ⵖ ⵓⵏⵎⵓⵇⵇⴰⵔ ⵏⵏⵙ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⵓⵜⴳ ⵓⵎⵙⵇⴰⴷ ⵏ ⴼⵉⵏⵍⴰⵏⴷⴰ ⴰⵔⴳⴳⵉⴳ ⴷ ⵜⵣⵣⵉⴳⵣⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵡⴰⵙ 17 ⵛⵓⵜⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ   Pekka Hyvönen ⴰⵎⵙⵇⴰⴷ ⵏ ⴼⵉⵏⵍⴰⵏⴷⴰ ⵖ ⵕⵕⴱⴰⵟ, ⵖ ⵓⵔⵣⴰⴼ ⵏ ⵓⵎⵢⴰⵙⵙⴰⵏ ⵍⵍⵉⵖ ⵉⴳⴰ ⴰⵎⵙⵇⴰⴷ ⴰⵎⴰⵢⵏⵓ ⵖ ⵜⴳⵍⴷⵉⵜ.

ⵖ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ, ⵉⵙⵓⵜⴳ ⵎⴰⵙⵙ ⴰⵎⵙⵇⴰⴷ ⵜⴰⵣⴷⴳⵉ ⴷ ⵓⵕⵥⵥⵓⵎ ⵍⵍⵉ ⵙ ⵜⵜⵓⵙⵙⴰⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵢⵍⵍⵉ ⵉⵜⵜⴰⵊⵊⴰⵏ ⵉⵏⵎⵓⵔⴰⵏ ⴰⴷ ⴹⴼⵕⵏ ⵜⴰⵡⵓⵔⵉ ⵏⵏⵙ, ⵢⵉⵏⵉ ⵎⴰⵙ ⵜⵔⴰ ⵜⵎⴰⵣⵉⵔⵜ ⵏⵏⵙ ⴰⴷ ⵜⵙⴷⵓⵙ ⵜⵉⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵖ ⴽⵓ ⵉⵙⵡⵉⵔⵏ, ⵖ ⵉⵍⵍⴰ ⵓⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵖ ⵙⵏⴰⵜ ⵜⵎⵉⵣⴰⵔ.

ⵉⵏⵏⴰ ⵎⴰⵙⵙ  Pekka Hyvönen ⵎⴰⵙ ⴷ ⴼⵉⵏⵍⴰⵏⴷⴰ ⴰⵔ ⵜⵙⴽⴰⵔ ⵖ ⵍⵎⵖⵔⵉⴱ ⴰⵙⴰⴽⴰ ⵙ ⵉⴼⵔⵉⵇⵢⴰ ⵍⵍⵉⵖ ⵉⵍⵍⴰ ⵖ ⵓⴷⵖⴰⵔ ⴰⵙⵜⵔⴰⵜⵉⵊⵉ ⵉⵥⵉⵍⵏ, ⵢⵉⵏⵉ : « ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵜⴰⵎⴰⵢⵏⵓⵜ ⵖ ⵉⵍⵍⴰ ⵓⵔⴳⴳⵉⴳ, ⴰⵢⵍⵍⵉ ⵉⵙⵙⵉⴳⵓⵜⵏ ⵜⵉⵥⴹⴰⵕⵉⵏ ⵏ ⵓⵙⵏⴼⵍ ⵖ ⵜⴷⵎⵙⴰ ⴷ ⵓⵙⵖⵏⵣⵉ ⴷ ⴼⵉⵏⵍⴰⵏⴷⴰ ». ⵖⵎⴽ ⵍⵍⵉ ⵉⵙⵓⵜⴳ ⵎⴰⵙⵙ ⴰⵎⵙⵇⴰⴷ ⵜⵉⵣⵡⵉⵔⵉ ⵏ ⵜⴳⵍⴷⵉⵜ ⵖ ⵢⵉⴳⵔ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ, ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⴰⵏⴰⵡ ⵉ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵖ ⵢⵉⴳⵔ ⵏ ⵜⵥⴹⴰⵕⵉⵏ ⵖⵓⵙⵏⵉⵏ.

ⵖ ⵓⵎⵏⴰⴹ ⴰⴷ, ⵉⵙⵎⵏⵉⴷ ⵎⴰⵙⵙ  Pekka Hyvönen ⵉⵎⵡⴰⵊⴱⵏ ⵖ ⵉⵍⵍⴰ ⵓⵏⴰⵔⵓⵣ ⵉ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵉⵣⴰⵔ ⵖ ⵉⴳⵔⴰⵏ ⵓⴷⴷⵉⵔⵏ ⴰⵎ ⵜⵉⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ ⴷ ⵓⴼⵓⵍⵍⵙ ⵉⵎⵍⵥⵢ ⴷ ⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵓⵙⴳⵎⵉ ⴷ ⵓⵙⵎⵓⵜⴳ ⴷ ⵡⵉⵢⵢⴰⴹ, ⵢⵉⵏⵉ ⵎⴰⵙ ⵔⴰⴷ ⵜⴷⵔⵓ ⵜⵎⴰⵣⵉⵔⵜ ⵏⵏⵙ ⵜⵉⵔⵎⵉⵜ ⴷ ⵜⵎⵓⵣⴰⵢⵜ ⵏⵏⵙ ⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⵖ ⴽⵓ ⵉⴳⵔⴰⵏ.

