ⵜⴰⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵜⵎⵍⴰ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙⵏⴰⵜ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵉ ⵓⵙⵔⵅⵓ ⵏ ⵜⴱⵔⵉⴷⵉⵏ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⵉⵡⵉⵏ ⵖ ⵢⵉⴳⵔ ⵏ ⵓⵣⵣⵔⴰⴼ

ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 16 ⵏⵓⵡⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ, ⵜⴰⵙⵎⵓⵏⵉ ⴷ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵍⵍⵉ ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵍⵄⴰⴱⴷⵉ, ⵜⵥⵍⵉ ⵉ ⵓⵙⵎⵏⵉⴷ ⵏ ⵙⵏⴰⵜ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵉ ⵓⵙⵏⴼⵍ ⴷ ⵓⵙⵎⵏⵉⴷ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 64.16 ⴼ ⵜⴼⴰⴷⵉⵡⵉⵏ ⵏ ⵓⵙⴽⵔ ⵏ ⵓⵣⵔⴼ ⵏ ⵓⵙⵎⵏⵉⴷ ⵏ ⵜⵓⵜⵔⵉⵡⵉⵏ ⴷ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 44.14 ⴼ ⵓⵙⵎⵏⵉⴷ ⵏ ⵜⵓⵍⴽⵉⵎⵉⵏ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ.

ⵖ ⵓⵏⵎⵓⵇⴰⵔ ⴰⴷ, ⵙⴷⴷⵉⴷⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵎⴰⵙ ⵍⵍⴰⵏⵜ ⵜⵎⵓⴽⵔⵉⵙⵉⵏ ⵣⴷⵉⵏⵉⵏ ⴷ ⵓⵙⴽⵔ ⵏ ⵉⵏⵎⵓⵔⴰⵏ ⵙ ⵓⵣⵔⴼ ⵏⵏⵙⵏ ⴰⴷⵙⵜⴰⵔ ⴼ ⵓⵙⵎⵏⵉⴷ ⵏ ⵜⵓⵜⵔⵉⵡⵉⵏ ⵖ ⵢⵉⴳⵔ ⵏ ⵓⵣⵣⵔⴰⴼ ⴷ ⵜⵓⵍⴽⵉⵎⵉⵏ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵙⵍⴰⵡⴰⵏ ⴰⴽⴽⵯ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ.

ⵖ ⵜⵉⴼⴰⵡⵜ ⵏ ⵜⵉⵔⵎⵉⵜⵉⵏ ⵜⵉⴳⵔⴰⵖⵍⴰⵏⵉⵏ, ⴷ ⵜⵢⴰⴼⵓⵜ ⵏ ⵓⵏⵎⵓⵇⴰⵔ ⵏ ⵡⴰⵙⵙ ⵏ ⵜⵖⵓⵔⵉ ⵍⵍⵉ ⵜⵙⴽⵔ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⵣⵡⵉⵔⵉ ⵏ ⵓⵙⴳⴳⵯⴰⵙ ⴼ : « ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵏⴳⵔ ⵜⵎⵓⴽⵔⵉⵙⵉⵏ ⵏ ⵜⵉⵍⴰⵡⵜ ⴷ ⵉⵎⵏⴰⴷⵏ ⵏ ⵜⵣⵣⵉⴳⵣⵜ », ⵜⵏⵏⴰ ⵜⵙⵇⵇⵉⵎⵜ ⵎⴰⵙ ⴷ ⵉⵇⵇⴰⵏ ⵓⵙⵏⴼⵍ ⵏ ⵙⵉⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵙ ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵓⵙⵎⵖⵔ ⵏ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ ⵖ ⵜⵎⴰⵣⵉⵔⵜ ⵏⵏⵖ.

ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⵜⴰⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵜⴳⴰ ⵢⴰⵜ ⵜⵔⵙⵍⵜ ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵏ 2011, ⵉⵙⴰⵡⵍ ⴼ ⵡⴰⵜⵉⴳ ⵏ ⵓⵙⵔⵅⵓ ⵏ ⵜⴱⵔⵉⴷⵉⵏ ⵣⴷⵉⵏⵉⵏ ⴷ ⵜⵓⵍⴽⵉⵎⵉⵏ ⴷ ⵜⵓⵜⵔⵉⵡⵉⵏ  ⵖ ⵢⵉⴳⵔ ⵏ ⵓⵣⵣⵔⴰⴼ ⵙ ⴰⵢⵍⵍⵉ ⵔⴰⴷ ⵢⴰⵡⵙ ⵉ ⵉⵏⵎⵓⵔⴰⵏ ⴰⴷ ⵙⴽⵔⵏ ⴰⵣⵔⴼ ⴰⴷ ⴰⴷⵙⵜⴰⵔ : « ⵜⴳⴰ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵢⴰⵜ ⵜⵢⴰⴼⵓⵜ ⵜⴰⴷⵙⵜⴰⵔⵜ ⵉⵙⵜⴰⵡⵀⵎⵎⴰⵏ, ⵜⴰⵡⵓⵔⵉ ⵖ ⵓⴳⵯⵏⵙ ⵏ ⵜⵎⵔⵙⴰⵍ ⵜⴳⴰ ⵜⴰⵖⴰⵔⴰⵙⵜ ⵉⵥⵉⵍⵏ ⵉ ⵜⵎⵔⴰⵔⵓⵜ ⴼ ⵉⵅⵎⵎⵉⵎⵏ ⵏ ⵉⵏⵎⵓⵔⴰⵏ ».

ⵉⵍⵍⴰ ⵓⵎⵙⴰⵛⴽⴰ ⴰⴷ ⵢⵉⵍⵉ ⵓⵎⵛⴰⵡⴰⵕ ⴷ ⵉⵏⴳⵎⴰⵎⵏ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⴷ ⵓⵣⴷⴷⵓⵢ ⴷ ⵜⵏⴱⴰⴹⵜ ⴼ ⵓⵙⵏⴼⵍ ⴷ ⵓⵙⵎⴰⴷ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ : 64.14 ⴼ ⵓⵙⵎⵏⵉⴷ ⵏ ⵜⵓⵜⵔⵉⵡⵉⵏ ⵖ ⵢⵉⴳⵔ ⵏ ⵓⵣⵣⵔⴰⴼ ⴷ 44.14 ⴼ ⵓⵙⵎⵏⵉⴷ ⵏ ⵜⵓⵍⴽⵉⵎⵉⵏ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ.