ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⵖⵉⵎⵉⵜ ⵏ ⵓⵏⵏⵓⵕⵣⵎ ⵏ ⵓⴳⵔⴰⵡ ⴰⴱⵕⵍⴰⵎⴰⵏⵉ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ

ⵙ ⵉⵙⵎ ⵏ ⵕⴱⴱⵉ

ⵎⴰⵙⵙ ⵏⵏⵄⵎⴰ ⵎⵉⵢⵢⴰⵕⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵉⵙⵇⵇⵉⵎⵏ ⵉⵏⴰⵎⵓⵔⵏ, ⴽⵓ ⵢⴰⵏ ⵙ ⵉⵙⵎ ⵏⵏⵙ ⴷ ⵓⴼⵔⵉⵙ ⵏⵏⵙ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⴷ ⵉⴳⵎⴰⵎⵏ ⵏ ⵉⴽⴰⴱⴰⵕⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

 ⵎⵎⵔⵖ ⴰⴷ ⴷⴰⵖ ⴷⵉⴷⵓⵏ ⵎⵎⵉⵇⵇⵉⵔⵖ ⴷ ⵉⵏⴱⴳⵉⵡⵏ, ⵙⴱⵔⵔⴽⵖ ⴽⵯⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵖⵔⵉ ⵉⵥⵉⵍⵏ ⵏ ⵓⵏⴳⴳⵯⵓ ⵏⵏⵄⵎⴰ ⵎⵉⵢⵢⴰⵕⴰ ⵍⵍⵉ ⴷⴰⵖ ⵙⵏⵉⵎⵎⵉⵔⵖ ⴼ ⵓⵙⴷⵔⵓ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⴳⵔⴰⵡ ⴰⴷ ⴰⴱⵕⵍⴰⵎⴰⵏⵉ ⵉⵡⴰⵜⵜⵙⵏ ⵜⵉⵡⵉⵣⵉ ⵙ ⵉⵙⵡⵉⵏⴳⵉⵎⵏ ⴷ ⵜⵙⵓⵎⴰⵔ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⴳ ⵉⵎⵏⴰⴹⵏ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ ⵍⵍⴰⵏⵉⵏ.

ⵎⴽ ⵍⵍⵉ ⴰⴽⴽⵯ ⵏⵙⵙⵏ, ⵜⴳⴰ ⵜⵡⵉⵏⴳⵎⵜ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵜⴰⵇⴱⵓⵔⵜ, ⵣⵔⵉⵏⵜ ⴼⵍⵍⴰⵙ ⵓⴳⴳⴰⵔ ⵏ ⴽⵕⴰⴹ ⵡⴰⴳⵏⴰⵔⵏ ⵏ ⵓⵙⴳⴳⵯⴰⵙ ⵍⵍⵉⵖ ⵉⵍⵓⵍ ⵓⵎⵓⵙⵙⵓ ⵏ ⵡⴰⵔⵡⴰⵍⴰ ⴳ ⵓⵎⵏⴰⴹ ⵏ ⵜⵎⴰⵖⵜ ⵜⴰⵚⵎⵎⴰⴹⵜ, ⵜⴳ ⴰⵎⵓⵙⵙⵓ ⴰⵎⴰⴹⵍⴰⵏ ⵎⴳⴰⵍ ⵏ ⵓⵙⴷⵓⵔⵔⵓⵢ, ⵜⵉⵔⵉ ⴰⴷ ⵜⴰⵎⵥ ⵉⵥⵎⵓⵥⵥⴰⵍ ⴼ ⵉⵛⴰⵎⵓⵛⵏ ⵏ ⵓⵎⴰⴹⴰⵍ ⵉ ⵓⴳⴳⴰⵔ ⵏ 45 ⵏ ⵓⵙⴳⴳⵯⴰⵙ.

