ⴷⵉⴱⵍⴰⵏ: ⵉⴷⵔⵓ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ ⴳ ⵜⵙⵓⵜⵍⵜ ⵏ ⵓⵎⵡⴰⵏ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵎⴰⴷⴷⴰⵙⵜ ⵏ ⵜⵏⴼⵔⵓⵜ ⴷ ⵓⵎⵢⴰⵡⴰⵙ ⴳ ⵓⵕⵓⴱⴱⴰ
ⵜⴷⵔⵓ ⵜⴰⵢⵢⴰⵡⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⵏ ⵓⵎⵡⴰⵏ ⵜⵉⵙ 22 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵎⴰⴷⴷⴰⵙⵜ ⵏ ⵜⵏⴼⵔⵓⵜ ⴷ ⵓⵎⵢⴰⵡⴰⵙ ⴳ ⵓⵕⵓⴱⴱⴰ ⴳ ⴷⵉⴱⵍⴰⵏ (ⵉⵕⵍⴰⵏⴷⴰ) ⵙⴳ 2 ⴰⵔ 4 ⴽⵟⵓⴱⵕ 2024.
ⵜⵓⵎⴰ ⵜⴰⵢⵢⴰⵡⵜ ⴰⴷ ⵉⴳⴰⵏ ⵜⴰⵎⴷⵔⴰⵡⵜ ⵏ ⵓⵎⵢⴰⵡⴰⵙ ⴳ ⵜⵎⴰⴷⴷⴰⵙⵜ, ⵎⴰⵙⵙ ⵎⴰⵕⵡⴰⵏ ⵛⴱⴰⵄⵜⵓ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⵎⴰⵙⵙ ⵅⴰⵍⵉⴷ ⵃⴰⵜⵉⵎⵉ ⵙⴳ ⵜⵥⵖⵓⵕⵜ ⴷ ⵜⵎⴰⵜⵔⴰⵔⵜ, ⵎⴰⵙⵙ ⴰⵃⵎⴰⴷ ⵍⵄⴰⵍⵉⵎ ⵙⴳ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ.
ⵜⵥⵍⵉ ⵜⵖⵉⵎⵉⵜ ⵏ ⵓⵏⵏⵓⵕⵣⵎ ⵏ ⵜⵙⵓⵜⵍⵜ ⵉ ⵉⵏⴰⵡⵏ ⵏ ⵉⵎⴰⵙⴰⵢⵏ ⵏ ⵜⵎⴰⴷⴷⴰⵙⵜ, ⴷ ⵓ ⵓⴳⵔⴰⵡ ⴰⴱⵕⵍⴰⵎⴰⵏⵉ ⴼ: “50 ⵏ ⵓⵙⴳⴳⵯⴰⵙ ⴷⴼⴼⵉⵔ ⵀⵉⵍⵙⵉⵏⴽⵉ: ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⴳ ⵓⵙⴷⵓⵙ ⵏ ⵡⴰⵏⴰⵡ ⴰⵎⴰⵜⴰⵢ ⵏ ⵓⴼⵔⴰ ⴷ ⵜⵏⴼⵔⵓⵜ ⵏ ⵜⵎⴰⴷⴷⴰⵙⵜ ⵏ ⵜⵏⴼⵔⵓⵜ ⴷ ⵓⵎⵢⴰⵡⴰⵙ ⴳ ⵓⵕⵓⴱⴱⴰ”.
ⵉⴳⴰ ⵓⴳⵔⴰⵡ ⴰⴷ ⵜⴰⵎⵍⴷⴰ ⴼ ⵙⴰⵡⵍⵏ ⵉⴱⵕⵍⴰⵎⴰⵏⵉⵢⵏ ⴷ ⵉⵎⵓⵣⴰⵢⵏ ⴷ ⵉⴳⵯⵏⵙⴰⵙⵏ ⵉⴷⵓⴱⵍⵓⵎⴰⵙⵉⵢⵏ ⴷ ⵉⴽⴰⴷⵉⵎⵉⵢⵏ ⴼ ⵉⵎⵕⵚⵉⵡⵏ ⵣⴷⵉⵏⵉⵏ ⴷ ⵓⵙⵡⵓⴷⴷⵓ ⵏ ⵉⵎⵏⵣⴰⵖⵏ ⴷ ⵉⵎⴰⵙⵙⵏ ⵏ ⵓⴼⵓⴽⴽⵓ ⵏⵏⵙⵏ, ⴰⵎ ⵜⴰⵎⴰⵣⵣⴰⵍⵜ ⴷ ⵓⵎⴹⴰⴽⴰⵕ ⴷ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⴳ ⵓⵙⵎⴽⵍ ⵏ ⵜⴰⵙⵙⴰⵙⵜ ⵏ ⵓⵙⵏⴼⵍ ⵏ ⵓⵏⵣⵡⵉ ⴷ ⵓⵙⴷⵓⵙ ⵏ ⵓⵙⵡⵓⴷⴷⵓ ⵏ ⵓⵣⵡⴰⴳ ⴳ ⵜⵙⴳⴰ ⵏ ⵜⵎⴰⴷⴷⴰⵙⵜ ⵉⵜⵜⵓⴱⴷⴰⵔⵏ.
