ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵙⵙⵏⵜⵉ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⵍⵏ ⵙ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⵓⵙⴰⵏ ⴰⵖⴰⵡⴰⵙ ⵏ ⵜⵡⵓⵔⵉ ⵏⵏⵙ
ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 14 ⵛⵓⵜⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ, ⵜⴰⵙⵎⵓⵏⵉ ⵜⵉⵙ ⵙⵏⴰⵜ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⵍⵏ ⵙ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⵓⵙⴰⵏ, ⵖ ⵉⵍⵍⴰ ⵓⵎⵛⴰⵛⴽⴰ ⴼ ⵉⵙⴳⵓⵎⵏ ⴷ ⵜⴱⵔⵉⴷⵜ ⵏ ⵜⵡⵓⵔⵉ, ⵖⵎⴽ ⴰⵏⵏ ⴷ ⵓⵥⵟⵟⴰ ⵏ ⵜⵔⴰⴱⴱⵓⵜ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ.
ⵖ ⵓⵎⵏⵉⴷ ⴰⴷ, ⵜⵙⵔⵙ ⵜⵔⴰⴱⴱⵓⵜ ⴽⵕⴰⴹ ⵉⵙⴳⵓⵎⵏ ⵉⴷⵙⵍⴰⵏⵏ ⵖ ⵔⴰⴷ ⵜⵉⵍⵉ ⵜⵡⵓⵔⵉ ⴼ ⵜⵎⵓⴽⵔⵉⵙⵉⵏ ⵥⵍⵉⵏⵉⵏ ⵙ ⵓⵙⴼⵍⵙ ⴰⴷⵓⵙⴰⵏ ⴷ ⵓⵏⴱⴰⴹ ⵏ ⵢⵉⴳⵔ, ⴷ ⵓⵙⵡⵓⵔⵉ ⵖ ⵜⵣⵣⵓⵍⵉⵏ ⵏ ⵜⵙⵏⵉⵊⵊⵉⵜ ⴷ ⵜⵉⴷ ⵜⵏⵜ ⵔⵡⴰⵙⵏⵉⵏ ⴷ ⵓⵔⵣⵣⵓ ⴰⵎⴰⵙⵙⴰⵏ, ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⴽⵕⴹⴰ ⵜⴰⴷⵓⵙⴰⵏⵜ, ⵖⵎⴽ ⴰⵏⵏ ⴷ ⵓⵙⵓⵊⴷ ⵏ ⵉⵙⵖⵍⴰⴼ ⴷ ⵜⵙⵓⵎⴰⵔ ⵍⵍⵉ ⵔⴰⴷ ⵉⵙⵎⵖⵔ ⴰⵏⴳⵔⴰⵡ ⴰⴷⵓⵙⴰⵏ ⵖ ⵜⵎⴰⵣⵉⵔⵜ ⵏⵏⵖ ⵙ ⵓⵎⵙⴰⵙⴰ ⴷ ⵜⴰⵏⵏⴰⵢⵜ ⵜⴰⴳⵍⴷⴰⵏⵜ ⵢⴰⵜⵜⵓⵢⵏ ⵉⵡⴰⵜⵜⵙⵏ ⵜⵉⵍⵉⵜ ⵏ ⵓⵃⵟⵟⵓ ⴰⵏⴰⵎⵓⵏ ⴷⴰⵔ ⴽⵓ ⵉⵎⵖⵔⵉⴱⵉⵢⵏ ⴷ ⵓⵙⵎⴰⵜⴰ ⵏⵏⵙ ⴷⴰⵔ ⴽⵓ ⵜⵉⴷⵓⵍⴰ ⵏ ⵡⴰⵎⵓⵏ, ⵖⵎⴽ ⵍⵍⵉ ⴷ ⵢⵓⵛⴽⴰ ⵏ ⵖ ⵉⵏⴰⵡ ⴰⴳⵍⴷⴰⵏ ⵢⴰⵜⵜⵓⵢⵏ ⵍⵍⵉ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵙ ⵜⵎⵍⴷⴰ ⵏ ⵜⴼⴼⵓⴳⵍⴰ ⵏ ⵓⴷⴰⴱⵓ ⵏ ⵓⵙⴳⴳⵯⴰⵙ ⴰⴷ.