ⵏⵏⵓⵔⵣⵏ ⵉⵎⴰⴷⴰⵏⵏ ⴷ ⵉⵅⴰⵜⴰⵔⵏ ⵏ ⵓⵎⵓⵙⵙⵓ ⴳ ⵓⵣⵎⵣ ⵏ ⵓⵙⴽⵔ ⴳ ⵓⵙⵉⵥⴹⵕ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⵓⵙⵢⴰ ⴷ ⵓⴳⵣⵣⵓⵎ ⵙⴳ ⵓⵕⵓⴱⴱⴰ ⵏ ⵍⵇⴱⵍⵜ, ⵉ ⵜⴳⵎⵉ ⵉⵛⵛⴰⵔⵏ ⴷ ⵜⵖⵜⴰⵙⵜ ⵜⴰⵙⵔⵜⴰⵏⵜ ⵜⴷⵉⴱⵍⵓⵎⴰⵙⵉⵜ ⵜⴰⵙⵉⵎⴰⵏⵜ ⵏ ⵜⵎⵉⵣⴰⵔ ⵏⵏⵙ, ⵎⴰⵙⵙ ⴰⵙⴷⵍⵊ ⵏ ⵓⵎⵓⵙⵙⵓ ⴷ ⵜⵎⵢⴰⴳⴳⵓⴳⵜ ⵏⵏⵙ ⴼ ⵉⵎⴰⵏ ⴱ ⵓⵙⴽⵔ ⴷ ⵜⵎⵏⵜⵍⵉⵏ ⵛⴷⴷⴰⴷⵏⵉⵏ ⴷⴰⵜ ⵏ ⴽⵔⴰ ⵏ ⵜⵎⵉⵣⴰⵔ ⵏⵏⵙ ⴳ ⵓⵎⵏⴰⴹ ⵏ ⵓⵚⴽⵓ ⵏ ⵓⵡⴰⵏⴽ ⴰⵏⴰⵎⵓⵔ, ⵙⵙⵉⵎⵥⵉⵏ ⴰⴽⴽⵯ ⵜⵉⵏⴰⵥⴰⵕⵉⵏ ⵏⵏⵙ ⵥⵉⵍⵏⵉⵏ.

ⵓⵔ ⵏⵍⵍⵉ ⴷⴰⵜ ⵏ ⵓⵣⵣⵔⴰⵢ ⵏ ⵜⵡⵓⵔⵉ ⵏ ⵓⵎⵓⵙⵙⵓ ⵏ ⵡⴰⵔⵡⴰⵍⴰ, ⵏⵙⵙⵉⵜ ⴰⵙ ⴰⵎⵓⵔⵙ, ⴳ ⵓⵙⵎⴰⵇⵇⵍ ⵏⵏⵙ ⵏ ⵖⵉⵍⴰⴷ, ⵎⴰⵛ ⴷⴰ ⵏⵔⵣⵣⵓ ⵜⵉⴱⵔⵉⴷⵉⵏ ⵍⵍⵉ ⵔⴰⴷ ⵉⵙⵎⵖⵔ ⵜⵉⵎⵉⵣⴰⵔ ⵏⵏⵖ ⴳ ⵉⵙⵡⵉⵔⵏ ⴰⴷⵎⵙⴰⵏ ⴷ ⵓⵙⵔⵜⴰⵏ ⴷ ⵓⵏⴰⵎⵓⵏ, ⴰⵎⵥⵏⵜ ⴰⵙⵡⵉⵔ ⵓⴽⵍⴰⵍⵏⵜ ⴳ ⵓⵎⴰⴹⴰⵍ ⵏ ⵜⴰⵙⵓⵜ ⵜⵉⵙ 21, ⵉⵚⵉⵃⵉ ⴰⵙⵏⵜ ⵡⴰⵢⴷⴰ ⵏⵏⵙⵏⵜ ⴰⵅⴰⵜⴰⵔ ⴷ ⵓⵎⵏⵏⴰⵡ, ⵟⵟⴼⵏⵜ ⵉⴷⵔⵉⵣⵏ ⴳ ⵜⵖⵜⴰⵙⵉⵏ ⵜⵉⴳⵔⴰⵖⵍⴰⵏⵉⵏ, ⵙ ⵎⴰ ⴷ ⵉⵎⵎⴰⵍⴰ ⵓⵎⵣⵔⵓⵢ ⴷ ⵓⵙⵜⴰⵍ ⴷ ⵓⵏⵛⴽ ⵏ ⵉⵎⵣⴷⴰⵖⵏ ⵏⵏⵙⵏⵜ.

ⴳ ⵜⵎⵓⴽⵔⵉⵙⵉⵏ ⴷ ⵜⵎⵙⴰⵔⵉⵏ ⵍⵍⵉ ⴼ ⵔⴰⴷ ⵢⵉⵍⵉⵓⵎⴹⴰⴽⴰⵕ ⴳ ⵓⴳⵔⴰⵡ ⴰⴷ, ⵟⵟⴰⴼⵏⵜ ⵜⵎⵉⵣⴰⵔ ⵏⵏⵖ ⴽⵉⴳⴰⵏ ⵏ ⵜⵥⴹⴰⵕⵉⵏ ⵉ ⵓⵙⵎⵖⵔ ⴷ ⵡⴰⵍⴰⵢ. ⵏⵖ ⴰⴽⴽⵯ ⵙⵏⴼⵍⵏⵜ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵏ ⵓⵎⵣⵔⴰⵢ.

