ⵍⵓⵕⴷⵓⵏ: ⵜⴰⴷⵔⴰⵡⵜ ⵉⵥⵉⵍⵏ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵓⵎⵙⴰⵡⴰⵍ ⵏ ⵉⴱⵕⵍⴰⵎⴰⵏⵏ ⴰⵄⵕⴰⴱⵏ ⴼ ⵓⵣⵣⵔⴰⵢ ⴰⵏⵎⵏⴰⴹ ⵏ ⵓⵙⵉⵡⴹ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⴱⵉⵊⵉⵏ
ⵉⵍⵍⴰ ⴳ ⵄⴰⵎⵎⴰⵏ, ⵜⴰⵎⴰⵥⵓⵏⵜ ⵏ ⵜⴳⵍⴷⵉⵜ ⵜⴰⵀⴰⵛⵉⵎⵉⵜ ⵏ ⵍⵓⵕⴷⵓⵏ, ⵓⵙⵙⴰⵏ ⵏ 29 ⴷ 30 ⵎⴰⵢ 2024, ⵓⵎⵙⴰⵡⴰⵍ ⵏ ⵉⴱⵕⵍⴰⵎⴰⵏⵏ ⴰⵄⵕⴰⴱⵏ ⴼ ⵓⵣⵣⵔⴰⵢ ⴰⵏⵎⵏⴰⴹ ⵏ ⵓⵙⵉⵡⴹ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⴱⵉⵊⵉⵏ ⴷⴼⴼⵉⵔ ⵏ 30 ⵏ ⵓⵙⴳⴳⵯⴰⵙ, ⵙ ⵜⴷⵔⴰⵡⵜ ⴷ ⵜⵙⵇⵇⵉⵎⵜ ⵏ ⵜⵎⵜⵜⴰ ⵎⵓⵏⵏⵉⵏ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵏ ⵜⴰⴳⵓⵜ ⵏ ⴰⵙⵢⴰ (ⵉⵙⴽⵡⴰ), ⴷ ⵜⴳⵔⴰⵡⵜ ⵏ ⵜⵎⵜⵜⴰ ⵎⵓⵏⵏⵉⵏ ⵉ ⵜⵎⵖⴰⵔⵜ - ⴰⵙⵉⵔⴰ ⴰⵏⵎⵏⴰⴹ ⵏ ⵉⵡⴰⵏⴽⵏ ⴰⵄⵕⴰⴱⵏ ⴷ ⵜⴰⵎⵓⵏⵜ ⵏ ⵉⵡⴰⵏⴽⵏ ⴰⵄⵕⴰⴱⵏ, ⵉⵥⴽⵉ ⵉ ⵓⵎⵙⴰⵡⴰⵍ ⴰⴽⴷ ⵉⴳⵯⵏⵙⴰⵙⵏ ⵏ ⵉⴱⵕⵍⴰⵎⴰⵏⵏ ⴰⵄⵕⴰⴱⵏ ⵍⵍⵉ ⵎⵓ ⵔⴰⴷ ⵜⵜⵓⴼⴽⵉⵏ ⵉⵙⵉⵙⴼⵉⵡⵏ ⴼ ⵓⵣⵣⵔⴰⵢ ⴰⵏⵎⵏⴰⴹ ⵏ ⵓⵙⵉⵡⴹ ⴷ ⵓⵖⴰⵡⴰⵙ ⵏ ⴱⵉⵊⵉⵏ, ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵜⵎⵙⴽⴰⵔ ⵥⵉⵍⵏⵉⵏ ⴼ ⵜⵉⵍⴰⵍⵜ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵓⵙⵎⵖⵔ ⵏ ⵜⵎⵙⴰⵔⵉⵏ ⵏ ⵜⵎⵖⴰⵔⵜ ⴷ ⵓⵣⵣⵔⴰⵢ ⵏ ⵓⵣⵣⴳⵉⵔ ⵏ ⵓⵙⵉⵡⴹ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⴱⵉⵊⵉⵏ.
ⵉⵡⴰⵜⵜⵙ ⵓⵎⵙⴰⵡⴰⵍ ⴰⵙⵙⵏ ⵏ ⵉⵎⵓⴽⵏⵏ ⵉⵣⵣⵔⴰⴼⵏ ⵙⴳ 2019 ⴳ ⵢⵉⵙⴽⵉⵍ ⴷ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ ⴷ ⵓⵙⴷⵓⵙ ⵏ ⵓⵙⵏⴼⵍ ⴷ ⵉⴱⵔⴷⴰⵏ ⵣⴷⵉⵏⵉⵏ ⴷ ⵉⵎⵓⴽⵏⵏ ⴰⴷ ⵉⵣⵣⵔⴰⴼⵏ, ⴷ ⵓⵙⵙⵏ ⵏ ⵜⵏⴰⵥⴰⵕⵉⵏ ⵎⵏⵉⴷ ⵏ ⵉⵣⵣⵔⴰⴼⵏ ⵡⴰⵜⵜⵙⵏⵉⵏ ⴰⵙⴷⵓⵙ ⵏ ⵢⵉⵙⴽⵉⵍ ⴷ ⵓⵙⵔⵙ ⵏ ⵜⵎⵣⵡⵓⵔⴰ ⴷ ⵜⵙⵜⵔⴰⵜⵉⵊⵉⵢⵉⵏ ⵏ ⵜⵡⵓⵔⵓ ⵏ ⵉⵎⴰⵍ, ⵙ ⵓⵙⵙⵏ ⵏ ⵜⵉⵔⵎⵉⵜ ⵏ ⵜⴱⴰⵕⵍⴰⵎⴰⵏⵉⵢⵉⵏⴳ ⵉⵙⵇⵇⵉⵎⵏ ⵉⵣⵣⵔⴰⴼⵏ.
ⵢⵓⵎⴰ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ ⵎⴰⵙⵙⴰ ⵏⴰⵊⵡⴰ ⴽⵓⴽⴽⵓⵙ ⵙⴳ ⵜⵔⴰⴱⴱⵓⵜ ⵏ ⵜⵥⵖⵓⵕⵜ ⴷ ⵜⵎⴰⵜⵔⴰⵔⵜ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⴼ ⵢⵉⵙⴽⵉⵍ, ⵎⴰⵙⵙⴰ ⵜⴰⵎⵛⵛⵉⵡⵕⵜ ⴼⴰⵟⵉⵎⴰ ⵍⵉⴷⵔⵉⵙⵉ ⵙⴳ ⵜⵔⴰⴱⴱⵓⵜ ⵏ ⵜⴰⵎⵓⵏⵜ ⵜⴰⵎⵖⵔⵉⴱⵉⵜ ⵉ ⵜⵡⵓⵔⵉ, ⵎⴰⵙⵙⴰ ⵜⴰⵎⵛⵛⵉⵡⵕⵟ ⵍⵓⴱⵏⴰ ⵍⵄⴰⵍⴰⵡⵉ ⵙⴳ ⵜⴰⵎⵓⵏⵜ ⵜⴰⵏⴰⵎⵓⵔⵜ ⵉ ⵜⵡⵓⵔⵉ.
ⵔⴰⴷ ⵉⵍⵉⵏⵜ ⵜⵖⵉⵎⵉⵜⵉⵏ ⵏ ⵓⵎⵙⴰⵡⴰⵍ ⴼ ⵙⴰ ⵏ ⵉⵙⵏⵜⵍⵏ, ⴼ ⵉⵙⵏⴼⵍⵏ ⵉⵣⵣⵔⴰⴼⵏ ⵙⴽⴰⵔⵏⵉⵏ ⵉⵙⴽⵉⵍ, ⵜⵉⵣⵣⵉⴳⵣⵉⵏ ⵜⵉⵣⵣⵔⴰⴼⵉⵏ ⴳ ⵢⵉⴳⵔ ⵏ ⵓⵣⵔⴼ ⴳ ⵜⵡⵓⵔⵉ ⴷ ⵡⴰⵡⵏⴰⴹ ⵏⵏⵙ, ⵜⴰⴷⵔⴰⵡⵜ ⵏ ⵜⵎⵖⴰⵔⵜ ⴳ ⵜⵓⴷⵔⵜ ⵜⴰⵎⴰⵜⴰⵢⵜ ⴷ ⵓⵙⴽⵔ ⵏ ⵜⵖⵜⴰⵙⵜ, ⵉⵣⵣⵔⴰⴼⵏ ⵏ ⵓⴼⵔⴰⴳ ⵏ ⵜⵎⵖⴰⵔⵉⵏ ⴷ ⵜⴼⵔⵅⵉⵏ ⵍⵍⴰⵏⵉⵏ ⴳ ⵓⵙⵓⵔⵙ ⵉⵀⵔⵛⵏ, ⴰⴼⵔⴰⴳ ⵙⴳ ⵜⵉⴽⵕⴹⵉ, ⴰⴷⴷⴰⴷⵏ ⵉⵏⵉⵎⴰⵏⵏ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⵏ ⵓⵙⵙⵏ ⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵉⵣⵡⴰⵔⵏ ⴳ ⵓⵙⵡⵉⵔ ⴰⵄⵕⴰⴱ ⴷ ⵓⴼⵔⵉⵇⵉ ⴳ ⵓⴼⵔⴰⴳ ⵏ ⵜⵎⵖⴰⵔⵉⵏ ⴷ ⵢⵉⵙⴽⵉⵍ, ⵉⵙⵎⵏⵉⴷ ⵓⴽⴰⴱⴰⵕ ⵜⵉⵔⵎⵉⵜ ⵏ ⵜⴳⵍⴷⵉⵜ ⴳ ⵓⵙⵉⵥⴹⵕ ⵏ ⵜⵎⵖⴰⵔⵉⵄⵏ, ⵉⵙⴷⴷⵉⴷ ⴰⵍⵜⴰⵖ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵓⵙⵎⵖⵔ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⴳ ⵉⵙⵡⵉⵔⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⵙⴳ ⵓⴷⵓⵙⵜⵓⵔ ⵏ 2011.
