ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵖ ⵓⵎⵙⴰⵡⴰⵍ ⵙ ⵜⵉⵍⵉⴼⵓⵏ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵙ ⵜⵉⵍⴰⵍⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵖ ⵓⵙⴷⵓⵙ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⵖ ⵜⵙⴳⴰ ⵏ ⵉⴼⴼⵓⵙ ⵏ ⵓⵏⴰⵎⵎⴰⵙ
ⵉⵙⴽⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵙⵙ ⵏ ⵓⵙⵉⵎⵡⴰⵙ 02 ⴽⵟⵓⴱⵕ 2020 ⴰⵎⵙⴰⵡⴰⵍ ⵙ ⵜⵉⵍⵉⴼⵓⵏ ⴷ ⵎⴰⵙⵙ David Sassoli ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⴼ ⵜⵎⵙⴽⴰⵔ ⵛⵛⴰⵔⵏⵉⵏ ⵏ ⵖⵉⵍⴰⴷ.
ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵙ ⵜⵉⵍⴰⵍⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵖ ⵓⵙⴷⵓⵙ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⵖ ⵜⵙⴳⴰ ⵏ ⵉⴼⴼⵓⵙ ⵏ ⵓⵏⴰⵎⵎⴰⵙ, ⵙⵍⴰⵡⴰⵏ ⴰⴽⴽⵯ ⵜⵉⵙⵏⵜⴰⵢⵉⵏ ⵏ ⵜⴳⵍⴷⵉⵜ ⵖ ⵓⴼⵙⴰⵢ ⵏ ⵜⴰⵙⵙⴰⵙⵜ ⵜⴰⵍⵉⴱⵉⵜ ⴷ ⵜⵓⴳⴳⴰⵙ ⵏⵏⵙ ⵖ ⵓⵙⵏⴰⵍ ⵏ ⵓⵎⵙⴰⵡⴰⵍ ⴷ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵉⵏ ⵏⴳⵔ ⴽⵓ ⵜⴰⵙⴳⵉⵡⵉⵏ ⵜⵉⵍⵉⴱⵉⵢⵉⵏ.
ⵖ ⵓⵎⵏⵉⴷ ⵏⵏⵙ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⴷⵔⵓⵜ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⵍⴰ ⴷ ⵓⵎⵢⴰⵡⴰⵙ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ, ⵉⵙⵙⴽⵜⵉ ⴷ ⵎⴰⵙ ⵉⵟⵟⴰⴼ ⵍⵎⵖⵔⵉⴱ ⴰⴷⵖⴰⵔ ⵏ “ⵓⵎⴰⴷⵔⴰⵡ ⵉⵣⵣⵉⴳⵣⵏ” ⴷⴰⵔ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵓⴷⵖⴰⵔ ⵏ “ⵓⵎⴰⴷⵔⴰⵡ ⵉ ⵜⴷⵉⵎⵓⵇⵔⴰⵟⵉⵜ” ⴷⴰⵔ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ.
ⵉⵙⵉⵙⴼⵉⵡ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⴷⵔⵓ ⵍⵎⵖⵔⵉⴱ ⴰⵜⵉⴳⵏ ⵣⴷⵉⵏⵉⵏ ⴷ ⵓⵙⵎⴽⵍ ⵏ ⵜⵎⵓⴽⵔⵉⵙⵜ ⵏ ⵓⵣⵡⴰⴳ ⴷ ⵜⵎⵉⵣⴰⵔ ⵏ ⵜⵎⵓⵏⵜ ⵏ ⵓⵕⵓⴱⴱⴰ, ⴷ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵖⵔ ⵏ ⵓⵙⵓⵔⵙ ⵏ ⵜⵎⵖⴰⵔⵜ, ⴷ ⵓⵙⴷⵓⵙ ⵏ ⵓⴼⵔⴰ ⴷ ⵜⵏⴼⵔⵓⵜ ⵜⵉⵎⴰⴹⴰⵍⵉⵏ ⵙⵍⴰⵡⴰⵏ ⴰⴽⴽⵯ ⵖ ⵜⵙⴳⴰ ⵏ ⵡⴰⵎⵎⴰⵙ.
ⵙⵓⵜⴳⵏ ⵙⵉⵏ ⵉⵎⵙⵜⴳⴳⴰⵔⵏ ⵜⵉⵍⴰⵍⵜ ⵜⴰⴱⵕⵍⴰⵎⴰⵏⵉⵜ ⵉⵔⴽⵙⵏ ⵖ ⵓⵙⴷⵓⵙ ⵏ ⵓⵎⵢⴰⵡⴰⵙ ⵏⴳⵔⴰⵜⵜⵙⵏ ⴷ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵉⵏ ⵖ ⵜⵎⵙⴰⵔ ⵛⵛⴰⵔⵏⵉⵏ. ⵖⵎⴽ ⵍⵍⵉ ⴷ ⵎⵛⴰⵛⴽⴰⵏ ⴰⴷ ⵉⵜⵜⵓⴼⴽⵉ ⵢⴰⵏ ⵓⵏⴼⵓⵙ ⴰⵎⴰⵢⵏⵓ ⵉ ⵜⵡⵓⵔⵉ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵎⵓⵏⵜ ⵉ ⵓⵏⴰⵎⵎⴰⵙ, ⵖ ⵉⴳⴰ ⵍⵎⵖⵔⵉⴱ ⵢⴰⵏ ⵖ ⵉⵎⵙⴽⵔⵏ ⵏⵏⵙ, ⵍⵍⵉⵖ ⵜⴳⴰ ⵢⴰⵏ ⵓⵙⴰⵢⵔⴰⵔ ⵏ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵜⵖⵔⵉ ⵏ ⵜⵎⵙⴰⵔⵉⵏ ⵜⵉⵎⵣⵡⵓⵔⴰ ⵖ ⵜⵙⴳⴰ.
ⵙ ⵜⵖⵔⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⵛⴰⵛⴽⴰⵏ ⴷ ⵙⵉⵏ ⵉⵎⵙⵜⴳⴳⴰⵔⵏ ⴰⴷ ⵉⵙⴽⵔ ⵎⴰⵙⵙ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ, ⵖ ⵎⴰ ⵏⵏ ⵓⵔ ⵢⴰⴳⴳⵓⴳⵏ, ⴰⵔⵣⴰⴼ ⵏ ⵜⵡⵓⵔⵉ ⵉ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵔⴰⴷ ⵉⴳ ⵜⴰⵎⵍⴷⴰ ⵏ ⵓⵔⵣⵣⵓ ⵏ ⵉⴱⵔⵉⴷⵏ ⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⵍⴰ ⴷ ⵓⵎⵢⴰⵡⴰⵙ ⵏⴳⵔ ⵍⵎⵖⵔⵉⴱ ⴷ ⵓⵕⵓⴱⴱⴰ ⵙ ⴽⵉⴳⴰⵏ ⵏ ⵜⴷⵉⵏⴰⵎⵉⵜ ⴷ ⵜⴷⵓⵙⵉ.