ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵕⵥⵥⵓⵎ ⵏ ⵓⵎⵙⴰⵡⴰⵍ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵏ ⵉⵄⵔⵔⵉⵎⵏ

ⵎⴰⵙⵙ ⵏⵏⵄⵎⴰ ⵎⵉⵢⵢⴰⵕⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵔ

ⵎⴰⵙⵙ ⴼⵓⵔⵜⵉⵏ ⵛⴰⵔⵓⵎⴱⵉⵔⴰ, ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ,

ⵎⴰⵙⵙ ⴰⵎⴰⵡⵙⴰⵙ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ

ⵉⵏⴳⴳⵯⴰ ⴷ ⵜⵏⴳⴳⵯⴰ ⵉⴱⵕⵍⴰⵎⴰⵏⵉⵢⵉⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴷⴰⵔⵉ ⵜⵓⵎⵔⵜ ⵉⵥⵍⵉⵏ ⵍⵍⵉⵖ ⵔⴰⴷ ⵕⵥⵎⵖ ⴷⵉⴷⵓⵏ ⴰⵎⵙⴰⵡⴰⵍⴰ ⴰⴱⵕⵍⴰⵎⴰⵏⵉⵉ ⴳ ⵜⵓⵙⵜⵍⵜ ⵏⵏⵙ ⵜⵉⵙ ⵙⵏⴰⵜ, ⵍⵍⵉ ⵜⵔⴰⵎ ⴰⴷ ⵉⴳ ⴽⵏⵏⵉⵏ ⵉⴳⵎⴰⵎⵏ ⵏ ⵓⴳⵔⴰⵡ ⵏ ⵉⵄⵔⵔⵉⵎⵏ ⴳ ⵓⴱⵕⵍⴰⵎⴰⵏ ⴰⴼⵔⵉⵇⵉ, ⵉⵍⴻⵍⵍⵉ ⵉⵏⵏⵓⵕⵥⵎⵏ. ⵜⵓⵎⵔⵜ ⴰⴷ ⵍⵍⵉ ⵉⴳⴰ ⵍⵃⴰⵍ ⴰⴳⵔⴰⵡ ⴰⴼⵔⵉⵇⵉ ⵉⵙⴰⵡⴰⵍ ⴼ ⵜⵎⵙⴰⵔⵉⵏ ⵣⴷⵉⵏⵉⵏ ⴷ ⵓⵎⵏⴰⴹ ⴰⴼⵔⵉⵇⵉ ⴷ ⵓⴳⵔⴰⵖⵍⴰⵏ ⵏ ⵖⵉⵍⴰⴷ, ⵡⵉⵙ ⵙⵙⵉⵏ ⵍⵍⵉⵖ ⴳⴰⵏ ⵉⵄⵔⵔⵉⵎⵏ ⵡⵉⴷⴰ ⵓⵙⵉⵏⵉⵏ ⴰⵏⵣⴳⵓⵎ ⵏ ⵉⵎⵏⵥⴰⵡ, ⵉⵄⵔⵔⵉⵎⵏ ⵉⴼⵔⵉⵇⵉⵢⵏ ⵙⴽⴰⵔⵏⵉⵏ ⵜⴰⵙⵔⵜⵉⵜ ⴷ ⵜⵖⴰⵡⵙⴰ ⵜⵎⴰⵜⴰⵢⵜ.

ⵙⵙⵓⵔⴼⴰⵜ ⵉⵢⵉ, ⴳ ⵜⵣⵡⵉⵔⵉ, ⴰⴷ ⵙⵔⵓⵏ ⵙⵏⵓⴱⴳⵖ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵜⴰⵎⴰⵣⵉⵔⵜ ⵜⴰⴼⵔⵉⵇⵉⵜ ⵜⴰⵇⴱⵓⵔⵜ, ⵉⴱⴷⴷⵏ ⴷ ⵜⵎⵙⴰⵔⵉⵏ ⵜⵓⴷⴷⵉⵔⵉⵏ ⵏ ⵉⴼⵔⵉⵇⵢⴰ ⴷ ⵜⴳⵎⵉ ⵏⵏⵙ ⴷ ⵜⵣⵣⵉⴳⵣⵜ ⴷ ⵉⵣⵔⴼⴰⵏ ⵏⵏⵙ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.

ⵔⵉⵖ ⴰⴷ  ⵙⵓⵜⴳⵖ ⵉⵄⵔⵔⵉⵎⵏ ⵍⵍⵉ ⴳⴰⵏⵉⵏ ⵉⴳⵏⵙⴰⵙⵏ ⵏ ⵉⵄⵔⵔⵉⵎⵏ ⵏ ⵉⴼⵔⵉⵇⵢⴰ ⴼⵔⴽⵏⵉⵏ ⵙ ⵜⵎⴷⵔⴰⵡⵜ ⴳ ⵜⵖⴰⵡⵙⴰ ⵜⴰⵎⴰⵜⴰⵢⵜ, ⵙ ⵜⵖⴰⵔⴰⵙⵜ ⵜⴰⵙⵔⵜⴰⵏⵜ ⴷ ⵜⵉⵕⵡⵉ ⵏ ⵜⵡⵡⵓⵔⵉ ⵜⴰⵎⵔⵙⵍⴰⵏⵜ ⴷ ⵜⵙⵔⵜⴰⵏⵜ, ⵉⵜⵜⵏⵄⴰⵕⵏ ⵉ ⵜⵎⵙⴰⵔⵉⵏ ⵏ ⵓⵎⵏⵥⴰⵡ ⵏⵏⵙ ⴳ ⵓⵎⵏⴰⴷ ⴷ ⵓⵣⵎⵣ ⴳ ⵏⵙⵖⴰⵡⵙⴰ ⵙ ⵓⵙⵡⵓⵔⵉ ⵏ ⵉⵏⵎⴰⵏⴽⵏ ⵏ ⵓⵙⵖⵡⵏ.

