ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵙⵉⵅⴼ ⴰⵏⵏⵓⵕⵥⵎ ⵏ ⵜⵡⵓⵔⵉⵡⵉⵏ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⵓⵙⴰ

ⵜⵙⴽⵔ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⵔⴰⴼ ⵉⵥⵍⵉⵏ ⵙ ⵓⵏⴳⵔⴰⵡ ⴰⴷⵓⵙⴰⵏ ⴰⵙⵙ ⵏ ⵡⴰⵢⵏⴰⵙ 31 ⵖⵓⵛⵜ ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⵉⵥⵍⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⵉ ⵜⵙⵎⵉⴳⴰⵍ ⴷ ⵜⴱⵔⵉⴷⵜ ⵏ ⵜⵡⵓⵔⵉ.

ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙ ⵜⴽⵛⵎ ⵜⵡⵓⵔⵉ ⵏ ⵜⵔⴰⴱⴱⵓⵜ ⴰⴷ ⵖ ⵓⵏⴳⵔⴰⵡⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵔⴰⵔ ⵓⵙⴽⵔ ⵏⵏⵙ ⵓⵍⴰ ⵉ ⵎⴰ ⴷ ⵉⵙⵖⴰⵡⵙⴰ ⵢⵉⴳⵔ ⴰⴷⵓⵙⴰⵏ ⵖ ⵜⵎⴰⵣⵉⵔⵜ ⵏⵏⵖ ⵍⵍⵉ ⴷⴷⴰⵔ ⴰⴷⵖⴰⵔ ⴰⵅⴰⵜⴰⵔ ⵖ ⵜⵊⵓⵏⴷⴰⵜ ⵏ ⵓⵡⴰⵏⴽ ⴷ ⵜⵎⵔⵙⴰⵍ ⵜⵉⵎⵏⵜⴰⵢⵉⵏ.

ⵉⵙⵎⵏⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵖ ⵜⴳⵓⵔⵉ ⵏ ⵓⵏⵏⵓⵕⵥⵎ ⴰⵙⵎⴰⵇⵇⵍ ⴰⴳⵍⴷⴰⵏ ⴰⵎⴰⵜⵜⵓⵢ ⴼ ⵓⵏⴳⵔⴰⵡ ⴰⴳⵯⵏⵙⴰⵏ ⴷ ⵓⵅⵎⵎⴻⵎ ⵍⵍⵉ ⵉⴼⴽⴰ ⵓⴳⵍⵍⵉⴷ ⵉ ⵓⵏⴳⵔⴰⵡ ⴰⵏⴰⵎⵓⵏ ⵙ ⵓⵎⴰⵜⴰ, ⴷ ⵜⴷⵓⵙⵉ ⵏ ⵉⵏⵎⵓⵔⴰⵏ ⵙ ⵜⵖⴰⵔⴰⵙⵜ ⵉⵥⵍⵉⵏ. ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ ⵎⴰⵙ “ⵉⴳⴰ ⵓⵏⴳⵔⴰⵡ ⴰⴷⵓⵙⴰⵏ ⵢⴰⵏ ⵓⴱⵔⵉⴷ ⵉⵙⵎⵓⵏⵏ ⴽⵓ ⵉⴼⵔⴷⴰⵙ ⵏ ⵡⴰⵎⵓⵏ, ⵉⵣⴷⵉ ⴷ ⵉⵙⵖⴰⵡⵙⴰⵜⵏ ⴷ ⵜⵎⵣⵡⵓⵔⴰ ⵏ ⵉⴼⴳⴰⵏⵏ ⴷ ⵜⴰⵡⵊⵉⵡⵉⵏ ⴷ ⵡⴰⵎⵓⵏⵏ, ⵢⵉⵡⵉ ⵜⵜ ⵖ ⵓⴷⵡⴰⵙ ⵏⵏⵙⵏ ⵙ ⵓⴷⵎⴰⵡⵏ ⵏⵏⵙ ⵏ ⵜⴼⴽⴽⴰ ⴷ ⵜⴱⵙⵉⴽⵓⵍⵓⵊⵉⵜ ⴷ ⵉⵏⴰⵎⵓⵏⵏ ⵓⵎⴰⵏⵉⵏ ⵣⴷⵉⵏⵉⵏ, ⵙ ⵓⵙⴼⵔⴽ ⴷ ⵡⴰⵔⴰⵢ ⴷ ⵓⵙⵉⵊⵊⵉ ⴷ ⵓⵙⵖⵔⵜ ⴰⵎⴰⵢⵏⵓ” ⵉⵙⵎⴷ ⵡⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵡⵉⴷⴰ ⴷⵔⵓⵏⵉⵏ ⵖ ⵜⵙⵎⵓⵏⵉ ⴰⴷ ⴼ ⵡⴰⵜⵉⴳ ⵉⵍⵍⴰⵏ ⴷⴰⵔ ⵉⵣⵣⵔⴰⴼⵏ ⵉⴷⵓⵙⵙⴰⵏ ⵍⵍⵉ ⴳⴰⵏⵉⵏ ⵜⵉⵖⴰⵡⵙⵉⵡⵉⵏ ⵜⵉⴷⵙⵍⴰⵏⵉⵏ ⵙ ⵉⵙⵙⵏⵜⵉ ⵓⵎⵓⴽⵏ, ⵡⴰⵅⵅⴰ ⵎⵢⴰⵏⴰⵡⵏⵜ, ⵉⵇⵇⴰⵏⴷ ⵙⵓⵍ ⵓⵙⵖⵓⴷⵓ ⴷ ⵓⵙⴼⴰⵍⴽⵉ ⵏⵏⵙⵏⵜ, ⵍⵍⵉⵖ ⴳⴰⵏⵜ ⵜⵓⵜⵔⴰ ⵏ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⴰⴷⵓⵙⴰⵏ ⵖ ⵉⵍⵍⴰ ⵓⵙⵍⴳⵏ ⴰⵙⴰⵜⵉ ⴷ ⵓⵙⴽⵔ ⵏ ⵜⵣⵣⵓⵍⵜ ⴷ ⵓⵙⴼⵍⵙ ⴰⴷⵓⵙⴰⵏ, ⵖⵎⴽ ⴰⵏⵏ ⴷ ⵜⴰⵣⵣⵓⵍⵉⵏ ⵔⵡⴰⵙⵏⵉⵏ ⵜⵉⵏ ⵜⵙⵏⵉⵊⵊⵉⵜ ⴷ ⵉⴳⵔⴰⵡⵏ ⴷ ⵜⵎⵔⵙⴰⵍ ⵜⵉⵎⵏⵜⴰⵢⵉⵏ. ⵖⵎⴽ ⵍⵍⵉ ⵉⴱⴷⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⴼ ⵡⴰⵜⵉⴳ ⵏ ⵜⵙⵏⵜⴰⵢⵉⵏ ⵍⵍⵉ ⵙⴽⵔⵏ ⵉⴼⵔⴷⴰⵙ ⵏ ⵓⵙⵇⵇⵉⵎⵖ ⴳⴰⵏⵜ ⵜⵙⵓⵎⴰⵔ ⵏ ⵉⵙⵍⴳⵏⵏ, ⵙⵙⴽⵜⵉⵏ ⴷ ⵜⵓⵎⴰⵢⵉⵏ ⵏⵏⵙⵏⵜ ⵖ ⵎⴰ ⴷ ⵉⵥⵍⵉⵏ ⵙ ⵓⵙⵉⵊⵊⵉ ⴷ ⵓⵙⴼⵍⵙ ⴰⴷⵓⵙⴰⵏ ⴷ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵉⵎⵣⴰⵔⴰⵢⵏ ⵉⵊⵢⵓⵖⵔⴰⴼⵉⵢⵏ ⴷ ⵉⵏⴰⵎⵓⵏⵏ, ⴷ ⵓⵙⵡⵓⵔⵉ ⵖ ⵜⵣⵣⵓⵍⵉⵏ ⵏ ⵜⵙⵏⵉⵊⵊⵉⵜⴷ ⵉⵏⴳⴰⵙⵏ ⵏ ⵜⵡⵓⵔⵉⴷ ⵜⵓⴳⵔⵉⵡⵜ ⵏ ⵉⵙⴰⴼⴰⵔⵏ ⴷ ⵜⵙⴰⵙⴼⵔⵜ, ⴷ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵉⵡⴰⵜⵜⵙⵏ ⴰⵙⴽⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⴰⵎⵛⴰⵡⴰⵕ ⵏ ⵜⴷⵓⵙⵉ ⵍⵍⵉ ⵉⵍⵍⴰⵏ ⵖ ⵓⵙⵍⴳⵏ ⴰⵙⴰⵜⵉ.

ⵙⴷⴷⵉⴷⵏ ⵉⵎⴷⵔⴰⵡⵏ ⵎⴰⵙ ⵉⴳⴰ ⵡⴰⵡⵜⵜⴰⵙ ⵏ ⵜⵔⴰⴱⴱⵓⵜ ⴰⴷ ⵢⵉⵍⵉ ⵡⴰⴽⴰⵣ ⵙⵇⵇⵉⵇⵏ ⵏ ⵓⵏⴳⵔⴰⵡ ⴷ ⵓⵔⵣⵣⵓ ⵏ ⵜⵎⵓⴽⵔⵉⵙⵉⵏ ⴷ ⵓⵙⵉⵙⴼⵉⵡ ⵏ ⵉⵙⵖⴰⵡⵙⴰⵜⵏ ⵉⵣⵣⵔⴰⴼⵏ ⵙ ⵜⴳⵉⵡⵔⵉⵏ ⵏ ⵓⵙⵙⴼⵍⴷ ⵍⵍⵉ ⵔⴰⴷ ⵜⵙⴽⵔ ⵜⵔⴰⴱⴱⵓⵜ ⴷ ⵓⵙⵙⴰⵏ ⵏ ⵜⵖⵓⵔⵉ ⴷ ⵓⵎⵢⴰⵡⴰⴹ ⵍⵍⵉ ⵔⴰⴷ ⵉⴳ ⵜⴰⵔⵙⵍⵜ ⵏ ⵓⵚⴽⵓ ⵏ ⵓⴼⵔⴰⴽ ⴰⵎⴳⵔⵓ ⵏ ⵓⵎⵓⴽⵏ ⵏ ⵓⵏⴳⵔⴰⵡ ⴰⴷⵓⵙⴰⵏ ⵖ ⴽⵓ ⵓⴷⵎⴰⵡⵏ ⵏⵏⵙ ⴷ ⵉⵖⵔⵔⴷⵏ ⵏⵏⵙ ⵏ ⵜⵣⵣⵓⵍⵜ ⴷ ⵉⵏⴼⴳⴰⵏⵏ ⴷ ⵉⵊⵢⵓⵖⵔⴰⴼⵉⵢⵏ.

ⵖ ⵓⵙⵏⵎⴰⵍⴰ ⵏ ⵜⵡⵓⵔⵉ ⵏ ⵜⵔⴰⴱⴱⵓⵜ, ⵜⵙⵔⵙ ⵜⵔⴰⴱⴱⵓⵜ ⵉⵡⵜⵜⴰⵙⵏ ⵏⵏⵙ ⵉⵙⵜⵔⴰⵜⵉⵊⵉⵢⵏ ⵙ ⵉⵙⴳⵓⵎⵏ ⴰⴷ:

-         ⴰⵎⵏⵉⴷ ⴰⵣⵣⵔⴰⴼ;

-         ⴰⵎⵏⵉⴷ ⴰⵎⴰⵜⵜⵉⵡ: ⵜⵓⵚⴽⵉⵡⵉⵏ ⵜⵉⵏⴰⴷⴷⵉⵡⵉⵏ;

-         ⴰⵎⵏⵉⴷ ⴰⵏⴼⴳⴰⵏ: ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵓⵙⵖⴰⵡⵙⴰ ⵉⵍⵍⴰⵏ;

-         ⵉⴳⵔ ⵉⵣⴷⵉⵏ ⴷ ⵜⵙⴳⴳⵉⵡⵉⵏ: ⴰⵙⴽⵔ ⵏ ⵓⵣⵔⴼ ⵉ ⵓⵙⵉⵊⵊⵉ ⴷⴰⵔ ⵜⵙⴳⴳⵉⵡⵉⵏ;

-         ⵉⴳⵔ ⵏ ⵓⵏⴱⴰⴹ ⴷ ⵓⵙⵡⵓⴷⴷⵓ ⵏ ⵉⵖⴰⵡⴰⵙⵏ ⵣⴷⵉⵏⵉⵏ ⴷ ⵢⵉⴳⵔ ⴰⴷⵓⵙⴰⵏ.

