ⵜⵉⵏⵏⴰⵡⵜ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⵖⵉⵎⵉⵜ ⵏ ⵓⵙⴼⵓⴳⵍⵓ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ

ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴰⵏⴳⴳⵯⵓ ⵉⵄⵣⵣⴰⵏ ⵏⵏⵄⵎⴰ ⵎⵉⵢⵢⴰⵕⴰ,

ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ,

ⵎⴰⵙⵙⴰ ⵜⴰⵎⴰⵡⵙⴰⵙⵜ ⵏ ⵜⵡⵉⵣⵉ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵎⵖⴰⵔⵜ,

ⵉⵙⵜ ⵎⴰⵙⵙⴰ ⵜⵉⵎⵙⵜⴳⴳⴰⵔⵉⵏ ⵏ ⵜⵎⵖⴰⵔⵉⵏ ⴳ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵉⵏⴰⵎⵓⵔⵏ,

ⵎⴰⵙⵙⴰ ⵜⴰⴳⵏⵙⴰⵙⵜ ⵏ ⵜⵎⵜⵜⴰ ⵎⵓⵏⵏⵉⵏ ⵉ ⵜⵎⵖⴰⵔⵜ,

ⵜⵉⵏⴳⴳⵯⴰ ⴷ ⵉⵏⴳⴳⵯⴰ ⵉⴱⵕⵍⴰⵎⵏⵉⵢⵏ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵏⵙⴰⵙⵏ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ.

ⵉⵖ ⵎⵔⵔⵖ ⴰⴷ ⴷⵔⵓⵖ ⴳ ⵓⵙⴼⵓⴳⵍⵓ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ, ⵍⵍⵉ ⵜⵙⵏⵎⴰⵍⴰ ⵜⵎⴰⵣⵉⵔⵜ ⵏⵏⵖ ⴰⵔ 10 ⴷⵓⵊⴰⵏⴱⵉⵔ 2021, ⵜⵎⵓⵏ ⵜⵓⵎⵔⵜ ⵉⵏⵓ  ⴳ ⴽⵉⴳⴰⵏ ⵏ ⵓⵖⵉⵍⵓⴼ, ⵍⵍⵉⵖ ⴰⵔ ⵥⵕⵕⴰⵖ ⴷ ⴰⵔ ⵜⵥⵕⵕⴰⵎ, ⵜⴰⵣⵣⵉⴳⵣⵜ ⵏ ⵜⵓⵎⴰⵏⵜ ⴰⴷ ⵜⴰⵏⴰⵎⵓⵏⵜ, ⵍⵍⵉ ⵓⵔ ⵉⴳⵉⵏ ⵖⴰⵙ ⵜⴰⵎⵖⵔⵉⴱⵉⵜ, ⵎⴰⵛⵛ ⵜⴳⴰ ⵜⴰⵎⴰⴹⵍⴰⵏⵜ ⵉⵍⵍⴰⵏ ⴳ ⵉⵏⵇⵇⵉⵙⵏ ⵉⴳⵔⴰⵖⵍⴰⵏⵏ ⴳ ⵜⵎⵉⵣⴰⵔ ⵏ ⵉⴼⴼⵓⵙ ⵓⵍⴰ ⵜⵉⵏ ⵉⵥⵥⵍⵎⴹ.