ⵉⴷ ⵎⴰⵙⵙ ⵉⵏⵙⵙⵉⵅⴼⵏ

ⵎⴰⵙⵙ ⴰⵎⴰⵡⵙⴰⵙ

ⵉⵏⴳⴳⵯⴰ ⴷ ⵜⵏⴳⴳⵯⴰ ⵉⴱⵕⵍⴰⵎⴰⵏⵉⵢⵉⵏ

 ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

 ⵏⵎⵓⵏ ⴳ ⵓⵙⴰⵜⵉ ⵏ ⵓⵎⵙⴰⵡⴰⵍ ⵉⵏⵏⵓⵕⵥⵎⵏ ⵉ ⵜⵎⵙⴰⵔⵉⵏ ⵜⵓⴷⴷⵉⵔⵉⵏ ⵏ ⵓⵎⵏⵥⴰⵡ ⵏⵏⵖ. ⵜⴳⴰ ⵜⵏⴼⵔⵓⵜ ⵏ ⵓⵜⵛⵓ ⵢⴰⵜ ⵙⴳ ⵜⵏⴰⵥⴰⵕⵉⵏ ⵜⵉⵊⵢⵓⵙⵔⵜⴰⵏⵉⵏ, ⵉⴳⴰ ⵡⴰⵍⴰⵢ ⵏ ⵡⴰⵜⵉⴳⵏ ⵏ ⵓⵜⵛⵓ ⴰⵙⵙ ⴰⴷ ⵢⴰⵏ ⵓⴼⵔⴷⴰⵙ ⵇⴳ ⵓⵎⴹⴰⴽⴰⵕ ⴳ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⵓⵔ ⴳⴰⴷⴷⴰⵏⵉⵏ ⴷ ⵡⴰⵔⵜⵉⵣⵔⴼⴰⵏⵉⵏ. ⵙⵙⵓⵔⴼⴰⵜ ⵉⵢⵉ ⴰⴷ ⵙⴰⵇⵙⴰⵖ ⵎⴽⵍⵍⵉ ⵜⵙⴰⵇⵙⴰⵎ: ⵎⴰⴷ ⵉⵅⴰⵚⵚⴰⵏ ⵉⴼⵔⵉⵇⵢⴰ ⵃⵎⴰ ⴰⴷ ⵜⴻⵟⵟⵉⴼ ⵜⴰⵏⴼⵔⵓⵜ ⵏⵏⵙ ⴳ ⵓⵜⵛⵓ? ⵉⵙ ⴷ ⵓⵔ ⵜⴻⵟⵟⴰⴼ ⵜⵉⵥⴹⴰⵕⵉⵏ ⵅⴰⵜⴰⵔⵏⵉⵏ ⵃⵎⴰ ⴰⴷ ⵜⴻⵟⵟⵉⴼ ⵉⵙⵖⴰⵡⵙⴰⵙⴰⵜⵏ ⵏⵏⵙ ⴳ ⵓⵜⵛⵓ? ⴷ ⵉⵙⵖⴰⵡⵙⴰⵙⵜⵏ ⵏ ⴽⵉⴳⴰⵏ ⵏ ⵉⵎⴷⴷⵓⴽⴽⵯⵍⴰ ⵏⵏⵙ? ⵉⵙ ⴷ ⵓⵔ ⵜⴳⵉ ⴰⵎⵏⵥⴰⵡ ⵉⵟⵟⴰⴼⵏ 60 % ⴳⴰⵏⵉⵏ ⵉ ⵜⴼⵍⵍⴰⵃⵜ ⴳ ⵓⵎⴰⴹⴰⵍ?

ⵉⵖ ⵉⴳⴰ ⵍⵃⴰⵎ ⵜⵉⵍⴰⵡⵜ ⴷⴰⵔ ⴽⵉⴳⴰⵏ ⵏ ⵜⵎⵉⵣⴰⵔ ⵏ ⵓⵎⵏⵥⴰⵡ ⵏⵏⵖ ⵍⵍⵉ ⴷⴰⵔ ⵜⴰⵙⵙⴰⵙⵜ ⵏ ⵓⵙⵏⵣⵔⴼ ⴷ ⵜⵖⴰⵔⴰ, ⴽⵉⴳⴰⵏ ⴳⵉⵙⵏ ⵓⵔ ⵉⵟⵟⴰⴼ ⵉⵙⵓⴳⴰⵎ ⵏ ⵡⴰⵎⴰⵏ ⴳⴳⵓⵜⵏⵉⵏ ⵙⵖⴰⵡⵙⴰⵏⵉⵏ ⵙ ⵓⵙⵎⵓⵙⵙⵓ ⴷ ⵓⵙⵎⵓⵜⴳ ⴷ ⵓⵙⵎⵔⵙ ⵉⵥⵉⵍⵏ.

ⵉⴼⵔⵉⵇⵢⴰ ⵓⵔ ⵜⵜ ⵅⴰⵚⵚⴰⵏⵜ ⵜⵎⵢⵓⵔⵉⵏ ⴷ ⵜⴷⵍⵙⴰ ⵜⴰⵏⴼⵍⴰⵃⵜ ⴷ ⵉⵎⵙⵡⵓⵔⵉⵢⵏ ⴷ ⵜⵙⵓⴳⴰⵔ, ⵎⴰⵛⵛ ⵜⵙⵖⴰⵡⵙⴰ ⵙ ⵜⵏⵏⵓⴱⴹⴰ ⵉⵕⵡⴰⵏ ⴷ ⵜⴻⵜⵉⴽⵏⵓⵍⵓⵊⵉⵢⵉⵏ ⵜⵉⵎⴰⵢⵏⵓⵜⵉⵏ ⵍⵍⵉ ⵙⴽⴰⵔⵏⵜ ⵜⵓⴷⴷⵉⵔⵉⵏ ⵏ ⵜⵎⴳⵓⵔⵉ ⵟⵟⴰⴼⵏⵉⵏ ⵜⵎⴰⵙⴰⵢⵜ ⵏ ⵜⵏⴼⴳⵓⵔⵉⵏ ⴷ ⵜⵙⵔⵜⵉⵜ ⴳ ⵓⵙⵏⴰⵍ ⵏ ⵉⴼⵔⵉⵇⵢⴰ ⵙ ⵜⵎⴷⵔⴰⵡⵉⵏ ⵜⵉⵣⵔⴼⴰⵏⵉⵏ ⵜⵉⵎⵔⵙⵍⴰⵏⵉⵏ, ⵏⵜⵜⵏⵜⵉ ⵎⵓ ⵜⵜⵚⵉⵃⵉⵏ ⵉⵙⵓⴳⴰⵎ ⵉⴼⵔⵉⵇⵉⵢⵏ ⵖⵍⴰⵏⵉⵏ, ⵡⵉⵏ ⵉⵣⵓⵖⴰⵣ.

ⵉⴼⵔⵉⵇⵢⴰ ⵓⵔ ⵜⵜ ⵜⵅⴰⵚⵚⴰ ⵜⵥⴹⴰⵕⵜ, ⴷ ⵜⵎⵙⵓⵜⵍⵉⵏ ⵏ ⵓⵎⴰⵔⵙ ⵏ ⵜⵥⴹⴰⵕⵜ ⵜⴰⵎⴰⵢⵏⵓⵜ, ⵜⴻⵟⵟⴰⴼ ⴰⵢⴷⴰ ⴽⵓⵍⵍⵓ ⵉⵖⵍⴰ, ⵡⵉⵏ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵉⵏⵍⵉⵜⵏ, ⵏⵙⵙⵏ ⵎⴰⵙ ⴷ ⴰⵢⴷⴰ ⴰⵙⵉⵍⴰⵏ ⴳ ⵜⴳⵎⵉ ⵜⴰⵙⵓⵍⴰⵏⵜ, ⴳ ⵜⵣⵡⵉⵔⵉ ⵏⵏⵙ ⵜⵉⴳⵎⵉ ⵜⴰⵏⴼⵍⴰⵃⵜ, ⵉⴳⴰⵜ ⵡⴰⵢⴷⴰ ⴰⵏⴼⴳⴰⵏ, ⴰⵢⵍⵍⵉ ⵙⵙⵎⵖⵔⵏⵜ ⵜⴷⵍⵙⵉⵡⵉⵏ ⵜⵉⴼⵔⵉⵇⵉⵢⵉⵏ ⴱⴰⵀⵔⴰ ⴳⴰⵏⵉⵏ ⵜⵉⵎⵏⵏⴰⵡⵉⵏ.