ⵜⵙⵏⵎⴰⵍⴰ ⵜⵎⵙⵎⵓⵏⵜ ⵉⵜⵜⵓⴱⴷⴰⵔⵏ ⴳ ⵜⵙⵓⵜⵍⵜ ⴰⵏⵎⵓⵇⵇⴰⵔ ⴰⵏⴰⵎⵎⴰⵙ ⵏ ⵜⵎⵙⵎⵓⵏⵜ ⴼ ⵓⵙⵓⵔⵙ ⵉⵍⵍⴰⵏ ⴳ ⵜⵙⴳⴰ ⵏ ⵍⵇⴱⵍⵜ ⵜⴰⵏⴰⵎⵎⴰⵙⵜ.
ⵉⵙⴰⵡⵍ ⴳ ⵓⵏⵎⵓⵇⵇⴰⵔ ⵎⴰⵙⵙ ⵎⴰⵕⵡⴰⵏ ⵛⴱⴰⵄⵜⵓ ⵙ ⵉⵙⵎ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ, ⴼ ⵓⵖⵉⵍⵓⴼ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵎⵏⵉⴷ ⵏ ⵜⴰⵙⵙⴰⵙⵜ ⵉⵍⵍⴰⵏ ⴳ ⵉⵡⵜⵜⴰ ⵊⴰⵔ ⵍⵓⴱⵏⴰⵏ ⴷ ⵉⵚⵕⴰⵉⵍ ⴷ ⵉⴷⵔⵉⵣⵏ ⴼ ⵜⵏⴼⵔⵓⵜ ⴷ ⵓⵔⴳⴳⵉⴳ ⴼ ⵎⴰⵕⵕⴰ ⵜⴰⵙⴳⴰ.
ⵉⵖⵔⴰ ⵉ ⵓⵙⴱⴷⴷⵉ ⴰⵎⴰⵜⴰⵢ ⵏ ⵓⵇⵔⵢⴰⵏ ⴷ ⵓⵙⵎⴰⴷ ⵏ ⵜⵎⴰⵖⵜ ⴰⴷ ⵙ ⵜⵡⵓⵔⵉ ⵜⴰⴷⵉⴱⵍⵓⵎⴰⵙⵉⵜ ⴷ ⵜⵙⵔⵜⴰⵏⵜ ⵉ ⵓⵙⴱⴷⴷⵉ ⵏ ⴰⵔⴰⵔⴳⴳⵉⴳ ⴷ ⵉⵎⴰⵖⵏ. ⵉⵙⴰⵡⵍ ⴼ ⵜⵓⴳⴳⴰⵙ ⵏ ⵍⵎⵖⵔⵉⴱ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵉ ⵚⴰⵃⴰ ⵏ ⵜⵎⵙⴰⵔⵜ ⵏ ⴼⴰⵍⵉⵙⵟⵉⵏ ⴷ ⵜⵙⵔⵜⵉⵜ ⵏ ⵍⵎⵖⵔⵉⴱ ⵜⴰⵎⵣⵡⴰⵔⵓⵜ ⴳ ⵢⵉⴳⵔ ⵏ ⵓⵣⵡⴰⴳ.
ⴳ ⵜⵙⵓⵜⵍⵜ ⴰⴷ, ⵉⵍⵍⴰ ⵓⵙⵓⵜⴳ ⵏ ⵜⴷⵔⴰⵡⵜ ⵉⵕⵡⴰⵏ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ. ⵜⴳⴰ ⵜⵙⵓⵜⵍⵜ ⴰⴷ ⵜⴰⵎⵍⴷⴰ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ ⵉ ⵓⵙⴽⵔ ⵏ ⵉⵏⵎⵓⵇⵇⴰⵔⵏ ⴰⴽⴷ ⵉⴽⴰⴱⴰⵕⵏ ⵢⴰⴹⵏⵉⵏ, ⴷ ⵓⵏⵎⵓⵇⵇⴰⵔ ⴰⴽⴷ ⴱⴰⵙⴽⴰⵍ ⴰⵍⵉⵣⴰⴷ, ⴰⴳⵯⵏⵙⴰⵙ ⵉⵥⵍⵉⵏ ⵙ ⵜⵖⴰⵡⵙⵉⵡⵉⵏ ⵜⵉⵏⴰⵎⵎⴰⵙⵉⵏ ⴳ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵎⴰⴷⴷⴰⵙⵜ ⵏ ⵜⵏⴼⵔⵓⵜ ⴷ ⵓⵎⵢⴰⵡⴰⵙ ⴳ ⵓⵕⵓⴱⴱⴰ.