ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵖ ⵉⵎⴹⴰⴽⴰⵕⵏ ⵏⵏⵙ ⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⵓⵜⴳ ⵎⴰⵙⵙ ⵄⴳⵉⵍⴰ ⵚⴰⵍⵉⵃ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵍⵉⴱⵉ ⵜⵓⴳⴳⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵖ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵉⵏ ⵏⴳⵔ ⵉⵍⵉⴱⵉⵢⵏ ⴷ ⵓⴼⵙⵙⴰⵢ ⵏ ⵜⴰⵙⵙⴰⵙⵜ ⵜⴰⵍⵉⴱⵉⵜ
ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⴰⵎⴰⵙ 25 ⴽⵟⵓⴱⵕ 2020 ⵖ ⵕⵕⴱⴰⵟ, ⵉⵎⴹⴰⴽⴰⵕⵏ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵍⵉⴱⵉ ⵎⴰⵙⵙ ⵄⴳⵉⵍⴰ ⵚⴰⵍⵉⵃ ⵉⵍⵍⴰⵏ ⵖ ⵓⵔⵣⴰⴼ ⴰⵎⴰⴷⴷⵓⴷ ⵉ ⵜⵎⴰⵣⵉⵔⵜ ⵏⵏⵖ ⵖ ⵢⵉⵅⴼ ⵏ ⵓⴽⴰⴱⴰⵕ ⵉⵙⵜⴰⵡⵀⵎⵎⴰⵏ.
ⵖ ⵓⵏⵎⵓⵇⴰⵔ ⴰⴷ, ⵉⵙⵓⵜⴳ ⵎⴰⵙⵙ ⴰⵏⵏⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵍⵉⴱⵉ ⵜⵓⴳⴳⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵉⵏ ⵏⴳⵔ ⵉⵍⵉⴱⵉⵢⵏ ⴷ ⵓⴼⵙⵙⴰⵢ ⵏ ⵜⴰⵙⵙⴰⵙⵜ ⵜⴰⵍⵉⴱⵉⵜ, ⵢⵉⵏⵉ:”ⴷⴰ ⵏⵙⵏⵉⵎⵎⵉⵔ ⴱⴰⵀⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴷ ⵏⵄⵡⵡⵍ ⴼ ⵍⵎⵖⵔⵉⴱ ⵖ ⵓⵙⵔⴱⵉ ⵏ ⵓⴼⵙⵙⴰⵢ ⵏ ⵜⴰⵙⵙⴰⵙⵜ ⵜⴰⵍⵉⴱⵉⵜ”. ⵢⵉⵏⵉ ⵓⵍⴰ ⵎⴰⵙ ⵉⵡⵙⵏⵜ ⵜⵓⴳⴳⴰⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵃⵎⴰ ⴰⴷ ⵢⵉⵍⵉ ⵓⵎⵙⴰⵙⴰ ⴼ ⵉⴷⵖⴰⵔⵏ ⵏ ⵓⴱⴰⴹ, ⵙ ⴰⵢⵍⵍⵉ ⵢⵉⵡⵙⵏ ⴰⴷ ⵉⴱⴷⴷ ⵓⵇⵔⵢⴰⵏ, ⴰⵢⵍⵍⵉ ⵉⵎⵎⴰⵍⴰⵏ ⵜⵉⵍⴰⵍⵜ ⵜⴰⴷⵙⵍⴰⵏⵜ ⵏ ⵜⴳⵍⴷⵉⵜ, “ⵏⴽⵏⵏⵉ ⵓⵔ ⵔⴰⴷ ⵏⴼⵍ ⵍⵎⵖⵔⵉⴱ”.
ⵉⵙⵓⵜⴳ ⵎⴰⵙⵙ ⵄⴳⵉⵍⴰ ⵚⴰⵍⵉⵃ ⵜⴰⴷⵓⵙⵉ ⵏ ⵜⵣⴷⴰⵢⵉⵏ ⵏ ⵜⴰⴳⵯⵎⴰⵜ ⴷ ⵜⴷⴷⵓⴽⵍⴰ ⵉⵣⴷⵉⵏ ⵙⵉⵏ ⵉⵎⴰⴷⴰⵏⵏ ⴰⵎⵖⵔⵉⴱⵉ ⴷ ⵓⵍⵉⴱⵉ, ⵉⵖⵔ ⵉ ⵓⵙⴷⵓⵙ ⵏ ⵓⵙⵏⴼⵍ ⵏ ⵜⴷⵎⵙⴰ ⴷ ⵓⵙⵖⵏⵣⵉ ⵏⴳⵔ ⵙⵏⴰⵜ ⵜⵎⵉⵣⴰⵔ, ⵙⵍⴰⵡⴰⵏ ⴰⴽⴽⵯ ⵖ ⵜⵓⵚⴽⵉⵡⵉⵏ ⵜⵉⵏⴰⴷⴷⵉⵡⵉⵏ ⴷ ⵜⵓⴳⴳⴰⵙ ⵏ ⵡⴰⵍⴰⵙ ⵏ ⵓⵚⴽⵓ ⵏ ⵍⵉⴱⵢⴰ ⵖ ⵜⴼⵔⴽⴰ ⴷ ⵢⵓⵛⴽⴰⵏ.
ⵖ ⵓⵎⵏⵉⴷ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉⵎⵎⴰⵖ ⵖ ⵓⵙⵎⴽⵍ ⵏ ⵜⴰⵙⵙⴰⵙⵜ ⵜⴰⵍⵉⴱⵉⵜ ⵙ ⵜⵏⴳⴰⴷⴷⴰⵢⵜ, ⵉⵎⵎⴰⵖ ⴰⴷ ⵢⵉⵍⵉ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵉⵏ ⴱⵍⴰ ⵉⴽⵛⵎ ⵖ ⵜⵎⵓⴽⵔⵉⵙⵉⵏ ⵜⵉⴳⵯⵏⵙⴰⵏⵉⵏ ⵏ ⵍⵉⴱⵢⴰ. ⵢⵉⵏⵉ ⵎⴰⵙ ⴷ ⴰⵙⴷⵓⵙ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⴷ ⵜⵢⴰⵏⵜ ⵏ ⵉⵎⴰⴷⴰⵏⵏ ⴳⴰⵏⵜ ⵜⵉⵔⵙⴰⵍ ⵍⵍⵉ ⴼ ⵜⴱⴷⴷ ⵜⴷⵉⴱⵍⵓⵎⴰⵙⵉⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵢⵉⵏⵉ:”ⴰⵏⴰⵔⵓⵣ ⵏⵏⵖ ⴰⵎⴳⵔⵓ ⴰⴷ ⴷ ⵉⵙⵓⵔⵔⵉ ⵓⵎⴰⴷⴰⵏ ⴰⵍⵉⴱⵉⴱ ⴰⵔⴳⴳⵉⴳ ⵏⵏⵙ ⴷ ⵜⵏⴼⵔⵓⵜ ⵏⵏⵙ ⴷ ⵜⵢⴰⵏⵜ ⵏⵏⵙ”.
ⵉⵙⵙⴽⵜⵉ ⴷ ⵎⴰⵙⵙ ⵍⵎⴰⵍⴽⵉ ⴰⵣⵎⵎⴻⵎ ⵏ ⵙⵏⴰⵜ ⵜⵙⴳⴳⵉⵡⵉⵏ ⵖ ⵡⴰⵢⵢⵓⵔ ⵏ ⵢⵓⵍⵢⵓⵣ ⵉⵣⵔⵉⵏ ⵜⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⵉⵎⵎⴰⵍⴰⵏ ⵜⵉⵔⴰⵜ ⵜⴰⵎⴷⵏⴰⵏⵜ ⴷ ⵜⵙⵔⵜⴰⵏⵜ ⵉ ⵓⵏⵓⵕⵥⵎ ⵏ ⵓⵎⵙⴰⵡⴰⵍ ⵉⵙⵓⵍⵏ ⵏⴳⵔ ⵙⵉⵏ ⵉⵙⵇⵇⵉⵎⵏ ⵏ ⵉⵎⵓⵔⴰ ⵖ ⵍⵎⵖⵔⵉⴱ ⴷ ⵍⵉⴱⵢⴰ.” ⴰⵢⵍⵍⵉ ⵉⴼⴽⴰⵏ ⵓⵏⴼⵓⵙ ⴰⵎⴰⵢⵏⵓ ⵉ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ”. ⵉⵙⴰⵡⵍ ⵓⵍⴰ ⴼ ⵜⵉⵔⴰⵜ ⵉⴷⵓⵙⵏ ⵉ ⵓⵙⴷⵓⵙ ⵏ ⵜⵡⵓⵔⵉ ⵏ ⵜⵔⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ-ⵜⴰⵍⵉⴱⵉⵜ ⴷ ⵓⵙⵎⵖⵔ ⵏ ⵜⵣⴷⴰⵢⵉⵏ ⵏⴳⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵉ ⴽⵉⴳⴰⵏ ⵏ ⵓⵎⵢⴰⵡⴰⵙ ⴷ ⵜⵡⵉⵣⵉ.