ⵖⵎⴽ ⵍⵍⵉ ⵜⴻⵟⵟⴰⴼ ⵉⴼⵔⵉⵇⵢⴰ ⵉⵙⴳⴱⵔⵏ ⵏ ⵢⵉⵍ ⵉⵅⴰⵜⴰⵔⵏ, ⴳⴰⵏⵉⵏ ⴰⵖⴱⴰⵍⵓ ⴰⵎⵇⵔⴰⵏ ⵏ ⵓⵜⵛⵓ. ⵉⵟⵟⴰⴼ ⵓⵎⵏⵥⴰⵡ ⵏⵏⵖ 13 ⵏ ⵎⵍⵢⵓⵏ ⵏ ⵓⴽⵉⵍⵓⵎⵉⵟⵕ ⴳ ⵓⴷⵔⵓ ⴰⵢⵍⴰⵏ, ⴷ 6.5 ⵏ ⵎⵍⵢⵓⵏ ⵏ ⴽⵉⵍⵓⵎⵉⵟⵕ ⵏ ⵓⵊⴰⵕⵉⴼ ⴰⵎⵏⵥⴰⵡ , ⴷ 26 ⵏ ⵉⴼⴹ ⵏ ⴽⵍⵎ ⴳ ⵉⴼⵜⴰⵙⵏ, ⵍⵍⴰⵏ ⵉⵙⵓⴳⴰⵎ ⴳ ⵓⴷⵖⴰⵔ ⴰⴷ ⴰⵢⵍⴰⵏ ⵉⴳⴰⵏ ⵉⴳⵔ ⵏ ⵜⵉⵍⴰⵍ ⵅⴰⵜⵔⵏⵉⵏ ⴷ ⵉⵙⵏⴼⵍⵏ ⵉⵏⵙⴱⴰⴱⵏ ⵉⵎⵏⵥⴰⵡⵏ ⴷ ⵉⴳⵔⴰⵖⵍⴰⵏⵏ ⵉⵅⴰⵜⴰⵔⵏ ⵜⵜⴰⵡⵉⵏⵉⵏ ⵚⴰⵃⴰ.

ⵉⴳ ⵓⵙⵇⵙⵉ ⴰⵅⴰⵜⴰⵔ: ⵎⴰⵏ ⴰⴱⵔⵉⴷ ⵏ ⵓⵙⵏⴼⵍ ⵏ ⵜⵥⴹⴰⵕⵉⵏ ⴰⴷ ⵙ ⵉⵙⴳⴱⵔⵏ?

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⴷ ⵜⴰⵎⵔⴰⵔⵓⵜ ⴼ ⵓⵙⵇⵙⵉ ⴰⴷ ⵜⵍⵍⴰ ⴷ ⵜⵎⵢⵉⵎⴰⵏⵜ ⵏ ⵉⴼⵔⵉⵇⵢⴰ ⵙ ⵉⵎⴰⴷⴰⵏⵏ ⵏⵏⵙ ⴷ ⵉⵎⵙⵜⴰⵢⵏ ⵏⵏⵙ ⴷ ⵜⵎⵔⵙⴰⵍ ⵏⵏⵙ, ⴳ ⵜⵥⴹⴰⵕⵉⵏ ⴷ ⵓⵎⵙⴰⵙⴰ ⴰⵎⴳⵔⵓ ⵉ ⵓⵙⵙⴰⵔⵓ ⵏⵏⵙⵏ ⵉ ⵜⵏⵓⴼⴰ ⵏ ⵓⴼⵔⵉⵇⵢⴰ ⴷ ⵓⵙⵡⴰⵍⴰ ⵏ ⵜⵎⴽⵕⴰⴷ ⴼ ⵉⵙⵏⴼⴰⵔⵏ ⵏ ⵓⵚⴽⵓ ⴷ ⵓⵙⵎⵖⵔ ⴷ ⵜⵓⵎⵔⵜ ⵏ ⵉⵡⴷⴰⵏ, ⵓⵔ ⴷ ⴳ ⵉⵔⴱⴰⴱⵏ ⵍⵍⵉ ⵙⴽⴰⵔⵏⵉⵏ ⵎⴰⵔⵓⵔ ⴷⴰⵔ ⵉⵎⴰⴷⴰⵏⵏ.

ⵉⴷ ⵎⴰⵙⵙ ⵉⵏⵙⵙⵉⵅⴼⵏ

ⵎⴰⵙⵙ ⴰⵎⴰⵡⵙⴰⵙ

ⵉⵏⴳⴳⵯⴰ ⴷ ⵜⵏⴳⴳⵯⴰ ⵉⴱⵕⵍⴰⵎⴰⵏⵉⵢⵉⵏ

 ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵓⵔ ⴷ ⵖⴰⵙ ⵍⴰⵥ ⴰⴷ ⵉⴳⴰⵏ ⵜⴰⵏⴰⵥⴰⵕⵜ ⴷⴰⵜ ⵏ ⵓⵎⵏⵥⴰⵡ ⵏⵏⵖ, ⵎⴰⵛⵛ ⵀⴰⵜⵉ ⵜⴳⴰ ⵜⴰⵏⴳⴰⵙⵜ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⵍⵍⵉ ⴼ ⵓⵔⵜⴳⵉ ⵜⴰⵎⵙⴰⵢⵜ, ⵓⵔ ⴷⴰⵔⵙ ⵉⵙⴳⴱⵔⵏ ⴷ ⵉⵙⵓⴳⴰⵎ ⴷ ⵜⵜⴽⴽⴰⵏⵉⵏ ⵜⵉⵎⴳⵓⵔⴰ ⵙⴽⴰⵔⵏⵉⵏ ⴰⵙⴳⵓⴼⵙ ⵍⵍⵉ ⵓⵔ ⵜⵙⴽⵉⵔ (ⴰⵔ ⵜⵙⴽⴰⵔ ⵉⴼⵔⵉⵇⵢⴰ ⵖⴰⵙ 4 % ⵏ ⵉⴳⴰⵣⵏ ⵙⴽⴰⵔⵏⵉⵏ ⴰⵎⵓⴽⵔⵉⵙ ⵏ ⵜⵔⵖⵉ), ⵜⴳ ⵓⵍⴰ ⵜⴰⵏⴳⴰⵙⵜ ⵏ ⵡⴰⵔⴰⵔⴳⵉⴳ ⴳ ⴽⵉⴳⴰⵏ ⵏ ⵜⵙⴳⴰ, ⴷ ⵜⴳⵏⵙⴰⵙⵜ ⵏ ⵓⵥⴰⵥⵓ ⵏ ⵓⵕⵟⵟⴰⵍ ⵏ ⴱⵕⵕⴰ, ⴷ ⵓⵏⴳⴰⵙ ⵏ ⵓⵏⴳⵔⴰⵡ ⴰⴷⵎⵙⴰⵏ ⴰⴳⵔⴰⵖⵍⴰⵏ ⵡⴰⵔⵓⵍⴳⵉⵏ ⴷ ⵡⴰⵔ ⵏ ⵜⵡⵉⵣⵉ, ⴳⵉⵏⵜ ⵜⵉⵎⵏⵜⵍⵉⵏ ⵜⵜⴰⵡⵙⵏⵉⵏ ⴳ ⵓⵥⵍⴰⴹ ⴷ ⵓⵛⵃⵓ ⵏ ⵓⵜⵛⵓ.

