ⵖ ⵓⵙⵏⵓⴱⴳ ⵏⵏⵙ ⵙⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵎⵍⴰ ⴷ ⵜⵎⵙⵇⴰⴷⵜ ⵏ ⴼⵕⴰⵏⵚⴰ ⵉⵣⵎⴰⵣ ⵉⵎⴰⵢⵏⵓⵜⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵉⵣⴰⵔ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵎⵡⴰⵙ 04 ⵛⵓⵜⴰⵏⴱⵉⵔ 2020  ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙⴰ Hélène LE GAL  ⵜⴰⵎⵙⵇⴰⴷⵜ ⵏ ⴼⵕⴰⵏⵚⴰ ⵖ ⵕⵕⴱⴰⵟ.

ⵖ ⵓⵏⵎⵓⵇⵇⴰⵔ ⴰⴷ, ⵜⵙⴷⴷⵉⴷ ⵎⴰⵙⵙⴰ ⵜⴰⵎⵙⵇⴰⴷⵜ ⵎⴰⵙ ⵜⵎⵎⴰⵖ ⵜⵎⴰⵣⵉⵔⵜ ⵏⵏⵙ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⵍⴰ ⴷ ⵓⵎⵢⴰⵡⴰⵙ ⴰⵎⵖⵔⵉⴱⵉ-ⴰⴼⵕⴰⵏⵚⴰⵡⵉ, ⵙⵍⴰⵡⴰⵏ ⴰⴽⴽⵯ ⵎⴰ ⴷ ⵉⵣⴷⵉⵏ ⴷ ⵜⴷⵓⵙⵉ ⵏ ⵜⵣⴷⴰⵢⵉⵏ ⵜⵉⵏⴼⴳⴰⵏⵉⵏ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵔ, ⵜⴼⴽ ⴰⵎⴷⵢⴰ ⵏ ⵓⵎⵓⴷⴷⵓ ⵉⵚⴰⵃⴰⵏ ⵉ ⵓⵏⵛⴽⴽ ⵉⴳⴳⵓⵜⵏ ⵏ ⵎⵉⴷⴷⵏ ⵍⵍⵉ ⴷ ⵖⴰⵎⴰⵏⵉⵏ ⵖ ⵙⵏⴰⵜ ⵜⵙⴳⴳⵉⵡⵉⵏ ⴷⴼⴼⵉⵔ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵍⵍⵉ ⵍⴽⵎⵏⵉⵏ 50.000.

ⵜⵙⵉⵙⴼⵉⵡ ⵎⴰⵙⵙⴰ Hélène LE GAL ⵎⴰⵙ ⴷ ⴰⵙⵓⵔⵙ ⵉⵥⵍⵉⵏ ⵍⵍⵉ ⴷ ⵢⵉⵡⵉ ⵓⴱⴰⵢⵢⵓⵕ ⴰⴷ, ⵉⵙⴳⴳⵯⵔⴰ ⴷ ⴰⴷ ⵉⵍⵉⵏ ⵉⵣⵎⴰⵣ ⵉⵎⴰⵢⵏⵓⵜⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵉⵣⴰⵔ ⵙ ⵜⵖⴰⵔⴰⵙⵜ ⵉⵥⵍⵉⵏ, ⴷ ⵏⴳⵔ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⵙ ⵓⵎⴰⵜⴰ, ⵙ ⴰⵢⵍⵍⵉ ⵙ ⵜⵥⵍⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉⵍⵍⴰⵏ ⵖ ⵓⴷⵖⴰⵔ ⴰⵙⵜⵔⴰⵜⵉⵊⵉ ⵉⴳⴰⵏ ⵓⴷⴷⵉⵔ, ⵜⵉⵏⵉ:"ⵔⴰⴷ ⵉⵍⵉⵏⵜ ⵜⵣⴷⴰⵢⵉⵏ ⵏⵏⵖ ⴷ ⵍⵎⵖⵔⵉⴱ ⵖ ⵜⵣⵣⵉⴳⵣⵜ ⵉⵙⵜⴰⵡⵀⵎⵎⴰⵏ ⵖ ⵜⴼⵔⴽⴰ ⴷ ⵢⵓⵛⴽⴰⵏ".

ⵜⵙⴷⴷⵉⴷ ⵎⴰⵙⵙⴰ ⵜⴰⵎⵙⵇⴰⴷⵜ ⵓⵍⴰ ⴼ ⵡⴰⵜⵉⴳ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵏⴳⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵖⵎⴽ ⴰⵏⵏ ⴷ ⵜⵓⴳⴳⴰⵙ ⵏ ⵍⵎⵖⵔⵉⴱ ⵉ ⵜⵉⵍⵉⵜ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⴳ ⵍⵉⴱⵢⴰ ⴷ ⵎⴰⵍⵉ.

ⵖ ⵓⵎⵏⵉⴷ ⵏⵏⵙ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⵡⴰⵜⵜⵙ ⵜⴷⵉⴱⵍⵓⵎⴰⵙⵉⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⵙⴷⵓⵙ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⵖ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴷ ⵜⵙⴳⴰ ⵏ ⵙⵙⴰⵃⵉⵍ, ⵜⵎⵎⴰⵖ ⴰⴷ ⵉⴳ ⵓⵎⵙⴰⵡⴰⵍ ⴰⴼⵙⵙⴰⵢ ⵏ ⵉⵎⴰⵖⵏ.

ⵖ ⵢⵉⴳⵔ ⴰⴱⵕⵍⴰⵎⴰⵏⵉ, ⵉⵙⵓⵜⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵙⵡⵉⵔ ⵏ ⵓⵣⴷⴷⵓⵢ ⴷ ⵓⵎⵢⴰⵡⴰⵙ ⵉⵙⵎⵓⵏⵏ ⵏⴳⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⴼⵕⴰⵏⵚⴰⵡⵉⵜ, ⵉⵙⵓⵜⴳ ⵜⴰⵢⵢⴰⴼⵓⵜ ⵏ ⵓⵙⵏⴼⴰⵔ ⵏ « ⵜⴰⴳⵯⵎⴰⵜⵜ ⵜⴰⵎⵔⵙⵍⴰⵏⵜ ⵊⴰⵔ ⵙⵉⵏ ⵉⵙⵇⵇⵉⵎⵏ », ⴰⵢⵍⵍⵉ ⵢⵉⵡⵙⵏ ⵖ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵖ ⵉⴳⵔⴰⵏ ⵙⵜⴰⵡⵀⵎⵎⴰⵏⵉⵏ ⵣⴷⵉⵏⵉⵏ ⴷ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⵉⵖⵔ ⵓⵍⴰ ⵉ ⵜⵣⵣⵉⴳⵣⵜ ⵏ ⵜⵓⴳⴳⴰⵙ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ.