ⵉⵎⴹⴰⴽⴰⵕⵏ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕ ⵏ ⵓⴼⵏⵉⵇ ⵏ ⵓⴷⵔⵉⵎ ⴰⴳⵔⴰⵖⵍⴰⵏ

ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 26 ⴽⵟⵓⴱⵕ 2020 ⵉⵎⴹⴰⴽⴰⵕⵏ ⴷ ⵓⴽⴰⴱⴰⵕ ⵏ ⵓⴼⵏⵉⵇ ⵏ ⵓⴷⵔⵉⵎ ⴰⴳⵔⴰⵖⵍⴰⵏ ⵙ ⵜⵏⵏⵙⵉⵅⴼⵜ ⵏ ⵎⴰⵙⵙ Roberto Cardelli, ⵖ ⵉⵎⵛⴰⵡⴰⵕⵏ ⵉⵙⴳⴳⵯⵙⴰⵏⵏ ⵍⵍⵉ ⵉⵙⴽⴰⵔ ⵓⴼⵏⵉⵇ.

ⵉⵜⵜⵓⵙⴽⴰⵔ ⵓⵏⵎⵓⵇⴰⵔ ⴰⴷ ⵙ ⵜⵖⴰⵔⴰⵙⵜ ⵏ ⵓⴼⵉⵣⵢⵓⴽⵓⵏⴼⵉⵕⵓⵏⵚ, ⵉⵙⵎⵏⵉⴷ ⴳⵉⵙ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵎⵙⴽⴰⵔ ⴷ ⵉⵙⵡⵓⴷⴷⵓⵜⵏ ⵉⵎⵣⵡⵓⵔⴰ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⵏ ⵓⴱⴰⵢⵓⵕ ⵏ ⴽⵓⵕⵓⵏⴰ. ⵉⵙⵙⴽⵜⵉ ⴷ ⵜⴰⵖⵜⴰⵙⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵖ ⵓⵙⴽⵔ ⵏ ⵓⴼⵏⵉⵇ ⵉⵥⵍⵉⵏ ⵉ ⵓⵙⵏⴰⵍ ⵏ ⵜⴰⵡⵊⵉⵡⵉⵏ ⵛⵃⴰⵏⵉⵏ ⴷ ⵜⵎⵙⵙⵓⵔⵉⵏ ⵜⵉⵏⴰⵎⵓⵔⵉⵏ, ⴷ ⵓⴼⵔⴰⴳ ⵏ ⵜⵣⵣⵓⵍⵉⵏ ⵏ ⵜⵡⵓⵔⵉ, ⴷ ⵓⵙⵓⵊⴷ ⵏ ⵉⵎⴰⵙⵙⵏ  ⴷ ⵉⵎⵜⵡⴰⵏ  ⵏ ⵜⵙⵏⵉⵊⵊⵉⵜ.

ⵢⵉⵏⵉ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵖ ⵉⵏⴰⵡ ⵉⴳⴳⵓⵔⴰⵏ ⵏ ⵓⵕⵥⵣⵓⵎ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⵏ ⵓⴱⵕⵍⴰⵎⴰⵏ, ⵢⴰⵏ ⵓⵖⴰⵡⴰⵙ ⵏ ⵓⵙⵙⵉⴷⵔ ⵏ ⵜⴷⵎⵙⴰ ⵜⴰⵏⴰⵎⵓⵔⵜ ⵉⴱⴷⴷⵏ ⴼ ⵓⵙⴽⵔ ⵏ ⵓⴼⵏⵉⵇ ⵏ ⵓⵙⵙⴰⵔⵓ ⴰⵙⵜⵔⴰⵜⵉⵊⵉ: “ⴰⴼⵏⵉⵇ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵙⴰⵔⵓ” ⵙ ⵡⴰⵜⵉⴳ ⵏ 15 ⵎⵍⵢⴰⵕ ⵏ ⴷⵔⵀⵎ ⵖ ⵜⵎⵙⴰⵙⵜⵍⵜ ⵏ ⵓⵡⴰⵏⴽ, ⵃⵎⴰ ⴰⴷ ⵢⵉⵍⵉ ⵓⵙⵎⵖⵔ ⵏ ⵓⵙⵙⴰⵔⵓ ⴷ ⵜⵙⵓⴳⴰⵔ ⵏ ⵜⴷⵎⵙⴰ ⵜⴰⵏⴰⵎⵓⵔⵜ ⵙ ⵓⵙⵏⴰⵍ ⵏ ⵉⴳⵔⴰⵏ ⵏ ⵓⴼⴰⵔⵙ ⴷ ⵓⵙⵙⵥⵕⴼ ⴷ ⵓⴹⴼⵕ ⵏ ⵉⵙⵏⴼⴰⵔⵏ ⵉⵅⴰⵜⴰⵔⵏ ⵙ ⵜⴷⵔⴰⵡⵜ ⵏⴳⵔ ⵉⴳⵔⴰⵏ ⴰⵎⴰⵜⴰⵢ ⴷ ⵓⵙⵍⵉⴳ.

ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⴰⴱⴰⵢⵢⵓⵕ ⴰⴷ ⴷⴰⵔⵙ ⵉⴷⵔⵉⵣⵏ ⵀⵔⵛⵏⵉⵏ ⴼ ⵜⴷⵎⵙⴰⵡⵉⵏ ⵏ ⴽⵓ ⵉⵡⴰⵏⴽⵏ ⵏ ⵓⵎⴰⴹⴰⵍ, “ⵍⵎⵖⵔⵉⴱ ⵍⵍⵉⵖ ⵉⴳⴰ ⵜⴰⵎⴰⵣⵉⵔⵜ ⵏ ⵜⵎⴰⵍⵍⴰⵢⵜ ⵉⵏⵏⵓⵕⵥⵎⵏ, ⴷⴰⵔⵙ ⵜⵉⵏⴰⵥⴰⵕⵉⵏ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ, ⵉⵎⵎⴰⵖ ⴰⴷ ⵉⵙⴽⵔ ⵖ ⵓⵣⵎⵣ ⴰⴷ ⵢⴰⵏ ⵓⵣⵎⵎⵣⵓ ⵏ ⵓⵙⴽⵔ ⵏ ⵉⵎⵓⴽⵏⵏ ⴷⵓⵙⵏⵉⵏ ⴷⵔⴰⵏⵉⵏ”, ⵉⵙⴰⵡⵍ ⵖ ⵓⵎⵏⵉⴷ ⴰⴷ ⴼ ⵓⵎⵓⴽⵏ ⵏ ⵓⵏⴳⵔⴰⵡ ⴰⴷⵓⵙⴰⵏ, ⴷ ⵓⵙⵎⴰⵜⴰ ⵏ ⵓⵙⴼⵍⵙ ⴰⵏⴰⵎⵓⵏ, ⴷ ⵓⵙⵎⵖⵔ ⵏ ⵜⴼⵍⵍⴰⵃⵜ ⴷ ⵜⴳⵎⵉ ⵜⴰⴼⴰⵔⴰⵏⵜ, ⴷ ⵓⵎⵓⴽⵏ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵓⵙⵖⵓⴷⵓ ⵏ ⵓⵏⴱⴰⴹ ⴷ ⵡⵉⵢⵢⴰⴹ.

ⵖ ⵜⵙⴳⴰ ⵏⵏⵙ, ⵉⵙⵓⵜⴳ ⵎⴰⵙⵙ Roberto Cardarelli ⴰⵏⵙⵙⵉⵅⴼ ⵏ ⵓⴽⴰⴱⴰⵕ, ⵜⵉⵎⵙⴽⴰⵔ ⴷ ⵉⵙⵡⵓⴷⴷⵓⵜⵏ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ, ⵢⵉⵏⵉ ⵎⴰⵙ ⴷ ⴰⴱⵔⵉⴷ ⵏ ⵡⴰⵔⴰⵢ ⴷ ⵉⴷⵔⵉⵎⵏ ⵍⵍⵉ ⵉⵙⵔⵙ ⵍⵎⵖⵔⵉⴱ ⵉⵡⵙⵏ ⵖ ⵓⵙⴷⵓⵙ ⵏ ⵜⵙⵓⴳⴰⵔ ⵏ ⵜⴷⵎⵙⴰ ⵜⴰⵏⴰⵎⵓⵔⵜ ⵖ ⵓⴼⵙⵙⴰⵢ ⵏ ⵜⴰⵙⵙⴰⵙⵉⵏ ⴷ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ, ⵢⵉⵏⵉ ⵎⴰⵙ ⵢⵓⵊⴰⴷ ⵓⴼⵏⵉⵇ ⵏ ⵓⴷⵔⵉⵎ ⴰⴳⵔⴰⵖⵍⴰⵏ ⵉ ⵓⴹⴼⵕ ⵏ ⵜⴷⵎⵙⴰ ⵜⴰⵏⴰⵎⵓⵔⵜ ⵖ ⵜⴼⵔⴽⴰ ⴷ ⵢⵓⵛⴽⴰⵏ.

ⵉⴳⴰ ⵓⵏⵎⵓⵇⴰⵔ ⴰⴷ ⴰⵣⵎⵣⵣⵓ ⵏ ⵓⵙⵏⴼⵍ ⵏ ⵜⴰⵏⵏⴰⵢⵉⵏ ⴼ ⵉⴱⵔⵉⴷⵏ ⵏ ⵓⵙⵙⵉⴷⵔ ⵏ ⵜⴷⵎⵙⴰ ⴷ ⵜⵉⵍⴰⵍⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵓⵙⵓⵊⴷ ⵏ ⵉⵎⵓⴽⵏⵏ, ⵜⵉⵍⵉ ⵓⵍⴰ ⵜⵓⵙⵙⵏⴰ ⵏ ⵉⵎⴰⵢⵏⵓⵜⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵏ ⵓⵙⴳⴳⵯⴰⵙ ⵏ 2021 ⴷ ⵉⵎⵔⵙⵉⵡⵏ ⵢⴰⴹⵏⵉⵏ ⵛⵛⴰⵔⵏⵉⵏ.