ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⵡⵉⵙ ⵙⴰ ⵏ ⵜⵣⵔⴼⵜ ⵜⴰⵏⴰⵎⵓⵏⵜ

ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵓⵎⵛⵉⵡⴰⵕ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ ⴷ ⵜⴳⵔⴰⵡⵉⵏ ⵏ ⵜⵏⵏⵓⴱⴹⴰ,

ⵉⵙⵜ ⵎⴰⵙⴰ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙⴰ ⵉⴱⵕⵍⴰⵎⴰⵏⵉⵢⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵎⵎⵔⵖ ⵍⵍⵉⵖ ⵔⴰⴷ ⴷⵔⵓⵖ ⵙ ⵉⵙⵎ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⴳ ⵜⵙⵓⵜⵍⵜ ⵏⵏⵙ ⵜⵉⵙ ⵙⴰⵜ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ, ⵍⵍⵉ ⵔⴰⴷ ⵉⵖⵔ ⴰⵙⴳⴳⵯⴰⵙ ⴰⴷ ⴰⵙⵙⴰⵔⵓ ⴳ ⵡⴰⵢⴷⴰ ⴰⵏⴼⴳⴰⵏ ⵉⵍⵍⴰⵏ ⴳ ⵓⴳⵯⵏⵙ ⵏ ⵜⵣⵔⴼⵜ ⵜⴰⵏⴰⵎⵓⵏⵜ, ⴰⵔ ⵙⵏⵉⵎⵎⵉⵔⵖ ⴰⵏⴳⴳⵯⵓ ⵏⵏⵡ ⵉⵄⵣⵣⴰⵏ ⵎⴰⵙⵙ ⵏⵏⵄⵎⴰ ⵎⵉⵢⵢⴰⵕⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴼ ⵜⵖⵓⵔⵉ ⵏⵏⵙ ⵃⵎⴰ ⴰⴷ ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵎⴹⴰⴽⴰⵕ ⴰⴷ ⵉⵍⵍⴰⵏ ⴳ ⵓⵖⴰⵡⴰⵙ ⴰⵏⴰⵎⵓⵔ.

ⵎⴰⴷ ⵉⵎⵎⴰⵍⴰⵏ ⴰⵜⵉⴳ ⴰⵏⴰⵎⵎⴰⵙ ⵏ ⵉⵎⵔⵙⵉ ⴰⴷ ⴳ ⵍⵎⵖⵔⵉⴱ ⵏ ⵡⴰⵙⵙ ⴰⴷ, ⵓⴳⴳⴰⵔ ⵏ ⵙⵏⴰⵜ ⵜⵎⵔⴰⵡⵉⵏ ⵣⵔⵉⵏⵉⵏ, ⵉⴳⴰ ⵜ ⵍⵍⵉⵖ ⵢⵉⵡⵉ ⵓⵏⵎⵓⵇⵇⴰⵔ ⴰⴷ ⵉⵡⵉⵣ ⴰⴳⵍⴷⴰⵏ ⴰⵎⴰⵜⵜⵓⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵍⵍⵉ ⵉⵙⵔⵙⵏ ⴳ ⵜⵎⵣⵡⵓⵔⴰ ⵏⵏⵙ, ⵜⵉⴳⵎⵉ ⵜⴰⵏⴼⴳⴰⵏⵜ ⴷ ⵓⵙⵙⴰⵔⵓ ⴳ ⵓⴼⴳⴰⵏ, ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⵉⴷⵙⵍⴰⵏⵏ, ⵙ ⵜⵓⵎⴰⵢⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ, ⵜⴳ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵉ ⵜⴳⵎⵉ ⵜⴰⵏⴼⴳⴰⵏⵜ, ⵍⵍⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴳ ⵎⴰⵢ 2005, ⵙ ⵜⵉⵢⵢⴰⴼⵓⵜ ⵏⵏⵙ, ⵙ ⵜⴰⵏⵏⴰⵢⵜ ⵏ ⵡⴰⵏⴹⴰⴼⵏ, ⵢⴰⵜ ⴳ ⵜⵙⵔⵜⴰⵢ ⴼⴰⵡⵏⵉⵏ ⴳ ⵜⴼⵔⴽⴰ ⵏ ⴱⴰⴱ ⵏ ⵡⴰⴷⴷⵓⵔ.

ⴰⵔ ⵎⵎⴰⵍⴰⵏⵜ ⵜⵎⵙⴽⴰⵔ ⴷ ⵜⵉⵔⵎⵉⵜⵉⵏ ⵜⵉⵎⵣⵔⴰⵢⵉⵏ ⵎⴰⵙ ⴰ ⵜⵜⵉⵎⵖⵓⵔ ⴽⵔⴰⵢⴳⴰⵜ ⵜⴰⵎⵜⵜⵉ ⵉⵖ ⵜⵙⵔⵙ ⴳ ⵉⵅⵎⵎⵉⵎⵏ ⵏⵏⵙ ⵉⵎⵣⵡⵓⵔⴰ ⴰⴼⴳⴰⵏ, ⴷ ⵓⵙⵙⴰⵔⵓ ⴳ ⵡⴰⵢⴷⴰ ⴰⵏⴼⴳⴰⵏ ⵙ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵙⵎⵓⵜⵜⴳ ⴷ ⵓⵙⴱⵓⵖⵍⵓ, ⴷ ⵜⵉⵍⵉⵜ ⵏ ⵜⵏⵓⴼⴰ ⵜⵉⵏⴰⵎⵓⵏⵉⵏ ⵙ ⵜⵉⵕⵡⵉ ⵜⵓⵛⵛⵉⵍⵜ. ⴰⵙⵉⵥⴹⵕ ⴰⴷⵎⵙⴰⵏ ⴷ ⵓⵏⴰⵎⵓⵏ ⵏ ⵓⴼⴳⴰⵏ ⴷ ⵜⵡⵡⵓⵔⵉ ⵢⴰⴽⴽⴰⵏ ⵜⵉⵖⵔⴰⴷ, ⵉⴹⵎⵏⵏ ⵉⵎⴰⵍ, ⴰⵔ ⵜⵜⴰⵡⵙⵏ ⴳ ⵓⴷⵔⴰⵡ ⵏⵏⵙ ⴳ ⵜⴳⵎⵉ ⴷ ⵓⴼⴰⵔⵙ, ⴷⵓⵙⵡⵓⴷⴷⵓ ⵏ ⵜⵖⴰⵡⵙⴰ ⵜⴰⵎⴰⵜⴰⵢⵜ, ⵙ ⵎⴰⴷ ⵉⵜⵜⴰⵡⵙⵏ ⴳ ⵓⵔⴳⴳⵉⴳ ⴰⵏⴰⵎⵓⵏ ⴷ ⵓⵙⴷⵓⵙ ⵏ ⵓⵚⴽⵓ ⴰⵎⵔⵙⵍⴰⵏ ⴳ ⵓⵙⴰⵜⵉ ⵏ ⵓⵡⴰⵏⴽ ⵉⴱⴷⴷⵏ ⴼ ⵉⵣⵔⴼⴰⵏ ⴷ ⵓⵛⵛⵉⵍⵏ.

ⵙ ⵜⵎⵢⵓⵔⵉⵏ ⵏⵏⵙ ⴷ ⵜⴷⵍⵙⴰ ⴷ ⵓⵎⵣⵔⵓⵢ ⵏⵏⵙ ⵉⵅⴰⵜⵔⵏ, ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴰⵏⴰⵡ ⵏⵏⵙ ⴰⵏⴰⵎⵓⵏ ⵉⴱⴷⴷⵏ ⴼ ⵜⵡⵉⵣⵉ ⴷ ⵓⵎⵢⴰⵡⴰⵙ ⴷ ⵓⵅⵎⵎⴻⵎ ⴳ ⵓⴼⴳⴰⵏ, ⴰⵏⴰⵡ ⴰⴷ ⵉⵜⵜⵉⵎⵖⵓⵔⵏ ⴷ ⵉⵣⵣⵉⴳⵉⵣⵏ ⵓⴳⴳⴰⵔ ⵏ ⵙⵏⴰⵜ ⵜⵎⵔⴰⵡⵉⵏ ⵙ ⵉⵡⵉⵣ ⴰⴳⵍⴷⴰⵏ ⵉⵣⵣⵉⴳⵣⵏ ⴷ ⵜⵡⵡⵓⵔⵉ ⵉⵣⵣⵉⴳⵣⵏ ⴳ ⵡⴰⴽⴰⵍ.

ⵜⴳⴰ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵉ ⵜⴳⵎⵉ ⵜⴰⵏⴼⴳⴰⵏⵜ, ⵜⴰⵎⴰⵜⴰⵔⵜ ⵉⴼⴰⵡⵏ ⵏ ⵡⴰⵏⴰⵡ ⴰⴷ ⴰⵏⴰⵎⵓⵏ, ⴰⵔ ⵜⵜⴰⵡⵙⵏ ⵉⵙⵏⴼⴰⵔⵏ ⵏⵏⵙ ⴷ ⵜⵥⴹⴰⵕⵉⵏ ⵏⵏⵙ ⴳ ⵓⵙⴱⴷⴷⵉ ⵏ ⵓⵥⵍⴰⴹ ⴷ ⵓⵙⵔⵅⵓ ⵏ ⵓⵙⵙⵍⵎⴷ, ⵙⵍⴰⵡⴰⵏ ⴰⴽⴽⵯ ⴰⵙⵙⵍⵎⴷ ⵏ ⵜⴼⵔⵅⵉⵏ ⴳ ⵉⴼⴰⵔⴰⵏⵏ, ⴷ ⵓⵙⴳⵉⴷⴷⵉ ⵏ ⵜⵙⵏⵜⴰⵢⵉⵏⵏ ⵜⴷⵎⵙⴰ ⵜⴰⵏⴰⵎⵓⵏⵜ ⴷ ⵜⵉⵏ ⵓⵎⵢⴰⵡⴰⵙ ⵉⵙⴽⴰⵔⵏ ⵜⵉⵖⵔⴰⴷ, ⴷ ⵜⵉⵍⵉⵜ ⵏ ⵡⴰⵎⴰⵏ ⵏ ⵜⵉⵙⵙⵉ ⴳ ⵓⵎⴰⴹⴰⵍ ⴰⴼⴰⵔⴰⵏ, ⴷ ⵓⵚⴽⵓ ⴷ ⵓⵙⵡⵓⴷⴷⵓ ⵏ ⵜⵎⵔⵙⴰⵍ ⵏ ⵓⴼⵔⴰⴳ ⴰⵏⴰⵎⵓⵏ ⴷ ⵓⵖⵓⵍ ⵏ ⵓⵙⵉⴷⴼ ⴷ ⵓⵙⵎⵓⵜⵜⴳ ⴷ ⵓⵙⵉⵍⵖ.

ⴳ ⵓⵎⵏⵉⴷ ⵏ ⵓⵙⵎⵔⵙⵍ ⵏ ⵜⵡⵡⵓⵔⵉ ⵜⴰⴳⴷⵓⴷⴰⵏⵜ ⴳ ⵜⵏⵓⴼⴰ ⵜⵉⵏⴰⵎⵓⵏⵉⵏ, ⵜⵔⵎⵙ ⵜⵎⴰⵣⵉⵔⵜ ⵏⵏⵖ ⴳ ⵜⵉⵍⵉⵜ ⵏ ⵓⵙⴼⵍⵙ ⴰⴷⵓⵙⴰⵏ ⵉ ⵓⴳⴳⴰⵔ ⵏ 23 ⵎⵍⵢⵓⵏ ⵏ ⵓⴼⴳⴰⵏ, ⵉⵚⴰⵃⴰ ⴰⵙⵏ ⵓⵏⴳⵔⴰⵡ ⴰⴷ ⵙ ⵜⵖⴰⵔⴰⵙⵜ ⵏ ⵓⵙⵎⵔⵙⵍ ⵍⵍⵉ ⵢⴰⴽⴽⴰⵏ ⵜⵉⵏⵓⴼⴰ ⵜⵉⴳⴷⵓⴷⴰⵏⵉⵏ ⵜⵉⴷⵓⵙⴰⵏⵉⵏ ⴳ ⵓⵙⴰⵜⵉ ⵏ ⵉⵍⵓⴳⵏ ⵉⵣⵔⴼⴰⵏⵏ ⵉⵎⴰⵢⵏⵓⵜⵏ, ⵙ ⵓⴼⵔⴰⴽ ⵏⵏⵖ ⵙ ⵎⴰⴷ ⵉⵔⴰ ⵓⵙⵏⴼⴰⵔ ⴰⴷ ⴳ ⵓⵙⵙⵥⵕⴼ ⴷ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵓⵎⴰⵡⴰ ⵓⵛⵛⵉ, ⵉⵇⵇⴰⵏ ⴷ ⴰⴷ ⵜ ⵏⵙⵓⵜⴳ ⴰⵙⵓⵜⴳ ⴷ ⵢⵓⵙⴰⵏ, ⵏⵙⵓⵜⴳ ⵜ ⴳ ⵓⵎⵏⴰⴹ ⵏⵏⵙ, ⴰⵎⵏⴰⴹ ⵏ ⵜⵎⴰⵖⵉⵏ ⴷ ⵜⴰⵙⵙⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵉⴷⵔⵉⵣⵏ ⵏⵏⵙⵏ. ⵉⴳⴰ ⵍⵃⴰⵍ ⴰⵙⴰⵡⵓⵔ ⴰⴳⵍⴷⴰⵏ, ⵍⵍⵉ ⴷ ⵉⵇⵇⴰⵏ ⵓⵙⵎⵓⵙⵙⵓ ⴰⵎⴳⵔⵓ ⴳ ⵎⴰⵕⵕⴰ ⵏ ⵜⵎⵔⵙⴰⵍ ⴷ ⵉⴷⵖⴰⵔⵏ ⵏ ⵜⵎⴰⵙⴰⵢⵜ, ⴷ ⵓⵙⵕⵚⵓ ⵏⵏⵙ ⴷ ⵓⵙⵖⵓⴷⵓ ⵏⵏⵙ ⵃⵎⴰ ⴰⴷ ⵜ ⵉⵙⵙⵏ  ⵓⴼⴳⴰⵏ.

