ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ ⴼ ⵓⵙⴱⴷⴷⵉ ⵏ ⵓⵙⵎⵔⵙ ⵏ ⵉⴷⵓⵀⴷⵓⵢⵏ ⴳ ⵢⵉⴳⵔ ⵏ ⵜⵓⵏⵏⵓⵏⵜ

ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 25 ⴷⵓⵊⴰⵏⴱⵉⵔ 2023 ⵙ ⵜⵓⴳⵜ ⴰⵙⵏⴼⴰⵔ ⵏ ⵓⵙⵍⴳⵏ 06.23 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 97.12 ⴼ ⵓⵙⴱⴷⴷⵉ ⵏ ⵓⵙⵎⵔⵙ ⵏ ⵉⵙⴷⵓⵀⴷⵓⵢⵏ ⴳ ⵜⵓⵏⵏⵓⵏⵜ ⴳ ⵜⵖⵉⵎⵜ ⵜⴰⵣⵣⵔⴰⴼⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵛⴰⴽⵉⴱ ⴱⵏⵎⵓⵙⴰ ⴰⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ, ⴷ ⵎⴰⵙⵙ ⵎⵓⵚⵟⴰⴼⴰ ⴱⴰⵢⵜⴰⵙ ⴰⵎⴰⵡⵙⴰⵙ ⵉⵜⵜⵓⵙⵎⴰⴳⴰⵍⵏ ⵙ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ ⴰⵎⵙⵙⵉⵅⵍ ⴰⵎⴰⴷⴷⵓⴷ ⵙ ⵉⵙⵎ ⵏ ⵜⵏⴱⴰⴹⵟ.

ⵉⴽⵛⵎ ⵓⵙⵏⴼⴰⵔ ⴰⴷ ⴳ ⵓⵙⴰⵜⵉ ⵏ ⵓⵎⵙⴰⵙⴰ ⵏ ⵓⵏⴳⵔⴰⵡ ⴰⵣⵣⵔⴰⴼ ⴰⵏⴰⵎⵓⵔ ⴷ ⵉⵙⵡⵓⴷⴷⵓⵜⵏ ⵣⴷⵉⵏⵉⵏ ⴷ ⵓⵙⴽⵔ ⵏ ⵉⵙⵓⵖⴰⴷ ⵉⵙⵜⵔⴰⵜⵉⵊⵉⵢⵏ ⵉⵏⴰⵎⵓⵔⵏ ⵏ ⵜⵓⵏⵏⵓⵏⵜ ⴷ ⵓⵙⵎⴰⵢⵏⵓ ⵏⵏⵙ, ⴷ ⵜⵡⵉⵙⵉ ⴳ ⵓⵙⴱⴷⴷⵉ ⵏ ⵉⵙⴷⵓⵀⴷⵓⵢⵏ ⴳ ⵢⵉⴳⵔ ⵏ ⵜⵓⵏⵏⵓⵏⵜ ⴳ ⵍⵎⵖⵔⵉⴱ, ⵙ ⵓⵎⵙⴰⵙⴰ ⴷ ⵉⵙⵖⵍⴰⴼ ⵏ ⵜⵙⵏⵓⵔⴰⵢⵜ ⵜⴰⵎⴰⴹⵍⴰⵏⵜ ⵉ ⵓⵙⴱⴷⴷⵉ ⵏ ⵓⵙⴷⵓⵀⴷⵓⵢⵏ, ⴷ ⵓⵎⵙⴰⵙⴰ ⵏ ⵓⵙⵍⴳⵏ 97.12 ⴷ ⵓⵙⵍⴳⵏ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵉⵙⴷⵓⵀⴷⵓⵢⵏ ⴷ ⵓⵙⴷⵓⵙ ⵏ ⵜⵙⵉⵎⴰⵏⵜ ⵏ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵏ ⵓⵙⴱⴷⴷⵉ ⵏ ⵉⵙⴷⵓⵀⴷⵓⵢⵏ.