ⴰⵔ ⵙⵓⵜⵓⴳⵖ ⴰⵙⴼⵓⴳⵍⵓ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵉⵔⵉⵖ ⴰⴷ ⵙⴻⴷⴷⵉⴷⵖ ⵙ ⵓⵔ ⵏⵙⵖⴰⵡⵙⴰ ⴰⴷ ⵏⵙⵙⴽⵜⵉ ⴰⵏⵛⴽⵏ ⵏ ⵜⵎⵖⴰⵔⵉⵏ ⵜⵜⴰⵡⴽⵕⴰⴹⵏⵉⵏ, ⴷ ⵡⴰⵏⴰⵡⵏ ⵏ ⵜⴽⵕⴹⵉ ⴷ ⵉⵎⵏⴰⴹⵏ ⵏⵏⵙ ⵃⵎⴰ ⴰⴷ ⵏⵙⵙⵏ ⴳⴰⵔ ⵜⵉⵢⵢⴰⴼⵓⵜⵉⵏ ⵏ ⵓⵙⴽⴽⵉⵔ ⴰⴷ. ⴰⵏⵛⴽ ⵏⵏⴰ ⵜⴳⴰ ⵜⵓⵎⴰⵏⵜ ⴰⴷ ⴷ ⵉⵎⵏⴳⴰⵙⵏ ⵏⵏⵙ, ⵀⴰ ⵏⵏ ⵜⴳⴰ ⵜⵉⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵉⵕⵥⵉ ⵏ ⵓⵙⵍⴳⵏ ⴷ ⵜⵣⴷⴰⵢⵉⵏ ⴷ ⵜⵇⴰⵏⵉⵏ ⴰⴷ ⵉⵍⵉⵏⵜ ⵊⴰⵔ ⵉⴼⵔⴷⴰⵙ ⵏ ⵡⴰⵎⵓⵏ, ⵜⴳ ⵜⵉⵕⵥⵉ ⵏ ⵜⵉⵍⵉⵜ ⵜⴰⴼⴳⴰⵏⵉⵜ ⴷ ⵜⵖⵔⵎⴰ ⵜⴰⴼⴳⴰⵏⵉⵜ.

ⵉⵙⵜⴰⵡⵀⵎⵎⴰ ⵓⵙⴼⵙⵉ ⵏ ⵜⴽⵕⴹⵉ ⴰⴷ ⵃⵎⴰ ⴰⴷ ⵏⵏⵙⵏ ⵜⵓⵎⴰⵏⵜ, ⵎⴰⵛⵛ ⵉⵇⵇⴰⵏ ⴷ ⵓⵍⴰ ⵓⵙⴱⴷⴷⵉ ⵏ ⵉⵥⵓⵕⴰⵏ ⵏⵏⵙ, ⵢⵉⵍⵉ ⴳⵉⵙⵏ ⵎⴰⴷ ⵉⴳⴰⵏ ⵜⴰⵡⵡⵓⵔⵉ ⵏ ⵓⵙⵍⴳⵏ ⴷ ⵜⵉⵏ ⵜⴱⵉⴷⴰⴳⵓⵊⵉⵜ ⴷ ⵓⵙⴳⵎⵉ ⴷ ⵜⵓⵙⵙⵏⴰ ⵏ ⵡⴰⵎⵓⵏ ⴷ ⵜⴷⵍⵙⴰ.

ⵎⴽ ⵍⵍⵉ ⵙⴷⴷⵉⴷⵖ, ⵜⵍⵍⴰ ⵜⵓⵎⴰⵏⵜ ⴰⴷ ⴳ ⵍⵎⵖⵔⵉⴱ, ⵎⴰⵛⵛ ⵜⵍⵍⴰ ⵓⵍⴰ ⵜⵉⵔⴰⵜ ⵉ ⵓⵙⴱⴷⴷⵉ ⵏⵏⵙ ⴷ ⵜⵉⵔⴰⵜ ⵏ ⵓⵙⵎⵖⵔ ⵏ ⵜⵎⵖⴰⵔⵉⵏ, ⴷ ⵜⵉⵔⴰⵜ ⵏ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ, ⴷ ⵜⵉⵔⴰⵜ ⵏ ⵓⵙⴷⵓⵙ ⵏ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵉⵎⴰⵙⵙⵏ ⵏ ⵜⵖⵜⴰⵙⵜ ⵜⴰⵙⵔⵜⴰⵏⵜ ⴷ ⵜⵎⵔⵙⵍⴰⵏⵜ ⴷ ⵜⴷⵎⵙⴰⵏⵜ ⴷ ⵜⴷⵉⴱⵍⵓⵎⴰⵙⵉⵜ, ⵜⵉⵔⴰⵜ ⴰⴷ ⵜⴳ ⵙ ⵉⵣⵡⴰⵔ ⵜⵉⵔⴰⵜ ⵜⴰⴳⵍⴷⴰⵏⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵜⴳⴰ ⵜⵉⵔⴰⵜ ⴷ ⵜⵙⵔⵜⴰⵢ ⵏ ⵉⴼⵔⴷⴰⵙ ⵓⴷⴷⵉⵔⵏ ⵉⵙⵔⵜⴰⵏⵏ ⴷ ⵉⵖⵔⵎⴰⵏⵏ ⴳ ⵜⵎⴰⵣⵉⵔⵜ ⴷ ⵜⵎⵔⵙⴰⵍ ⵏⵏⵙ.