 ⵉⵍⵍⴰ ⵓⵎⵏⵥⴰⵡ ⵏⵏⵖ ⴳ ⵓⴳⵏⵙ ⵏ ⵓⵯⵎⵃⵉⵣⵡⴰⵔ ⴰⴳⵔⴰⵖⵍⴰⵏ ⴰⵅⴰⵜⴰⵔ, ⵓⵔ ⴰⵙ ⵉⵜⵜⵚⵉⵃⵉ ⴳ ⵓⵙⵖⵏⵣⵉ ⴰⴳⵔⴰⵖⵍⴰⵏ ⵉⵜⵜⴰⵡⵉⵏ ⵜⵉⴳⵎⵉ ⴳ ⵉⵙⴰⵢⵔⵓⵔⵏ ⵢⴰⴹⵏⵉⵏ ⴳ ⵓⵎⴰⴹⴰⵍ, ⵖⵎⴽ ⴰⵏⵏⴰ ⴰⴼ ⴷ ⵉⵇⵇⴰⵏ ⵓⵙⵖⵔ ⵏ ⵉⵙⵏⴼⵍⵏ ⵊⴰⵔ ⵜⵉⵎⵉⵣⴰⵔ ⵏ ⵉⴼⵔⵉⵇⵢⴰ.

ⵉⵙⵖⴰⵡⵙⴰ ⵓⵎⵏⵥⴰⵡ ⵏⵏⵖ ⵓⵍⴰ ⵙ ⵜⴷⵔⵉⵎⵜ ⴷ ⵓⵙⵙⴰⵔⵓ ⴳ ⵜⴼⵍⵍⴰⵃⵜ ⵉ ⵓⴼⴰⵔⵙ ⵏ ⵓⵜⵛⵓ ⴷ ⵜⵏⴼⵔⵓⵜ ⵏⵏⵙ, ⵙ ⵓⵙⴱⴷⴷⵉ ⵏ ⵍⴰⵥ. ⵉⵡⴰⵏⴽⵏ ⵏ ⵉⵥⵥⵍⵎⴹ  ⴷ ⵉⵡⴰⵏⴽⵏ ⵉⵏⴱⵖⵓⵔⵏ ⵢⴰⴹⵏⵉⵏ ⴳ ⵓⵎⴰⴹⴰⵍ, ⵖⵓⵔⵙⵏ ⵜⵓⴳⵜ ⴳ ⵓⵜⵛⵓ ⴳ ⵓⵣⵎⵣ ⴳ ⵜⵍⵍⴰ ⵜⴰⵙⵙⴰⵙⵜ ⵏ ⵍⴰⵥ ⴷ ⴳⴰⵔ ⵓⵜⵛⵓ  ⴷⴰⵔ ⴽⵉⴳⴰⵏ ⵏ ⵉⵎⴰⴷⴰⵏⵏ ⵙ ⵓⵖⵉⵍⵓⴼ. ⵎⴰⴷ ⵉⴳⴰⵏ ⵎⵍⵢⴰⵕ ⵏ ⵟⵓⵏ ⵏ ⵓⵜⵛⵓ ⴰⵔ ⵏ ⵟⵟⴰⵕⵏ ⴳ ⵡⴰⵔⵔⴰⵣ ⴽⵓ ⴰⵙⴳⴳⵯⴰⵙ, ⴰⵢⵍⵍⵉ ⵉⵥⴹⴰⵕⵏ ⴰⴷ ⵉⴳ ⵓⵜⵛⵓ ⵏ ⵎⵍⵢⴰⵕ ⵏ ⵓⴼⴳⴰⵏ.

ⵓⵔ ⵏⴻⵍⵍⵉ ⴳ ⵓⵎⵏⴰⴹ ⵏ ⵜⵉⴽⴽⵉ, ⵎⴰⵛⵛ ⵜⵉⵖⴰⵡⵙⵉⵡⵉⵏ ⴰⴷ ⴰⵔ ⵙⴰⵙⴰⵏⵜ ⴰⵜⵉⴳⵏ ⴷ ⵜⵎⵉⵜⴰⵔ ⵏ ⵜⵡⵉⵣⵉ ⴷ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵓⴼⵔⴰⴽ ⴰⵎⴰⴷⵍⴰⵏ ⴷ ⵉⵎⴰⵏ ⴰⴼⵔⵉⵇⵉ, ⴰⵢⵍⵍⵉ ⵏⵉⵜ ⵉⴼⴰⵡⵏ ⴳ ⵓⵣⵎⵣ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⵍⵍⵉⵖ ⵜⵓⵜⵜⵊⴰ ⵉⴼⵔⵉⵇⵢⴰ ⵡⴰⵃⴷⵓⵜ ⴷⴰⵜ ⵏ ⵓⴱⴰⵢⵢⵓⵕ ⵙ ⵜⵥⴹⴰⵕⵉⵏ ⵏⵏⵙ ⴷⵔⵓⵙⵏⵉⵏ, ⵉⵍⵉⵏⵜ ⵜⵉⵏⵉⵎⴰⵏⵉⵏ ⵜⵉⵏⴰⵎⵓⵔⵉⵏ ⴷⴰⵔ ⵡⵉⴷⴰ ⵟⵟⴰⴼⵏⵉⵏ ⴽⵉⴳⴰⵏ ⵏ ⵜⵥⴹⴰⵕⵉⵏ ⴷ ⵉⵙⵓⴳⴰⵎ.

