ⴰⵙⵎⴰⴷ ⵏ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⴹⵍⴰⵏ ⵡⵉⵙ ⵙⵎⵎⵓⵙ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵙ ⵜⴷⵔⴰⵡⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ

ⵉⵙⵎⴷ ⵓⴳⵔⴰⵡ ⴰⵎⴰⴹⵍⴰⵏ ⵡⵉⵙ ⵙⵎⵎⵓⵙ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵉⵜⵜⵓⵙⵏⵎⴰⵍⴰⵏ ⴷⴷⵓ ⵜⵎⴰⵜⴰⵔⵜ : “ⴰⵙⵎⵓⵙⵙⵓ ⵏ ⵜⵓⴳⴳⴰⵙ ⵏ ⵉⴱⵕⵍⴰⵎⴰⵏⵏ ⵉ ⵜⵣⴷⴰⵢⵉⵏ ⵜⵉⴳⵜⵉⵔⴰⵏⵉⵏ ⴱⴰⵀⵔⴰ ⵕⵡⴰⵏⵉⵏ ⵉⴹⵎⵏⵏ ⴰⴼⵔⴰ ⴷ ⵜⴳⵎⵉ ⵜⴰⵙⵓⵍⴰⵏⵜ ⵉ ⵉⵎⴰⴷⴰⵏⵏ ⴷ ⵓⵎⴰⴹⴰⵍ, ⵜⵉⵡⵓⵔⵉⵡⵉⵏ ⵏⵏⵙ ⴰⵙⵙ ⵏ ⵓⴽⵡⴰⵙ 20 ⵖⵓⵛⵜ 2020. ⵜⵣⵣⵉⴳⵣ ⵜⵡⵓⵔⵉ ⵏ ⵜⵙⴰⵡⵓⵔⵉⵏ ⵖ ⵍⵍⴰⵏ ⵉⵎⴹⴰⴽⴰⵕⵏ ⴼ ⵉⵎⵔⵙⵉⵡⵏ ⵣⴷⵉⵏⵉⵏ ⴷ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⴰⵔ 2030, ⴷ ⵜⵎⵓⴽⵔⵉⵙⵉⵏ ⵣⴷⵉⵏⵉⵏ ⴷ ⵓⵏⵣⵡⵉ,  ⴰⵎⴰⵜⵜⴰⵢ ⵏ ⵉⴼⴳⴰⵏⵏ ⵖ ⵓⵎⴰⴹⴰⵍ, ⴰⵙⵖⵓⴷⵓ ⵏ ⵓⵏⴱⴰⴹ ⵉ ⵓⵙⵉⵣⴷⵔ ⵏ ⵉⵎⵣⴰⵔⴰⵢⵏ ⵏⴳⵔ ⵉⴱⵕⵍⴰⵎⴰⵏⵏ ⴷ ⵉⵎⴰⴷⴰⵏⵏ, ⴰⵚⴽⵓ ⵏ ⵉⵏⴳⵔⴰⵡⵏ ⵉⴷⵎⵙⴰⵏⵏ ⵉⵙⵓⵍⴰⵏⵏ ⵖ ⵉⵍⵍⴰ ⵓⵙⵉⴷⴼ ⵉⴹⵎⵏⵏ ⵜⴰⵏⵓⴼⵔⴰⵢⵜ ⴷ ⵜⵣⵔⴼⵜ ⵉ ⴽⵓ ⵢⴰⵏ, ⴰⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵜⵉⵡⵛⵛⵏⵜ.

