ⴰⵙⵜⴰⵢ ⵏ ⵍⵎⵖⵔⵉⴱ ⴷ ⴰⴳⵎⴰⵎ ⴳ ⴽⵕⴰⴹⵜ ⵜⴳⵔⴰⵡⵉⵏ ⵏ ⵜⴰⵎⵓⵏⵜ ⵏ ⵉⵙⵇⵇⵉⵎⵏ ⵏ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⴰⴷⴷⴰⵙⵜ ⵏ ⵓⴳⵔⴰⵡ ⵓⵙⵍⵉⵎ

ⵉⵜⵜⵓⵙⵜⴰⵢ ⵍⵎⵖⵔⵉⴱ ⴳ ⴽⵕⴰⴹⵜ ⵜⴳⵔⴰⵡⵉⵏ ⵏ ⵉⵙⵇⵇⵉⵎⵏ ⵉⴳⵎⴰⵎⵏ ⴳ ⵜⵙⵓⵜⵍⵜ 18 ⵏ ⵓⴳⵔⴰⵡ ⵏ ⵜⴰⵎⵓⵏⵜ ⵙⴳ 2 ⴰⵔ 5 ⵎⴰⵕⵙ ⴳ ⴰⴱⵉⴷⵊⵓⵏ. ⴳ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⵏ ⵜⴰⵎⵓⵏⵜ, ⵜⴰⵙⵇⵇⵉⵎⵜ ⵜⴰⵙⵓⵍⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵖⴰⵔⵜ ⴷ ⵜⵡⵓⵊⴰ, ⴷ ⵜⵙⵇⵇⵉⵎⵜ ⵜⴰⵙⵓⵍⴰⵏⵜ ⵉⵥⵍⵉⵏ ⵙ ⵜⵖⴰⵡⵙⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵜⵣⵔⴼⴰⵏⵉⵏ ⴷ ⵓⵎⵙⴰⵡⴰⵍ ⵏ ⵜⵖⵔⵎⵉⵡⵉⵏ ⴷ ⵉⵙⴳⴷⵏ.

ⵉⵍⵍⴰ ⵓⵙⵜⴰⵢ ⴰⴷ ⴳ ⵜⵙⵎⵓⵏ ⵜⴰⵎⵛⴰⵡⴰⵕⵜ ⵏ ⵜⵔⴰⴱⴱⵓⵜ ⵜⴰⵄⵕⴰⴱⵜ ⴳ ⵜⴰⵎⵓⵏⵜ ⵏ ⵉⵙⵇⵇⵉⵎⵏ ⵏ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⴰⴷⴷⴰⵙⵜ ⵏ ⵓⴳⵔⴰⵡ ⵓⵙⵍⵉⵎ, ⴳ ⵜⵙⵓⵜⵍⵜ ⵜⵉⵙ 18 ⵉⵍⵍⴰⵏ ⴳ ⴰⴱⵉⴷⵊⵓⵏ ⴳ ⵉⴷⵔⵓ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ.

ⵢⵓⵎⴰ ⵓⴽⴰⴱⴰⵕ: ⵎⴰⵙⵙⴰ ⵏⴰⵊⵡⴰ ⴽⵓⴽⴽⵓⵙ, ⵙⴳ ⵜⵥⵖⵕⵜ ⴷ ⵜⵎⴰⵜⵔⴰⵔⵜ, ⵎⴰⵙⵙ ⵎⵓⵃⴰⵎⵎⴰⴷ ⵛⵛⴱⴱⴰⴽ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⵎⴰⵙⵙ ⵅⴰⵍⵉⴷ ⵛⵛⵏⵏⴰⵇ ⵙⴳ ⵜⵔⴰⴱⴱⵓⵜ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ, ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙ ⵅⴰⵍⵉⴷ ⵙⵙⵟⵟⵉ ⵙⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ.