ⵖ ⵓⵎⵏⵉⴷ ⵏⵏⵙ, ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵕⵡⵉ ⵏ ⵜⵣⴷⴰⵢⵉⵏ ⵙⵎⵓⵏⵏⵉⵏ ⵍⵎⵖⵔⵉⴱ ⴷ ⴼⵉⵏⵍⴰⵏⴷⴰ, ⵢⵉⵏⵉ ⵎⴰⵙ ⵍⵍⴰⵏⵜ ⵜⵣⴷⴰⵢⵉⵏ ⵏ ⵜⴷⴷⵓⴽⵍⴰ ⵏⴳⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵖ ⵙⵏⴰⵜ ⵜⵎⵉⵣⴰⵔ ⵖ ⵓⵙⵡⵉⵔ ⵉⵥⵉⵍⵏ ⵖ ⵉⵍⵍⴰ ⵓⵎⵛⴰⵡⴰⵕ ⵉⵙⵓⵍⵏ ⴷ ⵓⵙⵏⴼⵍ ⵏ ⵉⵔⵣⴰⴼⵏ. ⵖⵎⴽ ⵍⵍⵉ ⵉⵖⵔⴰ ⵉ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⴱⵕⵍⴰⵎⴰⵏ ⵏ ⴼⵉⵏⵍⴰⵏⴷⴰ ⵃⵎⴰ ⴰⴷ ⵜⵙⴽⵔ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ, ⴰⵢⵍⵍⵉ ⵔⴰⴷ ⵉⴳ ⵜⴰⵎⵍⴷⴰ ⵏ ⵓⵔⵣⵣⵓ ⵏ ⵉⴱⵔⵉⴷⵏ ⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⵏⴳⵔ ⵙⵏⴰⵜ ⵜⵎⵉⵣⴰⵔ ⵉ ⴽⵉⴳⴰⵏ ⵏ ⵓⵎⵢⴰⴷⴰⵙ ⴷ ⵓⵎⵢⴰⵡⴰⵙ.

ⵙ ⵜⵎⵍⴷⴰ, ⵉⵙⵎⵏⵉⴷ ⵎⴰⵙⵙ ⵍⵎⴰⵍⴽⵉ ⵢⴰⵏ ⵓⵙⵎⴰⵇⵍ ⴼ ⵜⵓⵚⴽⴰ ⵏ ⵓⵙⵇⵇⵉⵎ ⵏ  ⵉⵎⵓⵔⴰ ⴷ ⵜⵣⵣⵉⴳⵣⵜ ⵏ ⵜⴳⵏⵙⴻⵙⵜ ⵏ ⵜⵎⵖⴰⵔⵜ ⵖ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⵢⵉⵏⵉ ⵎⴰⵙ ⵉⵙⴽⵔ ⵓⵙⵇⵇⵉⵎ ⵢⴰⵜ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵥⵍⵉⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ ⵉⵙⵡⵓⵔⵉⵏ ⴼ ⵓⵙⵎⵖⵔ ⵏ ⵉⵙⵓⵔⵙⵏ ⵏ ⵜⵎⵖⴰⵔⵜ. ⵖⵎⴽ ⵍⵍⵉ ⵉⵏⵏⴰ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵙⴽⵔ ⵓⵙⵇⵇⵉⵎ ⵖ ⵜⴳⴰⵔⵉⵡⵉⵏ ⴰⴷ ⵢⴰⵜ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⵓⵙⴰⵏ, ⵙ ⵓⵎⵙⴰⵙⴰ ⴷ ⵓⵙⵎⴰⵇⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵖ ⵓⵙⵎⵖⵔ ⵏ ⵢⵉⴳⵔ ⴰⴷⵓⵙⴰⵏ ⴷ ⵓⵃⵟⵟⵓ ⴰⵏⴰⵎⵓⵏ ⵉ ⴽⵓ ⵉⵎⵖⵔⵉⴱⵉⵢⵏ ⴷ ⵓⵙⵎⴰⵜⴰ ⵏⵏⵙ ⴼ ⴽⵓ ⵜⵉⴷⵓⵍⴰ ⵏ ⵡⴰⵎⵓⵏ.

ⵍⵎⵖⵔⵉⴱ-ⴼⵉⵏⵍⴰⵏⴷⴰ