ⴳ ⵉⴳⵔⴰⵏ ⵏ ⵜⴷⵎⵙⴰ ⴷ ⵜⵥⴹⴰⵕⵜ ⴷ ⵉⵙⵓⴳⴰⵎ ⵉⵎⵣⵡⵓⵔⴰ, ⵟⵟⴰⴼ ⵜⵎⴰⵣⵉⵔⵜ ⵏⵏⵖ ⵜⵉⵥⴹⴰⵕⵉⵏ ⵅⴰⵜⵔⵏⵉⵏ:

* ⴷⴰⵔⵙ ⵉⵣⵓⵖⴰⵣ ⴷ ⵜⴱⵖⵓⵔⵉⵏ ⴳⴰⵏⵉⵏ ⴰⵙⵙ ⴰⴷ ⵜⴰⵙⴰⵔⵓⵜ ⵏ ⵜⵎⴳⵓⵔⵉ ⵜⴰⵜⵉⴽⵏⵓⵍⵓⵊⵉⵜ ⴷ ⵜⵎⵉⴽⴰⵏⵉⴽⵜ, ⴳ ⵉⵍⵍⴰ ⵍⴳⴰⵣ ⴷ ⵓⴼⵉⵜⵔⵓⵍ, ⴷ ⵜⵥⴹⴰⵕⵉⵏ ⵅⴰⵜⵔⵏⵉⵏ ⵏ ⵓⴼⴰⵔⵙ ⵏ ⵜⵥⴹⴰⵕⵜ ⵙⴳ ⵉⵙⵓⴳⴰⵎ ⵉⵎⴰⵢⵏⵓⵜⵏ;

*  ⵟⵟⴰⴼⵏⵜ ⵜⵎⵉⵣⴰⵔ ⵏⵏⵖ ⴽⵉⴳⴰⵏ ⵏ ⵉⴽⴰⵍⵉⵡⵏ ⵏ ⵜⴼⵍⵍⴰⵃⵜ ⴳ ⵓⵎⴰⴹⵍ ⴰⴽⴽⵯ, ⵉⵟⵟⴰⴼ ⵓⵎⵏⵥⴰⵡ ⵏⵏⵖ, ⵉⴼⵔⵉⵇⵢⴰ, ⵡⴰⵃⴷⵓⵜ 60 % ⵏ ⵉⴽⴰⵍⵉⵡⵏ ⵉⵏⴼⵍⴰⵃⵏ. ⵥⵕⴰⵜ ⵜⵉⵍⴰⵍⵜ ⵍⵍⵉ ⵙ ⵉⵥⴹⴰⵕ ⴰⴷ ⵜⵜ ⵉⵙⴽⵔ ⴳ ⵓⵎⴰⴹⴰⵍ ⴳ ⵉⵍⵍⴰ ⵓⵎⵃⵉⵣⵡⴰⵔ ⵉ ⵓⵜⵛⵓ;

* ⵢⵓⵛⴰ ⵕⴱⴱⵉ ⵉ ⵜⵎⵉⵣⴰⵔ ⵏⵏⵖ ⵉⴷⵖⴰⵔⵏ ⴳⴳⴰⵜⵏⵉⵏ, ⵍⵍⴰⵏⵜ ⵊⴰⵔ ⴽⵕⴰⴹ ⵉⴳⵔⵡⴰⵏ ⵎⵇⵇⵓⵔⵏⵉⵏ ⴳ ⵓⵎⴰⴹⴰⵍ, ⴷ ⴽⵕⴰⴹ ⵢⵉⵍⵏ ⵉⵅⴰⵜⴰⵔⵏ. ⴽⵓ ⵢⴰⵏ ⵉⵙⵙⴼⴰⵡ ⴰⵜⵉⴳ ⵏ ⵢⵉⵍⵏ ⴰⵙⵙ ⴰⴷ ⴷ ⵜⵙⴰⵍⵉⵡⵉⵏ ⴷ ⵉⴱⵔⴷⴰⵏ ⴰⵢⵍⴰⵏⵏ ⴳ ⵓⵙⵖⵏⵣⵉ ⴰⴳⵔⴰⵖⵍⴰⵏ, ⴷ ⵜⵉⵍⵉⵜ ⵏ ⵓⵜⵛⵓ ⴷ ⵜⵉⵍⴰⵍⵜ ⵏ ⵜⵎⴰⵍⵍⴰⵢⵜ ⴷ ⵓⵎⵢⴰⵡⴰⴹ. ⵙ ⵓⵎⴷⵢⴰⵥⵕⴰⵜ ⴰⵖ ⴰⵎⵏⵥⴰⵡ ⵏⵏⵖ ⵉⴼⵔⵉⵇⵢⴰ ⵉⵟⵟⴰⵡ ⵖⴰⵙ ⵡⴰⵃⴷⵓⵜ 13 ⵎⵢⵓⵏ ⴽⵍⵎ2 ⵏ ⵓⴷⵔⴰ ⴰⵢⵍⴰⵏ, ⴷ 6.5 ⵏ ⵉⴼⴹ ⵏ ⴽⵍⵎ2 ⵏ ⵜⵥⵓⴹⴰ ⵜⴰⵎⵏⵥⴰⵡⵜ ⴷ 26 ⵏ ⵉⴼⴹ ⵏ ⴽⵍⵎ 2 ⵏ ⵉⴼⵜⴰⵙⵏ. ⵜⵓⴳⵜ ⴳⵉⵜⵏ, ⵉⵏⴳⴳⵯⴰ ⴷ ⵜⵏⴳⴳⵯⴰ, ⵉⴼⵔⴽ ⵓⴳⴳⴰⵔ ⵉⵏⵡ, ⴰⵜⵉⴳ ⴰⵙⵜⵔⴰⵜⵉⵊⵉ ⵏ ⵢⵉⵍⵏ ⴷ ⵉⴱⵔⴷⴰⵏ ⴰⵢⵍⴰⵏⵏ ⴷ ⵉⴼⵜⴰⵙⵏ ⴳ ⵓⵙⵖⵏⵣⵉ ⴰⴳⵔⴰⵖⵍⴰⵏ ⴼ ⴽⴽⴰⵏ ⴰⵙⵙ ⴰⴷ ⵉⵙⵓⵔⵙⵏ ⵉⵊⵢⵓⵙⵔⵜⴰⵏⵏ ⴷ ⵡⵉⵏ ⵜⵏⴼⵔⵓⵜ ⴳ ⵓⵎⴰⴹⴰⵍ, ⵙⵍⵡⴰⵏ ⴰⴽⴽⵯ ⴳ ⵡⴰⴷⴷⴰⴷ ⵏ ⵍⵇⴱⵍⵜ ⵜⴰⵏⴰⵎⵎⴰⵙⵜ.