ⵙ ⵓⵅⵎⵎⴻⵎ ⴰⴷ ⴰⴳⵍⴷⴰⵏ ⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵡⴰⴷⴷⵓⵔ ⵏⵏⵙⵏⵜ, ⵍⵍⴰⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵓⴼⵔⴰⴳ ⵏⵏⵙⵏⵜ ⴳ ⵉⵎⵓⴽⵏⵏ ⵏ ⵜⵎⴰⵣⵉⵔⵜ ⵏⵏⵖ ⵉ ⵉⴳⴳⴰⵔ ⵏ ⵙⵉⵏ ⵡⴰⴳⵏⴰⵔⵏ ⵏ ⵉⵙⴳⴳⵯⴰⵙⵏ. ⴰⵔ ⴷ  ⴰⴽⴽⵯ ⵏⴽⵯⵜⵜⵉ  ⴰⵅⵎⵎⴻⵎ ⴰⴳⵍⴷⴰⵏ ⴰⵎⴰⵜⵜⵓⵢ ⴼ ⵓⵙⵓⴼⵖ ⵏ ⵓⵙⵍⴳⵏ ⵏ ⵜⵓⵡⵊⴰ ⴳ 2004 ⴷ ⵜⴱⵔⵉⴷⵜ ⵏⵏⵙ ⵏ ⵓⵣⵣⵔⴰⴼ ⵙ ⵉⵎⵛⴰⵡⴰⵕⵏ ⵉⵏⴰⵎⵓⵔⵏ ⴷ ⵓⵎⵙⴰⵡⴰⵍ ⴰⵏⴰⵎⵓⵔ ⵉⵀⴷⴷⵏⵏ, ⵙ ⵜⵓⵎⴰⵢⵉⵏ ⵏⵏⵙ ⵏ ⵓⵙⵍⴻⵍⵍⵉ, ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵜⴰⵣⵣⴰⵏⵉⵏ ⵙ ⵓⵙⴽⵔ ⵏ ⵓⵎⵢⴰⵙⴰ ⴳ ⵓⵙⴰⵜⵉ ⵏ ⵜⵓⵡⵊⴰ.ⵜⴻⵜⵜⵓⵙⴽⴰⵔ ⴳ ⵓⵎⵏⴰⴹ ⴰⵙⴳⴰⵡⴰⵏ ⴰⵖⵔⵎⴰⵏ ⴰⵇⴱⵓⵔ, ⵉⴳ ⴰⵥⵎⴰⵥⵥⵍ ⵏ ⵡⴰⵏⴰⵡ ⵏ ⵓⵙⵍⴳⵏ ⵉⵣⵣⵉⴳⵣⵏ ⴷⴰⵔ ⵜⵎⴰⴷⴷⴰⵙⵉⵏ ⵜⵉⵎⴰⴹⵍⴰⵏⵉⵏ ⴷ ⵉⵎⴷⵔⴰⵡⵏ ⵏ ⵍⵎⵖⵔⵉⴱ ⴷ ⵡⵉⴷⴰ ⴷ ⵉⴷⵔⵓ ⴰⵜⵉⴳⵏ ⵏ ⵜⴷⵉⵎⵓⵇⵔⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ.