ⵉⴳⴰ ⵍⵃⴰⵍ ⵜⴰⴳⵔⴰⵡⵍⵍⴰ ⵉⴼⵙⵓⵙⵏ ⴳ ⵜⵏⴰⴼⵜ ⵜⴰⴷⵓⵙⴰⵏⵜ ⴷ ⵓⵙⴼⵍⵙ ⴰⴷⵓⵙⴰⵏ ⴳ ⵜⵎⴰⵣⵉⵔⵜ ⵏⵏⵖ, ⴰⵙⵏⴼⴰⵔ ⵉⵙⵙⵕⵚⵓⵏ ⵜⵉⵡⵉⵣⵉ ⴷ ⵓⵎⵢⴰⵡⴰⵙ ⴷ ⵓⵎⵛⴰⴱⴱⴰⴽ ⴰⵏⴰⵎⵓⵏ, ⵉⴼⴽ ⴰⵣⵔⴼ ⴳ ⵓⴷⵡⴰⵙ ⵙ ⵡⴰⵏⴰⵎⴽ ⵏⵏⵙ ⵉⴼⴰⵡⵏ, ⴰⵢⵍⵍⵉ ⵔⴰⴷ ⵉⵙⵖⵓⴷⵓ ⵓⵟⵟⵓⵏ ⵏ ⵜⵏⴰⴼⵜ ⵜⴰⴷⵓⵙⴰⵏⵜ ⵉⵙⴽⵔ ⵉⵙⵏⴼⵍⵏ ⵕⵡⴰⵏⵉⵏ ⴳ ⵜⵣⴷⴰⵢⵜ ⵏ ⵓⵏⵎⵓⵔⵉ ⴰⴽⴷ ⵜⴰⵏⴰⴼⵜ ⵜⴰⴳⴷⵓⴷⴰⵏⵜ.

ⵉⴷ ⵎⴰⵙⵙ ⵉⵏⵙⵙⵉⵅⴼⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵏⵔⴰ ⴰⴷ ⵏⵎⵙⴰⵙⴰ ⴼ ⵓⵙⵓⵜⴳ ⵏ ⵜⵎⵙⴽⵔⵜ ⴰⴷ ⴷ ⵓⵙⴷⵓⵙ ⵏⵏⵙ, ⵜⵇⵇⴰⵏ ⴷ ⵜⵓⴳⴳⴰⵙ ⵍⵍⵉ ⵔⴰⴷ ⵉⵜⵜⵓⵙⴽⵉⵔ ⴷ ⵜⵙⵔⵜⴰⵢⵜ ⵜⵉⴳⴷⵓⴷⴰⵏⵉⵏ ⵍⵍⵉ ⴷ ⵉⵇⵇⴰⵏ ⵓⵣⵣⴳⵉⵔ, ⴷ ⵜⵥⴹⴰⵕⵉⵏ ⵜⵉⵥⵕⴼⴰⵏⵉⵏ ⴷ ⵜⵏⴼⴳⴰⵏⵉⵏ ⴷ ⵓⵎⴰⵡⴰ ⵃⵎⴰ ⴰⴷ ⵏⴰⵡⵉ ⵜⴰⵏⴰⵥⴰⵕⵜ ⵏⵏⵖ ⵜⴰⵙⵜⵔⴰⵜⵉⵊⵉⵜ ⵉⵍⵍⴰⵏ ⴳ ⵓⵙⴽⵔ ⵏ ⵓⵡⴰⵏⴽ ⴰⵏⴰⵎⵓⵏ. ⵉⵇⵇⴰⵏ ⴷ ⵓⵍⴰ ⴰⴷ ⵏⵙⵙⵏ ⵎⴰⵙ ⴳⴳⵓⵜⵏⵜ ⵜⵏⴰⵥⴰⵕⵉⵏ ⵏ ⵓⵙⵙⴰⵔⵓ  ⵉ ⵡⴰⵢⴷⴰ ⴰⵏⴼⴳⴰⵏ ⵎⴰⵙ ⵓⵎⴰⵏⵜ. ⴰⵏⴰⵔⵓⵣ ⵏⵏⵖ ⴰⵎⴳⵔⴰ ⵉⴳⴰ ⵜ ⵙⴽⵓ ⵏ ⵓⴼⴳⴰⵏ ⵢⵓⵎⵥⵏ ⴳ ⵡⴰⵜⵉⴳⵏ ⵏⵏⵙ ⵉⵏⴰⵎⵓⵔⵏ, ⵉⵏⵏⵓⵕⵣⵎⵏ ⴼ ⵓⵎⴰⴹⴰⵍ, ⵉⵎⵎⴰⵖⵏ ⴼ ⵜⵎⵔⵙⴰⵍ ⵏⵏⵙ, ⵉⵜⵜⴰⵡⵙⵏ ⴳ ⵓⵙⵡⵓⴷⴷⵓ ⵏ ⵜⵖⴰⵡⵙⴰ ⵜⴰⵎⴰⵜⴰⵢⵜ, ⵉⵟⵟⴰⴼⵏ ⴰⵙⵡⵉⵏⴳⵎ ⵏⵏⵙ ⴰⵙⵉⵎⴰⵏ ⴷ ⵉⵙⴽⴰⵔⵏ ⵜⵉⵖⵜⴰⵙⵉⵏ ⵏⵏⵙ ⵙ ⵓⴼⵔⴰⴽ. ⴳ ⵢⴰⵏ ⵓⵎⴰⴹⴰⵍ ⵉⵏⵏⵓⵕⵥⵎⵏ, ⴹⵕⵏ ⵉⵡⵜⵜⴰ ⵓⵏⴳⵉⵎⵏ, ⵙ ⵜⴻⵜⵉⴽⵏⵓⵍⵓⵊⵉⵜ ⵏ ⵉⵏⵖⵎⵉⵙⵏ, ⴰⵢⵍⵍⵉ ⵉⵙⵉⵜⵜⵉⵏ ⴰⵜⵉⴳⵏ ⴼⵓⵍⴽⵉⵏⵉⵏ ⵉⵙⵏⴼⵍ ⵜⵏ, ⵙ ⴳⴰⵔ ⵉⵏⵖⵎⵉⵙⵏ ⵍⵍⴰⵏⵉⵏ ⴷ ⵜⵎⵓⵛⴰ ⵥⵡⵡⵕⵏⵉⵏ.