ⵜⵙⵔⵙ ⵜⵙⵇⵇⵉⵎⵜ ⴰⵖⴰⵡⴰⵙ ⵖ ⵉⵍⵍⴰ:

1-               ⴰⵙⴽⵔ ⵏ ⵜⴳⵉⵡⵔⵉⵏⵏ ⵓⵙⵙⴼⵍⴷ ⴷ ⵉⵎⵙⴽⴰⵔⵏ ⵉⴷⵙⵍⴰⵏⵏ ⵖ ⵓⵏⴳⵔⴰⵡ ⴰⴷⵓⵙⴰⵏ, ⴽⵔⴰⵢⴳⴰⵜ ⵓⵙⵎⵉⵍ ⴷ ⵏⵜⵜⴰⵏ ⴷ ⵉⵎⵔⵙⵉ ⵉⵜⵜⵓⵖⵔⴰⵏ.

2-               ⴰⵙⴽⵔ ⵏ ⵉⵏⵎⵓⵇⵇⴰⵔⵏ ⵏ ⵜⵖⵓⵔⵉ ⴼ ⴽⴽⵓⵥ ⵉⵎⵔⵙⵉⵡⵏ:

-         ⴰⵏⵎⵓⵇⵇⴰⵔ ⴰⵎⵣⵡⴰⵔ : ⴰⵙⴼⵍⵙ ⴰⴷⵓⵙⴰⵏ ⵢⵓⵎⴰⵏ ;

-         ⴰⵏⵎⵓⵇⵇⴰⵔ ⵡⵉⵙ ⵙⵉⵏ : ⵜⵉⵎⵙⴽⵔⵜ ⵏ ⵜⵣⵣⵓⵍⵜ ⵖ ⵢⵉⴳⵔ ⴰⴳⴷⵓⴷⴰⵏ ⵏⵖ ⵓⵙⵍⵉⴳ (ⵙ ⵜⵉⵍⵉⵜ ⵏ ⵉⴳⵏⵙⴰⵙⵏ ⵏ ⵜⵣⵣⵓⵍⵉⵏ ⵏ ⵜⵙⵏⵉⵊⵊⵉⵜ ⴷ ⵜⵉⴷ ⵜⵏⵜ ⵉⵔⵡⴰⵙⵏ…) ;

-         ⴰⵏⵎⵓⵇⵇⴰⵔ ⵡⵉⵙ ⴽⵕⴰⴹ : ⴼ ⵜⵓⵚⴽⵉⵡⵏ ⵜⵉⵏⴰⴷⴷⵉⵡⵉⵏ ⴷ ⵜⴽⵕⴹⴰ ⵜⴰⴷⵓⵙⴰⵏⵜ (ⵙ ⵜⵉⵍⵉⵜ ⵏ ⵉⴳⵏⵙⴰⵙⵏ ⵏ ⵉⴳⵔⴰⵏ ⵓⵏⴱⵉⴹⵏ ⵉⵎⵏⵜⴰⵢⵏ, ⵉⴷ ⴱⴰⴱ ⵏ ⵜⵣⵣⵓⵍⵜ, ⴰⵎⵓⵏ ⵓⵖⵔⵉⵎ…) ;

-         ⴰⵏⵎⵓⵇⵇⴰⵔ ⵡⵉⵙ ⴽⴽⵓⵥ : ⴰⵙⵏⵎⴰⵍⴰ ⵏ ⵡⴰⵙⵙ ⵏ ⵜⵖⵓⵔⵉ ⵙ ⵜⵉⵍⵉⵜ ⵏ ⵜⵏⴱⴰⴹⵜ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵉ ⵜⵏⴽⴷⴰ ⴷ ⵓⵙⵉⵙⵙⵏ ⵏ ⵜⵙⵏⵜⴰⵢⵜⵜⴰⴱⵕⵍⴰⵎⴰⵏⵉⵜ ⵖ ⵢⵉⴳⵔ ⴰⴷⵓⵙⴰⵏ ⴷ ⵓⵙⵓⵜⴳ ⵏ ⵜⵓⴳⴳⴰⵙ ⵜⵉⴱⵕⵍⴰⵎⴰⵏⵉⵢⵉⵏ.

