ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⵏ ⴱⵕⴰⵢⵕ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ
ⵜⴷⵔⵓ ⵜⵎⴰⵔⵉⵜ ⵎⴰⵙⵙⴰ ⵃⴰⵢⴰⵜ ⵍⵄⵔⴰⵢⵛ ⴳ ⵜⵙⵓⵜⵍⵜ ⵏ ⴱⵕⴰⵢⵕ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⴰⵎⵙⵜ ⴳ ⴳⵡⴰⵜⵉⵎⴰⵍⴰ ⵓⵙⵙⴰⵏ ⵏ 22 ⴷ 23 ⴱⵕⴰⵢⵕ 2024.
ⴳ ⵓⵎⴰⵍⵓ ⵏ ⵜⵖⵉⵎⵉⵜ ⵜⴰⵎⴰⵜⴰⵢⵜ, ⵜⵎⴹⴰⴽⴰⵕ ⵜⵎⴰⵔⵉⵜ ⵉⴳⴰⵏ ⵜⴰⴳⵎⴰⵎⵜ ⵜⵉⵎⵥⵕⵉⵜ ⴳ ⵜⴰⵢⵢⴰⵡⵜ ⵜⴰⵏⴰⵎⵓⵔⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖⵔ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵎⴰⵙⵙⴰ Silvia García Polanco ⵜⴰⵏⵙⵙⵉⵅⴼⵜ ⵏ ⵜⵎⴰⴷⴷⴰⵙⵜ ⴷ ⵜⴰⴱⵕⵍⴰⵎⴰⵏⵉⵜ, ⵜⴰⴳⵯⵏⵙⴰⵙⵜ ⵏ ⵜⴳⴷⵓⴷⴰⵏⵜ ⵏ ⴷⴷⵓⵎⵉⵏⵉⴽⴰⵏ.
ⵜⵙⴷⴷⵉⴷ ⵎⴰⵙⵙⴰ ⵍⵄⵔⴰⵢⵛ, ⵜⴰⴳⵯⵏⵙⴰⵙⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵖⵔⵉⴱ, ⵎⴰⵙ ⵜⴳⴰ ⵜⵉⵍⵉⵜ ⴰⴷ ⴰⵙⵖⵡⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⵍⵍⵉ ⵉⴳⴰⵏ ⵜⵉⵔⵙⴰⵍ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵜⵓⵏⴱⵉⴹⵜ ⴷ ⵜⴱⴰⵕⵍⴰⵎⴰⵏⵉⵜ ⵉ ⵓⵎⵙⴰⵙⴰ ⴷ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵏⵚⵕ ⵕⴱⴱⵉ, ⵜⵙⴰⵡⵍ ⵓⵍⴰ ⴼ ⵜⴷⵉⵏⴰⵎⵉⵜ ⵉⵥⵉⵍⵏ ⵏ ⵜⵣⴷⴰⵢⵉⵏ ⵊⴰⵔ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⵜⵉⴳⴰⵔⵉⵡⵉⵏ ⴰⴷ.
ⵜⵙⴷⴷⵉⴷ ⵎⴰⵙⵙⴰ Silvia Garcia Polanco ⴼ ⵜⵉⵍⴰⵍⵜ ⵏ ⵍⵎⵖⵔⵉⴱ ⵉⴳⴰⵏ ⵉⵎⵉ ⵙ ⵉⴼⵔⵉⵇⵢⴰ, ⵜⵏⵏⵓⵔⵣ ⴰⴷ ⵢⵉⵍⵉ ⵚⴰⵃⴰ ⵙⴳ ⵜⵉⵔⵎⵉⵜ ⵜⵎⵖⵔⵉⴱⵉⵜ ⴳ ⵢⵉⴳⵔ ⵏ ⵓⵙⵡⵓⴷⴷⵓ ⵏ ⵓⵣⵡⴰⴳ ⴷ ⵓⵙⴷⵓⵙ ⵏ ⵓⵣⴷⴰⵢ ⴰⴱⵕⵍⴰⵎⴰⵏⵉ ⴰⴽⴷ ⵜⴳⵍⴷⵉⵜ ⵏ ⵍⵎⵖⵔⵉⴱ. ⵜⵏⵏⵓⵔⵣ ⴰⵙⴽⵔ ⵏ ⵓⵏⵎⵓⵇⵇⴰⵔ ⵏ ⵜⵎⵖⴰⵔⵉⵏ ⵊⴰⵔ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵍⵍⵉ ⵜⵙⵙⵉⵅⴼ ⵜⴰⵎⴰⴷⴷⴰⵙⵜ ⴰⴷ ⵜⴰⵙⴳⴰⵡⴰⵏⵜ.
ⴳ ⵜⵙⵓⵜⵍⵜ ⴰⴷ, ⵉⵍⵍⴰ ⵓⵙⵖⵣⵏ ⵏ ⵉⵙⵏⴼⴰⵔⵏ ⵏ ⵜⵖⵜⴰⵙⵉⵏ ⵍⵍⵉ ⵙⵓⵊⴰⴷⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⵍⵍⴰⵏⵉⵏ ⴳ ⵉⵙⵖⵉⵎⵏ ⵉⵏⴰⵎⵓⵔⵏ ⵏ ⵉⵡⴰⵏⴽⵏ ⵉⴳⵎⴰⵎⵏ ⵙⴳ ⵓⵣⴳⵏ ⵏ ⴱⵕⴰⵢⵕ, ⴼ ⵉⵙⵏⵜⵍⵏ ⴳ ⵉⵍⵍⴰ ⵓⵙⵡⵓⴷⴷⵓ ⵏ ⵓⵣⵡⴰⴳ ⴷ ⵜⵥⴹⴰⵕⵉⵏ ⵖⵓⵙⵏⵉⵏ ⴳ ⵓⵏⴳⵔⴰⵡ ⵏ ⵓⵙⵉⴷⴼ ⴰⵙⴳⴰⵡⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ.
ⵉⴽⵛⵎ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵙ ⵉⵙⵇⵇⵉⵎⵏ ⵏⵏⵙ ⵙ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⴰⴳⵎⴰⵎ ⵉⵎⵥⵕⵉ ⴳ 16 ⵢⵓⵏⵢⵓ 2015. ⴰⴱⵕⵍⴰⵎⴰⵏ ⵏ ⵓⵏⴳⵔⴰⵡ ⵏ ⵓⵙⵉⴷⴼ ⴰⵏⵎⵏⴰⴹ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴳⵉⵙ ⵚⴹⵉⵚ ⵉⵡⴰⵏⴽⵏ: ⴳⵡⴰⵜⵉⵎⴰⵍⴰ, ⵙⵙⴰⵍⴼⴰⴹⵓⵕ, ⵀⵉⵏⴷⵓⵕⴰⵚ, ⵏⵉⴽⴰⵔⴰⴳⵡⴰ, ⴱⴰⵏⴰⵎⴰ, ⴷⴷⵓⵎⵉⵏⵉⴽⴰ. ⴳⵉⵙ ⵓⵍⴰ ⵉⴳⵎⴰⵎⵏ ⵉⵎⵥⵕⴰⵢⵏ ⵙⴳ ⵉⴱⵕⵍⴰⵎⴰⵏⵏ ⵏ ⵍⵎⵉⴽⵙⵉⴽ ⴷ ⴱⵓⵔⵜⵓⵔⵉⴽⵓ ⴷ ⵚⵚⵉⵏ ⴷ ⴼⵉⵏⵣⵡⵉⵍⵍⴰ ⴷ ⵍⵎⵖⵔⵉⴱ ⴷ ⵔⵓⵙⵢⴰ.