ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵏⵎⵓⵇⵇⴰⵔ ⴰⴽⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵙⵜⴳⴳⴰⵔⵏ ⵏ ⵜⴳⵔⴰⵡⵉⵏ ⵜⵉⵖⵔⵎⴰⵏⵉⵏ ⴷ ⵉⵎⵙⴽⴰⵔⵏ ⵉⵏⴰⵎⵓⵏⵏ,

ⵎⴰⵙⵙ ⴰⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵣⴷⴰⵢⵉⵏ ⴰⴽⴷ ⵓⴱⵕⵍⴰⵎⴰⵏ, ⴰⵎⵙⵙⵉⵡⵍ ⴰⵎⴰⴷⴷⵓⴷ ⵙ ⵉⵙⵎ ⵏ ⵜⴱⴰⴹⵜ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ, ⵉⴳⵎⴰⵎⵏ ⵏ ⵓⵙⵇⵇⵉⵎ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵏⵙⴰⵏ ⵏ ⵜⴳⵔⴰⵡⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⵎⴷⵔⴰⵡⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ.

ⵎⵎⵔⵖ ⴱⴰⵀⵔⴰ ⵙ ⵓⵕⵥⵥⵓⵎ ⵏ ⵓⵏⵎⵓⵇⵇⴰⵔ ⴰⴷ ⵏ ⵓⵎⵢⴰⵡⴰⴹ ⴰⴽⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵔⵎⴰⵏ, ⵍⵍⵉ ⵏⵥⵍⵉ ⵉ ⵉⵙⵖⵡⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⵏⵉⴷ ⵏ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵟ ⵉⵏⵏⵓⵕⵥⵎⵏ, ⵃⵎⴰ ⴰⴷ ⵏⴱⴷⴷ ⴼ ⵎⴰⴷ ⵉⵜⵜⵓⵙⴽⴰⵔⵏ ⵎⵍⵍⵉⵖ ⵉⴽⵛⵉⵎ ⵓⵙⵇⵇⵉⵎ  ⵙ ⵉⵎⵉⵙⵙ ⴰⴷ ⴳ ⵓⵎⵡⴰⵏ 2019, ⵏⵥⵕ ⵎⴰ ⵔⴰⴷ ⵉⵜⵜⵓⵙⴽⵉⵔ ⴳ ⵉⵎⴰⵍ, ⴷ ⵎⴰⵙ ⴷ ⵉⵇⵇⴰⵏ ⴰⴷ ⵉⵜⵜⵓⵙⴽⵉⵔ ⴳ 2022 ⴷ 2023.

ⵎⴽⵍⵍⵉ ⵜⵙⵙⵏⵎ, ⵀⴰⵜⵉ ⵜⵙⴽⵔ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⴰⴽⴷ ⵜⴰⵏⴱⴰⴹⵜ ⵉⵏⵏⵓⵕⵥⵎⵏ ⴳ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴰⵎⴷⵔⵓ ⴰⴷⵙⵍⴰⵏ ⵏ ⵉⴱⵕⵍⴰⵎⴰⵏⵏ ⴷ ⵜⵏⴱⴰⴹⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴳ ⵓⵙⴽⵔ ⵏ ⵉⵖⴰⵡⴰⵙⵏ ⴷ ⵉⵙⵖⵡⴰⵏ ⴳ ⵓⵙⴰⵜⵉ ⵏ ⵜⵙⵏⵜⴰⵢⵜ ⴰⴷ ⵍⵍⵉ ⴷⴰⵔⵙⵏ ⵜⵉⵍⴰⵍ ⴳ ⵓⵏⵄⴰⵔ ⴰⵖⵔⵎⴰ ⴷ ⵜⵉⴹⴰⴼ ⴷ ⵓⵙⵜⵉ ⴰⵏⴰⵎⵓⵏ.

ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴳⴰⵏⵜ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴰⵎⴷⵔⵓ ⴳ ⵓⵙⵎⵀⵍ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⴷ ⵜⵏⵎⵓⵔⵉ ⵙ ⵎⴰⴷ ⵉⵍⵍⴰⵏ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵏⴱⴷⴷ ⵖ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ  ⴷⵓⵙⵉⵔⴰ  ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⴼ ⵓⵙⵎⵔⵙⵍ ⵏ ⵜⵣⴷⴰⵢⵉⵏ ⴰⴽⴷ ⵉⵎⵙⴽⴰⵔⵏ ⵉⵏⴰⵎⵓⵏⵏ ⵙ ⵓⵙⴷⵔⵓ ⴷ ⵓⵎⵛⴰⵡⴰⵕ ⴷ ⵓⵡⵇⵇⵔ ⵙⵇⵇⵉⵇⵏ ⵏ ⵜⵉⵍⴰⵍ ⴷ ⵜⵎⴰⵙⴰⵢⵉⵏ .

