ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵖ ⵓⵙⵏⵓⴱⴳ ⵏⵏⵙ ⵙⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⵉⵙⴼⵉⵡ ⵓⵎⵙⵇⴰⴷ ⵏ ⴷⴷⴰⵏⵉⵎⴰⵕⴽ ⴰⵅⵎⵎⴻⵎ ⵉⵣⵣⵉⴳⵣⵏ ⵏ ⵜⵎⵙⵙⵓⵔⵉⵏ ⵏ ⵜⵎⴰⵣⵉⵔⵜ ⵏⵏⵙ ⵖ ⵓⵙⵙⴰⵔⵓ ⵖ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ
ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⴽⵡⴰⵙ 24 ⵛⵓⵜⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ NIKOLAJ HARRIS ⴰⵎⵙⵇⴰⴷ ⵏ ⵜⴳⵍⴷⵉⵜ ⵏ ⴷⴷⴰⵏⵉⵎⴰⵕⴽ ⵖ ⵕⵕⴱⴰⵟ.
ⵖ ⵜⵣⵡⵉⵔⵉ, ⵉⵙⵓⵜⴳ ⵎⴰⵙⵙ ⴰⵎⵙⵇⴰⴷ ⵙ ⵜⵎⵙⴽⴰⵔ ⵜⵉⵎⵣⵡⵓⵔⴰ ⵍⵍⵉ ⵜⵙⴽⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵖ ⵜⵣⵡⵉⵔⵉ ⵏ ⵓⴱⴰⵢⵢⵓⵕ, ⵙ ⵉⵙⵡⴰⵍⴰⵢⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ. ⵉⵙⵉⵙⴼⵉⵡ ⵎⴰⵙ ⴷ ⴽⵓ ⵉⵡⴰⵏⴽⵏ ⵖ ⵏⵉⵜ ⵜⵍⵍⴰ ⴷⴷⴰⵏⵉⵎⴰⵕⴽ ⴷⴰⵔⵙⵏⵜ ⴰⴽⴽⵯ ⵜⵉⵏⴰⵥⴰⵕⵉⵏ ⵣⴷⵉⵏⵉⵏ ⴷ ⵓⴱⴰⵢⵢⵓⵕ ⴰⴷ, ⵎⵎⴰⵖⵏⵜ ⴰⴷ ⵢⵉⵍⵉ ⵓⵎⵢⴰⵙ ⵏⴳⵔ ⵓⴼⵔⴰⴳ ⵏ ⵜⴼⴰⵜⵉⵜ ⵏ ⵉⵏⵎⵓⵔⴰⵏ ⴷ ⵓⵖⵓⵍ ⵏ ⵜⴷⵎⵙⴰ.
ⵖ ⵓⵙⵡⵉⵔ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ, ⵉⵙⴰⵡⵍ ⵎⴰⵙⵙ NIKOLAJ HARRIS ⴼ ⵓⵅⵎⵎⴻⵎ ⵉⵣⵣⵉⴳⵣⵏ ⵏ ⵜⵎⵙⵙⵓⵔⵉⵏ ⵏ ⴷⴷⴰⵏⵉⵎⴰⵕⴽ ⵖ ⵓⵙⵙⴰⵔⵓ ⵖ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵉⴼⴽ ⴰⵎⴷⵢⴰ ⵏ ⵉⵙⵙⴰⵔⵓⵜⵏ ⵉⵅⴰⵜⴰⵔⵏ ⵏ ⵜⵎⵙⵙⵓⵔⵉⵏ ⵏ ⴷⴷⴰⵏⵉⵎⴰⵕⴽ ⵖ ⵓⵙⵏⴼⴰⵔ ⵏ ⵓⴼⵜⴰⵙ ⴰⵏⴰⵎⵎⴰⵙ ⵏ ⵟⴰⵏⵊⴰ. ⵢⵉⵏⵉ ⵎⴰⵙ ⵉⵍⵍⴰ ⵓⵎⵢⴰⴷⴰⵙ ⵏⴳⵔ ⵙⵏⴰⵜ ⵜⵎⵉⵣⴰⵔ ⵖ ⵉⵙⴳⴳⵯⴰⵙⵏ ⴰⴷ ⴳⴳⵓⵔⴰⵏⵉⵏ, ⵖⵎⴽ ⴰⵏⵏ ⴷ ⵓⵣⴷⴷⵓⵢ ⴷ ⵓⵎⵢⴰⵡⴰⵙ ⵖ ⵉⴳⵔⴰⵏ ⵓⴷⴷⵉⵔⵏ ⵣⴷⵉⵏⵉⵏ ⴷ ⵡⴰⵡⵏⴰⴹ ⴷ ⵓⵙⴱⴷⴷⵉ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ, ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵏⴳⵔ ⵉⴳⵔⴰⵏ ⵓⵏⴱⵉⴹⵏ ⴷ ⵡⵉⵢⵢⴰⴹ.
ⵖ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵍⵍⴰⵏ ⵖ ⵍⵎⵖⵔⵉⴱ ⵉⵎⵡⴰⵊⴱⵏ ⵉⵅⴰⵜⴰⵔⵏ ⵍⵍⵉ ⵔⴰⴷ ⴷ ⵢⴰⵡⵉ ⵉⵙⵙⴰⵔⵓⵜⵏ ⵏ ⴱⵕⵕⴰ, ⵍⵍⵉⵖ ⵉⵍⵍⴰ ⵖ ⵓⴷⵖⴰⵔ ⴰⵙⵜⵔⴰⵜⵉⵊⵉ ⵉⵥⵉⵍⵏ, ⵉⴳ ⵜⴰⵎⴰⵣⵉⵔⵜ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ, ⵉⴳ ⵜⵉⵍⴳⴳⵯⵉⵜ ⵙ ⵜⵎⵉⵣⴰⵔ ⵏ ⵉⴼⵔⵉⵇⵢⴰ.
ⵢⵉⵏⵉ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵣⵣⵉⴳⵣ ⵍⵎⵖⵔⵉⴱ ⵖ ⵓⵙⵓⵊⴷ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵉⴳⴰⵏ ⴰⵏⵎⵢⴰⵡⴰⵙ, ⵖ ⵜⵍⵍⴰ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⴷⵖⴰⵔⴰⵏⵜ, ⴷ ⵜⵓⴷⵔⵜ ⵉⵥⵉⵍⵏ ⵏ ⴽⵓ ⵉⵏⵎⵓⵔⴰⵏ. ⵢⵉⵏⵉ ⵎⴰⵙ ⵜⴳⴰ ⵜⵉⵔⵎⵉⵜ ⵏ ⴷⴷⴰⵏⵉⵎⴰⵕⴽ ⵜⴰⴷ ⵉⴳⴰⵏ ⵜⴰⵎⵣⵡⴰⵔⵓⵜ ⵖ ⵓⵎⵏⵉⴷ ⴰⴷ, ⵔⴰⴷ ⴳⵉⵙ ⵢⵉⵍⵉ ⵚⴰⵃⴰ ⵖⵎⴽ ⴰⵏⵏ ⴷ ⵜⵉⵔⵎⵉⵜⵉⵏ ⵢⴰⴹⵏⵉⵏ ⵜⵉⴳⵔⴰⵖⵍⴰⵏⵉⵏ ⵜⵜⵓⵙⵙⴰⵏⵏⵉⵏ ⵙ ⵓⵎⵓⵔⵙ, ⵙ ⴰⵢⵍⵍⵉ ⵉⵎⵙⴰⵙⴰⵏ ⴷ ⵡⴰⵏⴰⵡ ⴰⵎⵖⵔⵉⴱⵉ.