ⵜⴰⴳⵓⵔⵉ ⵏ ⵎ.ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵏⵎⵓⵇⵇⴰⵔ ⴰⵎⵛⴰⵡⴰⵕ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵏ ⵉⴼⵔⵉⵇⵢⴰ

ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⴷ ⵉⵏⵙⵙⵉⵅⴼⵏ ⵏ ⵉⴽⴰⴱⴰⵕⵏ,

ⴰⵢⵜⵎⴰ, ⵉⵎⴷⴷⵓⴽⴽⵯⴰⵍ

ⵡⵉⴷⴰ ⵃⴰⴹⵕⵏⵉⵏ,

ⵉⵇⵇⴰⵏ ⴷ ⴳ ⵜⵣⵡⵉⵔⵉ ⴰⴷ ⵙⵔⵓⵏ ⴽⵓⵍⵍⵓ ⵙⴱⵔⵔⴽⵖ ⴳ ⵕⵕⴱⴰⵟ, ⴳ ⵡⴰⴽⴰⵍ ⵏ ⵍⵎⵖⵔⵉⴱ ⵉⴼⵓⵍⴽⵉⵏ, ⴳ ⵜⵎⴰⵣⵉⵔⵜ ⵏⵏⵓⵏ ⵜⵉⵙ ⵙⵏⴰⵜ ⵏⴳⵔ ⴰⵢⵜⵎⴰⵜⵓⵏ ⵍⵍⵉ ⴷⵉⴷⵓⵏ ⴷⵔⵓⵏⵉⵏ ⵜⴰⵎⴽⵯⵜⵉⵜ ⴷ ⵓⵎⵏⴰⴷ, ⴷⵔⵓⵏ ⴷⵉⴷⵓⵏ ⵓⵍⴰ ⴰⵜⵉⴳⵏ ⵏ ⵓⵎⴰⴹⴰⵍ ⴷ ⵉⴼⵔⵉⵇⵢⴰ, ⴷ ⵓⴱⵔⵉⴷ ⴷ ⵉⵙⵡⵉⵏⴳⵉⵎⵏ ⵏ ⵉⵎⴰⵍ.

ⴳ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ ⴰⴷ, ⵉⵇⵇⴰⵏ ⴷ ⴰⴷ ⴽⵯⵏ ⵙⵏⵉⵎⵎⵔⵖ ⴼ ⵓⵅⵎⵎⴻⵎ ⵏⵏⵓⵏ ⴳ ⵜⵎⵓⴽⵔⵉⵙⵉⵏ ⵏ ⵓⵎⵏⵥⴰⵡ ⵏⵏⵖ ⵉⴼⵔⵉⵇⵢⴰ ⴷ ⵜⵎⵙⴰⵔⵉⵏ ⵏⵏⵙ ⴷ ⵜⵎⵣⵡⴰⵔ ⵏⵏⵙ, ⴰⵅⵎⵎⴻⵎ ⴰⴷ ⵉⵟⵟⴰⴼⵏ ⴽⵉⴳⴰⵏ ⵏ ⵓⴷⵎⴰⵡⵏ, ⴳ ⵉⵍⵍⴰ ⵓⵅⵎⵎⴻⵎ ⵏⵏⵓⵏ ⴳ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵉⵡⴰⵏⴽⵏ ⴷ ⵉⵎⴰⴷⴰⵏⵏ ⵏⵏⵓⵏ ⴰⴽⴷ ⵉⵡⴰⵏⴽⵏ ⴷ ⵉⵎⴰⴷⴰⵏⵏ ⵏ ⵓⵎⵏⵥⴰⵡ ⵏⵏⵖ, ⵖⵎⴽ ⴰⵏⵏ ⴷ ⵓⵍⵜⴰⵖ ⵏⵏⵓⵏ ⵉⵕⵡⴰⵏ ⴳ ⵓⵙⵎⵖⵔ ⵏ ⵜⵡⵓⵔⵉ ⵜⴰⴳⵜⵉⵔⴰⵏⵜ ⴳ ⵓⴳⵯⵏⵙ ⵏ ⵜⵎⴰⴷⴷⴰⵙⵉⵏ ⴷ ⵜⵎⵔⵙⴰⵍ ⵜⵉⵙⵔⵜⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⴱⴰⵕⵍⴰⵎⴰⵏⵉⵢⵉⵏ ⵜⵉⴼⵔⵉⵇⵉⵢⵉⵏ ⵍⵍⵉ ⴰⵖ ⵉⵙⵎⵓⵏⵏ.