ⵉⵡⴰⵜⵜⵙ ⵓⴹⵕⵉⵚ ⴰⴷ ⴰⵙⵎⴰⵢⵏⵓ ⵏ ⵜⵓⵎⴰⵢⵉⵏ ⵇⵇⵏⵏⵉⵏ ⴷ ⵜⵉⴹⴰⴼ ⵏ ⵓⵙⵎⵔⵙ ⵏ ⵉⵙⴷⵓⵀⴷⵓⵢⵏ ⵙ ⵓⵎⵙⴰⵙⴰ ⵏ ⵓⵙⵍⴳⵏ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵉⵙⴷⵓⵀⴷⵓⵢⵏ, ⴳ ⵎⴰⴷ ⵉⵥⵍⵉⵏ ⵙ ⵜⵉⴹⴰⴼ ⵏ ⵉⵡⴷⴰⵏ  ⴷ ⵜⵉⴽⴽⵉ ⵏ ⵜⵓⵔⴰⴳⵉⵏ ⵏ ⵓⵙⵎⵔⵙ ⵏ ⵉⵙⴰⴼⵔⵏ ⴷ ⵉⵎⴰⵙⵙⵏ ⵏ ⵜⵙⵏⵉⵊⵊⵉⵜ ⵜⵜⴰⵡⴳⴷⴰⵍⵏⵉⵏ.

ⵉⵡⴰⵜⵜⵙ ⵓⵙⵏⴼⴰⵔ ⴰⵙⵎⵖⵔ ⵏ ⵜⵙⵉⵍⴰ ⵏ ⵉⵙⵓⵎⴰⵔ ⵥⵍⵉⵏ ⵙ ⵓⵙⴼⵙⵉ ⵏ ⵉⵎⴷⵢⴰⵜⵏ ⵉⴱⵢⵓⵍⵓⵊⵉⵢⵏ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵓⵙⵎⵔⵙ ⵏ ⵉⵙⴷⵓⵀⴷⵓⵢⵏ ⵃⵎⴰ ⴰⴷ ⴰⵎⵓⵏ ⵉⵙⵓⵎⴰⵔ ⵍⵍⵉ ⵜⵙⵖⵣⵏ ⵜⵙⵏⵓⵔⴰⵢⵜ ⵜⴰⵎⴰⴹⵍⴰⵏⵜ ⵏ ⵓⵙⴱⴷⴷⵉ ⵏ ⵉⵙⴷⵓⵀⴷⵓⵢⵏ ⴷ ⵓⵣⵣⵔⴰⵢ ⵏ ⵜⵏⴼⴳⵓⵔⵉⵏ ⵍⵍⴰⵏⵉⵏ ⴼ ⵉⴷ ⴱⴰⴱ ⵏ ⵜⵓⵏⵏⵓⵏⵜ ⵙ ⵓⵙⵎⵔⵙ ⵏ ⵜⵏⴼⴳⵓⵔⵉⵏ ⵜⵜⴰⵡⴱⴷⴰⵔⵏⵉⵏ ⴳ ⵓⵙⵍⴳⵏ ⴰⴳⵔⴰⵖⵍⴰⵏ ⵏ ⵓⵙⴱⴷⴷⵉ ⵏ ⵉⵙⴷⵓⵀⴷⵓⵢⵏ, ⴷ ⵓⵙⴷⵓⵙ ⵏ ⵜⵏⵏⵓⴱⴹⴰ ⵏ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵏ ⵓⵙⴱⴷⴷⵉ ⵏ ⵓⵙⵎⵔⵙ ⵏ ⵉⵙⴷⵓⵀⴷⵓⵢⵏ.

ⵖⵎⴽ ⴰⵏⵏ ⴷ ⵓⵙⴷⵓⵙ ⵏ ⵜⵙⵉⵎⴰⵏⵜ ⵏ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵏ ⵓⵙⴱⴷⴷⵉ ⵏ ⵓⵙⵎⵔⵙ ⵏ ⵉⵙⴷⵓⵀⴷⵓⵢⵏ ⴳ ⵓⵎⵏⵉⴷ ⵏ ⵜⵙⵉⵎⴰⵏⵜ ⵏⵏⵙ ⴷ ⵓⵣⵣⵔⴰⵢ ⵏ ⵓⵚⴽⵓ ⵏⵏⵙ ⴷ ⵜⵎⵥⵍⴰⵢ ⵏⵏⵙ ⵙ ⵓⵎⵙⴰⵙⴰ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⵏ ⵓⵙⴱⴷⴷⵉ ⵏ ⵉⵙⴷⵓⵀⴷⵓⵢⵏ.