ⵖ ⵎⴰ ⴷ ⵉⵥⵍⵉⵏ ⵙ ⵜⵉⵣⵉ, ⵍⵍⴰⵏⵜ ⵜⵙⵓⵎⴰⵔ ⵏ ⵉⵙⴰⴽⵓⴷⵏ ⵏ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⵏ ⵜⵖⵓⵔⵉ ⵙ ⵖⵎⴽ ⴰⴷ :

ⴰⵏⵎⵓⵇⵇⴰⵔ ⴰⵎⵣⵡⴰⵔⵓ : ⴰⵣⴳⵏ ⴰⵎⵣⵡⴰⵔⵓ ⵏ ⴽⵟⵓⴱⵕ ;

ⴰⵏⵎⵓⵇⵇⴰⵔ ⵡⵉⵙ ⵙⵉⵏ : ⵉⵎⴰⵍⴰⵙⵙ ⴰⵎⴳⴳⴰⵔⵓ ⵏ ⵏⵓⵡⴰⵏⴱⵉⵔ ;

ⴰⵏⵎⵓⵇⵇⴰⵔ ⵡⵉⵙ ⴽⵕⴰⴹ : ⵉⵎⴰⵍⴰⵙⵙ ⵡⵉⵙ ⵙⵉⵏ ⵖ ⴷⵓⵊⴰⵏⴱⵉⵔ ;

ⴰⵏⵎⵓⵇⵇⴰⵔ ⵡⵉⵙ ⴽⴽⵓⵥ : ⵉⵎⴰⵍⴰⵙⵙ ⴰⵎⴳⴳⴰⵔⵓ ⵖ ⴷⵓⵊⴰⵏⴱⵉⵔ.

ⵉⵙⵓⵜⴳ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⴰⵜⵉⴳ ⵉⵍⵍⴰⵏ ⴷⴰⵔ ⵜⵉⵢⴰⴼⵓⵜⵉⵏ ⵏ ⵓⵏⵎⵓⵇⵇⴰⵔ ⴰⵎⵣⵡⴰⵔⵓ, ⵙⴷⴷⵉⴷⵏ ⵎⴰⵙ ⵅⴰⵚⵚⴰⵏⵜ ⴽⵉⴳⴰⵏ ⵏ ⵜⵓⴳⴳⴰⵙ ⵃⵎⴰ ⴰⴷ ⵢⵉⵍⵉ ⵓⵎⵓⵔⵙ ⵏ ⵓⵙⴰⵡⵓⵔ ⴰⴷ ⴰⴱⵕⵍⴰⵎⴰⵏⵉ ⵉⵙⵜⴰⵡⵀⵎⵎⴰⵏ ⵍⵍⵉⵖ ⵉⴳⴰ ⵜⴰⵔⵙⵍⵜ ⵜⴰⴷⵙⵍⴰⵏⵜ ⵏ ⵓⵏⴳⵔⴰⵡ ⵏⵏⵖ ⴰⴷⵓⵙⴰⵏ. ⵙ ⵜⵎⵍⴷⴰ ⴰⴷ, ⵉⵙⵓⵜⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵙ ⵉⵎⵙⵡⵓⵔⵉⵢⵏ ⵖ ⵜⵙⵏⵉⵊⵊⵉⵜ ⴷ ⵜⵎⵙⵙⵓⴳⵓⵔⵜ ⴷ ⴽⵓ ⵉⵎⵙⵡⵓⵔⵉⵢⵏ ⵖ ⵜⴷⵓⵙⵉ ⵖ ⵢⵉⴳⵔ ⴰⴳⴷⵓⴷⴰⵏ ⵓⵍⴰ ⵓⵙⵍⵉⴳ, ⵍⵍⵉ ⴷ ⵎⵍⴰⵏⵉⵏ ⵜⵉⵙⵓⴳⴰⵔ ⵏⵏⵙⵏ ⴷ ⵉⵙⴼⴰⵙⴽⴰⵜⵏ ⵏⵏⵙⵏ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵖⵎⴽ ⵍⵍⵉ ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴼ ⵢⵉⵎⴰⵏ ⵏ ⵓⵙⵎⵓⵙⵙⵓ ⴰⵏⴰⵎⵓⵔ ⴷ ⵜⵡⵉⵣⵉ ⵜⴰⵏⴰⵎⵓⵔⵜ, ⵉⵖⵔ ⴰⴷ ⵢⵉⵍⵉ ⵓⵍⵜⴰⵖ ⴰⵎⴳⵔⵓ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵓⵙⴼⵔⵓⵔⵜ ⵏⵏⵙ.