ⵉⵖ ⵓⵔⵜⴰ ⵙⴰⵡⵍⵖ ⴼ ⵜⵎⴷⵔⴰⵡⵜ ⴰⴷ, ⵔⵉⵖ ⴰⴷ ⵉⵏⵉⵖ ⵎⴰⵙ ⵉⴽⵛⵎ ⵓⵏⵎⵓⵇⵇⴰⵔ ⴰⴷ ⴳ ⵓⵙⴰⵜⵉ ⵏ ⵉⵎⵉⵥ ⵉⵛⵛⴰⵔⵏ ⵏ ⵓⵖⴰⵡⴰⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵡⵉⵙ ⵙⵉⵏ, ⵖ ⵍⵍⴰⵏ ⵉⵙⵖⵡⴰⵏ ⴳ ⵓⵙⴰⵜⵉ ⵏ ⵜⵙⵏⵜⴰⵢⵜ ⵉ ⵜⵏⴱⴰⴹⵜ ⵉⵏⵏⵓⵕⵥⵎⵏ  ⵙ ⵓⵙⴽⵔ ⵏ ⵜⴱⵔⵉⴷⵜ ⵍⵍⵉ ⵜⵏⵏⴰ ⵜⵙⵏⵜⴰⵢⵜ ⴰⴷ.

ⵉⴳⴰ ⵓⵍⴰ ⵜⴰⵎⵍⴷⴰ ⴰⵙ ⵏⵙⵙⴽⵯⵜⵉ ⵙ ⵓⵙⴳⵣⵍ ⵙ ⵎⴰⴷ ⵉⵜⵜⵓⵙⴽⴰⵔⵏ ⴳ ⵓⵖⴰⵡⴰⵙ ⴰⵎⴰⵣⵡⴰⵔⵓ ⵏ ⵓⵙⵇⵇⵉⵎ ⵉ 2019-2021 ⵍⵍⵉ ⵉⵎⵎⴰⴳⴳⴰⵔⵏ ⴷ ⵓⵎⵏⴰⴹ ⵏ ⵓⴱⴰⵢⵢⵓⵕ ⵍⵍⵉ ⵎⵓ ⵉⵙⵙⵏ ⴽⵓⵢⴰⵏ ⵉⴷⵔⵉⵣⵏ ⵏⵏⵙ, ⵎⵇⵇⴰⵔ ⵉⵎⵎⴰⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⵉⵙⴽⵔ ⵉⵙⵖⵡⴰⵏⵏ ⵏⵏⵙ ⵉⴷⵙⵍⴰⵏⵏ ⵎⴽ ⵏⵉⵜ ⵉⵎⵎⴰⵍ ⵓⵣⵣⵔⴰⵢ ⴰⵏⵙⵉⵎⴰⵏ ⵍⵍⵉ ⵏⵉⵜ ⵜⵙⴽⵔ ⵜⵙⵏⵜⴰⵢⵜ ⵙ ⵉⵅⴼ ⵏⵏⵙ ⵎⴽ ⵍⵍⵉ ⵏⵉⵜ ⵥⵕⴰⵏ ⵉⵎⴷⵔⴰⵡⵏ ⵏⵏⵖ ⵉⴳⵔⴰⵖⵍⴰⵏⵏ.

ⵉⵍⵍⴰ ⵓⵙⵏⴳⵉⴷⴷⵉ ⵏ ⵉⵙⵖⵡⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳⴰⵏⵉⵏ ⵚⴹⵉⵚ (6) ⵙ ⵓⵖⴰⵡⴰⵙ ⴰⵎⵣⵡⴰⵔⵓ ⴳ ⵓⵙⴰⵜⵉ ⵏ ⴽⵕⴰⴹ ⵉⵙⴳⵓⵎⵏ ⵅⴰⵜⵔⵏⵉⵏ ⴳⵉⵙⵏ: 1)ⵜⴰⵎⴰⴷⵔⴰⵡⵜ ⵜⴰⵏⵎⵓⵔⵉ 2) ⴰⴽⵛⵓⵎ ⵙ ⵓⵏⵖⵎⵉⵙ 3 ⴰⵣⴷⴰⵢ ⵏ ⵜⵎⴰⵙⴰⵢⵜ ⴷ ⵓⵙⵉⵟⵏ.

ⵉⵖ ⵏⵇⵇⵍ ⵙ ⵓⵙⵎⵏⵉⴷ ⵏ ⵜⵎⵙⴽⵔⵜ ⵏ ⵓⵙⵇⵇⵉⵎ ⵏ ⵓⵏⵏⵓⵕⵥⵎ ⴷ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⴷ ⵜⵏⵎⵓⵔⵉ ⵙ ⵓⵣⵓⵣⵣⵔ, ⴰⵔ ⴰⵡⵏ ⵙⴷⴷⵉⴷⵖ ⵎⴰⵙ ⴷ ⴰⵙⵖⵍ ⵏ ⵉⵙⵖⵡⴰⵏ ⵏ ⵓⵙⵇⵇⵉⵎ ⵉ ⵓⵖⴰⵡⴰⵙ ⴰⵎⵣⵡⴰⵔⵓ ⵉⵍⴽⵎ ⵢⴰⵏ ⵓⵙⵡⵉⵔ ⴱⴰⵀⵔⴰ ⵎⵇⵇⵓⵔⵏ ⴳ ⴽⵉⴳⴰⵏ ⵏ ⵉⴳⵔⴰⵏ, ⵉⵍⴽⵎ ⵎⴰⴷ ⵉⵣⵔⵉⵏ 70% . ⵖ ⵎⴰⴷ ⵉⵥⵍⵉⵏ ⵙ ⵓⵣⵣⴳⵉⵔ ⵏ ⵜⵓⵎⴰⵢⵉⵏ ⵜⵉⴷⵙⵜⴰⵔⵉⵏ ⴷ ⵜⵣⵣⵔⴼⵉⵏ ⴳ ⵢⵉⴳⵔ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ, ⴷ ⵓⵙⴽⵔ ⵏ ⵓⵣⵔⴼ ⴰⴷⵙⵜⴰⵔ ⴳ ⵓⴽⵛⵓⵎ ⵙ ⵉⵏⵖⵎⵉⵙⵏ, ⴷ ⵓⵙⵔⵓ ⵏ ⵉⵏⵎⵓⵔⴰⵏ ⴳ ⵓⵣⵣⵔⴰⴼ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵓⵏⵏⵓⵕⵥⵎ ⴼ ⵓⴳⴷⵓⴷ, ⵙⵍⴰⵡⴰⵏ ⴰⴽⴽⵯ ⵉⵄⵔⵔⵉⵎⵏ, ⴷ ⵓⵙⵎⵀⵍ ⵏ ⵜⵎⴷⵔⴰⵡⵜ ⴰⴽⴷ ⴰⵎⵓⵏ ⴰⵖⵔⵎⴰⵏ ⴷ ⵉⴷⵖⴰⵔⵏ ⵏ ⵓⵔⵣⵣⵓ ⴰⵙⴷⴰⵡⴰⵏ ⴷ ⵡⴰⴽⴰⴷⵉⵎⵉ, ⴷ ⵓⵓⴱⵕⵍⴰⵎⴰⵏ ⴰⵍⵉⴽⵟⵕⵓⵏⵉ , ⵉⵙⴽⵔ ⵓⵙⵇⵇⵉⵎ ⵎⴰⴷ ⵉⴳⴰⵏ ⴰⴳⵏⴰⵔ ⴷ ⵎⵔⴰⵡ ⵏ ⵜⵎⵙⴽⵔⵔⵜ ⴼ ⵓⵏⵏⵓⵕⵥⵎ ⴰⵙⵎⵔⵙⵍⴰⵏ ⵉⴳⴰⴷⴷⴰⵏ.

ⴳ ⵓⵙⴰⵜⵉ ⵏ ⵓⵙⴳⵓⴷⵉ, ⵉⵙⴽⵔ ⵓⵙⵇⵇⵉⵎ ⴰⵖⴰⵡⴰⵙ ⵏⵏⵙ ⵡⵉⵙ ⵙⵉⵏ ⵍⵍⵉ ⵔⴰⴷ ⵏⵙⵎⵏⵉⴷ ⵉ ⵓⵙⵎⵖⵔ ⴷ ⵓⵙⵖⵓⴷⵓ, ⵏⴼⴽ ⵓⵍⴰ ⵜⵉⵎⵙⴽⴰⵔ ⵜⵉⵎⴰⵢⵏⵓⵜⵉⵏ ⵍⵍⵉ ⵔⴰⴷ ⵙⴽⵔⵏⵜ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵉⵎⵙⴽⴰⵔⵏ ⵉⵏⴰⵎⵓⵏⵏ.

ⵙ ⵖⵎⴽ ⴰⴷ, ⵢⵉⵡⵉ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⵙⴰ ⵉⵙⵖⵡⴰⵏ ⵉⵅⴰⵜⴰⵔⵏ ⵍⵍⵉ ⵎⵓ ⵔⴰⴷ ⵢⵉⵍⵉ ⵓⵣⵣⴳⵉⵔ ⵏⵏⵙ ⵙ ⵉⵙⵡⵓⴷⴷⵓⵜⵏ ⴷ ⵜⵖⵜⴰⵙⵉⵏ  ⵉ ⵓⵙⴷⵓⵙ ⵏ ⵜⵎⴷⵔⴰⵡⵜ ⴰⴽⴷ ⵉⵎⵙⴽⴰⵔⵏ ⵉⵏⴰⵎⵓⵏⵏ ⵉ ⵓⵣⵓⵣⵣⵔ ⴷ ⵓⵙⵕⵚⵓ ⵏ ⵜⴷⵍⵙⴰ ⵜⴰⴷⵉⵎⵓⵇⵔⴰⵟⵉⵜ ⴷ ⵓⵙⴽⵔ ⵏ ⵓⴱⵕⵍⴰⵎⴰⵏ ⵏ ⵡⴰⴷⴰⵙ, ⴷ ⵓⵏⵏⵓⵕⵥⵎ ⴼ ⴽⵉⴳⴰⵏ ⵏ ⵉⵏⵎⵓⵔⴰⵏ ⵙ ⵓⵙⵏⵓⴱⴳ ⵏ ⴽⵉⴳⴰⵏ ⵏ ⵉⵏⵎⵓⵔⴰⵏ ⵙⵍⴰⵡⴰⵏ ⴰⴽⴽⵯ ⵉⵄⵔⵔⵉⵎⵏ  ⴳ ⵓⵙⵖⵉⵎ ⵏ ⵓⵙⵇⵇⵉⵎ.

ⵢⵉⵡⵉ ⴷ ⵓⵖⴰⵡⴰⵙ ⴰⵙⴷⵔⵓ ⵏ ⵉⵏⵎⵓⵔⴰⵏ ⴳ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⴳ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵜⵎⴷⵔⴰⵡⵜ ⵏ ⵜⵎⵕⵚⵉⵟ ⵏ ⵓⵙⵏⴱⴷⵓ ⵉ ⵓⵣⵓⵣⵣⵔ ⵏ ⵡⴰⵜⵉⴳⵏ ⵏ ⵜⴷⵉⵎⵓⵇⵕⴰⵟⵉⵜ  ⴷ ⵜⴷⵍⵙⴰ ⴷ ⵜⵎⴷⵔⴰⵡⵜ, ⵃⵎⴰ ⴰⴷ ⵜⵏ ⴰⵎⵥⴰⵏ, ⵖⵎⴽ ⴰⵏⵏ ⴷ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⵉⴷⵖⴰⵔⴰⵏⵏ ⵏ ⵡⴰⴷⴰⵙ ⴼ ⵜⵉⵔⵔⴰ ⵜⴰⵣⵣⵔⴰⴼⵜ ⵃⵎⴰ ⴰⴷ ⵔⵎⵙⵏ ⵉⵏⵎⵎⵓⵔⴰⵏ ⵜⵉⵡⵡⵓⵔⵉⵡⵉⵏ ⵏ ⵓⵣⵣⵔⴰⴼ.

ⵡⵉⵏ ⴰⴷ ⵉⴳⴰⵏ ⵉⵣⵡⵉⵍⵏ ⵉⵅⴰⵜⴰⵔⵏ ⵏ ⵓⵖⴰⵡⴰⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵎⴰⴷ ⵉⵥⵍⵉⵏ ⵙ ⵓⴱⵕⵍⴰⵎⴰⵏ ⵉⵏⵏⵓⵕⵥⵎⵏ, ⵍⵍⵉ ⵔⴰⴷ ⵏⵙⵎⵏⵉⴷ ⵉ ⵓⴳⴷⵓⴷ ⴳ ⵓⵙⵉⵜ ⴰⵍⵉⴽⵟⵕⵓⵏⵉ ⴰⵎⴰⴷⴷⵓⴷ ⵏ ⵓⵙⵇⵇⵉⵎ ⵉ ⵓⵙⵎⵖⵔ ⵏⵏⵙ ⴷ ⵓⵙⵖⵓⴷⵓ ⵏⵏⵙ.

ⴳ ⵜⵉⵔⵔⴰ ⵏ ⵉⵙⵖⵡⴰⵏ ⴰⴷ, ⵏⵎⵎⴰⵖ ⴰⴷ ⵏⵙⵡⵓⵔⵉ ⵙ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵍⵍⵉ ⵉⴳⴰⵏ ⵉⵍⴻⵍⵍⵉ ⴷ ⴰⵎⵣⵡⴰⵔⵓ ⴳ ⵉⵥⵕⵉ ⵏ ⵡⵉⴷⴰ ⵜ ⵖⵔⴰⵏⵉⵏ ⴳ ⵎⴰⴷ ⵉⵥⵍⵉⵏ ⵙ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⴷ ⵜⵏⵎⵓⵔⵉ ⵖⵎⴽ ⴰⵏⵏ ⵓⵍⴰ ⵜⵓⵎⴰⵢⵉⵏ ⵏⵏⵙ ⴽⵓⵍⵍⵓ ⵜⵏⵜ.

ⵖⵓⵔⵏⵖ ⴰⴱⵓⵔⵣ ⵎⴰⵙ ⵜⴳⴰ ⵜⵎⴰⵣⵉⵔⵜ ⵏⵏⵖ ⵙⴳ ⵜⵎⵉⵣⴰⵔ ⵜⵉⵎⵣⵡⴰⵓⵔⴰ ⵍⵍⵉ ⴱⴷⴷⵏⵉⵏ ⴼ ⵓⵙⴷⵙⵜⵔ ⵏ ⵉⵣⵔⴼⴰⵏ ⴷ ⵓⵛⵛⵉⵍⵏ ⵏ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⴷ ⵜⵏⵎⵓⵔⵉ, ⵜⴳ ⵜⵉⵎⵣⵡⵓⵔⴰ ⵉⵙ ⵜⵕⵥⵎ ⵜⴰⵙⵏⵜⴰⵢⵜ ⵏ ⵜⵎⴰⴷⵔⴰⵡⵜ ⵉ ⵜⵏⴱⴰⴹⵜ ⵉⵏⵏⵓⵕⵥⵎⵏ.