ⵍⵍⵉⵖ ⴷ ⵜⵓⵛⴽⴰⵎ ⴰⵙⵙ ⴰⴷ ⵙⴳ ⵜⵊⵢⵓⵖⵔⴰⴼⵉⵢⵉⵏ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵜⵉⵎⵏⵏⴰⵡⵉⵏ, ⵜⴰⵙⵉⵎ ⴰⵥⴰⵥⵓⵢ ⵏ ⵓⵎⵓⴷⴷⵓ ⴳ ⵜⵎⵙⵓⵜⵍⵉⵏ ⴰⴷ ⵜⵉⴷⵓⵙⴰⵏⵉⵏ ⴳⴰⵏⵉⵏ ⵜⵉⵎⵥⵍⴰⵢ ⵃⵎⴰ ⴰⴷ ⵜⴷⵔⵓⵎ ⴳ ⵜⵙⵎⵓⵏⵉ ⵏ ⵓⵣⴷⴷⵓⵢ ⵉ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴼ ⵜⵖⴰⵔⴰⵙⵉⵏ ⵏ ⵓⵙⵖⵓⴷⵓ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴳ ⵓⴱⵕⵍⴰⵎⴰⵏ ⵏ ⴽⵓ ⵉⴼⵔⵉⵇⵢⴰ, ⵉⴳⴰ ⵉⵏⵉⴳⵉ ⴼ ⵓⵍⵜⴰⵖ ⵏⵏⵓⵏ ⵃⵎⴰ ⴰⴷ ⵜⵙⴽⵔ ⵜⵎⵔⵙⵍⵜ ⵏⵏⵖ ⵜⴰⵡⵡⵓⵔⵉ ⵏⵏⵙ ⵉ ⵚⴰⵃⴰ ⵏ ⵜⵏⵓⴼⴰ ⵏ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ, ⵏⴼⵍ ⴽⵓ ⵎⴰ ⵔⴰⴷ ⵉⵙⴱⴷⴷ ⴰⵏⴰⵔⵓⵣ ⵏⵏⵖ ⵉⵛⵛⴰⵔⵏ ⴳ ⵉⵍⵍⴰ ⵓⵙⴽⵔ ⵏ ⵉⴼⵔⵉⵇⵢⴰ ⵉⵎⵓⵏⵏ ⴳ ⵓⵙⵡⵉⵔ ⴰⵎⵔⵙⵍⴰⵏ, ⵉⵥⴹⴰⵕⵏ ⴰⴷ ⵜⵙⵙⵍⴽⵎ ⴰⴳⵕⴹ ⵏⵏⵙ ⴳ ⵓⵎⴰⴹⴰⵍ.

ⵀⴰ ⵏⵏ ⵍⵎⵖⵔⵉⴱ, ⵙⴳ ⵎⴰⴷ ⵉⵙⵎⴰⵢⵏⵓ ⴰⵍⵜⴰⵖ ⵏⵏⵙ ⴳ ⵜⵎⵓⵏⵜ ⵏ ⵉⴼⵔⵉⵇⵢⴰ, ⵢⵓⵔⵔⵉ ⴷ ⵙ ⵜⴳⵎⵎⵉ ⴷ ⴰⵢⵜ ⴷⴰⵔⵙ, ⵢⵓⵔⵔⵉ ⴷ ⴰⴷ ⵉⵙⴽⵔ ⴰⵣⵔⴼ ⵏⵏⵙ ⴳ ⵜⵉⵍⵉⵜ ⵜⴰⵎⵔⵙⵍⴰⵏⵜ ⴳ ⵓⵎⵏⵥⴰⵡ ⵏⵏⵙ. ⴳ ⵜⵉⴷⵜ, ⵓⵔ ⵉⴼⴼⵖ ⵉⴼⵔⵉⵇⵢⴰ, ⵉⵙ ⴽⴰ ⵉⵙⴱⴷⴷ ⵜⴰⵡⵡⵓⵔⵉ ⵏⵏⵙ ⴳ ⵜⵎⴰⴷⴷⴰⵙⵜ ⵏ “ⵜⵢⴰⵏⵜ ⵜⴰⴼⵔⵉⵇⵉⵜ” ⵍⵍⵉ ⵉⴳⴰⵏ ⵖⵉⵍⴰⴷ ⵜⴰⵎⵓⵏⵜ ⵜⴰⴼⵔⵉⵇⵉⵜ ⴷⴼⴼⵉⵔ ⵏ ⵓⵙⵏⴼⵍ ⵏ ⵜⴰⵏⵏⴰⵢⵜ ⴷ ⵓⵙⵎⵖⵔ ⵏ ⵉⵎⵏⴰⴷⵏ. ⵢⵓⵔⵔⵉ ⴷ ⵍⵎⵖⵔⵉⴱ ⵓⵍⴰ ⴷⴼⴼⵉⵔ ⵎⴰⴷ ⵜⵙⵎⴷ ⵜⵎⴰⵖⵜ ⵜⴰⵚⵎⵎⴰⴹⵜ, ⵙⵏⴼⵍⵏ ⵉⵏⵣⵡⵉⵜⵏ ⵉⴷⵢⵓⵍⵓⵊⵉⵢⵏ ⵍⵍⵉ ⵜⵜ ⵏⵏ ⴽⴽⴰⵏⵉⵏ ⴳ ⵓⵎⴰⴹⴰⵍ, ⵙⵍⴰⵡⴰⵏ ⴰⴽⴽⵯ ⴳ ⵉⴼⵔⵉⵇⵢⴰ. ⵢⵓⵔⵔⵉ ⴷ ⵍⵎⵖⵔⵉⴱ ⵓⵍⴰ ⵙ ⵜⵓⵜⵔⴰⵡⵉⵏ ⵏ ⴰⵢⵜⵎⴰⵙ ⴷ ⵉⵎⴷⴷⵓⴽⴽⴰⵍ ⴷ ⵜⵡⵉⵣⵉ ⵏⵏⵙ ⴷ ⵉⵥⵓⵥⴹⵏ ⵏⵏⵙⵏ ⵕⵡⴰⵏⵉⵏ ⴼ ⵜⵢⴰⵏⵜ ⵏ ⵉⴼⵔⵉⵇⵢⴰ ⴷ ⵓⵙⵎⴰⴷ ⵏ ⵜⵉⵔⴰⵜⵉⵏ ⴳ ⵓⵎⵏⵥⴰⵡ ⵏⵏⵖ.