ⴳ ⵓⵎⵏⴰⴹ ⴰⴷ, ⵉⵇⵇⴰⵏⴷ ⵓⵏⵄⴰⵕ ⴰⴳⵔⴰⵖⵍⴰⵏ ⵉ ⵜⵣⵔⴼⵜ ⵏ ⵓⵏⵣⵡⵉ ⴷ ⵓⵜⵛⵓ ⴳ ⵉⴼⵔⵉⵇⵢⴰ, ⴷ ⵜⵎⴷⵔⴰⵡⵉⵏ ⵜⵉⵣⵔⴼⴰⵏⵉⵏ  ⴷ ⵓⵙⵎⴰⵜⵜⵉ ⴰⵜⵉⴽⵏⵓⵍⵓⵊⵉ ⵉⵜⵜⴰⵡⵙⵏ ⴳ ⵓⴼⴰⵔⵙ ⴰⵏⴼⵍⴰⵃ, ⴷ ⵡⴰⵔ ⴰⵙⵎⵔⵙ ⵏ ⵉⵙⵍⴽⵉⵏⵏ ⵏ ⵜⵡⴰⴼⵉⵜ ⵉ ⵓⴱⵣⵣⴻⵣ ⴰⵥⵕⴼⴰⵏ ⴷ ⵓⵙⵔⵜⴰⵏ, ⴷ ⵓⵙⵎⴰⵜⵜⵉ ⵏ ⵉⴷⵔⵉⵎⵏ ⵉ ⵓⵙⵙⵥⵕⴼ ⵏ ⵉⵙⵏⴼⴰⵔⵏ ⵉⵏⴼⵍⴰⵃⵏ ⵉⴼⵔⵉⵇⵉⵢⵉⵏ ⵉⵅⴰⵜⴰⵔⵏ ⴷ ⵉⵙⵜⵔⴰⵜⵉⵊⵉⵢⵏ.  

ⴳ ⵓⴳⵯⵏⵙ ⴰⴼⵔⵉⵇⵉ, ⵏⵙⵖⴰⵡⵙⴰ ⵙ ⵓⵙⵡⵓⴷⴷⵓ ⵉ ⵜⴼⵍⵍⴰⵃⵜ ⵜⴰⵜⵔⴰⵔⵜ ⵉⵙⵓⵍⵏ, ⴷ ⵜⵎⴷⵔⴰⵡⵉⵏ ⵊⴰⵔ ⵉⴳⵔⴰⵏ ⴰⵎⴰⵜⴰⵢ ⴷ ⵓⵙⵍⵉⴳ, ⴷ ⵓⵏⵏⵓⵕⵥⵎ ⵏ ⵉⴳⴰⴷⴰⵣⵏ ⵉⴼⵔⵉⵇⵉⵢⵏ ⴷ ⵓⵙⴷⵓⵙ ⵏ ⵉⵙⵏⴼⵍⵏ ⵉⵡⵏⴹⴰⵏⵏ, ⵏⵙⵖⴰⵡⵙⴰ ⵓⵍⴰ ⵙ ⵓⵙⴷⵓⵙ ⵏ ⵜⴷⵎⵙⴰ ⵜⴰⴼⵏⵎⴰⵃⵜ ⴷ ⵜⵉⵏ ⵜⵎⵢⴰⵣⵜ, ⴷ ⵓⵙⵙⵥⵕⴼ ⵏ ⵉⵙⵏⴼⴰⵔⵏ ⵎⵥⵥⵉⵏⵉⵏ ⴳ ⵉⴼⵔⵉⵇⵢⴰ, ⴰⵢⵍⵍⵉ ⵔⴰⴷ ⵉⵙⵓⵊⵉⴷ ⴰⵜⵛⵓ ⴷ ⵜⵡⵡⵓⵔⵉ ⵏⵡ ⴰⴷⴷⵓⵔ.

ⵉⴷ ⵎⴰⵙⵙ ⵉⵏⵙⵙⵉⵅⴼⵏ

ⵎⴰⵙⵙ ⴰⵎⴰⵡⵙⴰⵙ

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵜⴰⵏⴼⵍⴰⵃⵜ ⵜⴰⵎⵣⵡⴰⵔⵓⵜ, ⵔⴰⴷ ⵉⵙⵔⵙ ⵜⵉⵔⵎⵉⵜ ⵏⵏⵙ ⴷⴰⵜ ⵏ ⴰⵢⵜⵎⴰⵙ ⵉⴼⵔⵉⵇⵉⵢⵏ, ⵉⵣⵣⵉⴳⵣ ⵓⵍⴰ ⴳ ⵓⵎⵢⴰⵡⴰⵙ ⴷ ⵓⵙⵏⴰⵍ ⵏⵏⵙⵏ ⵉ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ ⵉⴳⴳⵓⵜⵏ ⵉⵜⵜⵓⵇⴰⵔⵏ ⴰⵡⵏⴰⴹ.

ⴳ ⵓⵎⵏⴰⴹ ⴰⴷ, ⴰⵔ ⴷ ⵏⵙⵙⴽⵯⵜⵉ ⵜⴰⵙⵏⵜⴰⵢⵜ ⵍⵍⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴰⴽⴷ ⴰⵢⵜⵎⴰⵙ ⵉⴼⵔⵉⵇⵉⵢⵏ ⵍⵍⵉ ⵉⵜⵜⵓⵙⵙⴰⵙⵏ ⵙ ”ⵓⵙⵎⵙⴰⵙⴰ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ”, ⴳ ⵓⴳⵔⴰⵡ ⴰⴳⵔⴰⵖⵍⴰⵏ ⵏ ⵓⵏⵣⵡⵉ ⵉⵍⵍⴰⵏ ⴳ ⵏⵓⵡⴰⵏⴱⵉⵔ 2016 ⴳ ⵡⴰⵎⵓⵔ ⵏ ⵡⴰⴽⵓⵛ, ⵍⵍⵉ ⵉⵡⴰⵜⵜⵙⵏ ⴰⵍⴰⵢ ⵏ ⵜⵏⴼⵔⵓⵜ ⵏ ⵓⵜⵛⵓ ⵍⵍⵉⵖ ⵉⴳⴰ ⴱⴰⴱ ⵏ ⵡⴰⴷⴷⵓⵔ ⴰⵎⵣⵡⴰⵔⵓ ⵉⵏⵏⴰⵏ ⵎⴰⵙ ⵜⴳⴰ ⵜⴰⵏⴰⵥⴰⵕⵜ ⵜⴰⵅⴰⵜⴰⵔⵜ ⴷⴰⵜ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ. 

ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ: “ⵎⴽ ⵍⵍⵉ ⴰⴽⴽⵯ ⵏⵏⵙ, ⵓⵔ ⴷ ⵍⴳⴰⵣ ⴷ ⵓⴱⵉⵟⵕⵓⵍ ⴰⵔ ⴰⴷ ⵉⵔⴰⵔ ⵉ ⵉⵙⵖⴰⵡⵙⴰⵜⵏ ⵏⵏⵖ ⵉⴷⵙⵍⴰⵏⵏ ⴳ ⵓⵜⵛⵓ. ⵢⴰⴽ ⵜⴳⴰ ⵜⵏⴼⵔⵓⵜ ⵏ ⵓⵜⵛⵓ ⵜⴰⵏⴰⵥⴰⵕⵜ ⵜⴰⵅⴰⵜⴰⵔⵜ ⴷⴰⵜ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ?