ⵉⵙⵜ ⵎⴰⵙⵙⴰ ⵉⴷ ⵎⴰⵙⵙ

ⵉⵖ ⵜⵙⵜⴰⵀⵍⵍⴰ ⵜⴷⵉⵏⴰⵎⵉⵜ ⵏ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵍⵎⵖⵔⵉⴱ ⴰⵙⵓⵜⴳ, ⵜⵙⵙⵓⵙⵎ ⵙ ⵜⵡⵡⵓⵔⵉ ⵏⵏⵙ ⵉⴳⴰⵏ ⵡⵉⵏ ⵡⵇⴷⴰⵙ ⴷ ⵓⵎⵏⵏⴰⵡ, ⵀⴰⵜⵉ ⵉⴼⴽⴰ ⴰⵙ ⵓⴷⵓⵙⵜⵓⵔ ⴷ ⵜⵣⵣⵔⴰⴼⵉⵏ ⵢⴰⴹⵏⵉⵏⵉⵣⵔⴼⴰⵏ ⴷ ⵓⵛⵛⵉⵍⵎⵏ ⴷ ⵜⵎⴰⵙⴰⵢⵜ ⵉ ⵜⵙⵎⵉⴳⴰⵍ ⵜⵉⵎⴰⵢⵏⵓⵜⵉⵏ ⵥⵉⵍⵏⵉⵏ, ⵙ ⵓⵎⵏⵏⵉ 12 ⵏ ⵓⴷⵓⵙⵜⵓⵔ, ⵉⵇⵇⴰⵏ ⴷ ⴰⴷ ⵜⴰⵡⵙ ⴳ ⵓⵙⴰⵜⵉ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴳ ⵓⵙⵓⵊⴷ ⵏ ⵜⵖⵜⴰⵙⵉⵏ ⴷ ⵉⵙⵏⴼⴰⵔⵏ ⴷⴰⵔ ⵜⵎⵔⵙⴰⵍ ⵜⵜⴰⵡⵙⵜⴰⵢⵏⵉⵏ ⴷ ⵜⵏⴱⴰⴹⵉⵏ ⴷ ⵓⵙⵎⵀⵍ ⴷ ⵓⵙⵓⵜⴳ ⵏⵏⵙⵏⵜ.

ⵉⵙⴷⴷⵉⴷ ⵓⴷⵓⵙⵜⵓⵔ ⵎⴰⵙ ⵔⴰⴷ ⵙⴽⵔⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵜⵉⴳⵔⴰⵡⵉⵏ ⵏ ⵓⵎⵛⴰⵡⴰⵕ ⴰⴼⴰⴷ ⴰⴷ ⴷⵔⵓⵏ ⴽⵓ ⵉⵎⵙⴽⴰⵔⵏ ⴳ ⵓⵙⵓⵊⴷ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵙ ⵓⵙⵎⵀⵍ ⴷ ⵓⵣⵣⴳⵉⵔ ⴷ ⵓⵙⵓⵜⴳ. ⴰⵏⵎⵓⵇⵇⴰⵔ ⵏ ⵡⴰⵙⵙ ⴰⴷ ⵉⴽⵛⵎ ⵖⵉⴷ.

ⴰⵔ ⴰⴽⴽⴰⵏ ⵉⵎⵏⵏⵉⵜⵏ 14 ⴷ 15 ⵉ ⵉⵏⵎⵓⵔⴰⵏ ⴰⵣⵔⴼ ⵏ ⵓⵙⵎⵏⵉⴷ ⵏ ⵜⵓⵜⵔⴰⵡⵉⵏ ⴳ ⵢⵉⴳⵔ ⵏ ⵓⵣⵣⵔⴰⴼ, ⴷ ⵓⵣⵔⴼ ⵏ ⵓⵙⵎⵏⵉⴷ ⵏ ⵜⵓⵍⴽⵉⵎⵉⵏ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ, ⵉⵇⵇⴰⵏ ⴷ ⴼ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴰⴷ ⴰⵡⵙⵏⵜ ⴳ ⵓⵙⴰⵜⵉ ⵏ ⵜⵙⵏⵜⴰⵢⵉⵏ ⵏ ⵉⵏⵎⵓⵔⴰⵏ ⴳ ⵢⵉⴳⵔ ⴰⴷ, ⴷ ⵓⵙⵎⵀⵍ ⵏ ⵉⵡⵜⵜⴰⵙⵏ ⵏ ⵓⴷⵓⵙⵜⵓⵔ, ⴷ ⵓⵙⵔⵅⵓ ⵏ ⵜⵎⴷⵔⴰⵡⵜ ⴷ ⵓⵙⴱⵓⵖⵍⵓ ⵏ ⵓⵣⵣⵔⴰⴼ ⴰⵏⴰⵎⵓⵔ , ⵙⵍⴰⵡⴰⵏ ⴰⴽⴽⵯ ⵎⴰⵙ ⵜⴰⵥⵎ, ⵉⴳⵓⵜⵏ ⵓⵍⴰ ⵉⴳⵔⴰⵡⵏ ⵏ ⵓⵙⵡⵓⵔⵉ ⵏⵏⵓⵏ, ⵜⵉⵥⴹⵉⵔⵎ ⴰⴷ ⵜⵎⵛⴰⴱⴱⴰⴽⵎ ⵜⵉⵣⴷⴰⵢⵉⵏ ⵏⵏⵓⵏ.

ⵏⴱⴷⴷ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⴽⵔ ⵏ ⵜⵙⵇⵇⵉⵎⵜ ⵉⵜⵜⵓⵙⵎⴰⴳⴰⵍⵏ ⵙ ⵉⵎⵉⵥ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ ⵏ ⵉⵏⵎⵓⵔⴰⵏ ⵉ ⵓⵙⴽⵔ ⵙ ⵉⴱⴹⵉⵢⵏ ⵏ ⵓⴷⵓⵙⵜⵓⵔ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ.

ⴰⵔ ⵏⵉⵜ ⵉⵎⵎⴰⵍ ⵡⴰⵎⵓⵏ ⴰⵖⵔⵎⴰⵏ ⵙ ⵜⵉⴷⵜ ⵜⴰⵎⵏⵏⴰⵡⵜ ⵉⵍⵍⴰⵏ ⴳ ⵍⵎⵖⵔⵉⴱ ⴷ ⵜⵖⵔⵎⴰ ⵏⵏⵙ, ⵉⴳ ⴰⵢⴷⴰ ⴰⵏⴰⵎⵓⵔ ⵉⵙⵜⴰⵡⵀⵎⵎⴰⵏ ⵙ ⵜⵙⵓⴳⴰⵔ ⴷ ⵜⵣⵎⵎⴰⵔ ⴷ ⵜⵙⴰⵡⵓⵔⵜ ⵏ ⵓⵙⴽⵔ ⵏ ⵉⵏⵎⵖⵓⵔⵏ ⴷ ⵓⵣⵓⵣⵣⵔ ⵏ ⵡⴰⵜⵉⴳⵏ ⵏ ⵜⵡⵉⵙⵉ ⴷ ⵜⴷⵍⵙⴰ ⵏ ⵓⵎⵙⵓⵔⵓⴼ ⴷ ⵓⵙⴳⵎⵉ ⴼ ⵜⵏⵎⵓⵔⵉ.

ⵙ ⵜⵓⴳⴳⴰⵙ ⵏⵏⵖ ⴰⴽⴽⵯ, ⵔⴰⴷ ⵏⵙⴽⵔ ⴰⵡⵜⵜⵙ ⴰⵎⴳⵔⵓ ⵉⴳⴰⵏ ⴰⵙⴷⵓⵙ ⵏ ⵜⵎⵔⵙⴰⵍ ⵙ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⴳⵉⵙⵏⵜ, ⴷ ⵓⵙⵖⵓⴷⵓ ⵏ ⵜⵎⵙⴽⵔⵜ ⵍⵍⵉ ⵔⴰⴷ ⵉⵟⵟⴼ ⴰⴷⵔⵉⵣ ⴼ ⵡⴰⵎⵓⵏ, ⴷ ⵓⵙⵖⵓⴷⵓ ⵏ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ ⴷ ⵓⵙⵎⵖⵔ ⵏ ⵜⵢⵢⴰⴼⵓⵜ ⵏⵏⵙⵏⵜ.