ⵜⵙⴷⴷⵉⴷ ⵎⴰⵙⵙ ⴽⵓⴽⴽⵓⵙ ⴳ ⵜⵙⴳⵓⵔⵉ ⵏⵏⵙ ⵉ ⵎⴰⴱ ⵎⴰⵙ ⵉⴳⴰ ⵓⵙⵜⴰⵢ ⴰⴷ ⵏ ⵍⵎⵖⵔⵉⴱ ⴰⵙⵙⵏ ⵏ ⵓⵙⵖⵡⵏ ⵏ ⵜⴳⵍⴷⵉⵜ ⵉ ⵓⵙⴷⵓⵙ ⵏ ⵜⴰⵎⴰⵓⵏⵜ ⵉⴳⴰⵏ ⵜⴰⵎⴰⴷⴷⴰⵙⵜ ⵜⴰⵎⵏⵏⴰⵡⵜ ⵉⵕⵡⴰⵏ ⴳ ⵡⴰⵎⵓⵏ ⴰⴳⵔⴰⵖⵍⴰⵏ.

ⵜⵉⵏⵉ ⵎⴰⵙ ⵜⴳⴰ ⵜⵉⵍⵉⵜ ⴰⴷ ⵉⴷⵓⵙⵏ ⵏ ⵍⵎⵖⵔⵉⴱ ⵜⴰⴼⵍⵙⵜ ⴷ ⵓⴷⵖⴰⵔ ⵍⵍⵉ ⵟⵟⴰⴼ ⵜⴳⵍⴷⵉⵜ ⴳ ⵓⵎⴰⴹⴰⵍ ⴰⵄⵕⴰⴱ ⵓⵙⵍⵉⵎ ⴷ ⵓⵙⵡⵉⵔ ⴰⴳⵔⴰⵖⵍⴰⵏ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷⵡ ⵡⵉⵙ ⵚⴹⵉⵚ.

ⵢⵓⵎⴰ ⵓⵖⴰⵡⴰⵙ ⵏ ⵡⴰⵙ ⵡⵉⵙ ⵙⵉⵏ ⵏ ⵓⴳⵔⴰⵡ ⵍⵍⵉ ⵉⵍⵍⴰⵏ ⴷⴷⵓ ⵜⵎⴰⵜⴰⵔⵜ: “ⵉⵙⵏⴼⵍⵏ ⵏ ⵓⵏⵣⵡⵉ ⴳ ⵓⵎⴰⴹⴰⵍ, ⵎⴰⵏ ⵜⴰⵎⵔⴰⵔⵓⵜ ⵏ ⵉⵡⴰⵏⴽⵏ ⵉⴳⵎⴰⵎⵏ ?”, ⴰⵙⵏⵎⴰⵍⴰ ⵏ ⵜⵙⵎⵓⵏⵉ ⵜⵉⵙ ⵎⵔⴰⵡⵜ ⵏ ⵜⵙⵇⵇⵉⵎⵜ ⵜⵙⵓⵎⴰⵏⵜ ⵏ ⵜⵖⴰⵡⵙⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵜⵣⵔⴼⴰⵏⵉⵏ ⴷ ⵓⵎⵙⵡⴰⵍ ⵏ ⵜⵖⵔⵎⵉⵡⵉⵏ ⴷ ⵉⵙⴳⴷⵏ, ⴷ ⵜⵙⵎⵓⵏⵉ ⵜⴰⵙⵓⵎⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵖⴰⵔⵜ ⴷ ⵜⵡⵓⵊⴰ.

ⵔⴰⴷ ⵢⵉⵍⵉ ⵓⵙⵏⵎⴰⵍⴰ ⵏ ⵜⵙⵎⵓⵏⵉ ⵜⵉⵙ ⵎⵔⴰⵡⵜ ⵏ ⵜⵙⵇⵇⵉⵎⵜ ⵜⴰⵙⵓⵍⴰⵏⵜ ⵉⵥⵍⵉⵏ ⵙ ⵜⵖⴰⵡⵙⵉⵡⵉⵏ ⵜⵉⵙⵔⵜⴰⵏⵉⵏ ⴷ ⵜⵣⴷⴰⵢⵉⵏ ⵏ ⴱⵕⵕⴰ, ⴷ ⵜⵙⵎⵓⵏⵉ ⵜⴰⵎⵛⴰⵡⴰⵕⵜ ⵏ ⵜⵔⴰⴱⴱⵓⵜ ⵜⴰⴼⵔⵉⵇⵉⵜ ⴳ ⵜⵎⴰⴷⴷⴰⵙⵜ, ⴷ ⵜⵙⵎⵓⵏⵉ ⵏ ⵜⵔⴰⴱⴱⵓⵜ ⵏ ⴰⵙⵢⴰ.