ⴳ ⵓⵎⵏⴰⴹ ⴰⴷ, ⴰⵔ ⴷ ⵏⵙⵙⴽⵜⵉ ⵜⴰⴳⵓⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ ⴷⴰⵜ ⵏ ⵓⴳⵔⴰⵡ ⴰⴼⵔⵉⵇⵢⴰ ⴳ ⴰⴷⵉⵙ ⴰⴱⴰⴱ ⴳ ⵡⴰⵢⵏⴰⵙ 3 ⵢⵓⵍⵢⵓⵣ 2017 ⴳ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵔ ⵢⵉⵏⵉ: ⴷⴰⵔⵏⵖ ⴱⴷⴷⴰ ⵜⴰⵎⵢⵉⵎⴰⵏⵜ ⵎⴰⵙ ⵜⵥⴹⴰⵕ ⵉⴼⵔⵉⵇⵢⴰ ⴰⴷ ⵜⵙⵏⴼⵍ ⵜⵉⵏⴰⵥⴰⵕⵉⵏ ⵏⵏⵙ ⵙ ⵡⴰⵢⴷⴰ ⵉⴼⴰⵡⵏ ⵏ ⵜⵣⵣⵉⴳⵣⵜ ⴷ ⵓⵔⴳⴳⵉⴳ”. ⵢⵉⵏⵉ: “ⵉⵔⴰ ⵍⵎⵖⵔⵉⴱ ⴰⴷ ⵢⴰⵡⵙ ⴳ ⵡⴰⵍⴰⵢ ⵏ ⵉⴼⵔⵉⵇⵢⴰ ⵜⴰⵎⴰⵢⵏⵓⵜ: ⵉⴼⵔⵉⵇⵢⴰ ⵉⴷⵓⵙⵏ ⴷ ⵉⵣⵄⵎⵏ, ⵉⵎⵎⴰⵖⵏ ⴼ ⵜⵏⵓⴼⴰ ⵏⵏⵙ, ⵉⴼⵔⵉⵇⵉⵇⵢⴰ ⵉⵟⵟⴰⴼⵏ ⵉⴷⵔⵉⵣⵏ ⴳ ⵓⵙⴰⵔⴰⴳ ⴰⵎⴰⴹⵍⴰⵏ. ⵃⵎⴰ ⴰⴷ ⵉⵍⵉⵏⵜ ⵜⵎⵉⵜⴰⵔ ⵏ ⵉⴼⵔⵉⵇⵢⴰ ⴰⴷ ⵜⴰⵎⴰⵢⵏⵓⵜ, ⵉⵇⵇⴰⵏⴷ ⵓⵙⵍⴻⵍⵍⵉ ⴳ ⵉⵎⴰⵔⵓⵔⵏ. ⵉⴼⵔⵉⵇⵢⴰ ⵜⴰⵎⴰⵢⵏⵓⵜ ⵍⵍⵉ ⵏⵔⴰ ⴰⴷ ⵜⵜⵓⵙⴽⵉⵔ ⵙ ⴽⵉⴳⴰⵏ ⵏ ⵓⵏⴰⵔⵓⵣ, ⵉⵇⵇⴰⵏ ⴷ ⴰⴷ ⵜⵉⵍⵉ ⵙⴳ ⵓⵙⵎⴰⵇⵇⵍ ⵉⴼⴰⵡⵏ ⴷ ⵡⵉⵏ ⵜⵉⵍⴰⵡⵜ, ⵉⵥⴹⴰⵕⵏ ⴰⴷ ⴷ ⵜⴼⵍ ⵉⴼⵔⵉⵇⵢⴰ ⵜⴰⵎⵢⴰⵡⴰⵙⵜ ⵉⵟⵟⴰⴼⵏ ⵜⴰⵙⵏⵜⴰⵢⵜ”. ⵖⵎⴽ ⵍⵍⵉ ⵉⵍⵇⵎ ⴱⴰⴱ ⵏ ⵡⴰⴷⴷⵓⵔ ⴳ ⵜⴳⵓⵔⵉ ⴰⴷ, ⵙ ⵓⵖⵣⴰⵏ ⴷ ⵜⴷⵓⵙⵉ ⴷ ⵣⵣⵄⵎⵜ ⵍⵍⵉ ⴷ ⵢⵉⵡⵉ ⵓⴷⵖⴰⵔ ⴷ ⵓⴱⴷⴷⴰⴷ ⵉⴼⴰⵡⵏ ⴷ ⴰⵢⵜⵎⴰⵜⵏⵖ ⴷ ⵉⵎⴷⴷⵓⴽⴽⴰⵍ:” ⵉ ⵡⴰⵡⵜⵜⴰⵙ ⴰⴷ, ⵉⴳⴰ ⴰⴷⵙⵍⴰⵏ ⴰⴷ ⵙⵔⵙⵏ ⵉⴼⵔⵉⵇⵉⵢⵏ ⵉⵡⵜⵜⴰⵙⵏ ⵏ ⵜⵉⵍⴰⵡⵜ ⴷ ⵜⵡⵡⵓⵔⵉ, ⴱⴷⴷⵏⵉⵏ ⴼ ⵜⵎⵣⵡⵓⵔⴰ ⵏ ⵜⵉⴷⵜ ⵏ ⵉⴼⵔⵉⵇⵢⴰ ⵍⵍⵉ ⵙⵓⵍ ⵓⵔ ⵉⵙⵖⴰⵡⵙⴰⵏ ⵙ ⵜⵥⵓⴳⴰⵢ ⵜⵉⴷⵢⵓⵍⵓⵊⵉⵢⵉⵏ, ⴰⴷ ⵜⵙⵖⴰⵡⵙⴰ ⵙ ⵜⵡⵡⵓⵔⵉ ⵉⴼⴰⵡⵏ ⴷ ⵉⵙⴷⴷⵉⴷⵏ  ⵉⴳⵔⴰⵏ ⵏ ⵓⴼⵔⴰ ⴷ ⵜⵏⴼⵔⵓⵜ ⴷ ⵜⴳⵎⵉ ⵜⴰⵙⵓⵍⴰⵏⵜ. ⵍⵎⵖⵔⵉⴱ ⵉⴼⵔⴽ ⵙ ⵜⵙⵓⴳⵔⵜ ⵏ ⵉⴼⵔⵉⵇⵢⴰ ⴰⴷ ⵜⵙⵎⴰⵢⵏⵓ ⵉⵅⴼ ⵏⵏⵙ, ⵜⴰⵍⵍ ⴰⵙⵡⵉⵔ ⵏ ⵜⵣⵣⵉⴳⵣⵜ ⵏⵏⵙ, ⴷⴰⵜ ⵏ ⵓⵙⵡⵓⵜⵜⵓ ⵏ ⵓⵎⵢⴰⵡⴰⵙ ⴰⵇⴱⵓⵔ ⵊⴰⵔ ⵉⵥⵥⵍⵎⴹ ⴷ ⵉⴼⴼⵓⵙ, ⴳ ⵓⵙⴱⴷⴷⵉ ⵏ ⵜⵏⴰⵥⴰⵕⵜ ⵏ ⵡⴰⵍⴰⵢ, ⵉⵇⵇⴰⵏ ⴷ ⴰⴷ ⵜⵣⵣⵉⴳⵣ ⵉⴼⵔⵉⵇⵢⴰ ⵙ ⵓⵎⵢⴰⵡⴰⵙ ⴰⴼⵔⵉⵇⵉ ⵊⴰⵔ ⵉⵡⴰⵏⴽⵏ, ⴷ ⵓⵙⴽⵔ ⵏ ⴽⵓ ⵓⴷⵎⴰⵡⵏ ⵏ ⵜⵎⴰⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⴷ ⵜⵉⵏ ⵜⵎⵢⴰⵡⴰⵙⵜ ⵊⴰⵔ ⵉⵡⴰⵏⴽⵏ ⴰⵢⵜⵎⴰⵜⵏ”. (ⵉⵙⵎⴷ ⵡⴰⵡⴰⵍ ⵏ ⴱⴰⴱ ⵏⵡⴰⴷⴷⵓⵔ ⴰⴳⵍⵍⵉⴷ)

