ⵉⵎⴹⴰⴽⴰⵕ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵙⵔⵜⵉⵜ ⵏ ⴱⵕⵕⴰ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵙⵡⵉⵙⵔⴰ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 23 ⴽⵟⵓⴱⵕ 2024 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵙⵔⵜⵉⵜ ⵏ ⴱⵕⵕⴰ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵙⵡⵉⵙⵔⴰ ⵎⴰⵙⵙ Laurent Wehrli ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ. 

ⵜⵃⴰⴹⵕ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙⴰ ⵅⴰⴷⵉⵊⴰ ⵓⵍⴱⴰⵛⴰ ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵙⵡⵉⵙⵔⴰ ⴷ ⵎⴰⵙⵙ Valentin Zellweger ⴰⵎⵙⵇⵇⴰⴷ ⵏ ⵙⵡⵉⵙⵔⴰ ⴳ ⵕⵕⴱⴰⵟ, ⵢⵉⵍⵉ ⵓⵎⴹⴰⴽⴰⵕ ⴼ ⵜⵎⵙⴰⵔⵉⵏ ⵜⵉⵏⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ ⵛⵛⴰⵔⵏⵉⵏ. 

ⵙ ⵜⵎⵍⴷⴰ ⴰⴷ, ⵉⵖⵔⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⴷⵓⵙ ⵏ ⵓⵎⵢⴰⵡⴰⴹ ⴰⵙⵓⴰⵏ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵓⵎⵙⴰⵡⴰⵍ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⵊⴰⵔ ⵜⵉⵎⵙⴰⵔⵉⵏ ⴳⴰⵏⵉⵏ ⴳ ⵉⵅⵎⵎⵉⵎⵏ ⵏ ⵜⵎⵔⵙⴰⵍ ⴳ ⵙⵏⴰⵜ ⵜⵎⵉⵣⴰⵔ, ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⵊⴰⵔ ⵏⵏⵙⵏⵜ. 

ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵉⵎⵓⴽⵏⵏ ⵏ ⵜⴳⵍⴷⵉⵜ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴷ ⵜⵣⵣⵉⴳⵣⵜ ⵉⵍⵍⴰⵏ ⴳ ⵉⴳⵔⴰⵏ ⵏ ⵓⵙⵙⵍⵎⴷ ⴷ ⵜⴷⵓⵙⵉ ⴷ ⵜⵡⵉⵣⵉ ⴷ ⵓⴼⵔⴰⴳ ⴰⵏⴰⵎⵓⵏ ⴷ ⵓⵣⵡⴰⴳ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵡⴰⵎⴰⵏ. 

ⴳ ⵓⵎⵏⵉⴷ ⵏⵏⵙ, ⵉⵙⵓⵜⴳ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵙⵔⵜⵉⵜ ⵏ ⴱⵕⵕⴰ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵙⵡⵉⵙⵔⴰ ⴰⵙⵡⵉⵔ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵊⴰⵔ ⵙⵡⵉⵙⵔⴰ ⴷ ⵍⵎⵖⵔⵉⴱ, ⵖⵎⴽ ⴰⵏⵏ ⴷ ⵜⵉⵔⴰⵜ ⵉⴷⵓⵙⵏ ⵏ ⵓⴱⵕⵍⴰⵎⴰⵏ ⴰⵙⵡⵉⵙⵔⵉ ⴳ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵜⵓⴷⴷⴽⴽⵯⵍⴰ ⴰⴽⴷ ⵍⵎⵖⵔⵉⴱ. 

ⵉⵙⵏⵓⴱⴳ ⵢⴰⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴳ ⵡⴰⵢⵢⵓⵔ ⵏ ⵎⴰⵢ ⵉⵣⵔⵉⵏ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⴳ ⵙⵡⵉⵙⵔⴰ ⵎⴰⵙⵙ Eric Nussbaumer ⵍⵍⵉ ⵉⵙⴽⵔⵏ ⴰⵔⵣⴰⴼ ⵏ ⵜⵡⵓⵔⵉ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⵏⵜⵜⴰⵏ ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵉⵙⵜⴰⵡⵀⵎⵎⴰⵏ.