* ⵓⴳⴳⴰⵔ ⵏ ⵎⴰ ⴰⵏⵏ, ⵟⵟⴰⴼ ⵜⵎⴰⵣⵉⵔⵜ ⵏⵏⵖ, ⵜⵉⴱⵖⵓⵔⵉⵏ ⵜⵉⵏⴼⴳⴰⵏⵉⵏ ⵅⴰⵜⵔⵏⵉⵏ ⴰⵥⵓⵕ ⵏⵏⵙⵏⵜ ⵉⵄⵔⵔⵉⵎⵏ ⵏⵏⵓⵔⵣⵏⵉⵏ ⵉⵎⴰⵍ ⵉⵖⵓⴷⴰⵏ ⴷ ⵜⵓⴷⵔⵜ ⵉⵖⵓⴷⴰⵏ ⵎⴽ ⵉⵍⵍⴰⵏ ⴷⴰⵔ ⵉⵄⵔⵔⵉⵎⵏ ⵏ ⵜⵎⵉⵣⴰⵔ ⵏ ⵉⵣⵥⵍⵎⴹ.

ⵉⴳⴰ ⵙⴳ ⵜⵎⵣⵡⵓⵔⴰ ⵏ ⵜⵔⴰⴱⴱⵓⵜ ⵏⵏⵖ ⵜⴰⵏⵎⵏⴰⴹⵜ, ⴰⴱⵓⵖⵍⵓ ⵏ ⵜⴷⵍⵙⵉⵡⵉⵏ ⵏⵏⵖ ⴷ ⵜⵎⵏⵏⴰⵡⵜ ⵏⵏⵙⵏⵜ ⴷ ⵓⴷⵔⵓ ⴷ ⵓⵎⵣⵔⵓⵢ ⵏⵏⵙⵏⵜ. ⵓⵔ ⵉⴳ ⵍⵃⴰⵍ ⵖⴰⵙ ⴰⴼⵓⵙⵢⴼⵉⵙⴰ ⵢⵓⴳⵉⵏ ⵓⵔⵙⵉⵍ ⴷ ⵜⵖⵍⵍⴰⴱⵉⵜ, ⴳⵉⵏⵜ ⵜⵉⴷⴰ ⵙⵎⵓⵙⵙⵓⵏⵉⵏ ⴰⴼⵔⴰⴽ ⴰⵎⵣⵔⴰⵢ, ⵉⵙⵙⵔⵇⴱⵏ ⴰⵎⵛⴰⴱⴱⴰⴽ ⴳ ⵓⵥⵓⵕ ⵙ ⵎⴰ ⴷ ⵓⵔ ⵢⵓⴳⵉⵏ ⵡⴰⵢⵢⴰⴹ, ⴷ ⵓⵔ ⵉⴳ ⵓⵎⵣⵔⴰⵢ ⴷⵉⵙ ⵜⴰⴱⴱⴰⵢⴹⴰⵕⵜ  ⴷⴰⵜ ⵏ ⵓⵎⵢⴰⵡⴰⵙ ⴷ ⵓⵙⴷⵍⵙ ⴷ ⵓⵙⵏⴼⵍ.

  ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴷⴰⵜ ⵏ ⵜⵥⴹⴰⵕⵉⵏ ⴰⴷ ⵍⵍⵉ ⴷ ⵉⵇⵇⴰⵏ ⵓⵙⵏⴼⵍ ⵙ ⵜⴱⵖⵓⵔⵉⵏ ⴷ ⵉⵙⵏⴼⴰⵔⵏ, ⵉⵍⵍⴰ ⵓⵙⵇⵙⵉ ⵏ ⵜⵏⴰⵥⴰⵕⵉⵏ ⴷⴰⵜ ⵏ ⵜⵎⴰⵣⵉⵔⵜ ⵏⵏⵖ. ⴰⵎ ⵜⴰⵏⴰⵥⴰⵕⵜ ⵏ ⵡⴰⵔⴰⵔⴳⴳⵉⴳ ⴷ ⵉⴰⵖⵏ ⴷ ⵡⴰⵏⴰⵡⵏ ⵏ ⵓⵣⵡⴰⴳ, ⴷ ⵉⴷⵔⵉⵣⵏ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ, ⴷ ⵓⵃⵃⵓ ⵏ ⵉⵙⵙⴰⵔⵓⵜⵏ ⴷ ⵉⴷⴳⴰⵔⵏ ⴷ ⵜⴷⵔⵓⵙⵏ ⵏ ⵉⵙⵏⴼⵍⵏ ⵊⴰⵔ ⵜⵉⵎⵉⵣⴰⵔ ⵏⵏⵖ ⴷ ⵓⵣⴷⴰⵢ ⵏⵏⵙⵏ ⴰⴽⴷ ⵜⵉⵎⵉⵣⴰⵔ ⵏ ⵡⴰⵎⵎⴰⵙ, ⴷ ⵡⴰⵜⵉⴳⵏ ⵏ ⵓⵚⵉⴼⴹ ⵏ ⵜⵏⵣⵣⵓⵜⵉⵏ ⵏⵏⵖ, ⵍⵍⵉⵖ ⵓⵔ ⵏⵥⴹⴰⵕ ⴰⴷ ⵏⵟⵟⴼ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ ⴷ ⵜⵙⵓⴳⴰⵔ ⵏ ⵓⵙⵏⴼⵍ ⵏ ⵜⵥⴹⴰⵕⵉⵏ ⵏⵏⵖ ⵙ ⵜⴱⵖⵓⵔⵉⵏ.  

ⵉ ⵓⵙⵉⵜⵜⵉ ⵏ ⵎⴰ ⴷ, ⴼⵔⴽⵖ ⵎⴰⵙ ⴷ ⵉⵇⵇⴰⵏ ⴰⴷ ⵏⵙⵉⴳⴳⵍ ⴰⵙⵎⴰⴷ ⵊⴰⵔ ⵏⵏⵖ, ⵙⵎⵔⵙ ⵜⵉⵎⵍⴷⴰ ⵍⵍⴰⵏⵉⵏ, ⵏⵙⵓⵊⵉⴷ ⴰⵡⵏⴰⴹ ⴷ ⵢⵓⵙⴰⵏ ⴷ ⵉⵜⵜⴰⵡⵉⵏ ⵉⵙⵙⴰⵔⵓⵜⵏ ⵙ ⵉⵣⵣⵔⴰⴼⵏ ⵏⵏⵓⵕⵥⵎⵏⵉⵏ ⴷ ⵜⵏⵏⵓⴱⴹⴰ ⵏ ⵜⵏⴰⴼⵓⵜ ⵜⴰⵎⵙⵙⵓⴳⵓⵔⵜ, ⴷ ⵓⵙⵙⵔⵇⴱ ⵏ ⵜⴷⵍⵙⴰ ⵏ ⵜⵎⵙⵙⵏⵜⴰⵢⵜ.

ⵟⵟⴰⴼⵏⵜ ⵜⵎⵉⵣⴰⵔ ⵏⵏⵖ ⵜⵉⵥⴹⴰⵕⵉⵏ ⵅⴰⵜⵔⵏⵉⵏ ⵉ ⵓⵙⵙⴰⵔⵓ ⴳ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⵥⴹⴰⵕⵜ ⵜⴰⵎⴰⵢⵏⵓⵜ, ⴷ ⵎⴰⴷ ⴰⴽⴽⴰⵏ ⴳ ⵜⵎⵍⴷⵉⵡⵉⵏ ⵏ ⵜⵡⵓⵔⵉ ⴷ ⵜⴷⵉⵏⴰⵎⵉⵜⵉⵏ ⵜⵉⴷⵎⵙⴰⵏⵉⵏ ⴷ ⵓⵙⴷⵖⵔ ⵉⵜⵜⵓⴽⵍⴰⵍⵏ ⴳ ⵡⴰⵎⵓⵏⵏ ⵏ ⵓⵙⵏⵖⵎⵙ ⴷ ⵜⵓⵙⵙⵏⴰ.