ⵜⵙⵉⵙⴼⵉⵡ ⵎⴰⵙⵙⴰ ⵏⴰⵊⵡⴰ ⴽⵓⴽⴽⵓⵙ ⵎⴰⵙ ⵡⴰⵜⵜⵙⵏ ⵉⵎⵓⵏⵏ ⵉⵣⵣⵔⴰⴼⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙⴳ 2009, ⴰⵙⴷⵓⵙ ⵏ ⵢⵉⵙⴽⵉⵍ ⴷ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⴷ ⵜⴼⵔⵅⵉⵏ ⴳ ⵓⵙⴰⵜⵉ ⵏ ⵓⵍⵜⴰⵖ ⵏ ⵜⵎⵖⴰⵔⵉⵏ ⵉ ⵓⵙⴽⵔ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ, ⵙⵍⴰⵡⴰⵏ ⴰⴽⴽⵯ ⴰⵡⵜⵜⴰⵙ ⵡⵉⵙ ⵙⵎⵎⵓⵙ ⵉⵣⴷⵉⵏ ⴷ ⵢⵉⵙⴽⵉⵍ.
ⵜⵉⵏⵉ ⵓⵍⴰ ⵎⴰⵙ ⵉⵙⴳⴰⴷⴷⴰ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵊⴰⵔ ⵓⵔⴳⴰⵣ ⴷ ⵜⵎⵖⴰⵔⵜ ⵙ ⵢⵉⵙⴽⵉⵍ ⴳ ⵉⵣⵔⴼⴰⵏ ⴷ ⵜⵍⴻⵍⵍⵉ ⵜⴰⵖⵔⵎⴰⵏⵜ ⴷ ⵜⵙⵔⵜⴰⵏⵜ ⴷ ⵜⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴷ ⵜⴷⵍⵙⴰⵏⵜ ⴷ ⵜⴹⵡⵏⴹⴰⵏⵜ ⵎⴽ ⵍⵍⴰⵏⵜ ⴳ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵍⵍⵉ ⵉⵙⵖⵣⵏ ⵍⵎⵖⵔⵉⴱ. ⵜⵉⵏⵉ ⵎⴰⵙ ⵉⵙⴷⴷⵉⴷ ⵓⴷⵓⵙⵜⵓⵔ ⴼ ⴰⴷ ⵉⵍⵉⵏⵜ ⴳ ⵉⵙⵍⴳⵏⵏ ⵜⵓⵎⴰⵢⵉⵏ ⵏ ⵢⵉⵙⴽⵉⵍ ⵊⴰⵔ ⵜⵎⵖⴰⵔⵉⵏ ⴷ ⵉⴻⴳⴰⵣⵏ ⴳ ⵓⴽⵛⵎ ⵙ ⵜⵣⵣⵓⵍⵉⵏ ⵜⵉⴷⵙⵜⴰⵔⵉⵏ ⴷ ⵓⵙⵖⵓⴷⵓ ⵏ ⵜⴳⵯⵏⵙⴰⵙⵜ ⵏⵏⵙⵏⵜ, ⴷ ⵓⵙⵏⵎⴰⵍⴰ ⵏ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ ⵙ ⵢⵉⵙⴽⵉⵍ ⵊⴰⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ, ⴷ ⵓⵙⴽⵔ ⵏ ⵉⵙⵡⵓⴷⴷⵓⵜⵏ ⵍⵍⵉ ⵔⴰⴷ ⵢⴰⵡⵉ ⵉⵙⴽⵉⵍ ⴷ ⵓⵙⵉⵥⴹⵕ ⵏ ⵜⵎⵖⴰⵔⵜ.