ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⵓⴱⴳ ⴰⵎⵙⵇⴰⴷ ⵏ ⴱⵕⵉⵟⴰⵏⵢⴰ ⴳ ⵕⵕⴱⴰⵟ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⴽⵕⴰⵙ 05 ⵖⵓⵛⵜ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⴰⵎⵙⵇⴰⴷ ⵏ ⴱⵕⵉⵟⴰⵏⵢⴰ ⴳ ⵕⵕⴱⴰⵟ ⵎⴰⵙⵙ ⵟⵓⵎⴰⵚ ⵕⴰⵢⵍⵉ (Thomas Reilly), ⴷⴼⴼⵉⵔ ⵎⴰ ⴷ ⵙⵎⴷⵏⵜ ⵜⵙⵎⵉⴳⴰⵍ ⵏⵏⵙ ⵜⵉⴷⵉⴱⵍⵓⵎⴰⵙⵉⵢⵉⵏ ⴳ ⵜⴳⵍⴷⵉⵜ.

ⵙ ⵜⵎⵍⴷⴰ ⴰⴷ, ⵙⴰⵡⵍⵏ ⵙⵉⵏ ⵉⵏⵎⵖⵓⵔⵏ ⴼ ⵜⵣⵣⵉⴳⵣⵜ ⵉⵥⵉⵍⵏ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵖ ⵙⵏⴰⵜ ⵜⵎⵉⵣⴰⵔ ⵖ ⵉⵙⴳⴳⵯⴰⵙⵏ ⴳⴳⵓⵔⴰⵏⵉⵏ. ⵉⵣⵎⵎⵉⵎ ⵎⴰⵙⵙ ⴰⵎⵙⵇⴰⴷ ⵎⴰⵙ ⵍⵍⴰⵏⵜ ⵜⵥⴹⴰⵕⵉⵏ ⵙⵜⴰⵡⵀⵎⵎⴰⵏⵉⵏ ⴷ ⵉⵎⵏⵉⴷⵏ ⵏ ⵉⵎⴰⵍ ⵍⵍⵉ ⴷ ⵉⵇⵇⴰⵏ ⵓⵙⵡⵓⵔⵉ ⵃⵎⴰ ⴰⴷ ⴱⵓⵖⵍⵓⵏⵜ ⵜⵣⴷⴰⵢⵉⵏ ⵏⴳⵔ ⵙⵏⴰⵜ ⵜⵎⵉⵣⴰⵔ ⵖ ⴽⵓ ⵉⵙⵡⵉⵔⵏ ⵙⵍⴰⵡⴰⵏ ⴰⴽⴽⵯ ⵖ ⵢⵉⴳⵔ ⴰⴱⵕⵍⴰⵎⴰⵏⵉ.

ⵉⵙⵓⵜⴳ ⵎⴰⵙⵙ ⵟⵓⵎⴰⵚ ⵕⴰⵢⵍⵉ ⵜⴰⴷⵉⵏⴰⵎⵉⵜ ⵉⵍⵍⴰⵏ ⵖ ⵜⴳⵍⴷⵉⵜ ⴷ ⵜⴷⵓⵙⵉ ⵏ ⵜⵎⵔⵙⴰⵍ ⵏⵏⵙ, ⵢⵉⵏⵉ:”ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵖ ⵜⵏⴰⵔⴰ ⵏ ⵜⴳⵍⴷⵉⵜ ⵙ ⵜⵓⵏⵥⵉⵥⵜ ⵖ ⵓⴱⵔⵉⴷ ⵏ ⵓⴱⵓⵖⵍⵓ ⴷ ⵜⴳⵎⵉ”. ⵉⵖⵔ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵍⵎⵖⵔⵉⴱ ⴷ ⴱⵕⵉⵟⴰⵏⵉⵢⴰ ⵖ ⵢⵉⴳⵔ ⴰⵙⴳⵎⴰⵏ ⴷ ⵓⴷⵍⵙⴰⵏ ⴷ ⵓⵏⴰⵎⵓⵏ ⵍⵍⵉⵖ ⴳⴰⵏ ⵜⵉⵔⵙⴰⵍ ⵜⵉⴷⵙⵍⴰⵏⵉⵏ ⵏ ⵓⵙⴱⵓⵖⵍⵓ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵖ ⴽⵓ ⵉⴳⵔⴰⵏ.

ⵖ ⵜⵙⴳⴰ ⵏⵏⵙ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴽⵓ ⵜⵉⵙⵏⵜⴰⵢⵉⵏ ⵍⵍⵉ ⵜⵜⵓⵙⴽⴰⵔⵏⵉⵏ ⵖ ⵉⵙⴳⴳⵯⴰⵙⵏ ⵉⵎⴳⴳⵓⵔⴰ ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵙⵍⴰⵡⴰⵏ ⴰⴽⴽⵯ ⵖ ⵓⵎⵏⵉⴷ ⵏ ⵓⵙⵏⴼⵍ ⵏ ⵉⵔⵣⴰⴼⵏ ⵏ ⵉⴽⴰⴱⴰⵕⵏ ⵉⴱⵕⵍⴰⵎⴰⵏⵉⵢⵏ ⵙⴳ ⵙⵏⴰⵜ ⵜⵎⵉⵣⴰⵔ, ⴷ ⵜⵎⴷⵔⴰⵡⵜ ⵉⵥⵉⵍⵏ ⵉⵙⵎⵓⵏⵏ ⴰⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵔⵙⵍⵜ  ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ.

ⵉⵙⵙⵉⵙⴼⵉⵡ ⵎⴰⵙⵙ ⵍⵎⴰⵍⴽⵉ ⵎⴰⵙ ⴳⴰⵏ ⵉⵎⴹⴰⴽⴰⵕⵏ ⵜⵜⵉⵍⵉⵏⵉⵏ ⵏⴳⵔ ⵉⵎⵙⵜⴳⴳⴰⵔⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵉⵟⴰⵏⵉⵢⵏ ⵜⴰⵎⴰⵜⴰⵔⵜ ⵏ ⵜⵉⵔⴰⵜ ⵉⴼⴰⵡⵏ ⵏ ⵙⵏⴰⵜ ⵜⵎⵉⵣⴰⵔ ⵉ ⵓⵙⴱⵓⵖⵍⵓ ⵏ ⵜⵣⴷⴰⵢⵉⵏ ⵏⵏⵙⵏⵜ ⵜⵉⵙⵉⵏⵔⴰⵏⵉⵏ ⵃⵎⴰ ⴰⴷ ⵍⴽⵎⵏⵜ ⵢⴰⵏ ⵓⵙⵡⵉⵔ ⵢⴰⵜⵜⵓⵢⵏ ⵏ ⵓⵎⵢⴰⵡⴰⵙ ⴷ ⵓⵎⵢⴰⴷⴰⵙ.