ⴱⵉⴽⵉⵏ: ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵏⵎⵓⵇⵇⴰⵔ ⴰⵏⵎⵏⴰⴹ ⴼ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ

ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵏⵎⵓⵇⵇⴰⵔ ⴰⵏⵎⵏⴰⴹ ⴼ ⵓⵙⴽⵔ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ, ⵉⵜⵜⵓⵙⵏⵎⴰⵍⴰⵏ ⵙ ⵜⵖⴰⵔⴰⵙⵜ ⵉⵛⵛⴰⵔⵏ ⵊⴰⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵎⵓⵔⴰ ⵏ ⵚⵚⵉⵏ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⴳ 19 ⴰⵔ 23 ⵖⵓⵛⵜ 2024 ⴳ ⴱⵉⴽⵉⵏ. ⵢⵓⵎⴰ ⵓⴽⴰⴱⴰⵕ  ⵎⴰⵙⵙ ⴰⵎⴰⵔⵉ ⵍⴰⵃⵙⵏ ⵍⵄⴰⵎⵓⴷ, ⵙⴳ ⵜⵔⴰⴱⴱⵓⵜ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ ⴰⵏⵙⵙⵉⵅⴼ ⵏ ⵓⴽⴰⴱⴰⵕ, ⵎⴰⵙⵙ ⵄⴰⴱⴷ ⵍⵇⴰⴷⵔ ⵟⵟⴰⵀⵉⵕ, ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ-ⵜⵓⵣⵍⵜ ⵏ ⵍⵉⵜⵜⵉⵃⴰⴷ. 

ⴰⵎⵓⵙⵙⵓ ⴰⴷ ⵉⵎⵙⴰⵙⴰ ⴷ ⵓⴽⵜⵓⵢ ⵡⵉⵙ 40 ⵏ ⵜⵉⵍⵉⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵎⵓⵔⴰ ⵏ ⵓⵎⴰⴷⴰⵏ ⵏ ⵚⵚⵉⵏ ⴳ ⵜⴰⵎⴰⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⴷⵔⵓⵏ ⴳⵉⵙ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵏ ⵉⵡⴰⵏⴽⵏ ⴰⵄⵕⴰⴱⵏ ⴷ ⵉⴼⵔⵉⵇⵉⵢⵏ, ⵉⵙⴷⴷⵉⴷ ⵎⴰⵙⵙ Zhao Leji ⴰⵏⵙⵙⵉⵅⴼ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵜⴰⵛⵉⵏⵡⵉⵜ ⴳ ⵜⴳⵓⵔⵉ ⵏⵏⵙ ⵎⴰⵙ ⴷ ⵜⴷⵔⴰⵡⵜ ⵉⵕⵡⴰⵏ ⵏ ⴽⵉⴳⴰⵏ ⵏ ⵉⵡⴰⵏⴽⵏ ⴳ ⵓⵎⵓⵙⵙⵓ ⴰⴷ ⴰⴳⵔⴰⵖⵍⴰⵏ, ⴰⵔ ⵉⵎⵎⴰⵍ ⵉⵡⵉⵣ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ “ⵉⴼⴼⵓⵙ ⴰⵎⵇⵔⴰⵏ” ⵙ ⵓⵙⴷⵓⵙ ⵏ ⵓⵎⵢⴰⵡⴰⴹ ⴰⵙⵔⵜⴰⵏ ⴷ ⵓⴱⵕⵍⴰⵎⴰⵏⵉ ⴰⴳⵜⵉⵔⴰⵏ, ⴷ ⵎⴰⵙ ⵜⵓⵊⴰⴷ ⵚⵚⵉⵏ ⴰⴷ ⵜⴷⵔⵓ ⵜⵉⵔⵎⵉⵜ ⵏⵏⵙ ⵜⵓⵏⴳⵉⵎⵜ ⵏ ⵓⵎⵓⵔⵙ.  