ⵙⴳ ⵖⵉⴷ, ⴷⴰ ⵜⵜⴰⵏⵏⴰⵢⵖ ⵎⴰⵙ ⴷ ⴽⵔⴰ ⵏ ⵓⴷⵎⴰⵡⵏ ⵏ ⵜⵛⵃⵓⵜ ⴷ ⵓⵍⵎⴰⴹ ⵏ ⵉⵙⵏⴼⴰⵔⵏ ⵏ ⵜⴳⵎⵉ ⴳ ⴽⵉⴳⴰⵏ ⵏ ⵉⵡⴰⵏⴽⵏ ⵏ ⵉⴼⵔⵉⵇⵢⴰ ⵓⵔ ⵔⴰⴷ ⴳⵉⵏ ⴽⵔⴰ ⵏ ⵡⴰⵙⵙ ⵜⴰⴱⴱⴰⵢⴹⴰⵕⵜ ⴷⴰⵜ ⵏ ⵓⵙⴽⵔ ⵏ ⵜⵢⴰⵏⵜ ⵜⴰⴼⵔⵉⵇⵉⵜ ⵉⵜⵜⵓⵔⴰⵏ, ⴷ ⵓⵖⵓⵍ ⵏ ⵓⵚⴽⵓ ⵏ ⵉⴼⵔⵉⵇⵢⴰ ⴼ ⵜⵔⵙⴰⵍ ⵜⵉⴷⵙⵍⴰⵏⵉⵏ ⴷ ⵜⵣⵔⴼⴰⵏⵉⵏ ⵜⵉⵎⴰⵢⵏⵓⵜⵉⵏ.