ⵜⴰⵎⵓⵏⵜ ⵏⵏⵖ ⴷ ⵜⵔⵓⴱⴱⴰ ⵜⵉⵊⵢⵓⵙⵔⵜⴰⵏⵉⵏ ⴼ ⵜⵖⵜⴰⵙⵉⵏ ⵜⵉⵙⵔⵜⴰⵏⵉⵏ ⵎⵓⵏⵏⵉⵏ, ⴷ ⵓⵙⵉⵜⵜⵉ ⵏ ⵉⵎⵣⵔⴰⵢⵏ ⵊⴰⵔ ⵉⵡⴰⵏⴽⵏ ⵏⵏⵖ, ⴷ ⵜⵎⴰⵖⵜ ⵉⵙⵎⴷⵏ ⴼ ⵓⵡⵇⵇⵔ ⵏ ⵜⵅⵅⵓⵜⵔⴰ ⵏ ⵉⵡⴰⵏⴽⵏ ⵏⵏⵖ ⴷ ⵜⵢⴰⵏⵜ ⵏⵏⵙⵏ ⵜⴰⵏⴰⴽⴰⵍⵜ ⴷ ⵜⵖⵜⴰⵙⵉⵏ ⵏⵏⵙ ⵏ ⵜⵅⵅⵓⵜⵔⴰ, ⴳⴰⵏⵜ ⴰⵙⵙ ⴰⴷ ⵜⵉⴼⴰⴷⵉⵡⵉⵏ ⵍⵍⵉ ⵙⴷⴷⵉⴷⵏⵜ ⵜⵎⵙⴰⵔⵉⵏ ⵏ ⵓⵎⵣⵔⵓⵢ ⵃⵎⴰ ⴰⴷ ⵏⵍⴽⵎ ⵉⵡⵜⵜⴰⵙⵏ ⵏⵏⵖ. ⵍⵍⴰⵏ ⴳⵉⵎⵓⵔⵙⵏ ⵉⴳⵔⴰⵖⵍⴰⵏⵏ ⴽⵉⴳⴰⵏ ⵏ ⵉⵎⴷⵢⴰⵜⵏ, ⵍⴽⵎⵏⵜ ⵎⵉⵣⴰⵔ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴰⵢⵍⵍⵉ ⵍⴽⵎⵏⵜ, ⴷⴼⴼⵉⵔ ⵎⴰ ⴷ ⵙⵖⵡⵏⵜ ⵎⴰⵙ ⵓⵔ ⵜⵍⵍⵉ ⴽⵔⴰ ⵏ ⵜⵎⴰⵖⵜ ⴹⴰⵕⵜ ⵏ ⵜⵎⴰⵖⵜ ⵜⴰⵎⴰⴹⵍⴰⵏⵜ ⵜⵉⵙ ⵙⵏⴰⵜ ⴳ ⵓⴳⵯⵏⵙ ⵏ ⵉⵡⵜⵜⴰ ⵏ ⵜⵔⴰⴱⴱⵓⵜ ⵏ ⵓⵕⵓⴱⴱⴰ, ⵙⵡⴰⵍⴰⵏⵜ ⵜⵉⴱⵖⵓⵔⵉⵏ ⵏ ⵉⵣⵓⵖⴰⵣ ⴷ ⵉⴷⴳⴰⵔⵏ ⵏ ⵉⵔⴱⴰⴱⵏ ⵉ ⵜⵎⴳⵓⵔⵉ ⵜⴰⵎⴰⵢⵏⵓⵜ ⴷ ⵓⵚⴽⵓ ⵏ ⵜⵓⵚⴽⵉⵡⵉⵏ ⵅⴰⵜⵔⵏⵉⵏ, ⵕⵥⵎⵏⵜ ⵉⵡⵜⵜⴰ ⵊⴰⵔ ⵏⵏⵙⵏⵜ, ⵙⵎⵓⵏⵏⵜ ⵜⵉⵙⵔⵜⴰⵢ ⴷ ⵓⴷⵔⵉⵎ ⵏⵏⵙⵏⵜ.