ⴳ ⵓⵙⴱⴷⴷⵉ ⵏ ⵓⵙⵓⵔⵙ ⴰⴷ, ⴰⵔ ⵜⵜⵉⵎⵖⵓⵔⵏ ⴳⴰⵔ ⵉⵏⴰⵡⵏ, ⴷ ⵜⴰⴳⵯⵉⵜ ⵏ ⵡⴰⵢⵢⴰⴹ, ⴷ ⵜⴻⵟⵟⵓⵕⴼⴰ, ⴷ ⵉⵙⵡⵉⵏⴳⵎⵏ ⵀⵔⵛⵏⵉⵏ, ⵎⴰ ⴰⵏⵏ ⵉⴳⴰ ⴰⵙⵓⵔⵙ ⴰⵎⴰⴹⵍⴰⵏ ⵉⵍⵍⴰⵏ ⴳ ⴽⵔⴰⵢⴳⴰⵜ ⵎⴰⵏⵉ, ⴽⵔⴰⵢⴳⴰⵜ ⴰⵎⵓⵏ. ⵖⵉⴷ ⵉⵍⵍⴰ ⵓⵙⵇⵙⵉ ⵉⵥⵍⵉⵏ ⵙ ⵡⴰⵜⵉⴳⵏ ⵉⵏⴰⵎⵓⵏⵏ ⵥⵉⵍⵏⵉⵏ, ⴰⵜⵉⴳⵏ ⵏ ⵜⵉⵍⵉⵜ ⵉ ⵡⴰⵎⵓⵏ, ⴷ ⵓⵎⵢⴰⵡⴰⵙ ⴷ ⵓⵎⵛⴰⴱⴱⴰⴽ, ⴷ ⵓⴼⴰⵔⵙ ⴷ ⵜⵡⵡⵓⵔⵉ ⴷ ⵜⵙⵏⵜⴰⵢⵜ ⴷ ⵓⵙⵎⴰⵢⵏⵓ ⴷ ⵓⵎⵃⵉⵣⵡⴰⵔ ⵓⵍⴳⵉⵏ, ⴰⵉⴳⵏ ⵍⵍⵉ ⴱⴷⴷⴰ ⵍⵍⴰⵏⵉⵏ ⴳ ⵍⵎⵖⵔⵉⴱ, ⵉⵇⵇⴰⵏ ⴷ ⵓⵙⵎⵖⵔ ⵏⵏⵙⵏ ⴼ ⵜⵣⴷⴰⵢⵉⵏ ⵏⵏⵖ ⴷ ⵜⵎⵙⴽⴰⵔ ⵏⵏⵖ. ⵉⵇⵇⴰⵏ ⴷ ⵓⵍⴰ ⵓⵙⵙⴰⵔⵓ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏⴷ ⵉⵙⴰⵢⵔⵓⵔⵏ ⴷ ⵜⴱⴰⴷⵓⵜⵉⵏ ⵍⵍⵉ ⴷ ⵉⵇⵇⴰⵏ ⵓⴼⴰⵔⵙ ⴷ ⵓⵙⵕⵚⵓ ⴷ ⵓⵣⵓⵣⵣⵔ, ⴰⵙⵙⴰⵔⵓ ⴰⵙⵜⵔⴰⵜⵉⵊⵉ ⵢⴰⴽⴽⴰⵏ ⴰⴼⴰⵔⵙ, ⴳ ⵓⴼⵔⴷⵉⵙ ⴰⵏⴼⴳⴰⵏ. ⴰⵙⵙⴰⵔⵓ ⴳ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵙⵎⴰⵢⵏⵓ, ⴳ ⵜⵉⵏⵎⵍ ⴷ ⵓⵙⵉⵏⴰⵏ ⴷ ⵜⵙⴷⴰⵡⵉⵜ ⴷ ⵓⵔⵣⵣⵓ ⴰⵎⴰⵙⵙⴰⵏ. ⴳ ⵓⵎⵏⵉⴷ ⴰⴷ, ⵉⵇⵇⴰⵏ ⴷ ⴰⴷ ⵜⴻⵟⵟⴼ ⵜⵎⴽⵔⴰⴷ ⵜⵉⴳⴷⵓⴷⴰⵏⵉⵏ ⵉⵙⵜⴰⵡⵀⵎⵎⴰⵏ ⴳ ⵢⵉⴳⵔ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴰⴷⵔⵉⵣ ⵉⴼⴰⵡⵏ ⴼ ⵓⵙⵖⵓⴷⵓ ⵏ ⵓⵟⵟⵓⵏⵏ ⵥⵍⵉⵏⵉⵏ ⵙ ⵢⵉⴳⵔ ⴰⴷ. ⵉⵖ ⴰⵖ ⵜⵚⴰⵃⴰ ⵜⵏⴰⵥⴰⵕⵜ ⴰⴷ ⵙ ⵜⵉⵍⵉⵜ ⵏ ⵜⵉⵍⴰⵍⵜ ⵜⵓⵛⵉⵍⵜ ⵉ ⵜⵉⵏⵎⵍ ⴷ ⵜⵙⴷⴰⵡⵉⵜ ⴳ ⵡⴰⵎⵓⵏ, ⴷ ⵓⵚⴽⵓ ⵏ ⵡⴰⵜⵉⴳⵏ, ⵔⴰⴷ ⴰⵖ ⵚⵉⵃⵉⵏⵜ , ⵙ ⵓⵙⴷⴷⴻⴷ, ⵜⵉⵢⵢⴰⴼⵓⵜⵉⵏ ⵥⵉⵍⵏⵉⵏ ⴳ ⵎⴰⵕⵕⴰ ⵏ ⵉⴳⵔⴰⵏ.

ⵉⴳⴰ ⵍⵄⴰⵍ ⵓⵍⴰ ⵓⵖⵓⵍ ⵏ ⵜⵉⵍⴰⵍⵜ ⵜⴰⵏⴰⵎⵎⴰⵙⵜ ⵏ ⵜⵓⵡⵊⴰ ⴳ ⵓⵙⵎⵖⵔ ⴷ ⵓⵙⴳⵎⵉ ⴼ ⵉⵎⴰⵏ ⵏ “ⵜⵎⵖⵔⵉⴱⵉⵜ” ⵉⴱⴷⴷⵏ ⴼ ⵓⵡⵇⵇⵔ ⴷ ⵜⵡⵡⵓⵔⵉ ⴷ ⵓⵣⴷⴰⵢ ⵊⴰⵔ ⵓⵣⵔⴼ ⴷ ⵓⵛⵛⵉⵍ.

ⴳ ⵓⵙⵡⵉⵔ ⵡⵉⵙ ⴽⵕⴰⴹ, ⵉⴳⴰ ⵍⵃⴰⵍ ⵜⵉⵍⴰⵍⵜ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ, ⵍⵍⵉ ⴷ ⵉⵇⵇⴰⵏ ⵓⵙⴰⵜⵉ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⴷ ⵜⵡⵉⵙⵉ ⴳ ⵓⵙⵕⵚⵓ ⵏ ⵓⴼⵔⴰⴽ ⴰⵏⴰⵎⵓⵔ ⴷ ⵓⵙⵕⵚⵓ ⵏ ⵓⵎⵣⴰⵔⴰⵢ ⴷ ⵓⵚⴽⵓ ⵏ ⵡⴰⵡⵔⵉⴽ ⴰⵏⴰⵎⵓⵔ.

ⵙ ⵓⵙⴷⴷⴻⴷ, ⵓⵔ ⵔⴰⴷ ⵏⵎⵎⵣⵔⵉ ⴳ ⵓⵎⵏⴰⴷ ⴰⴷ, ⵉⵇⵇⴰⵏ ⴰⵖ ⴷ ⴰⵙⵙ ⴰⴷ ⵙ ⵣⵣⵔⴱ ⴰⴷ ⵏⴱⴷⴷ ⴼ ⵉⵙⵎⵔⵙⵏ ⵏ ⵜⴻⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ  ⵙ ⵜⵓⵎⴰⵢⵉⵏ ⴷ ⵉⵏⴰⵡⵏ ⴷ ⵓⵙⵎⵔⵙ ⵏ ⵜⴻⵜⵉⴽⵏⵓⵍⵓⵊⵉⵜ ⴳ ⵜⵎⵙⵙⵓⴳⵓⵔⵜ ⴷ ⵜⵓⴷⵔⵜ ⵜⴰⵎⴰⵜⴰⵢⵜ.

ⵙ ⵓⵙⴷⴷⴻⴷ, ⵉⵇⵇⴰⵏ ⴷ ⴰⴷ ⵏⴱⴷⴷ ⴼ ⵜⵓⵎⴰⵢⵉⵏ ⵍⵍⵉ ⵙⵎⵔⴰⵙⵏ ⵉⵄⵔⵔⵉⵎⵏ ⵏⵏⵖ, ⵜⴰⵏⵏⴰⵢⵜ ⵍⵍⵉ ⴷ ⵉⵙⵙⴼⵓⵖ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ ⵅⴼ ⴳⴰⵔ ⵉⵏⵖⵎⵉⵙⵏ, ⴷ ⵜⵣⵔⴰⵡⵜ ⵜⴰⵙⵓⵙⵢⵓⵍⵓⵊⵉⵜ ⵍⵍⵉ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⵅⴼ ⵡⴰⵜⵉⴳⵏ, ⴳⴰⵏ ⴰⵏⴰⴳⵏⴰ ⵏ ⵉⵎⵉⵣⵉ ⵍⵍⵉ ⵉⵜⵜⵉⵏⵉⵏ ⴰⴷ ⵉⵍⵉⵏⵜ ⵜⵙⵔⵜⴰⵢ ⴷ ⵉⵣⵣⵔⴰⴼⵏ ⵉ ⵓⵙⵏⴼⵍ ⵏ ⴳⴰⵔ ⵉⵙⵡⴰⵍⴰⵢⵏ ⵍⵍⴰⵏⵉⵏ ⴳ ⵉⴳⵔⴰⵏ ⴰⴷ, ⵙ ⵓⵙⵙⵔⵇⴱ ⵏ ⵉⵙⵎⵔⵙⵏ ⵥⵉⵍⵏⵉⵏ ⵏ ⵜⴻⵜⵉⴽⵏⵓⵍⵓⵊⵉⵜ ⵏ ⵓⵎⵢⴰⵡⴰⴹ.

ⴳ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⴰⴷ ⵍⵍⴰⵏⵉⵏ ⴷⴰⵜ ⵏ ⵜⵎⴰⵣⵉⵔⵜ ⵏⵏⵖ, ⵉⵇⵇⴰⵏ ⴷ ⵓⵙⴷⵓⵙ ⵏ ⵓⵎⵛⴰⴱⴱⴰⴽ ⴳ ⵡⴰⵜⵉⴳⵏ ⵏⵏⵖ ⵉⵎⵖⵔⵉⴱⵉⵢⵏ ⵛⵛⴰⵔⵏⵉⵏ, ⴳⴰⵏⵉⵏ ⵜⵉⵎⵣⵔⴰⵢ, ⵏⵏⵓⵕⵥⵎⵏⵉⵏ ⴼ ⵓⵎⴰⴹⴰⵍ ⴷ ⵜⴷⵍⵙⵉⵡⵉⵏ ⵏⵏⵙ. ⵍⵍⵉⵖ ⵉⴳⴰ ⵎⴰⵢⴰⵏⵏ ⵜⴰⵙⵉⵍⴰ ⵜⴰⴷⵙⵍⴰⵏⵜ, ⴷ ⵜⵙⵉⵍⴰ ⵉⴷⵓⵙⵏ ⵏ ⵜⵢⴰⵏⵜ ⵏⵏⵖ ⴷ ⵓⵎⵛⴰⴱⴱⴰⴽ ⵏⵏⵖ ⵅⴼ ⵜⵉⵔⵙⴰⵍ ⵏⵏⵖ ⵜⵉⵏⴰⵎⵓⵔⵉⵏ ⴷ ⵜⵎⵔⵙⴰⵍ ⵏⵏⵖ, ⵜⵇⵇⴰⵏ ⴷ ⵜⵡⵡⵓⵔⵉ ⴳ ⵢⵉⴳⵔ ⴰⴷ, ⵙ ⵓⵙⵙⴰⵔⵓ ⴳ ⵓⴼⴳⴰⵏ, ⵍⵍⵉ ⴷ ⵇⵇⴰⵏ ⵜ ⵜⵔⵙⴰⵍ ⵜⵉⵎⵜⵜⵉⵡⵉⵏ ⵍⵍⵉ ⵔⴰⴷ ⵢⴰⵡⵙ ⴳ ⵜⵙⵓⵍⴰⵏⵜ ⴷ ⵓⵙⵕⵚⵓ. ⵖⵎⴽ ⴰⵏⵏ, ⴰⴼ ⴷ ⵉⵇⵇⴰⵏⵏ ⴰⴷ ⵉⵍⵉⵏ ⵉⵣⵔⴼⴰⵏ ⴷ ⵡⴰⵜⵉⴳⵏ ⵍⵍⴰⵏⵉⵏ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵍⵍⵉ ⴳⴰⵏⵉⵏ ⵜⵉⵎⵣⵡⵓⵔⴰ, ⴳⵉⵏⵜ ⴰⵙⴰⵡⵓⵔ ⵉⵏⵏⵓⵕⵣⵎⵏ ⵉ ⵓⵙⵖⵓⴷⵓ ⴷ ⵓⵙⵎⵖⵔ ⴷ ⵓⵙⵕⵚⵓ ⴷ ⵓⵣⵓⵛⵛⵍ. ⴳⵉⵙⵏ ⴰⵙⵉⵥⴹⵔ ⵏ ⵜⵎⵖⴰⵔⵉⵏ ⴷ ⵜⵉⵍⵉⵜ ⵏ ⵉⵣⵔⴼⴰⵏ ⵏⵏⵙⵏⵜ ⵙ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ ⴷ ⵜⵙⵉⵎⴰⵏⵜ, ⴷ ⵓⵙⵉⴷⴼ ⵏⵏⵙⵏⵜ ⴳ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ, ⵙ ⵓⵙⵔⵅⵓ ⵏ ⵜⴷⵔⴰⵡⵜ ⵏⵏⵙⵏⵜ ⴳ ⵜⵎⴰⵙⴰⵢⵉⵏ ⵜⵉⴳⴷⵓⴷⴰⵏⵉⵏ ⵜⵉⴳⵯⵏⵙⴰⵙⵉⵏ ⴷ ⵜⵎⵣⵣⴳⴰⵔⵉⵏ, ⵓⵔ ⴷ ⵉⵇⵇⴰⵏ ⴰⴷ ⵜⴱⴷⴷ ⵜⵡⵉⵙⵉ ⵏ ⵢⴰⵏ ⵓⴳⵣⵣⵓⵎ ⴰⴷⵙⵍⴰⵏ ⵏ ⵡⴰⵎⵓⵏ.

ⵍⵍⵉⵖ ⵉⴳⴰ ⵓⵙⵙⴰⵔⵓ ⴳ ⵓⴼⴳⴰⵏ ⴰⵙⵙⴰⵔⵓ ⴳ ⵉⵎⴰⵍ, ⵉⴳⴰ ⵓⵙⵙⴰⵔⵓ ⵖ ⵉⵄⵔⵔⵉⵎⵏ ⵙⴳ ⵜⵉⵎⴰⵙⴰⵢⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⴷ ⵉⵇⵇⴰⵏ ⵓⵙⵡⵓⵔⵉ ⴷⴰⵔ ⵜⵎⵔⵙⴰⵍ ⴷ ⵜⵏⴱⴰⴹⵉⵏ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵓⵙⵡⵓⴷⴷⵓ ⵏⵏⵙⵏ ⴷ ⵓⵣⵣⴳⵉⵔ ⵏⵏⵙⵏ, ⵉ ⵓⵣⵓⵣⵣⵔ ⵏ ⵓⵏⴰⵔⵓⵣ ⴳ ⵉⵎⴰⵍ, ⴷ ⵓⵙⵉⵜⵜⵉ ⵏ ⵡⴰⵔⴰⵏⴰⵔⵓⵣ, ⵄⵎⴰ ⴰⴷ ⵙⵡⵓⵔⵉⵏ ⵉⵄⵔⵔⵉⵎⵏ ⴳ ⵜⵙⵏⵜⴰⵢⵜ ⴷ ⵓⴼⴰⵔⵙ.