ⴳ ⵜⵙⴰⵡⵓⵔⵜ ⵜⴰⵎⵣⵡⴰⵔⵓⵜ ⵏ ⵓⴳⵔⴰⵡ ⴰⴷ, ⵉⵍⵍⴰⵏ ⵅⴼ ⵜⵏⴼⵔⵓⵜ ⴷ ⵓⵔⴳⴳⵉⴳ ⵉ ⵓⵙⴽⵔ ⵏ ⵜⴳⵎⵉ ⴷ ⵓⴱⵓⵖⵍⵓ ⵏ ⵉⵎⴰⴷⴰⵏⵏ, ⵉⵙⴰⵡⵍ ⵎⴰⵙⵙ ⵍⴰⵃⵙⵏ ⵍⵄⴰⵎⵓⴷ ⵎⴰⵙ ⵜⵣⴷⵉ ⵜⴳⵎⵉ ⴷ ⵓⵔⴳⴳⵉ ⴰⵙⵔⵜⴰⵏ ⴷ ⵜⵉⵍⵉⵜ ⵏ ⵜⵏⴼⵔⵓⵜ ⴳ ⵓⵡⴰⵏⴽ ⴷ ⵡⴰⵎⵓⵏⵏ, ⵢⵉⵏⵉ ⵎⴰⵙ ⵜⵣⴷⵉ ⴰⵔⵜⵏⴼⵔⵓⵜ ⴷ ⵉⵎⴰⵖⵏ, ⵉⴳ ⵓⵔⴳⴳⵉⴳ ⵜⴰⵔⵙⵍⵜ ⵜⴰⵙⵉⵍⴰⵏⵜ ⵉ ⵜⴳⵎⵉ ⴷ ⵓⴱⵓⵖⵍⵓ  ⴷ ⵥⵥⵀⵕⵜ. ⵉⵙⴷⴷⵉⴷ ⵓⵍⴰ ⵎⴰⵙ ⴷ ⵜⴰⵏⴼⵔⵓⵜ ⴷ ⵓⵔⴳⵉⴳ ⵎⵓⵏⵏ, ⵓⵔ ⵜⵍⵍⵉ ⵜⴳⵎⵉ ⵜⴰⵔ ⵜⴰⵏⴼⵔⵓⵜ, ⴷ ⵓⵔ ⵜⵍⵍⵉ ⵜⵏⴼⵔⵓⵜ ⵜⴰⵔ ⵜⵉⴳⵎⵉ ⵉ ⵉⵎⴰⴷⴰⵏⵏ. 

ⵢⵉⵏⵉ ⵎⴰⵙⵙ ⵍⵄⴰⵎⵓⴷ ⵎⴰⵙ ⵥⴹⴰⵕⵏ ⵉⴱⵕⵍⴰⵎⴰⵏⵉⵢⵏ ⴰⴷ ⵙⴽⵔⵏ ⵜⵉⵍⴰⵍ ⵙⵜⴰⵡⵀⵎⵎⴰⵏⵉⵏ ⵉ ⵓⵙⴽⵔ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ, ⵢⵉⵏⵉ ⵎⴰⵙ ⴳⴰⵏ ⵉⴱⵕⵍⴰⵎⴰⵏⵉⵢⵏ ⵉⵙⵔⵜⴰⵏⵏ ⵍⵍⵉ ⵙⴽⴰⵔⵏⵉⵏ ⵜⴰⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵙ ⵓⵙⵎⵔⵙ ⵏ ⵉⵎⴰⵙⵙⵏ ⵏ ⵓⴼⵔⴰ ⵉ ⵓⴼⵓⴽⴽⵓ ⵏ ⵉⵎⴰⵖⵏ, ⵙ ⵓⵕⵥⵥⵓⵎ ⵏ ⵓⵎⵙⴰⵡⴰⵍ ⴷ ⵜⵎⴰⵣⵣⴰⵍⵜ. ⵢⵉⵏⵉ ⵎⴰⵙⵙ ⴰⵎⴰⵔⵉ ⵎⴰⵙ ⵜⵙⴽⴰⵔ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵙ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ, ⴰⵎⵢⴰⵡⴰⵙ ⴷ ⵜⵎⵢⵉⵎⴰⵏⵜ ⵙ ⵜⵙⵏⵜⴰⵢⵉⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵎⵢⴰⴷⴰⵙ. 

ⴳ ⵓⵎⵏⵉⴷ ⵏⵏⵙ, ⵉⵙⵎⵏⵉⴷ ⵎⴰⵙⵙ ⵄⴰⴱⴷ ⵍⵇⴰⴷⵔ ⵟⵟⴰⵀⵉⵔ ⵜⴰⴽⵛⵛⵓⵎⵜ ⴳ ⵜⵙⴰⵡⵓⵔⵜ ⵜⵉⵙ ⴽⵕⴰⴹⵜ ⴼ: “ⵓⵡⵇⵇⵔ ⵏ ⵜⵎⵏⵏⴰⵡⵜ ⴷ ⵜⵎⵣⵔⴰⵢⵜ ⵜⴰⵖⵔⵎⴰⵏⵜ ⴷ ⵓⵙⴷⵓⵙ ⵏ ⵓⵙⵏⴼⵍ ⴰⴷⵍⵙⴰⵏ ⵉ ⵓⵙⵙⵍⵎⴷ ⵉⵛⵛⴰⵔⵏ”, ⵢⵉⵏⵉ ⵎⴰⵙ ⵉⵙⵖⴰⵡⵙⴰ ⵓⵎⴰⴹⴰⵍ ⵉ ⵓⵎⵢⴰⵡⴰⴹ ⵊⴰⵔ ⵉⵎⴰⴷⴰⵏⵏ ⵙⵍⴰⵡⴰⵏ ⴰⴽⴽⵯ ⵙ ⵜⵣⵣⵉⴳⵣⵜ ⵜⴰⵜⵉⵇⵏⵉⵜ ⵉⴳⴳⵓⵜⵏ, ⵉⵇⵇⴰⵏ ⴷ ⵓⵍⴰ ⵓⵡⵇⵇⵔ ⵏ ⵜⵎⵏⵏⴰⵡⵜ ⵏ ⵜⵖⵔⵎⴰⵡⵉⵏ ⵍⵍⵉ ⵉⴳⴰⵏ ⵜⴰⵔⵙⵍⵜ ⵜⴰⵙⵉⵍⴰⵏⵜ ⵉ ⵓⵙⴽⵔ ⵏ ⵜⵎⵢⵉⴷⵉⵔⵜ ⵏ ⵓⴼⵔⴰ ⴷ ⵓⵙⵎⵖⵔ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ. ⵢⵉⵏⵉ ⵓⵍⴰ ⵎⴰⵙ ⵜⴳⴰ ⵜⵎⵏⵏⴰⵡⵜ ⵜⴰⴷⵍⵙⴰⵏⵜ ⵉ ⵉⵎⴰⴷⴰⵏⵏ ⵏ ⵓⵎⴰⴹⴰⵍ ⴰⵖⴱⴰⵍⵓ ⵏ ⵥⵥⵀⵕⵜ ⵍⵍⵉ ⵉⵙⴽⴰⵔⵏ ⴰⵙⵏⴼⵍⵓⵍ ⴷ ⵓⵔⵎⴰⵙ ⵉⵜⵜⵓⵙⵏⴼⴰⵍⵏ ⵊⴰⵔ ⵉⵎⴰⴷⴰⵏⵏ ⵏ ⵓⵎⴰⴹⴰⵍ. 

ⵉⵙⴷⴷⵉⴷ ⵎⴰⵙⵙ ⵟⵟⴰⵀⵉⵕ ⵎⴰⵙ ⵉⵎⵎⴰⵍ “ⵓⵡⵇⵇⵔ ⵏ ⵓⵎⵣⵔⴰⵢ ⵏ ⵜⵖⵔⵎⵉⵡⵉⵏ ⴰⵙⵓⵜⴳ ⵏⵏⵖ ⵉ ⵡⴰⵜⵉⴳⵏ ⵉⵏⴼⴳⴰⵏⵏ ⵛⵛⴰⵔⵏⵉⵏ, ⴽⵓ ⵜⴰⵖⵔⵎⴰ ⴰⵔ ⵜⵜⴰⵡⵙ ⴳ ⵓⵥⵟⵟⴰⴰⵏⴼⴳⴰⵏ ⴰⵎⴰⴹⵍⴰⵏ, ⵜⴰⵙⵉ ⴰⵎⵣⵔⵓⵢ ⴷ ⵜⵎⵢⵓⵔⵉⵏ ⴷ ⵜⵥⵓⵕⵉ ⴷ ⵡⴰⵜⵉⴳⵏ. ⵜⴰⵎⵏⵏⴰⵡⵜ ⴰⴷ ⴰⴷ ⵉⵙⴽⴰⵔⵏ ⴳ ⵓⵎⴰⴹⴰⵍ ⴰⴷⵖⴰⵔ ⵉⴱⵓⵖⵎⴰⵏ ⵙ ⵜⵉⵔⵉⵜⵉⵏ ⴷ ⵜⵓⵙⵙⵏⵉⵡⵉⵏ, ⵉⵙⴽⵔ ⵜⵉⵔⵙⴰⵍ ⵏ ⵓⵎⵙⴰⵡⴰⵍ ⵍⵍⵉ ⵉⵙⴽⴰⵔⵏ ⴰⵏⵢⴰⵍⴽⴰⵎ ⵊⴰⵔ ⵜⵎⵜⵜⵉⵡⵉⵏ ⵓⵔ ⴷ ⵜⵉⴱⴱⴰⵢⴹⵕⵉⵏ”.