“ⵜⵉⵥⵉⵕⵜ ⵏ ⵓⵏⴳⵓⵣ” ⵓⵔ ⵜⴳⵉ ⴷ ⵓⵔ ⵙⴰⵔ ⵔⴰⴷ ⵜⴳ ⵉⵎⵉⵙⵙ ⵏ ⵓⵙⴼⵔⵓ ⵏ ⵓⵎⴰⵟⵍ ⵏ ⴽⵔⴰ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⴳ ⵓⴱⵔⵉⴷ ⵏ ⵜⴳⵎⵉ ⴷ ⵓⵍⵜⴰⵖ ⴳ ⵉⵎⴰⵍ , ⴷⴰ ⵥⵕⵕⴰⵖ ⵎⴰⵙ ⴷ ⴰⵎⵓⴽⵔⵉⵙ ⴰⵎⵇⵔⴰⵏ ⴷⴰⵜ ⵏ ⵜⵢⴰⵏⵜ ⵜⴰⵎⵔⵙⵍⴰⵏⵜ ⵏ ⵓⵎⵏⵥⴰⵡ ⵏⵏⵖ ⵉⴳⴰ ⵜⵜ ⵍⵍⵉⵖ ⴱⴷⴷⴰ ⵔⴰⵏⵜ ⴽⵔⴰ ⵏ ⵜⵙⴳⴳⵉⵡⵉⵏ ⴰⴷ ⵣⵣⵔⵉⵏⵜ ⴽⵔⴰ ⵏ ⵉⵖⴰⵡⴰⵙⵏ ⵉⵙⵔⵜⴰⵏⵏ ⴽⵕⵕⵓⵥⵏⵉⵏ, ⵓⵔ ⵍⵍⵉⵏⵉⵏ ⴷ ⵉⵡⵜⵜⴰⵙⵏ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⴷ ⵜⵎⵔⵙⴰⵍ ⵍⵍⵉ ⵜⵜ ⴹⴼⵕⵏⵉⵏ, ⴷ ⵓⵔ ⴰ ⵜⵙⴰⵡⴰⵍ ⴼ ⵜⵉⵔⴰⵜ ⵏⵏⵖ ⵜⴰⵎⴳⵔⵓⵜ ⴳ ⵓⵖⵓⵍ ⵏ ⵓⵚⴽⵓ ⵏ ⵉⵎⵏⴰⴷⵏ ⵏⵏⵖ ⴷ ⵜⵣⵣⵉⴳⵣⵜ ⵙ ⵉⵎⴰⵍ ⵍⵍⵉ ⴷ ⵉⵇⵇⴰⵏⵏ ⴰⴷ ⵜ ⵏⵙⴽⵔ ⴽⵓⵍⵍⵓ ⴰⵖ ⵙ ⵓⵎⴳⵔⵓ.

ⵙ ⵓⵖⵉⵍⵓⴼ, ⵍⵍⴰⵏⵜ ⴽⵔⴰ ⵏ ⵜⵕⵥⵉⵡⵉⵏ ⴳ ⵓⴱⵕⵍⴰⵎⴰⵏ ⵏⵏⵖ ⴰⴼⵔⵉⵇⵉ ⴳ ⵜⵉⵣⵉ ⴰⴷ ⵉⴳⴳⵓⵔⴰⵏ, ⵍⵍⵉⵖ ⵉⵙⵎⵔⵙ ⵓⵏⵙⵙⵉⵅⴼ ⴰⵎⴰⵔⵉ ⵜⴰⵣⵣⵓⵍⵜ ⵏⵏⵙ ⵃⵎⴰ ⴰⴷ ⵉⵣⵣⵔⵉ ⵜⵉⵖⵜⴰⵙⵉⵏ ⵉ ⵚⴰⵃⴰ ⵏ ⵜⵏⵓⴼⴰ ⵜⵉⵙⵔⵜⴰⵏⵉⵏ ⵏ ⴽⵔⴰ ⵏ ⵉⵡⴰⵏⴽⵏ ⴱⵍⴰ ⴽⵔⴰ ⵏ ⵓⵣⵔⴼ, ⵙⵍⴰⵡⴰⵏ ⴰⴽⴽⵯ ⵎⴰⵙ ⴷ ⵜⴰⵣⵣⵓⵍⵜ ⴰⴷ ⵉⵇⵇⴰⵏ ⴰⴷ ⵜⴱⴷⴷ ⵖⴰⵙ ⴼ ⵓⵙⴽⵔ ⵏ ⵜⵡⵡⵓⵔⵉⵡⵉⵏ ⴰⵔⵜⴰ ⵢⵍⵍⵉ ⵓⵙⵜⴰⵢ ⵏ ⵓⵏⵙⵙⵉⵅⴼ ⴰⵎⴰⵢⵏⵓ ⵙ ⵎⴰⴷ ⵉⵍⵍⴰⵏ ⴳ ⵓⵏⴳⵔⴰⵡ ⴰⴳⵯⵏⵙⴰⵏ.

ⴳⴰⵏ ⵉⵙⴽⵉⵔⵏ ⴰⴷ ⵜⴰⵎⴰⵜⴰⵔⵜ ⵉⴼⴰⵡⵏ ⵎⴰⵙ ⵓⵔ ⵜⵍⵍⵉ ⵜⵉⴹⴰⴼ ⵜⴰⵎⵔⵙⵍⴰⵏⵜ ⴷ ⵜⵎⴰⵜⴰⵔⵜ ⴼ ⵜⵓⴳⴰⵡⵜ ⵜⴰⵣⵔⴼⴰⵏⵜ ⵉⴳⴰⵏ ⵎⴳⴰⵍ ⵏ ⵓⵖⵣⴰⵏ ⵏ ⵜⵎⵔⵙⵍⵜ ⵏⵏⵖ, ⵉⵇⵇⴰⵏ ⴷ ⵓⵣⵣⵔⴰⵢ ⵏ ⵎⴰⵢⴰⴷ ⴳ ⵉⵎⴰⵍ ⴷ ⵓⵙⵡⵓⵔⵉ  ⴰⴷ ⵉⵍⵉⵏ ⵜⵖⵜⴰⵙⵉⵏ ⵏ ⵜⵎⴰⵙⴰⵢⵜ ⵃⵎⴰ ⴰⴷ ⴷⴰⵖ ⵓⵔ ⵉⵜⵜⵓⵍⵉⵙ ⵎⴰⴷ ⵉⵣⵔⵉⵏ.