ⵉⵇⵇⴰⵏ ⴷ ⵓⵍ ⴰⴷ ⵓⵔ ⵏⴻⵜⵜⵓ ⴰⵅⵎⵎⴻⵎ ⴳ ⵜⴰⵙⵓⵜⵉⵏ ⵏ ⵉⵎⴰⵍ, ⴷ ⵓⵙⵉⵜⵜⵉ ⵏ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⵉⵡⵙⵏⵉⵏ ⴳ ⵓⵚⴽⵓ ⵏ ⵍⵎⵖⵔⵉⴱ ⵏ ⵡⴰⵙⵙ ⴰⴷ, ⵎⵉⴷⴷⵏ ⴳⴰⵏⵉⵏ ⵉⵅⴰⵜⴰⵔⵏ ⵍⵍⵉ ⴷ ⵉⵇⵇⴰⵏ ⵓⴼⵔⴰⴳ ⵏ ⵡⴰⴷⴷⵓⵔ ⵏⵏⵙⵏ ⴷ ⵓⴼⵔⴳⴰ ⵏⵏⵙⵏ, ⵉⴳⴰ ⵍⵃⴰⵍ ⵓⵛⵛⵉⵍ ⵏ ⵓⵙⴳⴷ ⴷ ⵡⴰⵎⵓⵏ ⴷ ⵜⵖⴰⵔⵉⵡⵉⵏ, ⵏⵙⵙⵏ ⵉⵙ ⵉⴳⴰ ⵓⴼⵔⴰⴳ ⵏ ⵜⵓⵡⵊⴰ  ⵉ ⵉⴷⴱⴰⴱⴰⵜ ⵏⵏⵖ ⴷ ⵉⵎⵎⴰⵜ ⵏⵏⵖ ⵙⴳ ⴰⵜⵉⴳⵏ ⵏ ⵉⵎⵖⵔⵉⴱⵉⵢⵏ ⵍⵍⵉ ⴷ ⵉⵇⵇⴰⵏ ⵓⴼⵔⴰⴳ.

ⵙ ⵓⵙⴷⴷⴻⴷ, ⵜⴰⵡⵉⵜ ⴳ ⵜⴷⴰⵍⵉⵡⵉⵏ ⴰⴷ ⴷ ⵓⵎⵢⴰⵙ ⴳ ⵓⴼⵔⴰⴳ ⵏ ⵜⴰⵙⵓⵜⵉⵏ ⵙ ⵓⵎⵏⴰⴷ ⵏ ⵡⴰⵏⴰⵡ ⴰⵏⴰⵎⵓⵏ, ⵉⵇⵇⴰⵏ ⴷ ⴰⴷ ⴷⵉⵙ ⵉⵎⵓⵏ ⵉⵡⵉⵣ ⴼ ⵓⵎⵢⴰⵡⴰⵙ ⴰⴷⵖⴰⵔⴰⵏ ⴷ ⵜⵣⵔⴼⵜ ⵜⴷⵖⴰⵔⴰⵏⵜ, ⵜⴰⵣⵣⵉⴳⵣⵜ ⵍⵍⵉ ⵉⵙⴽⴰⵔ ⵍⵎⵖⵔⵉⴱ ⵉⵇⵇⴰⵏ ⴷ ⴰⴷ ⵜⴻⵟⵟⵉⴼ ⵜⴰⵢⵢⴰⴼⵓⵜ ⵏⵏⵙ ⵜⴰⵏⴰⵎⵓⵏⵜ ⴷ ⵜⴷⵖⴰⵔⴰⵏⵜ ⵢⵓⵎⴰⵏ ⵎⴰⵕⵕⴰ ⵏ ⵜⵙⴳⴳⵉⵡⵉⵏ ⵏ ⵜⴳⵍⴷⵉⵜ ⵉ ⵓⵙⴷⵓⵙ ⵏ ⵓⵎⵛⴰⴱⴱⴰⴽ ⴰⵏⴰⵎⵓⵏ ⴷ ⵓⴽⴰⵍⴰⵏ ⴳ ⵓⵙⴰⵜⵉ ⴳ ⵉⴼⵔⴳ ⴽⵓⵢⴰⵏ  ⵎⴰⵙ ⵉⴳⴰ ⴰⴳⵣⵣⵓⵎ ⵙⴳ ⴳⵉⵙ, ⴳ ⵜⵓⵛⵛⵉⵍⵉⵏ ⴷ ⵜⵣⵔⴼⴰⵏⵉⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵜⵔⵎⵙ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵏ ⴽⵕⴰⴹ ⵉⴳⵍⴷⴰⵏ ⵏⵏⵙ ⴳ ⵉⵎⵉⵥ ⵏ ⵜⵙⵉⵎⴰⵏⵜ ⵜⴰⵏⴰⵎⵓⵔⵜ ⵙ ⵜⵖⵏⵙⴰ ⵉⵃⵕⵕⴰⵏ, ⴰⵙⵙ ⴰⴷ ⴰⵏⴰⵡ ⴰⴷ ⴰⵔ ⵉⵜⵜⵓⵖⵔⵉ ⴳ ⵓⵎⴰⴹⴰⵍ, ⴳ ⵓⵚⴽⵓ ⵏ ⵜⵎⵔⵙⴰⵍ ⴷ ⵓⵙⴽⵔ ⵏ ⵡⴰⵏⴰⵡ ⴰⴷⵉⵎⵓⵇⵔⴰⵟⵉ ⴷ ⵓⵎⵔⵙⵍⴰⵏ, ⵙ ⵓⵎⵙⴰⵙⴰ ⴷ ⵓⵙⴽⵔ ⵏ ⵉⵎⵓⵔⵙⵏ ⵉⵅⴰⵜⴰⵔⵏ ⴳ ⵢⵉⴳⵔ ⵏ ⵓⵎⴰⵡⴰ ⴰⴷⵙⵍⴰⵏ ⵙ ⵓⴳⴳⵓⴳⵏ ⴷ ⵉⴱⵔⴷⴰⵏ ⴷ ⵉⴼⵜⴰⵙⵏⴷ ⵉⵣⴰⴳⴳⵯⵣⵏ, ⴳ ⵢⵉⴳⵔ ⵏ ⵜⵏⵓⴼⴰ ⵜⵉⴷⵙⵍⴰⵏⵉⵏ, ⵙ ⵜⵉⴼⴰⵡⵜ ⴷ ⵡⴰⵎⴰⵏ ⵏ ⵜⵉⵙⵙⵉ ⴷ ⵓⴷⵡⴰⵙ ⴷ ⵓⵙⵙⵍⵎⴷ. ⵙ ⵓⵙⴷⴷⴻⴷ, ⵉⴳⴰ ⵓⴼⵔⴰⴳ ⵏ ⵡⴰⵏⴰⵡ ⴰⴷ ⴰⵎⵖⵔⵉⴱⵉ  ⴷ ⵓⵙⵎⵖⵔ ⵏⵏⵙ, ⵜⴰⵣⵣⵉⴳⵣⵜ ⴰⴷ ⵜⴱⵉⴷⴷ ⴼ ⵓⵙⴳⵓⴷⵉ, ⵉⵇⵇⴰⵏ ⴰⴷ ⴳⵉⵙ ⵢⴰⵎⵣ ⴽⵓ ⵢⴰⵏ, ⵙ ⵓⴼⵔⴰⴽ ⵏ ⵉⵎⵖⵔⵉⴱⵉⵢⵏ ⵎⴰⵙ ⵉⴳⴰ ⵡⵉⵏⵙⵏ ⴷ ⵡⵉⵏ ⵉⵏⴰⵔⵓⵣⵏ ⵏⵏⵙ. ⵙ ⵖⵎⴽ ⴰⴷ ⴰⴼ ⵉⵙⵜⴰⵡⵀⵎⵎⴰ ⵓⵙⵙⴰⵔⵓ ⴳ ⵉⵙⵓⴳⴰⵎ ⵉⵏⴼⴳⴰⵏⵏ.

ⵇⵇⴰⵏ ⴷ ⵉⵍⴰⵡⴰⵢⵏ ⵏ ⵉⴳⵔⴰⵏ ⴷ ⵉⴷⵖⴰⵔⵏ ⵍⵍⵉ ⵔⴰⴷ ⵉⵍⴷⵉ ⴰⵍⴰⵡⴰⵢ ⵏ ⵜⴳⵎⵉ, ⴰⵎⵣⴰⵔⴰⵢ ⴰⵅⴰⵜⴰⵔ ⵉⵍⵍⴰⵏ ⴳ ⵉⵣⵎⴰⵣ ⵏ ⵜⵡⵉⵣⵉ, ⵓⵔ ⵔⴰⴷ ⵢⴰⵡⵙ ⴳ ⵓⵙⴽⵔ ⵏ ⵓⵎⵛⴰⴱⴱⴰⴽ ⴰⵏⴰⵎⵓⵏ ⵍⵍⵉ ⵏⵔⴰ, ⵖⵎⴽ ⴰⵏⵏ ⴰⴼ ⴷ ⵜⵇⵇⴰⵏ ⵜⵣⵔⴼⵜ ⵜⴰⴷⵖⴰⵔⴰⵏⵜ ⵉⵎⵓⵏⵏ ⴷ ⵜⵣⵔⴼⵜ ⵜⴰⵏⴰⵎⵓⵏⵜ.

ⴰⵔ ⵎⵎⴰⵍⴰⵏⵜ ⴽⵔⴰ ⵏ ⵜⵎⵙⴰⵔⵉⵏ ⵣⵔⵉⵏⵉⵏ ⵎⴰⵙ ⵜⴻⵟⵟⴰⴼ ⵜⵎⴰⵣⵉⵔⵜ ⵏⵏⵖ ⵜⵉⵥⴹⴰⵕⵉⵏ ⵅⴰⵜⵔⵏⵉⵏ. ⴰⵢⵍⵍⵉ ⵏⵉⵜ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ, ⵙ ⵜⵡⵡⵓⵔⵉ ⵜⴰⵎⵣⵡⴰⵔⵓⵜ ⴳ ⵓⵙⴱⴷⴷⵉ ⵏ ⵓⴱⴰⵢⵢⵓⵔ ⵏ ⴽⵓⴼⵉⴷ 19, ⴷ ⵎⴰⴷ ⵜⵙⴽⵔ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⵉ ⵜⵓⵡⵊⵊⴰ ⵏ ⵓⴹⴰⵕ ⴳ ⵓⵖⵔⵔⴰⴼ ⵏ ⵓⵎⴰⴹⴰⵍ ⴳ ⵇⴰⵟⴰⵕ, ⵍⵍⵉⵖ ⵙⵙⵎⵔⵏ ⵉⵎⵖⵔⵉⴱⵉⵢⵉⵏ, ⵉⵎⴰⵔⵓⵔⵏ ⴷ ⵓⴳⴷⵓⴷ, ⴰⵎⴰⴹⴰⵍ. ⴳ ⵓⵎⵏⵉⴷ ⵢⴰⴹⵏⵉⵏ, ⵎⵍⴰⵏ ⵉⵎⵖⵔⵉⴱⵉⵢⵏ ⵉⴳⵯⵉⵢⵢⴰ ⵏⵏⵙⵏ ⴳ ⴱⵕⵕⴰ, ⵎⵍⵉⵏ ⵎⴰⵙ ⴰ ⵉⵜⵜⴰⵔⵓ ⵍⵎⵖⵔⵉⴱ ⵜⵉⵙⵓⴳⴰⵔ ⴰⵜⵜⵓⵢⵏⵉⵏ. ⵎⴰ ⴰⵏⵏ ⴰⵏⴰⵡⵏ ⵏ ⵉⵎⵓⵔⵙⵏ ⵏ ⵡⴰⵢⴷⴰ ⴰⵏⴼⴳⴰⵏ ⴰⵎⵖⵔⵉⴱⵉ, ⵓⵔ ⵔⴰⴷ ⵉⵏⴽⵔ ⴰⴱⵍⴰ ⵡⴰⴷ ⵜⵏ ⵓⵔ ⵉⵔⵉⵏ, ⴷ ⵡⴰⴷ ⵉⴳⴰⵏ ⵎⴳⴰⵍ ⵏ ⵓⵣⵔⴼ ⵏⵏⵖ ⴳ ⵜⵣⵣⵉⴳⵣⵜ ⴷ ⵜⴷⵉⵎⵓⵇⵔⴰⵟⵉⵜ ⴷ ⵓⵙⴷⵖⵔ ⴰⴳⵔⴰⵖⵍⴰⵏ, ⵍⵍⵉⵖ ⵜⵜⵓⵏ ⵎⴰⵙ ⵏⴳⴰ ⵜⴰⵎⵜⵜⵉ ⵉⴱⴷⴷⵏ ⴳ ⵓⵎⵣⵔⵓⵢ ⴷⴰⵜ ⵏ ⵜⴳⵍⴷⴰⵢ ⵅⴰⵜⵔⵏⵉⵏ ⵃⵎⴰ ⴰⴷ ⵉⵖⴰⵎⴰ ⵍⵎⵖⵔⵉⴱ ⴰⵡⴰⵏⴽ ⵏ ⵓⵎⵣⵔⵓⵢ ⵙ ⵜⵎⵥⵍⴰⵢ ⵏⵏⵙ ⵜⵉⵎⵥⵍⴰⵢ

ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ.