ⵖ ⵓⵙⵏⵓⴱⴳ ⵏⵏⵙ ⵙⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵎⵙⵇⴰⴷⵜ ⵏ ⴳⵡⴰⵟⵉⵎⴰⵍⴰ ⵜⵙⴷⴷⵉⴷ ⴼ ⵡⴰⴷⴷⴰⴷ ⵉⴱⴷⴷⵏ ⵏ ⵜⵎⴰⵣⵉⵔⵜ ⵏⵏⵙ ⴷ ⵜⵢⴰⵏⵜ ⵜⴰⴽⴰⵍⴰⵏⵜ ⵏ ⵜⴳⵍⴷⵉⵜ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵡⴰⵙ 24 ⵛⵓⵜⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰⵙⵙⴰ MONICA BOLANOS PEREZ ⵜⴰⵎⵙⵇⴰⴷⵜ ⵏ ⴳⵡⴰⵟⵉⵎⴰⵍⴰ ⵖ ⵕⵕⴱⴰⵟ, ⵖ ⵓⵔⵣⴰⴼ ⵏ ⵓⵎⵢⴰⵙⵙⴰⵏ ⵍⵍⵉⵖ ⵜⴳⴰ ⵜⴰⵎⵙⵇⴰⴷⵜ ⵜⴰⵎⴰⵢⵏⵓⵜ ⵖ ⵜⴳⵍⴷⵉⵜ.

ⵖ ⵓⵏⵎⵓⵇⵇⴰⵔ ⴰⴷ, ⵜⵙⴷⴷⵉⴷ ⴷⴰⵖ ⵎⴰⵙⵙⴰ ⵜⴰⵎⵙⵇⴰⴷⵜ ⴼ ⵡⴰⴷⴷⴰⴷ ⵉⴱⴷⴷⵏ ⵏ ⵜⵎⴰⵣⵉⵔⵜ ⵏⵏⵙ ⵖ ⵓⵙⵏⴰⵍ ⵏ ⵜⵢⴰⵏⵜ ⵜⴰⴽⴰⵍⴰⵏⵜ ⵏ ⵜⴳⵍⴷⵉⵜ, ⵜⵉⵏⵉ ⵎⴰⵙ ⵜⵍⵍⴰ ⴳⵡⴰⵟⵉⵎⴰⵍⴰ ⴷ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⵍⵍⵉ ⴷ ⵢⵉⵡⵉ ⵍⵎⵖⵔⵉⴱ ⴷ ⴰⴼⵙⵙⴰⵢ ⵉⵙⵎⴷⵏ ⵉ ⵓⵎⵏⵣⴰⵖ ⴰⴷ ⵉⵜⵜⵓⵙⴽⴰⵔⵏ, ⵜⵏⵏⴰ ⵎⴰⵙ ⵉⴳⴰ ⴰⴼⵙⵙⴰⵢ ⴰⵙⵔⵜⴰⵏ ⴷ ⵡⵉⵏ ⵓⴼⵔⴰ ⴷ ⵡⵉⵏ ⵜⵉⵍⴰⵡⵜ ⵉⵖⵥⴰⵏⵏ. ⵜⵣⵎⵎⵉⵎ ⴰⵎⵙⴰⵙⴰ ⵏ ⵜⴰⵏⵏⴰⵢⵉⵏ ⵏ ⵙⵏⴰⵜ ⵜⵎⵉⵣⴰⵔ ⵖ ⴽⵓ ⵜⵎⵙⴰⵔⵉⵏ ⵉⵡⵉⵏⵉⵏ ⴰⵅⵎⵎⴻⵎ ⵉⵛⵛⴰⵔⵏ, ⵜⵙⵓⵜⴳ ⴰⵎⵢⴰⴷⴰⵙ ⵉⵣⵣⵉⴳⵣⵏ ⵏⴳⵔ ⵙⵏⴰⵜ ⵜⵎⵉⵣⴰⵔ ⵍⵍⵉ ⵔⴰⴷ ⵉⵙⴼⵓⴳⵍⵓ ⵖ ⵓⵙⴳⴳⵯⴰⵙ ⴷ ⵢⵓⵛⴽⴰⵏ ⴰⴽⵜⴰⵢ ⵡⵉⵙ ⵙⵉⵏ ⵡⴰⴳⵏⴰⵔⵏ ⴷ ⵎⵔⴰⵡ ⵏ ⵓⵙⵏⵜⵉ ⵏ ⵜⵣⴷⴰⵢⵉⵏ ⵏⵏⵙⵏⵜ ⵜⵉⴷⵉⴱⵍⵓⵎⴰⵙⵉⵢⵉⵏ.

ⵜⵏⵏⴰ ⵎⴰⵙⵙⴰ MONICA BOLANOS PEREZ ⵎⴰⵙ ⴳⴰⵏⵜ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵖ ⵙⵏⴰⵜ ⵜⵎⵉⵣⴰⵔ ⵜⵉⴷ ⵕⵡⴰⵏⵉⵏ, ⵖⵎⴽ ⵍⵍⵉ ⵜⵙⵓⵜⴳ ⵜⴰⵡⵓⵔⵉ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵖ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⵍⴰ ⴷ ⵉⴱⵕⵍⴰⵎⴰⵏⵏ ⵏ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ, ⵜⵉⵏⵉ ⵎⴰⵙ ⵜⴳⴰ ⴳⵡⴰⵟⵉⵎⴰⵍⴰ ⵜⵉⵍⴳⴳⵯⵉⵜ ⵏ ⵜⵙⴳⴰ ⵖⵎⴽ ⵍⵍⵉ ⵉⴳⴰ ⵍⵎⵖⵔⵉⴱ ⵜⴰⵣⵍⵖⴰ ⵉⵣⴷⵉⵏ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ.  

ⵖ ⵜⵙⴳⴰ ⵏⵏⵙ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵣⴷⴰⵢⵉⵏ ⵏ ⵜⴷⴷⵓⴽⵍⴰ ⴷⵓⵙⵏⵉⵏ ⵉⵙⵎⵓⵏⵏ ⵏⴳⵔ ⵍⵎⵖⵔⵉⴱ ⴷ ⴳⵡⴰⵟⵉⵎⴰⵍⴰ, ⴰⵢⵍⵍⵉ ⵢⵉⵡⵙⵏ ⵖ ⵓⵕⵥⵥⵓⵎ ⵏ ⵉⵎⵏⵉⴷⵏ ⵉⵎⴰⵢⵏⵓⵜⵏ ⵏ ⵓⵎⵢⴰⵡⴰⵙ ⵏⴳⵔⴰⵜⵜⵙⵏ, ⵉⵙⴷⴷⵉⴷ ⵎⴰⵙ ⴷⵔⵓⵏⵜ ⵙⵏⴰⵜ ⵜⵎⵉⵣⴰⵔ ⴰⵜⵉⴳⵏ ⵍⵍⵉ ⴼ ⵉⵕⵚⴰ ⵓⵏⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ, ⵍⵍⵉ ⵣⴷⵉⵏⵉⵏ ⴷ ⵓⵎⵢⴰⵡⴰⵙ ⴷ ⵓⴼⵔⴰ ⴷ ⵜⵏⴼⵔⵓⵜ.

ⵉⵙⵓⵜⴳ ⵎⴰⵙⵙ ⵍⵎⴰⵍⴽⵉ ⴰⴷⴷⴰⴷ ⵏ ⴳⵡⴰⵟⵉⵎⴰⵍⴰ ⵉⴱⴷⴷⵏ ⴷ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ , ⵉⵍⵍⴰⵏ ⴷ ⵜⵢⴰⵏⵜ ⵜⴰⴽⴰⵍⴰⵏⵜ ⵏ ⵜⴳⵍⴷⵉⵜ, ⵢⵉⵏⵉ ⵎⴰⵙ ⵙⴽⵔⵏⵜ ⵙⵏⴰⵜ ⵜⵎⵉⵣⴰⵔ ⵖ ⵜⵢⴰⵏⵜ ⵏ ⵉⵡⴰⵏⴽⵏ ⴷ ⵜⵢⴰⵏⵜ ⵏ ⵉⵎⴰⴷⴰⵏⵏ ⵜⵉⵔⵙⴰⵍ ⵜⵉⴷⵙⵍⴰⵏⵉⵏ ⵉ ⵓⵙⴷⵓⵙ ⵏ ⵓⴼⵔⴰ ⴷ ⵓⵔⴳⴳⵉⴳ ⵖ ⴽⵓ ⵜⴰⵙⴳⴳⵉⵡⵉⵏ ⵏ ⵓⵎⴰⴹⴰⵍ.

ⵖ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⴰⵡⵍ  ⵎⴰⵙⵙ ⴰⵏⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵉⵔⴰⵜ ⵉⴷⵓⵙⵏ ⵃⵎⴰ ⴰⴷ ⵜⵉⵍⵉ ⵜⵣⵣⵉⴳⵣⵜ ⵖ ⵓⴱⵔⵉⴷ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⵍⴰ ⴷ ⵓⵎⵢⴰⵡⴰⵙ ⴷ ⵓⴱⵕⵍⴰⵎⴰⵏ ⵏ ⴳⵡⴰⵟⵉⵎⴰⵍⴰ, ⵢⵉⵏⵉ ⵎⴰⵙ ⵜⴻⵟⵟⴰⴼ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵜⵉⵍⴰⵍⵜ ⵜⴰⴷⵙⵍⴰⵏⵜ ⵖ ⵓⵙⵎⵖⵔ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵉⵣⴰⵔ ⵖ ⴽⵓ ⵉⴳⵔⴰⵏ.