ⵜⴰⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵏⴳⵔⴰⵡ ⴰⴷⵓⵙⴰⵏ ⵜⵙⵏⵎⴰⵍⴰ ⵜⵉⵖⵉⵎⵉⵜ ⵏ ⵓⵙⵙⴼⵍⴷ ⵉ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵙⵜⴰⵡⵀⵎⵎⴰⵏⵉⵏ ⵙ ⵢⵉⴳⵔ ⴰⴷⵓⵙⴰⵏ

ⵜⵙⵏⵎⴰⵍⴰ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵏⴳⵔⴰⵡ ⴰⴷⵓⵙⴰⵏ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵉⵖⵉⵎⵉⵜ ⵏ ⵓⵙⴼⴼⵍⴷ ⵉ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵙⵜⴰⵡⵀⵎⵎⴰⵏⵉⵏ ⵙ ⵢⵉⴳⵔ ⴰⴷⵓⵙⴰⵏ, ⴰⵙⵙ ⵏ ⵓⴽⵕⴰⵙ 28 ⴽⵟⵓⴱⵕ ⵖ ⵓⵙⵖⵉⵎ ⵏ ⵓⵙⵇⵇⵉⵎ.

ⵖ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ, ⵉⴱⴷⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵡⴰⵜⵉⴳ ⵏ ⵜⵙⵎⵓⵏⵉ ⴰⴷ ⵉⵍⵍⴰⵏ ⵖ ⵜⵎⵙⴰⵙⵜⵍⵜ ⵍⵍⵉⵖ ⵉⴷⴷⵔ ⵓⵎⴰⴹⴰⵍ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⴰⵢⵍⵍⵉ ⵉⵙⴽⵔⵏ ⵖ ⵜⴷⵓⵙⵉ “ⵜⴰⵎⵣⵡⴰⵔⵓⵜ ⵏ ⵜⵎⵣⵡⵓⵔⴰ”, ⵢⵉⵏⵉ ⵎⴰⵙ ⵉⵎⵎⴰⵖ ⵍⵎⵖⵔⵉⴱ ⴰⴷ ⵢⴰⵏⴼ ⵉ ⵜⵎⵓⴽⵔⵉⵙⵉⵏ ⵍⵍⴰⵏⵉⵏ ⵖ ⵓⵏⴳⵔⴰⵡ ⴰⴷⵓⵙⴰⵏ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ, ⵙ ⵜⵓⴳⴳⴰⵙ ⵙⵜⴰⵡⵀⵎⵎⴰⵏⵉⵏ ⴳⴰⵏⵉⵏ ⵜⵉⵥⵕⴼⴰⵏⵉⵏ ⴷ ⵜⵎⴰⵜⵜⵉⵡⵉⵏ ⴷ ⵜⵏⴼⴳⴰⵏⵉⵏ, ⵃⵎⴰ ⴰⴷ ⵓⵔ ⵉⴹⵕ ⵓⵏⴳⵔⴰⵡ ⴰⴷ.

ⵢⵉⵏⵉ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵙⵡⴰⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵜⵏⴱⴰⴹⵜ ⵃⵎⴰ ⴰⴷ ⵜⵙⵎⴰⵜⴰ ⴰⵙⴼⵍⵙ ⴰⴷⵓⵙⴰⵏ ⴷ ⵓⵃⵟⵟⵓ ⴰⵏⴰⵎⵓⵏ ⴼ ⴽⵓ ⵉⵎⵖⵔⴰⴱⵉⵢⵏ ⵖ ⵙⵎⵎⵓⵙ ⵉⵙⴳⴳⵯⴰⵙⵏ, ⵉⴳⴰ “ⵢⴰⵏ ⵓⵙⵡⴰⵍⴰ ⴰⴳⵍⴷⴰⵏ ⵉⴷⵓⵙⵏ ⴷⴰⵜ ⵏ ⵉⵎⵍⵢⵓⵏⵏ ⵏ ⵉⵎⵖⵔⵉⴱⵉⵢⵏ ⵖ ⵉⴷ ⴱⴰⴱ ⵏ ⵜⵡⵓⵔⵉ ⵉⵙⵉⵎⴰⵏⵏ ⴷ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⵓⵔ ⵉⴳⴰⴷⴷⴰⵏ ⴷ ⵉⵡⴷⴰⵏ ⵛⵃⴰⵏⵉⵏ”.

ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⵢⵉⵡⵙ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⵙⴰⵡⵔⵜ ⴰⴷ ⵜⴰⵏⴰⵎⵓⵔⵜ ⵜⴰⵅⴰⵜⴰⵔⵜ, ⵢⵉⵏⵉ ⵎⴰⵙ “ⵜⵜⵓⵙⴽⴰⵔ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵏⴳⵔⴰⵡ ⴰⴷⵓⵙⴰⵏ”, ⵜⵙⵙⵏⵜⵉ ⵜⴰⵡⵓⵔⵉ ⵏⵏⵙ ⵙ ⵓⵙⵓⵊⴷ ⵏ ⵓⵖⴰⵡⴰⵙ ⴷ ⵜⴱⵔⵉⴷⵜ ⵏ ⵜⵡⵓⵔⵉ, ⵜⵙⴽⵔ ⵜⵉⵔⵓⴱⴱⴰ ⵎⵥⵥⵉⵏⵉⵏ ⵏ ⵜⵡⵓⵔⵉ ⵉⵍⵍⴰⵏ ⴼ ⵜⵖⵓⵔⵉ ⴷ ⵓⵔⵣⵣⵓ ⵖ ⵉⵙⴳⵓⵎⵏ ⵉⴷⵙⵍⴰⵏⵏ ⵣⴷⵉⵏⵉⵏ ⴷ ⵓⵙⴼⵍⵙ ⴰⴷⵓⵙⴰⵏ ⵢⵓⵎⴰⵏ ⴷ ⵓⵙⵙⵥⵕⴼ ⴰⴷⵓⵙⴰⵏ, ⴷ ⵜⵣⵣⵓⵍⵉⵏ ⵏ ⵜⴷⵓⵙⵉ ⴷ ⵜⵉⴷ ⵜⵏⵜ ⵔⵡⴰⵙⵏⵉⵏ ⴷ ⵓⵔⵣⵣⵓ ⴰⵎⴰⵙⵙⴰⵏ, ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⴽⵕⴹⴰ ⵜⴰⴷⵓⵙⴰⵏⵜ, ⴷ ⵓⵏⴱⴰⴹ.

ⵉⵙⵉⵙⴼⵉⵡ ⵎⴰⵙ ⴷ ⵜⵉⵖⵉⵎⵉⵜ ⴰⴷ ⵏ ⵓⵙⵙⴼⵍⴷ ⵜⴽⵛⵎ ⵖ ⵓⵏⵏⵓⵕⵥⵎ ⴼ ⴽⵓ ⵉⵎⵙⴽⴰⵔⵏ ⵖ ⵢⵉⴳⵔ ⴰⴷⵓⵙⴰⵏ ⴷ ⵓⵙⵎⵖⵔ ⵏ ⵓⵎⵛⴰⵡⴰⵕ ⴷ ⵓⵙⵎⵓⵏ ⵏ ⵓⵎⵍⴰⵏ.

ⵜⵉⴽⵛⵛⵓⵎⵉⵏ ⵏ ⵉⴳⵏⵙⴰⵙⵏ ⵏ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵍⵍⴰⵏⵉⵏ ⵖ ⵍⵎⵖⵔⵉⴱ ⴱⴷⴷⵏⵜ ⴼ ⵡⴰⵜⵉⴳ ⵏ ⵓⵙⴰⵡⵓⵔ ⵏ ⵓⵙⵎⴰⵜⴰ ⵏ ⵓⵙⴼⵍⵙ ⴰⴷⵓⵙⴰⵏ ⴷ ⵓⵛⵛⵉⵍ ⵏ ⵓⵙⵖⵔⵜ ⵏ ⵓⵏⴳⵔⴰⵡ ⴰⴷⵓⵙⴰⵏ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵣⴷⵉⵏⵉⵏ ⴷ ⵜⵎⵓⴹⴰⵏ ⴰⵎ ⵜⵓⵔⵉⵏ ⴷ ⵍⵉⵛⵎⴰⵏⵢⴰ ⴷ ⵙⵙⴽⴽⴰⵔ, ⴷ ⵓⴹⴼⵕ ⵏ ⵉⵙⵏⴼⵍⵏ ⵉⴷⵉⵎⵓⵖⵔⴰⴼⵉⵢⵏ ⴷ ⵓⵙⵓⵔⵙ ⵏ ⵓⴱⴰⵢⵢⵓⵕ ⵖ ⵍⵎⵖⵔⵉⴱ, ⴷ ⵓⵙⵎⴽⵍ ⵏ ⵜⵎⵓⴽⵔⵉⵙⵉⵏ ⵣⴷⵉⵏⵉⵏ ⴷ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵡⵉⵏ ⵜⵙⵏⵉⵊⵊⵉⵜ ⴷ ⵓⵙⵎⵖⵔ ⵏ ⵜⵉⵕⵡⵉ ⵏ ⵜⵏⵓⴼⴰ, ⴷ ⵓⵙⴷⵓⵙ ⵏ ⵓⵏⴱⴰⴹ ⵏ ⵢⵉⴳⵔ, ⴷ ⵓⵙⵎⵔⵙ ⵉⵥⵉⵍⵏ ⵏ ⵜⴻⵜⵉⴽⵏⵓⵍⵓⵊⵉⵜ ⵏ ⵓⵎⵍⴰⵏ, “ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵓⵙⵓⵊⴷ ⵏ ⵜⵙⵔⵜⵉⵜ ⵜⴰⴷⵓⵙⴰⵏⵜ ⵉⵍⵍⴰⵏ ⴷ ⵉⵏⴰⵔⵓⵣⵏ ⵏ ⵉⵏⵎⵓⵔⴰⵏ ⴷ ⴽⵓ ⵉⵎⵙⴽⴰⵔⵏ”.

ⵖ ⵓⵎⵏⵉⴷ ⵏⵏⵙⵏ, ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⴰⵙⵎⴰⵇⵇⵍ ⴰⴳⵍⴷⴰⵏ ⵉ ⵓⵙⵎⵖⵔ ⵏ ⵢⵉⴳⵔ ⴰⴷⵓⵙⴰⵏ, ⵙⴷⴷⵉⴷⵏ ⴼ ⵜⵉⵔⴰⵜ ⵜⴰⵙⵔⵜⴰⵏⵜ ⵉⴳⴰⵏ ⵜⴰⵖⴰⵡⵙⴰ ⵜⴰⵙⵉⵍⴰⵏⵜ, ⴷ ⵔⴰⴷ ⵉⵕⵡⵓ ⵓⵏⴳⵔⴰⵡ ⴰⴷⵓⵙⴰⵏ ⵏ ⵍⵎⵖⵔⵉⴱ ⴷⴼⴼⵉⵔ ⵏ ⵓⴱⴰⵢⵢⵓⵕ ⵙ ⵓⵙⴽⵔ ⵏ ⵜⵎⵢⴰⴷⴰⵙⵉⵏ ⵍⵍⵉ ⵔⴰⴷ ⵉⵙⵓⵊⵉⴷ ⴰⵙⴼⵍⵙ ⴰⴷⵓⵙⴰⵏ ⵉⵎⵙⴰⵙⴰⵏ ⵍⵍⵉⵖ ⵉⴳⴰ ⵢⴰⵏ ⵓⵙⵏⴼⴰⵔ ⴰⵏⴰⵎⵓⵏ ⵢⵉⵡⵉⵏ ⴰⵅⵎⵎⴻⵎ ⴰⴳⵍⴷⴰⵏ ⵉⵥⵍⵉⵏ.

ⵃⴰⴹⵕⵏ ⵖ ⵓⵏⵎⵓⵇⴰⵔ ⴰⴷ: ⵎⴰⵙⵙⴰ Maryam BIGDELI ⵜⴰⴳⵏⵙⴰⵙⵜ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵜⴷⵓⵙⵉ, ⵎⴰⵙⵙⴰ  Giovana Barberis ⵜⴰⴳⵏⵙⴰⵙⵜ ⵏ ⵍⵢⵓⵏⵉⵙⵉⴼ, ⵎⴰⵙⵙ Jorge Coarasa ⴰⵎⵓⵣⴰⵢ ⵖ ⵍⴱⴰⵏⴽ ⴰⴳⵔⴰⵖⵍⴰⵏ, ⵎⴰⵙⵙⴰ “ⵍⴰⵢⵍⴰ ⵎⵓⵇⴷⵉⵎ” ⵜⴰⵎⵙⵜⴳⴳⴰⵔⵜ ⵖ ⵍⴱⴰⵏⴽ ⴰⴼⵔⵉⵇⵉ ⵉ ⵜⴳⵎⵉ ⵖ ⵍⵎⵖⵔⵉⴱ, ⴷ ⵉⵎⵓⵣⴰⵢⴰⵏ ⵢⴰⴹⵏⵉⵏ.