ⵎⴽ ⴰⴷ ⴰⵜ ⵜⴳⴰ ⵜⵙⵏⵜⴰⵢⵜ ⵏ ⵓⵙⵎⵙⴰⵙⴰ ⴱ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ ⴷ ⵉⵙⵏⴼⵍⵏ ⵏ ⵓⵏⵣⵡⵉ, ⵉⵜⵜⵓⵙⵙⴰⵏ ⵙ (Triple A) ⵍⵍⵉ ⵏⵕⵥⵎ ⵙ ⵜⵎⵍⴷⴰ ⵏ ⵓⴳⵔⴰⵡ ⵏ ⵓⵏⵣⵡⵉ“ⴽⵓⴱ 22”, ⵜⴳⴰ ⵜⴰⵙⵏⵜⴰⵢⵜ ⵉⵙⵎⵓⵏⵏ ⵜⴰⵎⵔⴰⵔⵓⵜ ⵉⴼⴰⵡⵏ ⵜⴰⵎⵣⵡⴰⵔⵓⵜ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ ⴳⴰⵏⵉⵏ ⵜⵉⵏ ⵉⵙⵏⴼⵍⵏ ⵉⵏⵣⵡⴰⵢⵏ.

ⵍⵍⵉ ⵖ ⵜⵜ ⵏⵕⵥⵎ, ⵜⵉⵡⵉ, ⵜⵙⵏⵜⴰⵢ, ⴰⵙⵏⴰⵍ ⵏ 30 ⵏ ⵜⵎⴰⵣⵉⵔⵜ.

ⵜⵡⴰⵜⵜⵙ ⵜⵙⵏⵜⴰⵢⵜ (Triple A) ⴰⵙⵓⵊⴷ ⵏ ⵉⵙⵓⴳⴰⵎ ⵏ ⵉⴼⵔⵉⵎⵏ ⴳⵓⵜⵜⵏⵉⵏ ⵉ ⵓⵙⴽⵔ ⵏ " ⵓⵙⵎⵙⴰⵙⴰ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ ⵎⵥⵥⵉⵏ”,   ⵔⴰⴷ ⵜⴹⴼⵕ ⵓⵍⴰ ⴰⵙⴳⵉⴷⴷⵉ ⴷ ⵓⵣⵓⵛⵛⵍ ⵏ ⵉⵙⵏⴼⴰⵔⵏ ⵉⵏⴼⵍⴰⵃⵏ ⵙ ⴽⴽⵓⵥ ⵏ ⵉⵖⴰⵡⴰⵙⵏ: 

- ⴰⵙⵡⵓⴷⴷⵓ ⴰⵙⵏⵍⵍⵉ ⵏ ⵡⴰⴽⴰⵍ,

- ⵉⵎⵉⵥ ⴰⵙⵓⵍⴰⵏ ⵏ ⵡⴰⵎⴰⵏ ⵜⵜⵓⵙⵎⵔⴰⵙⵏⵉⵏ ⵖ ⵜⴼⵍⵍⴰⵃⵜ,

- ⵜⴰⵎⵙⵙⵓⴳⵓⵔⵜ ⵏ ⵉⵎⵉⵣⵉⵢⵏ ⵏ ⵓⵡⵏⴹⴰⵏ,

- ⴰⵙⵙⵥⵕⴼ ⵏ ⵓⵎⵢⴰⵡⴰⵙ ⵉ ⵉⴷ ⴱⴱⴰ ⵏ ⵉⵙⵏⴼⴰⵔⵏ ⵎⵥⵥⵉⵏⵉⵏ”.

ⵉ ⵓⵙⵏⴰⵍ ⵏ ⵓⵙⵡⴰⵍⴰ ⴷ, ⵉⵙⵔⵙ ⵍⵎⵖⵔⵉⴱ ⵜⵉⵥⴹⴰⵕⵉⵏ ⵅⴰⵜⵔⵏⵉⵏ ⵍⵍⵉ ⵉⵟⵟⴰⴼ ⴳ ⵢⵉⴳⵔ ⵏ ⵓⴼⴰⵔⵙ ⵉ ⵓⵙⵎⵖⵔ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ ⵙ ⵉⵙⵏⴼⴰⵔⵏ ⵏ ⵓⵙⵉⵔⴰ ⴰⵛⴰⵔⵉⴼ ⵏ ⵍⴼⵓⵙⴼⴰⵟ, ⴷ ⵜⴳⵯⵎⵎⴰ ⵜⵉⵏⴼⵍⴰⵃⵉⵏ ⵏ ⵉⴼⵔⵉⵇⵢⴰ, ⴷ ⵓⵙⵔⵙ ⵏ ⵜⵙⵓⴳⴰⵔ ⵜⵉⵎⵖⵔⵉⴱⵉⵢⵉⵏ ⴷⴰⵜ ⵏ ⴽⵉⴳⴰⵏ ⵏ ⵉⵎⴷⴷⵓⴽⴽⵯⴰⵍ.

ⵉⵙⵎⴷ ⵡⴰⵡⴰⵍ ⴰⴳⵍⴷⴰⵏ ⵍⵍⵉ ⵉⵙⴳⵣⵍⵏ ⵓⴳⴳⴰⵔ ⵏ ⵙⵎⵎⵓⵙ ⵏ ⵉⵙⴳⴳⵯⴰⵙⵏ ⵜⵉⵡⵉⵣⵉ ⴷ ⵓⵙⵎⴰⵇⵇⵍ ⵏ ⵍⵎⵖⵔⵉⴱ ⴰⵎⵣⵡⴰⵔⵓ ⵉ ⵜⵎⵓⴽⵔⵉⵙⵜ ⵏ ⵓⵜⵛⵓ ⴷ ⵜⵔⵙⴰⵍ ⵏ ⵜⵉⵍⵉⵜ ⵏⵜ ⴼⵍⵍⴰⵃⵜ ⵜⴰⴼⵔⵉⵇⵉⵜ  ⵍⵍⵉ ⵙ ⵏⵙⵖⴰⵡⵙⴰ ⴰⵙⵙ ⴰⴷ ⵉ ⵜⴰⵏⵏⴰⵢⵜ ⵏⵏⵙ ⴰⴷ ⵜⴳ ⵜⵉⵍⴰⵡⵜ ⵉⴼⴰⵡⵏ ⵉⴼⵔⴳⵏ ⵉⴼⵔⵉⵇⵢⴰ ⵙⴳ ⵍⴰⵥ ⴷ ⵓⵥⵍⴰⴹ.

ⵉⴷⴳⴰⵎ, ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵜⴰⴼⴼⵓⴳⵍⴰ ⵏ ⵓⵙⵎⵏⵉⴷ ⵏ ⵓⵖⴰⵡⴰⵙ ⴰⵎⴰⵢⵏⵓ ⵏ ⵓⵙⵙⴰⵔⵓ ⴰⵣⴳⵣⴰⵡ ⵏ ⵓⵙⵉⵔⴰ ⴰⵛⴰⵔⵉⴼ ⵏ ⵍⴼⵓⵙⴼⴰⵟ, ⴷ ⵓⵣⵎⵎⴻⵎ ⵏ ⵜⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ ⵊⴰⵔ ⵜⵏⴱⴰⴹⵜ ⴷ ⵓⵙⵉⵔⴰ ⴰⴷ ⵉⵣⴷⵉⵏ ⴷ ⵓⵖⴰⵡⴰⵙ, ⵙ ⵓⵙⵙⴰⵔ ⵏ 13 ⵎⵍⵢⴰⵕ ⴷⵓⵍⴰⵕ ⵉ ⴽⴽⵓⵥ ⵉⵙⴳⴳⵯⴰⵙⵏ, ⵉ ⵡⴰⵍⴰⵢ ⵏ ⵜⵙⵓⴳⴰⵔ ⵏ ⵓⴼⴰⵔⵙ ⵏ ⵍⴰⵏⴳⵔⵉⵢⴰⵜ ⴷ ⵓⵙⵎⴰⵜⵜⵉ ⵙ ⵓⴼⴰⵔⵙ ⵉⵖⵓⵙⵏ ⴰⵣⴳⵣⴰⵡ. ⴰⵢⵍⵍⵉ ⵔⴰⴷ ⵢⴰⵡⵙ ⵉ ⵍⵎⵖⵔⵉⴱ ⴷ ⵉⵡⴰⵏⴽⵏ ⵉⵎⴷⴷⵓⴽⴽⵯⵍⴰ ⴳ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⴳ ⵜⵎⵜⵜⵉⵡⵉⵏ ⵏ ⵓⴼⴰⵔⵙ ⴰⵏⴼⵍⴰⵃ ⴷ ⵍⴰⵏⴳⵔⵉⵢⵜ ⴰⵔ 2040, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵜⵉⵍⵉⵜ ⵏ ⵜⵏⴼⵔⵓⵜ ⵏ ⵓⵜⵛⵓ ⴳ ⵉⴼⵔⵉⵇⵢⴰ ⴷ ⵜⵉⵍⵉⵜ ⵏ ⵓⵜⵛⵓ ⵙ ⵓⵥⴰⵥⵓ ⵉⴷⵔⵓⵙⵏ ⴳ ⵡⴰⵡⵏⴰⴹ ⴷ ⵓⴷⵔⵉⵎ ⴷ ⵓⴼⴳⴰⵏ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⴳⴰⵏ ⵉⵄⵔⵔⵉⵎⵏ ⵉⴼⵔⵉⵇⵉⵢⵏ ⵜⴰⵔⵙⵍⵜ ⵉ ⵜⴳⵎⵉ, ⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴷⴰⵜ ⵏ ⵉⵅⴰⵜⴰⵔⵏ ⵏ ⵉⴼⵔⵉⵇⵢⴰ ⴳ 2017: “ⵉⵎⴰⵍ ⵏ ⵉⴼⵔⵉⵇⵢⴰ ⵉⵣⴷⵉ ⴷ ⵉⵄⵔⵔⵉⵎⵏ ⵏⵏⵙ”ⴷ “ⵓⵛⵛⵉⵍ ⵏ ⵓⵙⵡⴰⵍⴰ ⵏ ⵡⴰⵢⴷⴰ ⴰⴷ ⴰⴷⵉⵎⵓⵖⵔⴰⴼⵉ ⵉ ⵓⵙⵎⵖⵔ ⵏ ⵓⵎⵏⵥⴰⵡ”.

ⵓⵔ ⵜⵍⵍⵉ ⵜⵓⵔⴷⴰ ⵎⴰⵙ ⵉⴳⴰ ⵡⴰⵔⵡⵓⵔⵉ ⵏ ⵉⵄⵔⵔⵉⵎⵏ ⵏ ⵉⴼⵔⵉⵇⵢⴰ ⵢⴰⵜ ⵙⴳ ⵜⵎⵓⴽⵔⵉⵙⵉⵏ ⵏ ⵓⵎⵏⵥⴰⵡ, ⵜⴳ ⴰⵙⴱⴷⴷⵉ ⵏ ⵡⴰⵢⴷⴰ ⵉⵖⵍⴰⵏ, ⵜⴳ ⵜⴰⵎⵏⵜⵉⵍⵉⵜ ⵍⵍⵉ ⵙⵙⵎⵔⴰⵙⵏ ⵉⵎⵓⵙⵙⵓⵜⵏ ⵏ ⵓⴱⵔⵙⵙⵉⵡⴷ ⴷ ⵓⵎⵣⴰⵔⴰⵢ ⴳⴰⵏⵉⵏ ⵓⵍⴰ ⵜⵉⵏⴰⵥⴰⵕⵉⵏ ⴷⴰⵜ ⵏ ⵜⵎⵉⵣⴰⵔ ⵏⵏⵖ.