ⵍⵍⵉⵖ ⵉⴷⵔⵓ ⵖ ⵜⵙⴰⵡⵓⵔⵜ ⵉⵍⵍⴰⵏ ⴼ ⵓⵎⵓⵙⵙⵓ ⴷ ⵓⵎⴰⵜⵜⴰⵢ ⵏ ⵉⵡⴷⴰⵏ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⵎⴰⵙ ⵉⵣⵡⴰⵔ ⵍⵎⵖⵔⵉⴱ ⵖ ⵓⴼⵙⵙⴰⵢ ⵏ ⵓⵙⵓⵔⵙ ⵏ ⵉⵎⵣⵡⴰⴳ ⵍⵍⴰⵏⵉⵏ ⵖ ⵡⴰⴽⴰⵍ ⵏⵏⵙ ⵙⴳ 2014, ⵙⵍⴰⵡⴰⵏ ⴰⴽⴽⵯ ⵡⵉⴷ ⴰ ⵓⵛⴽⴰⵏⵉⵏ ⵖ ⵜⵎⵉⵣⴰⵔ ⵜⴰⵢⵜⵎⴰⵜⵉⵏ ⵏ ⵉⴼⵔⵉⵇⵢⴰ, ⵉⵙⴷⴷⵉⴷ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵎⵢⴰⴷⴰⵙⵜ ⵏ ⵓⵙⵉⴷⴼ ⵏ ⵉⵡⴷⴰⵏ ⴰⴷ ⵃⵎⴰ ⴰⴷ ⴰⵡⵙⵏ ⵖ ⵜⵡⵓⵔⵉ ⵏ ⵜⴳⵎⵉ ⵏ ⵜⵎⵉⵣⴰⵔ ⵏ ⵓⵙⵏⵓⴱⴳ ⴷ ⴰⴷ ⵓⵔ ⴳⵉⵏ ⴰⵥⴰⵥⵓⵢ ⴼ ⵡⴰⵎⵓⵏⵏ ⴰⴷ.

ⵙⵎⴷⵏⵜ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⵙ ⵓⵙⵖⵣⵏ ⵏ ⵓⵙⵉⵡⴹ ⵖ ⵙⴷⴷⵉⴷⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⴼ ⵡⴰⵜⵉⴳ ⵏ ⵓⵙⵡⵓⴷⴷⵓ ⴰⴳⵜⵉⵔⴰⵏ ⵏ ⵜⴰⵙⵙⴰⵙⵉⵏ ⵜⵉⴳⵔⴰⵖⵍⴰⵏⵉⵏ, ⴷ ⵜⴳⵎⵉ ⵜⴰⵙⵓⵍⴰⵏⵜ ⵙ ⵓⵡⵇⵇⵔ ⵏ ⵓⴱⴰⴹ ⵏ ⵉⵡⴰⵏⴽⵏ ⴷ ⵜⵢⴰⵏⵜ ⵏⵏⵙⵏ ⵜⴰⴽⴰⵍⴰⵏⵜ.  ⵢⵉⵡⵉ ⵉⵎⵔⵙⵉ ⴰⴷ ⴰⵜⵉⴳ ⴰⵔⵙⵍⴰⵏ ⵖ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⴷ, ⵙⵍⴰⵡⴰⵏ ⴰⴽⴽⵯ ⵖ ⵢⴰⵏ ⵓⵎⴰⴹⴰⵍ ⵖ ⵍⵍⴰⵏⵜ ⴽⵉⴳⴰⵏ ⵏ ⵜⵓⵎⴰⵏⵉⵏ ⴰⵎ ⵉⵙⵏⴼⵍⵏ ⵉⵜⵉⴽⵏⵓⵍⵓⵊⵉⵢⵏ ⴷ ⴽⵉⴳⴰⵏ ⵏ ⵜⴽⵕⴹⵉ, ⴰⵢⵍⵍⵉ ⵉⵎⵎⴰⵍⵏ ⵜⴰⵡⵓⵔⵉ ⵍⵍⵉ ⴷ ⵉⵇⵇⴰ ⵏⵏ ⴰⴷ ⵜⵉⵍⵉ ⴷⴰⵔ ⵉⴱⵕⵍⴰⵎⴰⵏⵏ ⵖ ⵓⵙⵡⵉⵔ ⴰⴷ ⵙ ⵓⵙⴽⵔ ⵏ ⵓⵎⵓⵔⵙ ⵏ ⵜⵙⵔⵜⴰⵜⵉⵊⵉⵜ ⵏ ⵓⵙⵡⵓⴷⴷⵓ ⴰⴳⵜⵉⵔⴰⵏ ⵏ ⵜⴰⵙⵙⴰⵙⵉⵏ, ⵙ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵉⵏ ⵏ ⴽⵓ ⵉⵎⴰⴷⴰⵏⵏ.