ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⵓⴱⴳ ⴰⵎⵙⴽⴰⵔ ⴰⵎⴰⵔⵉ ⵏ ⵜⵡⵓⵔⵉⵡⵉⵏ ⵏ ⵜⵎⵙⵇⴰⴷⵜ ⵏ ⵇⴰⵟⴰⵕ
ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⵉⵏⴰⵙ 24 ⵏⵓⵡⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⴰⵎⵙⴽⴰⵔ ⴰⵎⴰⵔⵉ ⵏ ⵜⵡⵓⵔⵉⵡⵉⵏ ⵏ ⵜⵎⵙⵇⴰⴷⵜ ⵏ ⵇⴰⵟⴰⵕ ⵖ ⵕⵕⴱⴰⵟ ⵎⴰⵙⵙ ⵅⴰⵍⵉⴷ ⵎⵓⵃⴰⵎⵎⴰⴷ ⴱⵏ ⵣⴰⴱⵉⵏ ⴷⴷⵓⵙⴰⵔⵉ.
ⵖ ⵓⵏⵎⵓⵇⴰⵔ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵎⵙⴽⴰⵔ ⴰⵎⴰⵔⵉ ⵏ ⵜⵡⵓⵔⵉⵡⵉⵏ ⵏ ⵜⵎⵙⵇⴰⴷⵜ ⵏ ⵇⴰⵟⴰⵕ ⴰⵙⵏⴰⵍ ⵏ ⵜⵎⴰⵣⵉⵔⵜ ⵏⵏⵙ ⵉ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷ ⵜⵡⵓⵔⵉ ⵏ ⵓⴼⵔⴰ ⵍⵍⵉ ⵙⴽⵔⵏⵜ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵖ ⵓⵕⵥⵥⵓⵎ ⵏ ⵓⵙⴰⴽⴰ ⵏ ⵍⴳⵔⴳⴰⵔⴰⵜ, ⵉⴱⴷⵔ ⴰⵏⵢⴰⵍⴽⴰⵎ ⵏ ⵜⵉⵍⵉⴼⵓⵏ ⵉⵍⵍⴰⵏ ⵏⴳⵔ ⴱⴰⴱ ⵏ ⵜⴰⵜⵜⵓⵢⵜ ⵛⵛⵉⵅ ⵜⴰⵎⵉⵎ ⴱⵏ ⵃⴰⵎⴰⴷ ⴰⵍ ⵜⴰⵏⵉ, ⵍⴰⵎⵉⵔ ⵏ ⵇⴰⵟⴰⵕ, ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵖ ⵉⵎⴰⵍⴰⵙⵙ ⵉⵣⵔⵉⵏ.
ⵉⵙⴷⴷⵉⴷ ⵎⴰⵙⵙ ⴷⴷⵓⵙⴰⵔⵉ ⵎⴰⵙ ⵉⵍⵍⴰ ⵓⵙⵇⵇⵉⵎ ⵏ ⵛⵛⵓⵕⴰ ⵏ ⵇⴰⵟⴰⵕ ⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ, ⴷ ⵓⵙⴷⵓⵙ ⵏ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵏⴳⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵖ ⵙⵏⴰⵜ ⵜⵎⵉⵣⴰⵔ, ⵉⵙⵓⵜⴳ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ.
ⵖ ⵜⵙⴳⴰ ⵏⵏⵙ, ⵉⵙⵏⵉⵎⵎⵔ ⴷ ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷⴷⴰⴷ ⵏ ⵓⵙⵏⴰⵍ ⵏ ⵇⴰⵟⴰⵕ ⵉ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵢⵉⵏⵉ “ⵜⴳⴰ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵜⴰⵎⵙⴰⵔⵜ ⵜⴰⵎⵙⴼⵓⵥⵥⵕⵜ ⴷⴰⵔ ⴽⵓ ⵉⵎⵖⵔⵉⴱⵉⵢⵏ, ⴷ ⴰⵔ ⵏⵥⵕⵕⴰ ⵎⴰⵙ ⴷ ⵜⴰⵢⴰⵏⵜ ⵏ ⵉⵎⴰⴷⴰⵏⵏ ⴷ ⵉⵡⴰⵏⴽⵏ ⵜⴳⴰ ⵜⴰⴼⴰⴷⴰ ⵜⴰⵔⵙⵍⴰⵏⵜ ⵉ ⵜⵏⴼⵔⵓⵜ ⴷ ⵓⵔⴳⴳⵉⴳ ⵖ ⵓⵎⴰⴹⴰⵍ ⴽⵓⵍⵍⵓ ⵜ”.
ⵉⵙⵓⵜⴳ ⵎⴰⵙⵙ ⵍⵎⴰⵍⴽⵉ ⵜⴰⵣⵣⵉⴳⵣⵜ ⵜⴰⴷⵉⵎⵓⵇⵔⴰⵟⵉⵜ ⵏ ⵇⴰⵟⴰⵕ ⵙ ⵉⵡⵉⵣ ⵏ ⴱⴰⴱ ⵏ ⵜⴰⵜⵜⵓⵢⵜ ⵍⴰⵎⵉⵔ, ⵉⵙⵓⵜⴳ ⴰⵙⵏⵎⴰⵍⴰ ⵏ ⵉⵙⵜⴰⵢⵏ ⵓⵙⵔⵉⴷⵏ ⵏ ⵓⵙⵇⵇⵉⵎ ⵏ ⵛⵛⵓⵕⴰ ⵖ ⵓⵙⴳⴳⵯⴰⵙ ⴷ ⵢⵓⵛⴽⴰⵏ, ⵉⴱⴷⴷ ⴼ ⵜⵉⵔⴰⵜ ⵉⴷⵓⵙⵏ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵙⵉⵏ ⵉⵙⵇⵇⵉⵎⵏ, ⴷ ⵓⵙⵡⵓⵔⵉ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵛⵛⵓⵕⴰ ⵖ ⵇⴰⵟⴰⵕ ⵖ ⵓⵕⵥⵥⵓⵎ ⵏ ⵉⵎⵏⵉⴷⵏ ⵉⵎⴰⵢⵏⵓⵜⵏ ⵉ ⵓⵎⵢⴰⵡⴰⵙ ⴷ ⵜⵡⵉⵣⵉ.