ⴰⵢⵍⵍⵉ ⴷⴰⵖ ⵉⴳⴰⵏ ⵉⵏⵎⵏⵣⵉ, ⵎⴰⴷ ⵉⵊⵕⴰⵏ ⴳ ⵜⵙⵓⵜⵍⵜ ⵜⴰⵏⵎⵢⴰⵔⵜ ⵜⵉⵙ ⴽⴽⵓⵥⵜ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵙⵎⵎⵓⵙⵜ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵉⵍⵍⴰⵏ ⴳ ⵎⵉⴷⵔⴰⵏⴷ ⴳ 20 ⵎⴰⵢⵢⵓ ⴷ 4 ⵢⵓⵏⵢⵓ ⴳ ⵓⵙⴳⴳⵯⴰⵙ ⴰⴷ, ⵜⵉⵎⵥⵕⴰⵢⵉⵏ ⴳⴰⵏⵉⵏ ⵎⴳⴰⵍ ⵏ ⵢⵉⵎⴰⵏ ⵏ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ ⴷ ⵜⵉⴷⵉⵎⵓⵇⵕⴰⵜⵉⵜ ⵜⴰⴳⵯⵏⵙⴰⵏⵜ, ⵎⴳⴰⵍ ⵏ ⵜⵍⴻⵍⵍⵉ ⵏ ⵓⵙⵜⴰⵢ ⵏ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ ⵏ ⴽⵓ ⵉⴼⵔⵉⵇⵢⴰ ⵉ ⵓⵏⵙⵙⵉⵅⴼ ⵏⵏⵙⵏ ⴷ ⵉⴳⵏⵙⴰⵙⵏ ⵏⵏⵙⵏ ⴳ ⴽⵓ ⵜⵉⴳⵔⴰⵡⵉⵏ ⵏ ⵜⵎⵔⵙⵍⵜ ⴰⴷ ⵉⵜⵜⴰⵡⵇⵇⴰⵔⵏ, ⴳ ⵜⵉⵣⵉ ⵖ ⵏⵔⴰ ⴰⴽⴽⵯ ⴰⴷ ⵏⴼⵍ ⴰⵎⴰⵟⵍ ⵍⵍⵉ ⴷ ⵉⴳⴳⵔⴰⵏ ⴼ ⵜⵡⵡⵓⵔⵉⵡⵉⵏ ⵏ ⵜⵎⵔⵙⵍⵜ ⵏⵏⵖ ⵍⵍⵉ ⴷ ⵉⵡⵉⵏ ⵉⵙⵓⵔⵙⵏ ⵉⴷⵓⵙⴰⵏⵏ ⵉⵎⵥⵍⴰⵢⵏ ⴳ ⵓⵎⴰⴹⴰⵍ.

ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵜⵜⴰⵡⵇⵇⴰⵔⵏⵉⵏ,

ⵉⴳⴰ ⵓⵖⵓⵍ ⵏ ⵣⵓⵏ ⵜⵉⵎⵙⴽⴰⵔ ⴰⴷ ⵓⵔ ⵍⵉⵏⵉⵏ ⵜⴰⵎⴰⵙⴰⵢⵜ ⴳ ⵓⴳⵯⵏⵙ ⵏ ⵓⴱⵕⵍⴰⵎⴰⵏ ⵏ ⴽⵓ ⵉⴼⵔⵉⵇⵢⴰ ⴰⵙⴷⴷⵉⴷ ⵏ ⵉⵎⵉⵣⵉⵢⵏ ⵏ ⵓⵙⴷⵔⵓ ⵏ ⵜⴰⵙⵙⴰⵙⵜ ⵏ ⵜⵎⵢⵉⵎⴰⵏⵜ ⵊⴰⵔ ⵉⵎⵙⵜⴰⵢⵏ ⵉⴼⵔⵉⵇⵉⵢⵏ ⴷ ⵉⴳⵏⵙⴰⵙⵏ ⵏⵏⵙⵏ, ⵉⵕⵥ ⵓⵍⴰ ⵉⵏⴰⵔⵓⵣⵏ ⵏⵏⵙⵏ ⴳ ⵢⴰⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵉⵜⵜⵎⴹⴰⴽⴰⵕⵏ ⴼ ⵉⴼⵙⵙⴰⵢⵏ ⵏ ⵜⵎⵓⴽⵔⵉⵙⵉⵏ ⵏ ⵓⵏⵎⵓⵔⵉ ⴰⴼⵔⵉⵇⵉ, ⵉⵙⴽⵔ ⴰⵜⵉⴳⵏ ⵏ ⵜⴷⵉⵎⵓⵇⵔⴰⵟⵉⵜ ⴳ ⵜⵍⵍⴰ ⵜⴷⵔⴼⵉⵜ ⵏ ⵓⵙⵜⴰⵢ ⴷ ⵡⴰⵜⵜⴰⵢ ⴼ ⵜⵉⴹⴰⴼ ⴳ ⵜⵎⵔⵙⴰⵍ ⴷ ⵓⵙⵡⴰⵍⴰ ⵏⵏⵙⵏⵜ ⵉ ⵜⵏⴰⴼⵜ ⵏ ⵉⵙⵏⴼⴰⵔⵏ ⵉⵏⵉⵎⴰⵏⵏ ⴷ ⵜⵓⵙⵎⵉⵏ ⵏ ⵜⵎⵉⵣⴰⵔ ⴳⴰⵏⵉⵏ ⵎⴳⴰⵍ ⵏ ⵓⵙⵏⴼⴰⵔ ⵏⵏⵖ ⴰⵎⵏⵥⴰⵡ ⴰⵅⴰⵜⴰⵔ.

ⴷⴰⵜ ⵏ ⵜⵏⴰⵥⴰⵕⵉⵏ ⴳⴳⵓⵜⵏⵉⵏ ⵎⵏⵉⴷ ⵏ ⵓⵎⵏⵥⴰⵡ ⵏⵏⵖ ⴰⴼⵔⵉⵇⵉ ⴰⵎ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵓⵛⵃⵓ ⵏ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵣⵣⵉⴳⵣⵜ ⵏ ⵉⵎⴰⵖⵏ ⵉⵔⴱⴰⴱⵏ ⴷ ⵡⵉⴷⴰ ⵜⵏ ⵓⵔ ⴳⵉⵏⵉⵏ, ⴷ ⵜⵏⴰⵥⴰⵕⵜ ⵏ ⵓⵙⴽⵔ ⵏ ⵜⵙⴳⴰ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⵉ ⵓⵙⵏⴼⵍ ⵉⵍⴻⵍⵍⵉ - ⵙ ⵎⴰⴷ ⴳⵉⵙ ⵉⵍⵍⴰⵏ ⴳ ⵜⵓⵙⵙⵔⴰ ⵏ ⵉⵡⵜⵜⴰ ⵉ ⵜⵍⴻⵍⵍⵉ ⵏ ⵓⵎⵓⴷⴷⵓ ⵏ ⵉⵡⴷⴰⵏ ⴷ ⵜⵎⴳⵓⵔⴰ - ⵉⵇⵇⴰⵏ ⴰⵖ ⴷ ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵜⵎⵔⵙⴰⵍ ⵏⵏⵖ ⵉ ⵓⵙⵎⵔⵙ ⵏ ⵉⵙⵏⴼⴰⵔⵏ ⴰⴷ ⴷ ⵓⵙⴱⴷⴷⵉ ⵏ ⵜⵓⵜⵔⴰⵡⵉⵏ  ⴷ ⵜⴼⵔⴽⴰ ⴷ ⵉⵙⵖⵡⴰⵏ ⵏ ⵉⵎⴰⵍ. ⴰⵙⵙ ⴰⴷ, ⵜⴳⴰ ⵜⵎⵔⵙⵍⵜ ⵏ ⵓⴱⵕⵍⴰⵎⴰⵏ ⵏ ⴽⵓ ⵉⴼⵔⵉⵇⵢⴰ ⵙ ⵜⵎⵥⵍⴰⵢ ⵏⵏⵙ ⴷ ⵜⵉⵍⴰⵍ ⵏⵏⵙ, ⴰⵎⵙⴽⴰⵔ ⴰⴷⵙⵍⴰⵏ  ⴳ ⵓⵙⴽⵔ ⵏ ⵓⵙⵎⴰⴷ ⴰⴼⵔⵉⵇⵉ ⵍⵍⵉ ⴰⴽⴽⵯ ⵏⵔⴰ.

ⵜⵉⵎⵓⴽⵔⵉⵙⵏ ⵍⵍⵉ ⴱⴷⴷⴰ ⵍⵍⴰⵏⵉⵏ ⴳ ⵓⴳⵯⵏⵙ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⴱⵣⵣⵉⵣⵏⵜ ⴼⵍⵍⴰⵖ ⴰⵣⵣⵔⴰⵢ ⵏ ⵜⵙⵉⵍⴰ ⵜⴰⵣⵔⴼⴰⵏⵜ ⵍⵍⵉ ⴼ ⴱⴷⴷⵏⵜ ⵜⴳⵔⴰⵡⵉⵏ ⴷ ⵜⵙⵇⵇⵉⵎⵉⵏ ⵏ ⵜⵎⵔⵙⵍⵜ ⵏⵖ ⴳ ⵜⵡⵓⵔⵉⵡⵉⵏ ⵏⵏⵙ, ⴰⵣⵣⵔⴰⵢ ⴰⴷ ⵉⵡⴰⵜⵜⵙ ⴰⵙⵖⵓⴷⵓ ⴷ ⵓⴼⵓⵍ ⵏ ⵜⵎⵓⴽⵔⵉⵙⵉⵏ ⵜⵉⵣⵔⴼⴰⵏⵉⵏ, ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵡⵡⵓⵔⵉ ⵜⴰⴷⵉⵎⵓⵇⵔⴰⵟⵉⵜ, ⵃⵎⴰ ⴰⴷ ⵜⵙⴽⵔ ⵜⵎⵔⵙⵍⵜ ⴰⴷ ⵉⵜⵜⴰⵡⵇⵇⴰⵔⵏ ⵜⵉⵍⴰⵍⵜ ⵏⵏⵙ ⵙ ⵜⵖⴰⵔⴰⵙⵜ ⴷ ⵢⵓⵙⴰⵏ.