ⵓⵔ ⵖⴰⵍⵖ ⵎⴰⵙ ⵓⵔ ⵥⴹⴰⵕⵏⵜ ⵜⵎⵉⵣⴰⵔ ⵜⵎⵉⵣⴰⵔ ⵏⵏⵖ ⴰⵙⴽⵔ ⵏ ⵉⵙⵏⴼⴰⵔⵏ ⴰⴷ ⵉⵖ ⵜⵍⵍⴰ ⵜⵉⵔⴰ ⵜⴰⵙⵔⵜⴰⵏⵜ ⴷ ⵓⵙⵖⵉⵡⵙ ⴷⴰⵔ ⵜⵎⵔⵙⴰⵍ ⵏⵏⵙ ⴳ ⵜⵏⴱⴰⴹⵉⵏ ⴷ ⵉⴱⵕⵍⴰⵎⴰⵏⵏ ⴷ ⵜⵓⴼⵔⵉⵢⵉⵏ, ⴷ ⵉⵖ ⴼⵔⴽⵏ ⵉⵎⴰⴷⴰⵏⵏ ⵙ ⵡⴰⵡⵜⵜⴰⵙ ⴰⴷ, ⵙⵍⴰⵡⴰⵏ ⴰⴽⴽⵯ ⵎⴰⵙ ⵏⵟⵟⴰⴼ ⵉⵏⴳⵔⴰⵡⵏ ⵉⵏⵎⵏⴰⴷⵏ ⵔⵎⵙⵏⵉⵏ ⴳ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⵉⴼⵔⵉⵇⵢⴰ ⵏⵖ ⴰⵎⴰⴹⴰⵍⴰ ⵄⵕⴰⴱ ⵙⵍⵡⴰⵏ ⴰⴽⴽⵯ ⵍⵅⴰⵍⵉⵊ ⴰⵄⵕⴰⴱ.

ⵉⵇⵇⴰⵏ ⴰⵖ ⴷ ⴷ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⴰⴷ ⵏⵙⵎⵓⵏ ⴰⵏⵄⴰⵕ ⵏⵏⵖ ⴳ ⵉⵏⵎⵓⵇⵇⴰⵔⵏ ⵉⴳⵔⴰⵖⵍⴰⵏⵏ ⵉ ⵓⵏⵄⴰⵕ ⵎⴳⴰⵍ ⵏ ⵜⵏⵓⵔⴰⴼ ⵏ ⵜⵎⵉⵣⴰⵔ ⵏⵏⵖ ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⴳ ⵓⵔ ⵜⵍⵍⵉ ⵜⵣⵔⴼⵜ, ⵏⵎⵎⴰⵖ ⴼ ⵓⵣⵔⴼ ⵏⵏⵖ ⴰⴷ ⴰⵖ ⵚⵉⵃⵉⵏⵜ ⵜⴻⵜⵉⴽⵏⵓⵍⵓⵊⵉⵢⵉⵏ ⴷ ⵜⵙⵓⴳⴰⵔ ⵍⵍⵉ ⴷ ⵉⵇⵇⴰⵏ ⵓⵙⵎⵓⵜⵜⵉ ⵏⵏⵙ ⵙ ⵓⵥⴰⵥⵓ ⵉⴷⵔⵓⵙⵏ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵓⵔ ⵔⴰⴷ ⴱⴰⵀⵔⴰ ⵙⴰⵡⵍⵖ ⴼ ⵜⵓⴳⴳⴰⵙ ⵏ ⵍⵎⵖⵔⵉⴱ ⵉ ⵓⵙⴽⵔ ⵏ ⵉⵡⵜⵜⴰⵙⵏ ⴰⴷ ⵙ ⵜⵏⵣⴱⴰⵢⵜ ⵏⵏⵙ ⵉ ⵜⵙⵉⵎⴰⵏⵜ ⵍⵍⵉ ⵖ ⴰⴽⴽⵯ ⵏⴷⵔⴰ ⵎⴰⵕⵕⴰ, ⴷ ⵜⴼⵔⴽⴰ ⵏ ⵓⵚⴽⵓ ⵏ ⵓⵡⴰⵏⴽ ⴰⵏⴰⵎⵓⵔ, ⴷ ⴰⵙⵙ ⴰⴷ ⴳ ⵉⵎⵏⴰⴹⵏⵜ ⵏ ⵜⵎⴰⴹⵍⴰⵏⵜ ⴷ ⵜⵏⴰⵥⴰⵕⵉⵏ ⵏⵏⵙ, ⵎⴰⵛ ⵙⵙⵓⵔⴼⴰⵜ ⵉⵢⵉ ⴰⴷ ⵙⵙⴽⵯⵜⵉⵖ ⵢⴰⵏ ⵙⴳ ⵉⵙⵏⴼⴰⵔⵏ ⵏ ⵓⵏⴰⵔⵓⵣ ⴷ ⵓⵙⵏⴼⵍⵓⵍ ⵍⵍⵉ ⵉⵙⵎⵏⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵍⵍⵉ ⵉⴳⴰⵏ ⵜⴰⵙⵏⵜⴰⵢⵜ ⵏ ⵓⵙⴷⵓⵙ ⵏ ⵓⴽⵛⵎ ⵏ ⵉⵡⴰⵏⴽⵏ ⵏ ⵙⵙⴰⵃⵉⵍ ⵙ ⵓⴳⴰⵔⵓ ⵏ ⵡⴰⵟⵍⴰⵚ ⴷ ⵜⴳⵎⵉ ⵏ ⵙⵙⴰⵃⵉⵍ ⵏ ⵡⴰⵟⵍⴰⵚ ⴰⴼⵔⵉⵇⵉ.