ⵉⵙⴽⵔ ⵓⵙⵍⴳⵏ ⴰⴷ ⵢⴰⵏ ⵓⴱⵔⵉⴷ ⵖⵣⵣⵉⴼⵏ ⵏ ⵉⵎⵓⴽⵏⵏ ⴷⵔⴰⵏⵉⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⵎⴳⴰⵍ ⵏ ⵜⴽⵕⴹⵉ ⵏ ⵜⴼⴽⴽⴰ ⴷ ⵜⴷⵎⵙⴰ ⴷ ⵜⵎⴰⵜⴰⵔⵜ, ⵉⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵏ 2011 ⵜⴰⵔⵙⵍⵜ ⵜⴰⵏⴰⵎⵎⴰⵙⵜ ⵍⵍⵉ ⵉⴼⴽⴰⵏ ⵉⵣⵔⴼⴰⵏ ⵉ ⵓⵔⴳⴰⵣ ⴷ ⵜⵎⵖⴰⵔⵜ ⵙ ⵜⵏⴳⴰⴷⴷⴰⵢⵜ ⴳ ⵉⵣⵔⴼⴰⵏ ⴷ ⵜⴷⵔⴼⴰⵢ ⵜⵉⵖⵔⵎⴰⵏⵉⵏ ⴷ ⵜⵙⵔⵜⴰⵏⵉⵏ ⴷ ⵜⵉⵢⵢⴰⴹ ⵍⵍⵉ ⴳⵉⵙ ⵍⵍⴰⵏⵉⵏ, ⵖⵎⴽⴰⵏ ⵓⵍⴰ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵍⵍⵉ ⵉⵙⵖⵣⵏ ⵍⵎⵖⵔⵉⴱ, ⴰⵢⵍⵍⵉ ⵉⵎⵎⴰⵍⴰⵏ ⵎⴰⵙ ⵉⵔⴰ ⵓⵡⴰⵏⴽ ⴰⵙⴽⵔ ⵏ ⵢⵉⵙⴽⵉⵍ ⵊⴰⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴷ ⵓⵙⴽⵔ ⵏ ⵓⵙⵇⵇⵉⵎ ⴰⵎⵛⴰⵡⴰⵕ ⵉ ⵜⵓⵡⵊⴰ ⴷ ⵜⵣⵣⴰⵏⵉⵏ.

ⵉⵙⴽⵔ ⵓⴷⵓⵙⵜⵓⵔ ⵏ 2011 ⵢⴰⵜ ⵜⴷⵉⵏⴰⵎⵉⵜ ⵏ ⵉⵎⵓⴽⵏⵏ ⵜⴰⵣⵔⴰⴼⵜ ⴷ ⵜⵎⵔⵙⵍⴰⵏⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ, ⴷ ⵜⵔⵙⵍⵜ ⵏ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴷ ⵜⴽⵕⴹⵉ ⵎⴳⴰⵍ ⵏⵏⵙⵏⵜ, ⵉⴳ ⵙⴳ ⵜⵉⵎⴰⵜⴰⵔⵉⵏ ⵏⵏⵙ ⴰⵙⵖⵣⵏ ⵏ ⵓⵙⵍⴳⵏ 103.13 ⴼ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ.

ⵉⵖ ⵜⴳⴷⵍ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ, ⵎⴳⴰⵍ ⵏ ⵓⴼⴳⴰⵏ, ⴳ ⵉⵣⵣⵔⴰⴼⵏ ⴷ ⵉⵙⵍⴳⵏⵏ ⴷ ⵡⴰⵜⵉⴳⵏ, ⵉⴳⴰ ⵓⴼⵔⴰⴳ ⵏ ⵜⴼⵔⵅⵉⵏ ⴷ ⵜⵎⵖⴰⵔⵉⵏ ⵜⵉⵎⵏⴳⴰⵙ ⵏ ⵜⴽⵕⴹⵉ, ⴷ ⵓⵙⴽⵔ ⵏ ⵜⵣⵔⴼⵜ ⴷ ⵓⵙⴱⴷⴷⵉ ⵏ ⴳⴰⵔ ⵜⴰⵎⵙⴽⵔⵜ ⴰⴷ, ⴳⴰⵏ ⵜⴰⵡⵡⵓⵔⵉ ⵍⵍⵉ ⴷ ⵉⵇⵇⴰⵏⵏ  ⵉ ⵜⵡⵉⵣⵉ ⴰⴽⴷ ⵉⵎⵏⴳⴰⵙ ⵏ ⵜⵉⵕⵥⵉ ⴰⴷ ⵉⴳⴰⵏ ⵎⴳⴰⵍ ⵏ ⵡⴰⴷⴷⵓⵔ ⴷ ⵜⴼⴽⴽⴰ.

ⵍⵍⵉⵖ ⵜⴼⵔⴽ ⵜⵎⴰⵣⵉⵔⵜ ⵏⵏⵖ ⵙ ⵜⵎⴰⵙⴰⵢⵜ ⴰⴷ, ⵜⵙⴽⵔ ⴳ ⵜⵎⵔⵙⴰⵍ ⴷ ⵜⴰⴷⴷⴰⵔⵉⵏ ⵏ ⵜⵉⵡⵉⵜ ⴳ ⵜⵎⵏⴳⴰⵙ ⵏ ⵜⴽⵕⴹⵉ ⴳ ⵜⴼⵔⵅⵉⵏ ⴷ ⵜⵎⵖⴰⵔⵉⵏ, ⵢⴰⵜ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ ⵉⵍⵍⴰⵏ ⴳ ⵜⵎⵔⵙⴰⵍ ⵙⴳ ⵜⵉⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵜⴰⵏⴰⵎⵎⴰⵙⵜ ⴷ ⵜⵏⴰⴽⴰⵍⵜ, ⴷ ⵜⵙⵏⴱⴹⴰⵢⵉⵏ, ⵙ ⴰⵢⵍⵍⵉ ⵜⵙⵙⴷⵓⵙ ⵜⵡⵡⵓⵔⵉ ⵏ ⵡⴰⵎⵓⵏ ⴰⵖⵔⵎⴰⵏ ⵙ ⵜⵉⴹⴰⴼ ⴷ ⵓⵙⴼⵔⴽ ⴷ ⵓⵙⵙⵍⵎⴷ.

ⵜⴳⴰ ⵜⵎⵙⴽⵔⵜ ⵜⴰⵎⵖⵔⵉⴱⵉⵜ ⴳ ⵜⴰⵡⵉⵜ ⴳ ⵉⵎⵏⴳⴰⵙ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ ⴷ ⵓⵙⵙⴼⵍⴷ, ⵜⴰⵎⵙⴽⵔⵜ ⵏ ⵜⵓⴷⵔⵉⵡⵉⵏ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵢⴰⵏ ⵡⴰⵏⴰⵡ ⵉⵍⵍⴰⵏ ⴳ ⵜⵎⵙⴽⴰⵔ ⵜⵉⴳⵔⴰⵖⵍⴰⵏⵉⵏ ⵍⵍⵉ ⵢⵉⵡⵉⵏ ⴰⵙⵓⵜⴳ ⵏ ⵜⴳⵔⴰⵡⵉⵏ ⵏ ⵜⵎⵜⵜⴰ ⵎⵓⵏⵏⵉⵏ.

ⵎⴰⵙⵙ ⴰⵏⵙⵙⵉⵅⴼ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵉⵖ ⵜⵙⵔⵙ ⵜⵎⴰⵣⵉⵔⵜ ⵏⵏⵖ ⵉⵎⴰⵙⵙⵏ ⵉⴷⵙⵜⴰⵔⵏ ⴷ ⵉⵣⵣⵔⴰⴼⵏ ⴷ ⵉⵎⵔⵙⵍⴰⵏⵏ ⴷ ⵉⵍⵓⵊⵉⵙⵜⵉⵢⵏ ⵉ ⵜⴰⵡⵉⵜ ⴳ ⵉⵎⵏⴳⴰⵙ ⵏ ⵜⴽⵕⴹⵉ, ⵀⴰⵜ ⵜⴰⵣⵣⵉⴳⵣⵜ ⵏ ⵜⵓⵎⴰⵏⵜ ⴰⴷ ⴰⵔ ⵉⵙⵇⵙⴰ ⴰⴼⵔⴰⴽ ⵏⵏⵖ ⴳ ⴽⵔⴰ ⵏ ⵉⵙⵡⵉⵏⴳⵉⵎⵏ ⵉⵇⴱⵓⵔⵏ ⵍⵍⵉ ⵜⵜ ⵉⵙⵙⵉⵎⵥⵉⵏ, ⵎⵙⴰⵙⴰⵏ ⴷⵉⴷⵙ.

