ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⵓⴱⴳ ⵜⴰⵎⵙⵇⴰⴷⵜ ⵏ ⴽⴰⵏⴰⴹⴰ, ⵜⵙⵓⵜⴳ ⵙ ⵓⵙⵢⴰⴼ ⵏ ⵜⵡⵉⵣⵉ ⵉⵍⵍⴰⵏ ⵖ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 1 ⵛⵓⵜⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙⴰ Nell Stewart ⵜⴰⵎⵙⵇⴰⴷⵜ ⵏ ⴽⴰⵏⴰⴹⴰ ⵖ ⵕⵕⴱⴰⵟ, ⵖ ⵓⵙⴰⵜⵉ ⵏ ⵓⵔⵣⴰⴼ ⵏ ⵓⵊⵎⵉⵍ ⵍⵍⵉⵖ ⵜⴳⴰ ⵜⴰⵎⵙⵇⴰⴷⵜ ⵜⴰⵎⴰⵢⵏⵓⵜ ⵖ ⵜⴳⵍⴷⵉⵜ.

ⵙ ⵜⵎⵍⴷⴰ ⴰⴷ, ⵜⵙⴷⴷⵉⴷ ⵎⴰⵙⵙⴰ ⵜⴰⵎⵙⵇⴰⴷⵜ ⴼ ⵡⴰⵜⵉⴳ ⵍⵍⵉ ⵜⴰⴽⴽⴰ ⵜⵎⴰⵣⵉⵔⵜ ⵏⵏⵙ ⵉ ⵜⵣⴷⴰⵢⵉⵏ ⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵜⵉⵏⵉ ⵎⴰⵙ ⴷⵔⵓⵏⵜ ⵙⵏⴰⵜ ⵜⵎⵉⵣⴰⵔ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ. ⵜⵣⵎⵎⵉⵎ ⵎⴰⵙ ⴱⴷⴷⵏⵜ ⵙⵏⴰⵜ ⵜⵎⵉⵣⴰⵔ ⴼ ⵓⵙⵎⵖⵔ ⵏ ⵉⵙⵓⵔⵙⵏ ⵏ ⵜⵎⵖⴰⵔⵜ, ⵉⵙⵎⵓⵏ ⵜⵏ ⵓⵣⴷⴷⵓⵢ ⵖ ⵓⵙⵡⵉⵔ ⴰⴳⵔⴰⵖⵍⴰⵏ ⴼ ⴽⵉⴳⴰⵏ ⵏ ⵜⵎⵙⴰⵔⵉⵏ ⵏ ⵖⵉⵍⴰⴷ, ⵖⵎⴽ ⵍⵍⵉ ⵉⵍⵍⴰ ⵓⵏⵛⴽ ⵉⴳⴳⵓⵜⵏ ⵏ ⵉⵏⵎⵓⵔⴰⵏ ⵉⴽⴰⵏⴰⴹⵉⵢⵏ ⵍⵍⵉ ⴳⴰⵏⵉⵏ ⴰⵢⵜ ⵍⵎⵖⵔⵉⴱ.

ⵜⵙⴷⴷⵉⴷ ⵎⴰⵙⵙⴰ Nell Stewart  ⵙ ⵜⵡⵉⵣⵉ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵙ ⵜⵉⴽⴽⵉ ⵏ ⵜⵡⵉⵙⵉ ⵏ ⵜⵙⵏⵉⵊⵊⵉⵜ, ⴰⵢⵍⵍⵉ ⵉⴳⴰⵏ ⴰⵣⵣⴳⵉⵔ ⵏ ⵉⵙⵡⴰⵍⴰⵢⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵖⵎⴽ ⴰⵏⵏ ⴷ ⵓⴱⴷⴷⴰⴷ ⵏ ⵜⴳⵍⴷⵉⵜ ⴷ ⵍⵓⴱⵏⴰⵏ ⴷⴼⴼⵉⵔ ⵏ ⵓⴱⴱⴰⵇⵇⵉ ⵉⵊⵔⴰⵏ ⵖ ⵜⵎⴰⵥⵓⵏⵜ ⴱⴰⵢⵔⵓⵜ ⵖ ⵜⴳⴰⵔⵉⵡⵉⵏ ⴰⴷ.

ⵜⵏⵏⴰ ⵎⴰⵙⵙⴰ ⵜⴰⵎⵙⵇⴰⴷⵜ ⵎⴰⵙ ⵉⵙⴽⵔ ⵓⴱⵕⵍⴰⵎⴰⵏ ⴰⴽⴰⵏⴰⴹⵉ ⵖ ⵜⴳⵉⵔⴰ ⴰⴷ ⵢⴰⵜ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵍⴰ ⵜⴰⴱⵕⵍⴰⵎⴰⵏⵉⵜ ⵏⴳⵔ ⵙⵏⴰⵜ ⵜⵎⵉⵣⴰⵔ, ⴳⵉⵙ ⵉⴳⵏⵙⴰⵙⵏ ⵏ ⴽⵓ ⵉⵎⵓⵍⵍⵉⵜⵏ ⵉⵙⵔⵜⴰⵏⵏ, ⵜⴱⴷⴷ ⴼ ⵡⴰⵜⵉⴳ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ.

ⵖ ⵓⵎⵏⵉⴷ ⵏⵏⵙ, ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵜⵎⴰⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵔ, ⵖⵎⴽ ⵍⵍⵉ ⵉⵙⴷⴷⵉⴷ ⵙ ⵡⴰⴷⴷⴰⴷ ⵉⴳⴰⴷⴷⴰⵏ ⵏ ⴽⴰⵏⴰⴹⴰ ⵖ ⵎⴰ ⴷ ⵉⵥⵍⵉⵏ ⵙ ⵜⵢⴰⵏⵜ ⵜⴰⴽⴰⵍⴰⵏⵜ ⵏ ⵜⴳⵍⴷⵉⵜ. ⵢⵉⵏⵉ ⵎⴰⵙ ⴷⵔⵓⵏⵜ ⵙⵏⴰⵜ ⵜⵎⵉⵣⴰⵔ ⴰⵜⵉⴳⵏ ⵏ ⵢⵉⵙⴽⵉⵍ ⵏⴳⵔ ⴰⵡⵜⵎ ⴷ ⵜⴰⵡⵜⵎⵜ ⴷ ⵓⵙⴷⵓⵙ ⵏ ⵓⵙⵜⴰⵢ ⴰⴷⵉⵎⵓⵇⵔⴰⵟⵉ ⴷ ⵓⵙⴷⵓⵙ ⵏ ⵓⵚⴽⵓ ⴰⵎⵔⵙⵍⴰⵏ.

ⵖ ⵓⵎⵏⴰⴹ ⴰⴷ, ⵉⵙⵎⵏⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵣⵣⵉⴳⵣⵜ ⵏ ⵓⴱⵔⵉⴷ ⴰⴷⵓⵙⵜⵓⵔⵉ ⴷ ⵓⴷⵉⵎⵓⵇⵔⴰⵟⵉ ⵖ ⵜⵎⴰⵣⵉⵔⵜ ⵏⵏⵖ ⵙⴳ ⵜⴰⵙⵉⵎⴰⵜ ⴷ ⵉⵎⵓⴽⵏⵏ ⵉⵅⴰⵜⴰⵔⵏ ⵜⵜⵓⵙⴽⴰⵔⵏⵉⵏ ⵙ ⵜⵓⵏⵥⵉⵥⵜ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵢⵉⵍⵉ ⴳⵉⵙⵏ ⵓⵙⵖⵣⵏ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⵏ ⵓⴷⵓⵙⵜⵓⵔ ⵏ 2011. ⵢⵉⵏⵉ ⵎⴰⵙ ⵉⴼⴽⴰ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵜⵉⵎⵥⵍⴰⵢ ⵜⵉⵅⴰⵜⴰⵔⵉⵏ ⵉ ⵓⴱⵕⵍⴰⵎⴰⵏ, ⵉⵙⵔⵙ ⴰⵎⵏⵣⴰⵢ ⵏ ⵓⴱⵟⵟⵓ ⵏⴳⵔ ⵜⵏⴱⴰⴹⵉⵏ, ⵉⵙⴷⵓⵙ ⵉⵙⴽⵉⵍ ⵏⴳⵔ ⵓⵔⴳⴰⵣ ⴷ ⵜⵎⵖⴰⵔⵜ, ⵉⵙⴽⵔ ⴽⵉⴳⴰⵏ ⵏ ⵜⵎⵔⵙⴰⵍ ⵏ ⵓⵏⴱⴰⴹ ⵉⵥⵉⵍⵏ, ⴰⵢⵍⵍⵉ ⵉⴳⴰⵏ ⵖ ⵉⵏⴰⵔⵓⵣⵏ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⵖ ⵓⵚⴽⵓ ⵏ ⵓⵡⴰⵏⴽ ⴰⴷⵉⵎⵓⵇⵔⴰⵟⵉ ⵖ ⵉⵍⵍⴰ ⵓⵣⵔⴼ ⴷ ⵓⵙⵍⴳⵏ ⵙ ⵓⵎⵙⴰⵙⴰ ⴷ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ ⵉⵥⵍⵉⵏ.

ⵖ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵉⵔⴰⵜ ⵉⴷⵓⵙⵏ ⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵖ ⵙⵏⴰⵜ ⵜⵎⵉⵣⴰⵔ, ⵢⵉⵏⵉ:”ⴰⵔ ⵜⵜⴰⵡⵙ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵖ ⵓⵙⴷⵓⵙ ⵏ ⵜⵣⴷⴰⵢⵉⵏ ⴷ ⵉⵡⴰⵏⴽⵏ ⵉⵎⴷⴷⵓⴽⴽⴰⵍ, ⵜⴳ ⴽⴰⵏⴰⴹⴰ ⴰⵎⴰⴷⵔⴰⵡ ⵉⵥⵉⵍⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ”.