ⵖ ⵎⴰ ⴷ ⵉⵥⵍⵉⵏ ⵙ ⵜⴱⵔⵉⴷⵜ ⵏ ⵜⵡⵓⵔⵉ, ⵔⴰⴷ ⵜⵜⵓⵙⴽⵉⵔⵏⵜ ⵜⵙⵎⵓⵏⴰⵢ ⵜⵉⴳⵯⵏⵙⴰⵏⵉⵏ, ⴷ ⵜⵖⵉⵎⵉⵜⵉⵏ ⵏ ⵓⵙⵙⴼⵍⴷ ⵉ ⵉⵎⵙⵜⴳⴳⴰⵔⵏ ⵖ ⵢⵉⴳⵔ ⴼ ⵉⵎⵔⵙⵉⵡⵏ ⵉⵎⵣⵡⵓⵔⴰ, ⵖⵎⴽ ⴰⵏⵏ ⴷ ⵓⵙⵏⵎⴰⵍⴰ ⵏ ⵓⵙⵙⴰⵏ ⵏ ⵜⵖⵓⵔⵉ ⵖ ⵍⵍⴰⵏ ⵉⴳⵏⵙⴰⵙⵏ ⵉⵎⵏⵜⴰⵢⵏ ⴷ ⵉⵎⵓⵣⴰⵢⵏ ⴷ ⵉⵎⵔⵣⵓⵜⵏ, ⵖⵎⴽ ⵍⵍⵉ ⵔⴰⴷ ⵜⵜⵓⵙⴽⵉⵔⵏⵜ ⵜⵔⵓⴱⴱⴰ ⵏ ⵜⵡⵓⵔⵉ ⵙ ⵉⵙⴳⵓⵎⵏ ⵜⵜⵔⵙⵏⵉⵏ, ⵉⵍⵉⵏ ⵉⵎⵏⵇⵇⴰⵙⵏ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵢⴰⵏ ⵖ ⵜⵓⴳⵜ ⴷ ⵡⴰⵢⵢⴰⴹ ⵖ ⵜⵓⵣⵍⵜ.
ⵍⵍⵉⵖ ⵉⵙⵜⴰⵡⵀⵎⵎⴰ ⵉⵎⵔⵙⵉ ⵏ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⵓⵙⴰⵏ ⴷ ⵉⴷⵔⵉⵣⵏ ⵏⵏⵙ ⴼ ⴽⵓ ⵜⵉⴷⵓⵍⴰ ⵏ ⵡⴰⵎⵓⵏ, ⴰⵔ ⵜⴰⵇⵔⴰ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⵍⵏ ⵙ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⵓⵙⴰⵏ ⵉ ⴽⵓ ⵉⵏⵎⵓⵔⴰⵏ ⴷ ⵜⴳⵔⴰⵡⵉⵏ ⵜⵉⵎⵏⵜⴰⵢⵉⵏ ⵃⵎⴰ ⴷ ⵜⵜⵓⴼⴽⵉⵏⵜ ⵜⵙⵓⵎⴰⵔ ⵉ ⵓⵙⴱⵓⵖⵍⵓ ⵏ ⵜⵡⵓⵔⵉ ⴰⴷ ⴷ ⵓⵙⵖⵓⴷⵓ ⵏⵏⵙ, ⵙ ⵜⵖⴰⵔⴰⵙⵜ ⵏ ⵓⵙⵉⵜ ⴰⵍⵉⴽⵟⵕⵓⵏⵉ ⵏ ⵓⵙⵇⵇⵉⵎ.
ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⵍⵏ ⵙ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⵓⵙⴰⵏ ⵍⵍⵉⵖ ⵉⵙⵓⵍ ⵓⵎⵓⴽⵏ ⵏ ⵢⵉⴳⵔ ⴰⴷⵓⵙⴰⵏ ⵖ ⵜⵎⴰⵣⵉⵔⵜ ⵏⵏⵖ ⵍⵍⵉ ⴷⴰⵔ ⵜⵍⵍⴰ ⵜⵣⵡⵉⵔⵉ ⵖ ⵜⵊⵓⵏⴷⴰⵜ ⵏ ⵓⵡⴰⵏⴽ ⴷ ⵜⵎⵔⵙⴰⵍ ⵜⵉⵎⵏⵜⴰⵢⵉⵏ, ⵖ ⵓⵙⴰⵜⵉ ⵏ ⵜⵓⵎⴰⵢⵉⵏ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙⵍⴰⵡⴰⵏ ⴰⴽⴽⵯ ⵉⵎⴰⴳⵔⴰⴷⵏ ⵏ ⵓⴳⵣⵣⵓⵎ ⵏⵏⵙ ⵡⵉⵙ ⵎⵔⴰⵡ.