ⵉⵙⵜ ⵎⴰⵙⵙⴰ ⵉⴷ ⵎⴰⵙⵙ

ⴰⵏⵏⵓⵕⵥⵎ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⴰⵜⵉ ⵏ ⵓⵙⵖⵡⵏ ⵏⵏⵙ ⴳ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵜ ⵉⵏⵏⵓⵕⵥⵎⵏ. ⴳ ⵜⵣⴷⴰⵢⵜ ⴷ ⵉⵎⴰⵙⵙⵏ ⵏ ⵓⵙⵏⵖⵎⵙ ⵉⵏⴰⵎⵓⵔⵏ ⴷ ⵡⵉⵏ ⴱⵕⵕⴰ , ⵍⵍⵉ ⴳⴰⵏⵉⵏ ⴰⵙⴰⵔⵓ ⵏ ⵓⵏⵖⵎⵉⵙ ⴰⴱⵕⵍⴰⵎⴰⵏⵉ, ⵉⵍⴽⵎ ⵓⵏⵛⴽ ⵏ ⵉⵏⵖⵎⴰⵙⵏ ⵍⵍⴰⵏⵉⵏ ⴷⴰⵔ ⵓⵙⵇⵇⵉⵎ ⵎⴰⴷ ⵉⴳⴰⵏ 250, ⴰⵏⵛⴽ ⵉⵅⴰⵜⵔⵏ ⵙ ⵜⵎⵙⴽⴰⵔ ⵏ ⵓⵎⵣⴰⵣⴰⵍ ⴳ ⵓⴳⵏⵙ ⵏ ⵜⴳⵍⴷⵉⵜ ⴷ ⴱⵕⵕⴰ ⵏⵏⵙ. ⵉⵣⵓⵣⵣⵔ ⵓⵙⵇⵇⵉⵎ ⵓⵍⴰ ⵉⴼⴹⵏ ⵏ ⵜⴻⵜⴳⴰⵔⵉⵏ ⴳ ⵓⵙⵉⵜ ⵏⵏⵙ ⴰⵍⵉⴽⵟⵕⵓⵏⵉ ⵙ ⵜⵖⵜⴰⵙⵉⵏ ⴷ ⵉⵏⵇⵇⵉⵙⵏ ⵏ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ, ⴷ ⵓⴳⴳⴰⵔ ⵏ ⵙⵏⴰⵜ ⵜⵉⵎⵎⴰⴹ ⵏ ⵓⴷⵍⵉⵙ ⴰⵎⵓⵟⵟⵓⵏ. ⴰⵢⴷⴰ ⴰⴷ ⵏ ⵜⴻⵜⴳⴰⵔⵉⵏ ⴰⵔ ⴰⵇⵔⴰⵖ ⵉ ⵉⵎⵔⵣⵓⵜⵏ ⵉ ⵓⵙⵡⵓⵔⵉ ⵉ ⵓⵙⵎⵖⵔ ⵏ ⵓⵔⵣⵣⵓ ⴼ ⵜⴷⵉⵎⵓⵇⵔⴰⵟⵉⵜ ⴷ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ . ⵙ ⵡⴰⵜⵉⴳ ⵏ ⵓⵎⵛⴰⵡⴰⵕ ⴰⵎⴰⵙⵙⴰⵏ ⴳ ⵓⵙⵖⵓⴷⵓ ⵏ ⵜⵡⵡⵓⵔⵉ ⵜⴰⴱⵕⵍⴰⴰⵎⵏⵉⵜ, ⵉⵣⴷⵉ ⵓⵙⵇⵇⵉⵎ ⴷ ⵜⵎⵢⴰⵇⵇⴰⵏⵉⵏ ⵏ ⵜⵎⴷⵔⴰⵡⵜ  ⴷ ⵜⵙⴷⴰⵡⵉⵢⵉⵏ ⵜⵉⵏⴰⵎⵓⵔⵉⵏ ⴳⴰⵏⵉⵏ ⵙⵏⴰⵜ ⴷ ⵎⵔⴰⵡⵜ, ⵃⵎⴰ ⴰⴷ ⵢⴰⵡⵙ ⴳ ⵜⵉⵍⵉⵜ ⵏ ⵓⵙⵎⴰⵇⵇⵍ ⴰⵎⴰⵙⵙⴰⵏ ⴼ ⵉⵏⴰⵔⵓⵣⵏ ⵏ ⵉⵏⵎⵓⵔⴰⵏ, ⵉⵕⵥⵎ ⵓⵙⵇⵇⵉⵎ ⵢⴰⵜ ⵜⵣⵔⴰⵡⵜ ⵜⴰⵙⵓⵙⵢⵓⵍⵓⵊⵉⵜ ⴳ ⵓⵙⴳⴳⵯⴰⵙ ⴰⴷ ⴰⵣⵣⵔⴰⴼ, ⵔⴰⴷ ⵜⵜⵓⴼⴽⵉ ⵜⵉⵢⵢⴰⴼⵓⵜ ⵏⵏⵙ ⴳ ⵎⴰ ⵏⵏ ⵓⵔ ⵢⴰⴳⴳⵓⴳⵏ.

ⵉⵙⵜ ⵎⴰⵙⵙⴰ ⵉⴷ ⵎⴰⵙⵙ

ⴰⵔ ⴷⴰⵖ ⴰⵇⵔⴰⵖ ⵉ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⵏ ⵉ ⵓⵙⴽⵔ ⵏ ⵉⵣⵔⴼⴰⵏ ⵏⵏⵙⵏ ⵉⴷⵙⵜⴰⵔⵏ ⴷ ⵓⵙⴽⵔ ⵏ ⵜⵙⵏⵜⴰⵢⵉⵏ ⵏ ⵜⵏⵎⵓⵔⵉ ⴳ ⵢⵉⴳⵔ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵍⵍⵉ ⵉⴳⴰⵏ ⵜⴰⵔⵙⵍⵜ ⵜⴰⵎⴷⵏⴰⵏⵜ ⵏ ⵓⵙⵡⵓⴷⴷⵓ  ⵏ ⵜⵖⴰⵡⵙⴰ ⵜⴰⵎⴰⵜⴰⵢⵜ. ⵎⵇⵇⴰⵔ ⵜⵜⵉⵏⵉⵖ ⵎⴰⵙⴷ ⵜⴰⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⵓⵔ ⵔⴰⴷ ⵜⵙⵏⴼⵍ ⵜⴰⴷⵉⵎⵓⵇⵔⴰⵟⵉⵜ ⵜⴰⴱⵕⵍⴰⵎⴰⵏⵉⵜ ⵏ ⵜⴳⵯⵏⵙⴰⵙⵜ, ⵉⵍⵉⵏ ⵉⵡⵜⵜⴰ ⵊⴰⵔ ⵓⵙⵔⵜⴰⵏ ⴷ ⵓⵖⵔⴰⵎⵏ ⵍⵍⵉ ⴷ ⵉⵇⵇⴰⵏ ⵓⵡⵇⵇⵔ, ⴰⵔ ⵜⵜⵉⵏⵉⵖ ⵓⵍⴰ ⵎⴰⵙ ⴳⴰⵏⵜ ⵜⴳⵔⴰⵡⵉⵏ ⵜⵉⵖⵔⵎⴰⵏⵉⵏ ⵜⴰⵔⵙⵍⵜ ⵜⴰⴷⵙⵍⴰⵏⵜ ⵏ ⵜⵎⵔⵙⴰⵍ, ⴷ ⵓⴷⵎ ⵏ ⵜⴷⵉⵎⵓⵇⵔⴰⵟⵉⵜ ⵙ ⴽⵓ ⵉⵎⵏⴰⴷⵏ ⵏⵏⵙ.

ⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ:

“ⵉⵙⵖⴰⵡⵙⴰ ⵍⵎⵖⵔⵉⴱ ⵉ ⴽⵓ ⵜⴰⵔⵡⴰ ⵏⵏⵙ ⴷ ⵉⴼⵔⴷⴰⵙ ⵏⵏⵙ ⵓⴷⴷⵉⵔⵏ ⵟⵟⴰⴼⵏⵉⵏ ⴰⴷⵔⵉⵣ ⵙⵍⴰⵡⴰⵏ ⴰⴽⴽⵯ ⵜⵉⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⵍⵍⵉ ⵎⵓ ⴱⴷⴷⴰ ⵏⵙⵙⵔⵇⴰⴱ ⵜⵉⵙⵏⵜⴰⵢⵉⵏ ⵏⵏⵙ ⵥⵉⵍⵏⵉⵏ ⵍⵍⵉⵖ ⴷⴰⵔⵙⵏⵜ ⵜⵉⵍⴰⵍⵜ ⵉⵕⵡⴰⵏ ⴷ ⵜⴰⵏⴱⴰⴹⵜ ⵢⴰⴹⵏⵉⵏ ⴷ ⵜⴷⵓⵙⵉ ⵏ ⵜⵙⵓⵎⵔⵜ ⵉⵜⵜⴰⵡⵙⵏ ⴳ ⵓⴼⵔⴰⵏ ⵉⵥⵉⵍⵏ ⴷ ⵓⵎⵢⴰⵙⴰ ⵏ ⵜⵏⴱⴰⴹⵉⵏ”. ⵉⵙⵎⴷ ⵡⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⴳ ⵜⴳⵉⵔⴰ, ⴰⵔ ⴰⵇⵔⴰⵖ ⵉ ⵓⵙⴱⵓⵖⵍⵓ ⵏ ⵓⵖⴰⵡⴰⵙ ⵏ ⵜⵡⵡⵓⵔⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵡⵉⵙⵉ ⴳ ⵓⵙⴽⵔ ⵏⵏⵙ, ⴰⵔ ⴽⵏ ⵙⵏⵉⵎⵎⵉⵔⵖ ⴼ ⵜⵉⵍⵉⵜ ⵏⵏⵓⵏ, ⴰⵔ ⵙⵏⵉⵎⵉⵔⵖ ⵓⵍⴰ ⵎⴰⵙⵙ ⴰⵎⴰⵡⵙⴰⵙ ⴼ ⵜⵉⵍⵉⵜ ⵏⵏ ⴷⵉⴷⵏⵖ , ⴰⵢⵍⵍⵉ ⵉⵎⵎⴰⵍⴰⵏ ⴰⵎⵢⴰⵡⴰⵙ ⴷ ⵓⵙⵎⴰⴷ ⵊⴰⵔ ⵜⵏⴱⴰⴹⵉⵏ, ⴰⵔ ⵙⵏⵉⵎⵎⵉⵔⵖ ⵉⵎⴷⵔⴰⵡⵏ ⵏⵏⵖ ⵉⴳⵔⴰⵖⵍⴰⵏⵏ: ⵜⴰⵎⵓⵏⵜ ⵏ ⵓⵕⵓⴱⴱⴰ, ⵜⴰⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⵜⵉⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ, ⴰⵙⵉⵏⴰⴳ ⴰⴷⵉⵎⵓⵇⵔⴰⵟⵉ ⴰⵎⵉⵔⵉⴽⴰⵏⵉ, ⵉⵎⵙⵜⴳⴳⴰⵔⵏ ⵏ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵜ ⵉⵏⵏⵓⵕⵥⵎⵏ ⴷ ⵓⴳⵏⵙⴰⵙ ⵏⵏⵙ ⴳ ⵉⴼⵔⵉⵇⵢⴰ ⴷ ⵜⵙⴳⴰ ⵏ ⵍⵇⴱⵍⵜ ⵜⴰⵏⴰⵎⵎⴰⵙⵜ.

ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