ⵓⵔ ⴳⵉⵙ ⵜⵓⵔⴼⴰ ⵎⴰⵙ ⴷ ⵜⵉⵔⵓⴱⴱⴰ ⵏⵏⵖ ⵜⵉⵊⵢⵓⵙⵔⵜⴰⵏⵉⵏ ⴳⴰⵏⵉⵏ ⴽⵕⴰⴹⵜ: ⵉⴼⵔⵉⵇⵢⴰ ⴷ ⵓⵎⴰⴹⴰⵍ ⴰⵄⵕⴰⴱ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ, ⴳⴰⵏⵉⵏ ⴰⴽⴽⵯ ⵜⵉⵎⵏⵜⴰⵢⵉⵏ ⵙ ⵜⵙⵏⵜⴰⵢⵜ ⴰⴷ ⵜⴰⵎⴰⵢⵏⵓⵜ ⴷ ⵜⵙⵜⵔⴰⵜⵉⵊⵉⵜ. ⵥⵕ ⴰⵜ ⴰⵖ ⴰⵏⵛⴽ ⵏ ⵜⴷⵉⵏⴰⵎⵉⵜⵉⵏ ⵍⵍⵉ ⵔⴰⴷ ⵢⵉⵍⵉ, ⴷ ⵓⵏⵛⴽ ⵏ ⵓⵙⵎⵖⵔ ⵍⵍⵉ ⵔⴰⴷ ⵉⵜⵜⵓⵙⴽⵉⵔ ⴷ ⵉⵚⴰⵃⴰⵜⵏ ⵉⵅⴰⵜⴰⵔⵏ ⵍⵍⵉ ⵔⴰⴷ ⵏⴰⵎⵥ, ⵙⵍⴰⵡⵏ ⴰⴽⴽ ⴰⵜⵉⴳ ⵏ ⵜⵡⵉⵣⵉ ⵉⵍⴰⵏ ⴰⴼⴰⵔⵙ ⵉⵟⵟⴰⴼⵏ ⵜⴰⵢⴰⴼⵓⵜ ⵜⴰⵙⵜⵔⴰⵜⵉⵊⵉⵜ ⵉⵛⵛⵛⴰⵔⵏ. ⵉⴳⴰ ⵍⵃⴰⵍ ⵉⵙⵏⴼⴰⵔⵏ ⵉⵅⴰⵜⴰⵔⵏ ⵏ ⵓⵙⵙⴰⵔⵓ ⵉ ⵓⵣⴷⴰⵢ ⴷ ⵓⵎⵢⴰⵡⴰⴹ ⴷ ⵓⴼⴰⵔⵙ ⴷ ⵓⵙⵉⴷⴼ ⴳ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵉⴳⴰⵎⴰⵏⵏ ⵎⵇⵇⵓⵔⵏⵉⵏ.

ⴳⴰⵏⵜ ⵢⴰⵜ ⵙⴳ ⵜⵙⵏⵜⴰⵢⵉⵏ ⴷ ⵉⵙⵏⴼⴰⵔⵏ ⵉⵎⵣⵡⵓⵔⴰ ⵍⵍⵉ ⵜⵙⵓⵎⵔ ⵜⴳⵍⴷⵉⵜ ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵉⴳⴰⵏ ⴰⵙⵙ ⴰⴷ ⴰⴳⵣⵣⵓⵎ ⴷ ⵓⴼⵔⴷⴰⵙ ⵏ ⵜⴷⵉⴱⵍⵓⵎⴰⵙⵉⵜ ⵜⴰⵎⵖⵔⴰⴱⵉⵜ ⵍⵍⵉ ⵉⵙⵙⵕⵚⴰ ⴷ ⵉⵙⵏⴰⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ.

ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ, ⴰⵎⵓⵔⵙ ⵉ ⵜⵡⵓⵔⵉⵡⵉⵏ ⵏⵏⵓⵏ