ⵉⵖ ⴳⴰⵏ ⵉⵙⵍⴳⵏⵏ ⵉⴷⵙⵍⴰⵏⵏ ⴳ ⵓⵙⴱⴷⴷⵉ ⵏ ⵜⵎⵙⴽⴰⵔ ⴰⴷ ⴳⴰⵏⵉⵏ ⵎⴳⴰⵍ ⵏ ⵜⴼⴳⴰⵏⵉⵜ, ⵉⵇⵇⴰⵏ ⴷ ⵓⵣⵣⵔⴰⵢ ⵏ ⵉⵙⵡⵉⵏⴳⵉⵎⵏ ⴼ ⵓⴷⵖⴰⵔ ⵏ ⵜⵎⵖⴰⵔⵜ ⴳ ⵡⴰⵎⵓⵏ, ⴰⵢⵍⵍⵉ ⵉⵔⴰⵏ ⴽⵉⴳⴰⵏ ⵏ ⵓⵙⵎⵓⵙⵙⵓ ⴰⴷⵙⵍⴰⵏ ⴷ ⵓⵖⵔⵎⴰⵏ, ⴳ ⵡⴰⵎⵓⵏ ⴷ ⵉⴽⴰⴱⴰⵕⵏ ⴷ ⵜⵎⵙⵎⵓⵏⵉⵏ, ⴷ ⵓⵙⵏⵖⵎⵙ ⵃⵎⴰ ⴰⴷ ⵏⵔⵎⵙ ⴳ ⵓⵙⴱⴷⴷⵉ ⵏⵏⵙ ⴷ ⵡⵉⴷⴰ ⵜⵜ ⵙⴽⴰⵔⵏⵉⵏ, ⵙ ⵓⵙⴽⵔ ⵓⵍⴰ ⵏ ⵜⵙⵔⵜⴰⵢ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵙ ⵜⵖⴰⵔⴰⵙⵜ ⵉⴷⵓⵙⵏ, ⴷ ⵓⵙⵓⵊⴷ ⵏ ⵓⴼⵔⴰⴳ ⵏ ⵉⵎⵏⴳⴰⵙ ⵏ ⵜⴽⵕⴹⵉ ⴷ ⵡⵉⴷⴰ ⵙⵔⵙ ⵜⵜⴱⵔⵔⴰⵃⵏⵉⵏ.

ⵉⵍⵍⴰ ⵓⴱⵕⵍⴰⵎⴰⵏ ⴳ ⵜⵎⵔⵙⴰⵍ ⵜⵜⵎⴰⵖⵏⵉⵏ ⴼ ⵜⵎⵖⴰⵔⵉⵏ ⴷ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ ⵙ ⵜⵎⵥⵍⴰⵢ ⵏⵏⵙ ⵜⵉⵣⵣⵔⴰⴼⵉⵏ ⴷ ⵜⵎⴰⵙⴰⵢⵜ ⵏⵏⵙ ⴳ ⵓⵙⵖⵓⴷⵓ ⵏ ⵉⵙⵍⴳⵏⵏ ⴷ ⵓⵎⵙⴰⵙⴰ ⵏⵏⵙⵏ ⴷ ⵉⵎⵏⴰⴹⵏ ⴷ ⵉⵙⵖⴰⵡⵙⴰⵜⵏ ⵏ ⵡⴰⵎⵓⵏ, ⴷ ⵜⵎⵥⵍⴰⵢ ⵏⵏⵙ ⴳ ⵜⵉⴹⴰⴼ ⴷ ⵓⵙⴱⴷⴷⵉ ⵏ ⵜⵓⵎⴰⵏⵜ, ⴷ ⵓⴷⵖⴰⵔ ⵏⵏⵙ ⴰⴷⵙⵜⴰⵔ ⴰⵙ ⵢⴰⴽⴽⴰⵏ ⵜⵉⵎⵥⵍⴰⵢ ⴷ ⵜⵏⴱⴰⴹⵜ ⵜⴰⵎⴰⵜⵔⴰⵏⵜ ⵜⴰⴱⵉⴷⴰⴳⵓⵊⵉⵜ.

ⵙ ⵓⵙⴷⴷⴻⴷ, ⵉ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ, ⵍⵍⴰⵏⵜ ⵜⵙⵔⵜⴰⵢ ⵕⵡⴰⵏⵉⵏ ⵉ ⵓⵙⵉⵥⴹⵕ ⴰⴷⵎⵙⴰⵏ ⴷ ⵜⵙⵉⵎⴰⵏⵜ ⵜⴰⵥⵕⴼⴰⵏⵜ ⵏ ⵜⵎⵖⴰⵔⵉⵏ, ⵜⵉⵙⵔⵜⴰⵢ ⵍⵍⵉ ⵔⴰⴷ ⵢⴰⵡⵙ ⵉ ⵜⵎⵖⴰⵔⵉⵏ  ⴰⴷ ⵉⵍⵉⵏⵜ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵏ ⵉⵏⴰⵎⵎⴰⵙⵏ ⴷ ⵉⵏⴰⴽⴰⵍⵏ ⴷ ⵜⴱⵔⴰⵜⵉⵏ ⵉ ⵡⴰⵎⵓⵏ, ⴷ ⵓⵙⵉⵙⵙⵏ ⵙ ⵓⵙⵏⴼⵍⵓⵍ ⵏ ⵜⵎⵖⴰⵔⵉⵏ ⴷ ⵜⵙⵓⴳⵔⵜ ⵏ ⵜⵎⵖⴰⵔⵜ ⴳ ⵜⵏⴰⵔⴰ. ⵉⵍⵍⴰ ⴳ ⵓⵎⵣⵔⵓⵢ ⵏⵏⵖ ⴰⵇⴱⵓⵔ ⴷ ⵡⴰⵜⵔⴰⵔ ⵎⴰⴷ ⵉⵙⴷⴷⵉⴷⵏ ⵜⵉⵙⵓⴳⴰⵔ ⴰⴷ.

ⵉⵖ ⵜⴳⴰ ⵜⵎⵙⴰⵔⵜ ⵏ ⵜⵎⵖⴰⵔⵜ ⴳ ⵓⴳⵯⵏⵙ ⵏ ⵉⵙⴰⵡⵓⵔⵏ ⵏ ⵉⵎⵓⴽⵏⵏ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵄⵣⵣⵓ ⵕⴱⴱⵉ, ⵙ ⵓⴼⵔⴰⴳ ⴰⴷⵓⵙⴰⵏ ⴷ ⵓⵏⴰⵎⵓⵏ ⴷ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵓⵙⴰⵔⵓ ⴷ ⵜⴷⵎⵙⴰ ⵏ ⵜⵡⵉⵣⵉ ⴷ ⵜⵏⴰⵎⵓⵏⵜ, ⵉⵖ ⵜⴳⴰ ⵜⵎⴰⴷⵔⴰⵡⵜ ⵏ ⵜⵎⵖⴰⵔⵜ  ⵙⴳ ⵜⵉⵔⵙⴰⵍ ⵏ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ, ⵀⴰⵜ ⵉⴳⴰ ⵓⵙⵙⵍⵎⴷ ⴷ ⵓⵙⴳⵎⵉ ⴷ ⵓⵙⵎⵓⵜⵜⴳ ⵉⴳⴰⵏ ⵡⵉⵏ ⵜⴼⵔⵅⵉⵏ, ⵉⴳⴰ ⴱⴷⴷⴰ ⵢⴰⵏ ⵉⵎⵉⵙⵙ ⵉ ⵓⵙⴱⴷⴷⵉ ⵏ ⵎⴰⴷ ⵉⵜⵜⵚⵉⵃⵉⵏ ⵉ ⵜⵎⵖⴰⵔⵜ ⴳ ⵜⴽⵕⴹⵉ ⵏ ⵜⴼⴽⴽⴰ ⴷ ⵜⵎⴰⵜⵔⴰⵔⵜ ⴷ ⵜⴷⵎⵙⴰ. ⵎⴰ ⴰⴷ ⵓⵔ ⵉⵙⴱⴷⴷ ⵜⵉⵍⴰⵍⵜ ⵏ ⵓⵎⵢⴰⵡⴰⴹ ⴷ ⵓⵙⵙⴼⵔⴽ ⴷ ⵓⵙⵏⵖⵎⵙ ⴳ ⵓⵣⵓⵣⵣⵔ ⵏ ⵜⵓⵎⴰⵏⵜ ⵍⵍⵉ ⵉⵙⵙⵀⵔⵛⵏ ⵏ ⵓⵣⴳⵏ ⵏ ⵡⴰⵎⵓⵏ.