ⴳⴰⵏ ⵉⵎⵓⵔⵙⵏ ⵏ ⵉⵄⵔⵔⵉⵎⵏ ⵉⴼⵔⵉⵇⵉⵢⵏ ⵣⵓⴳⵏⵉⵏ ⴷ ⵉⵏⵍⵉⵜⵏ ⵉⴼⵔⵉⵇⵉⵢⵏ ⵣⵓⴳⵏⵉⵏ, ⴳ ⵜⵎⴰⵙⵙⴰⵏⵜ ⴷ ⵜⴷⵍⵙⴰ ⴷ ⵜⵓⵏⵏⵓⵏⵜ, ⵜⴰⵎⵙⴰⵔⵜ ⵉ ⵓⵙⵓⵜⴳ ⵏ ⵜⵥⴹⴰⵕⵉⵏ ⵏ ⵉⵄⵔⵔⵉⵎⵏ ⵏⵏⵖ, ⵉ ⴽⵉⴳⴰⵏ ⵏ ⵜⵡⵡⵓⵔⵉ ⵜⴰⵖⵔⵎⴰⵏⵜ ⴷ ⵜⵙⵔⵜⴰⵏⵜ ⴷ ⵓⵙⵏⴰⵍ ⵏ ⵓⵚⴽⵓ ⵏ ⵓⵡⴰⵏⴽ ⴷ ⵜⵎⵔⵙⴰⵍ ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵜⵉⵜ ⴳ ⵓⵎⵏⵥⴰⵡ ⵙ ⵉⵎⵏⴰⴹⵏ ⵏⵏⵖ ⵉⵎⵣⵔⴰⵢⵏ ⴷ ⵜⵎⵢⵓⵔⵉⵏ ⴷ ⵜⴷⵍⵙⴰ ⵏⵏⵖ ⵜⴰⴼⵔⵉⵇⵉⵜ, ⵜⴳ ⵜⵉⵏ ⵜⵉⵔⴰⵜ ⵍⵍⵉ ⵙⵉⴳⴳⵉⵍⵉⵏ ⵉⵎⴰⴷⴰⵏⵏ ⵟⵟⴼⵏ ⵜⵜ ⵙ ⵓⵙⴳⵓⴷⵉ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵜⵍⵍⴰ ⴷⴰⵜ ⵏⵏⵓⵏ ⴽⵯⵏⵏⵉ ⵉⵄⵔⵔⵉⵎⵏ ⵏ ⵉⴼⵔⵉⵇⵢⴰ ⴷ ⵉⵎⵙⵜⴰⵢⵏ ⵏⵏⵙ ⵉⵙⵔⵜⴰⵏⵏ ⵜⴰⵎⴰⵙⴰⵢⵜ ⵏ ⵓⵙⵎⵖⵔ ⵏ ⵉⴼⵔⵉⵇⵢⴰ, ⴷ ⵜⵉⵍⵉⵜ ⵏ ⵉⴼⵔⵉⵇⵢⴰ ⵜⴰⵎⴰⵢⵏⵓⵜ, ⴷⴰⵔⵓⵏ ⵜⵉⵎⵙⵉⵔⵉⵏ ⵏ ⵓⵎⵣⵔⵓⵢ ⴰⴼⵔⵉⵇⵉ, ⴰⵢⵍⵍⵉ ⵉⵜⵜⴰⵙⵏ ⴳ ⵜⵉⵍⵉⵜ ⵏ ⵓⵡⵜⵜⴰⵙ ⴰⴷ. ⴷⴰⵜ ⵏ ⵜⵎⵙⴽⴰⵔ ⵏ ⵉⵎⵣⵡⵓⵔⴰ ⵏ ⵜⵙⵉⵎⴰⵏⵉⵏ ⵜⵉⴼⵔⵉⵇⵉⵢⵉⵏ: ⵉⴷ ⴱⴰⴱ ⵏ ⵡⴰⴷⴷⵓⵔ ⵉⴳⵍⵍⵉⵏⵏ ⵎⵓⵃⴰⵎⵎⴰⴷ ⵡⵉⵙ ⵙⵎⵎⵓⵙ ⴷ ⵍⵃⴰⵙⴰⵏ ⵡⵉⵙ ⵙⵉⵏ, ⵙⵉⴷⴰⵔ ⵙⵉⵏⴳⵓⵔ ⴷ ⴰⵃⵎⴰⴷ ⵙⵉⴽⵓⵜⵓⵔⵉ ⴷ ⴱⴰⵜⵔⵉⵙ ⵍⵓⵎⵓⵎⴱⴰ ⴷ ⴽⵡⴰⵎⵉ ⵏⵉⴽⵔⵓⵎⴰ ⴰⵃⵎⴰⴷⵓ ⴰⵃⵉⴷⵊⵓ ⴷ ⵀⵓⴼⵢⵉⵜ ⴱⴰⵏⵢⵉ ⴷ ⵡⵉⵢⵢⴰⴹ, ⵍⵍⴰⵏ ⵉⵅⴰⵜⴰⵔⵏ ⵉⴼⵔⵉⵇⵉⵢⵉⵏ ⵉⵄⵔⵔⵉⵎⵏ ⵓⵙⵉⵏⵉⵏ ⵜⴰⵙⴰⴼⵓⵜ ⵏ ⵓⵎⵓⴽⵏ ⴳ ⵜⵣⵡⵉⵔⵉ ⵏ ⵜⵉⵏ ⵉⴼⴹ ⵔⵉⵙ ⴽⵕⴰⴹⵜ.

ⵉⴳⴰ ⵓⵙⴱⴷⴷⵉ ⵏ ⵍⴰⵥ ⴷ ⵓⵥⵍⴰⴷ ⴷ ⵓⵙⵉⵜⵜⵉ ⴷ ⵉⵎⴰⵖⵏ ⵜⴰⵡⵡⵓⵔⵉ ⵜⴰⵙⵔⵜⴰⵏⵜ, ⵓⵔ ⴷ ⵜⴰⵎⵓⴽⵔⵉⵙⵜ ⵏ ⵓⵏⵣⵡⵉ, ⵍⴰⵥ ⵓⵔ ⵉⴳⵉ ⵉⵎⴰⵍ ⵍⵍⵉ ⵓⵔ ⵏⵥⴹⴰⵕ ⴰⴷ ⵏⵙⵉⵜⵜⵉ, ⵉⴳⴰ ⴰⴼⴰⵔⵙ ⵏ ⵓⵏⴳⵔⴰⵡ ⵏ ⵜⵣⴷⴰⵢⵉⵏ ⴷ ⵓⴱⵟⵟⵓ ⵏ ⵉⴼⵓⵍⴽⵉⵜⵏ ⴷ ⵜⵎⵓⴽⵔⵉⵙⵉⵏ ⴷ ⵜⵙⵔⵜⴰⵢ, ⵍⵍⵉ ⴷ ⵉⵇⵇⴰⵏ ⵓⵣⵣⵔⴰⵢ ⵙ ⵜⵉⵔⴰⵜ ⵏⵏⵖ, ⵏⴽⴽⵯⵏⵉ ⵉⴼⵔⵉⵇⵉⵢⵏ  ⵙ ⵓⵡⵇⵇⵔ ⵏ ⵓⵎⵣⵔⵓⵢ ⵏⵏⵖ, ⴷ ⵜⵎⵢⵉⵎⴰⵏⵜ ⴳ ⵜⵥⴹⴰⵕⵉⵏ ⵏⵏⵖ, ⴷ ⵓⵙⵡⴰⵍⴰ ⵙ ⵉⵎⴰⵍⴰ ⵏⵎⵏ ⵙ ⵜⵖⵜⴰⵙⵜ ⵜⴰⴼⵔⵉⵇⵉⵜ ⵜⴰⵙⵉⵎⴰⵜ. ⵓⵔ ⴳⵉⵙ ⵜⵓⵔⴷⴰ ⵎⴰⵙ ⴷ ⴰⵢⵍⵍⵉ ⵙⴽⴰⵔⵏ ⵉⵄⵔⵔⵉⵎⵏ ⵏ ⵉⴼⵔⵉⵇⵇⵢⴰ ⴷ ⵜⵙⵓⴳⴰⵔ ⵏⵏⵙ ⵏ ⵜⵓⵏⵏⵓⵏⵜ ⴳ ⵓⵖⵔⵔⴰⴼ ⵏ ⵓⵎⴰⴹⵍ ⴳⴰⵏ ⵜⴰⵎⴰⵜⴰⵔⵜ ⴼ ⵜⵙⵓⴳⵔⵜ ⵏ ⵉⵄⵔⵔⵉⵎⵏ ⵉⴼⵔⵉⵇⵉⵢⵏ ⴳ ⵡⴰⵍⴰⵢ ⵏ ⵜⵏⴰⵥⴰⵕⵉⵏ.

ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