ⵜⴳⴰ ⵜⵙⵎⵓⵏⵉ ⴰⴷ ⵢⴰⵏ ⵓⴷⵎ ⵙⴳ ⵓⴷⵎⴰⵡⵏ ⵏ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵜⴰⴼⵔⵉⵇⵉⵜ ⵉⵛⵛⴰⵔⵏ ⵖ ⵏⵔⴰ ⴰⵙⵏⴼⵍ ⵏ ⵜⴰⵏⵏⴰⵢⵢⵉⵏ ⵃⵎⴰ ⴰⴷ ⵢⵉⵍⵉ ⵓⵎⵙⴰⵙⴰ ⵊⴰⵔ ⵉⴽⴰⴱⴰⵕⵏ ⵉⴱⵕⵍⴰⵎⴰⵏⵉⵢⵏ ⵃⴰⴹⵕⵏⵉⵏ, ⵙ ⵓⵎⵙⴰⵙⴰ ⴷ ⵉⵎⵓⵣⴰⵢⵏ ⵉⴷⵙⵍⴰⵏⵏ ⵏ ⵜⵎⵔⵙⵍⵜ ⵏⵏⵖ ⵉⵜⵜⴰⵡⵇⵇⴰⵔⵏ ⵙ ⵓⵡⵇⵇⵔ ⵉⵙⵎⴷⵏ  ⵏ ⵢⵉⵎⴰⵏ ⵏ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵜⴰⴳⵜⵉⵔⴰⵏⵜ.

ⵃⵎⴰ ⴰⴷ ⵏⵍⴽⵎ ⴰⵡⵜⵜⴰⵙ ⴰⴷ, ⴳⴰⵏⵜ ⵜⵙⵓⵎⵔⵉⵏ ⵍⵍⵉ ⵙ ⵏⵥⴹⴰⵕ ⴰⴷ ⵜⵏⵜ ⵏⴻⵏⵏⴰ, ⵓⵛⵛⵉⵍ ⵏ ⵓⵙⵏⴼⵍ ⵏ ⵓⵙⵍⴳⵏ ⴰⴳⵯⵏⵙⴰⵏ  ⵃⵎⴰ ⴰⴷ ⵢⵉⵎⵖⵓⵔ ⴼ ⴽⵓ ⵉⵙⴰⵖⵓⵍⵏ ⵉⵣⵔⴼⴰⵏⵏ, ⵃⵎⴰ ⴰⴷ ⵓⵔ ⵢⵉⵍⵉ ⵓⵎⵣⵔⴰⵢ ⵊⴰⵔ ⵉⵙⵍⴳⵏⵏ ⵍⵍⵉ ⵍⵍⴰⵏⵉⵏ, ⴷ ⴰⴷ ⵓⵔ ⵢⵉⵍⵉ ⴽⵔⴰ ⵏ ⵓⵎⵣⵔⴰⵢ ⴼ ⵓⵙⴼⵔⵓ ⵏ ⵉⴹⵕⵉⵚⵏ ⵉⵣⵔⴼⴰⵏⵏ, ⵍⵍⵉ ⴱⴷⴷⴰ ⵙⵎⵔⴰⵙⵏ ⴽⵔⴰ ⵏ ⵡⵉⴷⴰ ⵓⵔ ⵙⵔⵙⵏⵉⵏ ⵜⴰⵏⴰⴼⵓⵜ ⵉⵛⵛⴰⵔⵏ  ⴳ ⵜⵎⵣⵡⵓⵔⴰ ⵏⵏⵙⵏ.

ⵓⵔ ⴳⵉⵙ ⵜⵓⵔⴷⴰ ⵎⴰⵙⴷ ⵜⵉⴽⵛⵛⵓⵎⵉⵏ ⵏⵏⵓⵏ ⵙⵜⴰⵡⵀⵎⵎⴰⵏⵉⵏ ⴷ ⵓⵏⵢⴰⵍⴽⴰⵎ ⵏⵏⵓⵏ ⵉⵥⵉⵍⵏ ⴳ ⵓⵏⵎⵓⵇⵇⴰⵔ ⴰⴷ ⴰⵎⵛⴰⵡⴰⵕ ⵔⴰⴷ ⵉⵙⴱⵓⵖⵍⵓ ⴰⵎⴹⴰⴽⴰⵕ ⵍⵍⵉ ⵔⴰⴷ ⵢⴰⵡⵉ ⵜⵉⵙⵓⵎⵔⵉⵏ ⵍⵍⵉ ⵔⴰⴷ ⵉⵙⵖⵓⴷⵓ ⵜⴰⵡⵡⵓⵔⵉ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵃⵎⴰ ⴰⴷ ⵜⵜⵓⵙⴽⵉⵔ ⵜⵢⴰⵏⵜ ⵜⴰⴼⵔⵉⵇⵉⵜ ⵍⵍⵉ ⵏⵙⵉⴳⴳⵉⵍ ⵏⵙⴽⵔ ⵉⵏⴰⵔⵓⵣⵏ ⵏ ⵉⵎⴰⴷⴰⵏⵏ ⵏⵏⵖ.

ⵜⵉⴽⴽⵍⵉⵜ ⵢⴰⴹⵏⵉⵏ, ⴰⵔ ⴰⵡⵏ ⵙⵙⵉⵜⵉⵎⵖ ⴰⵙⵏⵓⴱⴳ ⵢⵓⵎⵎⵔⵏ ⴳ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⴷ ⵓⵎⵓⵔⵙ ⵉⵙⵎⴷⵏ ⵉ ⵓⵏⵎⵓⵇⵇⴰⵔ ⴰⴷ.