ⴰⵏⵏ ⵏⵉⴳⴳⵓⴳ ⴼ ⵓⵙⵙⵉⵎⵣⵉ ⵏ ⵜⵓⵎⴰⵏⵜ ⵏⵖ ⴰⵙⵎⵖⵔ ⵏⵏⵙ, ⵉⵖ ⵏⵥⵕⴰ ⴰⵏⴰⵡ ⵉⵇⵇⵏⵏ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ, ⵀⴰⵏⵏ ⵉⴳⴰ ⵓⵙⵡⵓⵔⵉ ⴼ ⵓⴼⵔⴰⴽ ⴰⵎⴳⵔⵓ ⴷ ⵜⴷⵍⵙⴰ ⴷ ⵜⵡⵡⵓⵔⵉ ⵏ ⵓⵙⴱⴷⴷⵉ ⵏ ⵓⴱⴽⴽⴰⴹ ⴷ ⵓⵙⴽⵔ ⵏ ⵓⵎⵓⵣⴰⵢ ⵏ ⵡⴰⵔⵓⵔⵡⵍ ⵙⴳ ⵓⵙⴳⵓⴹⵉ ⴷ ⵓⵙⴽⵔ ⵏ ⵓⵙⵍⴳⵏ, ⵎⴰ ⴰⴷ ⵔⴰⴷ ⵉⵙⴽⵔ ⴰⵙⴳⵓⴷⵉ ⵍⵍⵉ ⵔⴰⴷ ⵢⴰⵡⵙ ⵉ ⵡⴰⵎⵓⵏ ⴰⴷ ⵉⴱⴱⵉ ⴷ ⵜⵓⵎⴰⵏⵜ ⴰⴷ ⵉⵍⴽⵎ ⴰⵡⵜⵜⴰⵙ ⵏ ⵜⵎⵜⵜⴰ ⵎⵓⵏⵏⵉⵏ ⵉⴳⴰⵏ: “ⴰⴷ ⵏⵍⴽⵎ ⵉⵎⴰⵍ ⵖ ⵓⵔ ⵜⵍⵍⵉ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵜ”.

ⴳ ⵜⴳⵉⵔⴰ, ⴷⴰ ⵙⵓⵜⴳⵖ ⴰⵍⵜⴰⵖ ⴰⴱⵕⵍⴰⵎⴰⵏⵉ ⴳ ⵜⵡⵡⵓⵔⵉ ⵜⴰⵏⵎⵓⵔⵉⵜ ⵉⵥⵉⵍ, ⴰⵔ ⵙⵏⵉⵎⵎⵉⵔⵖ ⵜⵉⴽⴽⵍⵉⵜ ⵢⴰⴹⵏⵉⵏ ⴰⵏⴳⴳⵯⵓ ⵏⵏⵡ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵖⵓⵔⵉ ⵏⵏⵙ, ⴰⵔ ⴽⵏ ⵙⵏⵉⵎⵎⵉⵔⵖ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⴼ ⵓⴷⵡⴰⵍ ⵏⵏⵓⵏ ⵉⵥⵉⵍⵏ.