ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵖⵣⵏ ⵚⴹⵉⵚ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵓⵎⵣⴰⵖ ⴰⵏⴰⵎⵓⵔ ⴷ ⵜⵏⴼⵔⵓⵜ ⵜⴰⵍⵉⴽⵟⵕⵓⵏⵉⵜ ⴷ ⵢⵉⴳⵔ ⴰⵥⵕⴼⴰⵏ ⴷ ⵓⴱⴰⵏⴽⵉ

ⵙ ⵓⵎⴽⴰⵕⴰⴹ ⴰⵙ ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 14 ⵢⵓⵍⵢⵓⵣ 2020 ⵚⴹⵉⵚ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵣⴷⵉⵏⵉⵏ ⴷ  ⵢⵉⴳⵔ ⴰⵥⵕⴼⴰⵏ ⴷ ⵓⴱⴰⵏⴽⵉ, ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵏⴼⵔⵓⵜ ⵜⴰⵍⵉⴽⵟⵕⵓⵏⵉⵜ. ⵖ ⵜⵖⵉⵎⵉⵜ ⵜⵓⵙⵎⵉⴷⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⴷ ⵎⴰⵙⵙ ⵄⴰⴱⴷⵍⵍⴰⵟⵉⴼ ⵍⵓⴷⵉⵢⵢⵉ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵥⵍⵉⵏ ⵙ ⵓⵎⵣⴰⵖ ⴰⵏⴰⵎⵓⵔ.

ⵖ ⵜⵏⴽⴷⴰ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 36.20 ⵉ ⵓⵙⵏⴼⵍ ⵏ ⵜⴼⵏⵉⵇⵜ ⵜⴰⵏⴰⵎⵎⴰⵙⵜ ⵏ ⵜⵏⴼⵔⵓⵜ ⵙ ⵜⵎⵙⵙⵓⵔⵜ ⵏ ⵜⵡⵉⵙⵉ, ⵉⵙⴷⴷⵉⴷ ⵎⴰⵙⵙ ⵎⵓⵃⴰⵎⵎⴰⴷ ⴱⵏ ⵛⴰⵄⴱⵓⵏ ⴰⵎⴰⵡⵙⴰⵙ  ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⵎⴰⵙ ⴷ ⵉⵇⵇⴰⵏ ⵓⵎⵓⴽⵏ ⵏ ⵓⵙⴰⵜⵉ ⴰⵣⵣⵔⴰⴼ ⵏ ⵜⴼⵏⵉⵇⵜ ⴰⴷ, ⵍⵍⵉⵖ ⵜⵣⵣⵉⴳⵣ ⵜⵓⵜⵔⴰ ⴼ ⵜⵏⵓⴼⴰ ⵏⵏⵙ ⵙⵍⴰⵡⴰⵏ ⴰⴽⴽⵯ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵉⵇⵇⴰⵏ ⴷ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⵏⴱⴰⴹ ⵏⵏⵙ ⴷ ⵓⵏⴳⵔⴰⵡ ⵏ ⵓⵙⵡⵓⴷⴷⵓ ⴷ ⵡⴰⵙⵙⴰⵢ ⵏ ⵉⵎⵉⵣⵉⵢⵏ, ⵢⵉⵏⵉ ⵎⴰⵙ ⵔⴰⴷ ⵉⴳ ⵓⵎⵓⴽⵏ ⴰⴷ ⴰⵙⵏⵜⵉ ⵏ ⵜⴼⵔⴽⴰ ⵜⴰⵎⴰⵢⵏⵓⵜ ⵉ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵍⵍⵉ ⵔⴰⴷ ⵉⵙⵙⵔⵅⵓ ⴰⵙⵙⵥⵕⴼ. ⵔⴰⴷ ⵢⵉⵍⵉ ⵓⵙⵎⵀⵍ ⵏ ⵓⵙⵍⴳⵏ ⴰⴷ ⵜⵉⵣⵉ ⵏⵏⴰ ⵜⵎⵎⴰⵜⵜⵉ ⵜⴼⵏⵉⵇⵜ ⵜⴰⵏⴰⵎⵎⴰⵙⵜ ⵏ ⵜⵏⴼⵔⵓⵜ ⵙ ⵜⵎⵙⵙⵓⵔⵜ ⵏ ⵜⵡⵉⵙⵉ ⴷ ⵓⵙⴽⵔ ⵏ ⵉⴳⵎⴰⵎⵏ ⵏⵏⵙ ⵖ ⵜⵎⵙⵙⵓⴳⵓⵔⵜ ⴷ ⵓⵙⵡⵓⴷⴷⵓ.

ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 44.20 ⴰⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⵓⵟⵟⵓⵏ 103.12 ⵉⵣⴷⵉⵏ ⴷ ⵜⵎⵔⵙⴰⵍ ⵏ ⵓⵕⵟⵟⴰⵍ ⴷ ⵜⴳⵔⴰⵡⵉⵏ ⵜⵉⵎⵔⵡⴰⵙⵉⵏ ⵃⵎⴰ ⴰⴷ ⵢⵉⵍⵉ ⵓⵎⵛⴰⵛⴽⴰ ⵏ ⴽⵔⴰ ⵏ ⵉⴱⴹⵉⵢⵏ ⵏ ⵓⵙⵍⴳⵏ ⴰⴱⴰⵏⴽⵉ ⴷ ⵉⴱⴹⵉⵢⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵉⵣⴷⵉⵏ ⴷ ⵓⵙⵏⴼⵍ ⵏ ⵜⴼⵏⵉⵇⵜ ⵜⴰⵏⴰⵎⵎⴰⵙⵜ ⵏ ⵜⵏⴼⵔⵓⵜ ⵙ ⵜⵎⵙⵙⵓⵔⵜ ⵏ ⵜⵡⵉⵙⵉ.

ⵖ ⵓⵎⴹⴰⴽⴰⵕ ⵏ ⵙⵉⵏ ⵉⵙⵏⴼⴰⵔⵏ, ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⵏ ⵜⵓⴳⵜ ⴷ ⵜⵓⵣⵍⵜ ⵜⴰⵖⵜⴰⵙⵜ ⵏ ⵓⵙⵏⴼⵍ ⵏ ⵜⴼⵏⵉⵇⵜ ⵜⴰⵏⴰⵎⵎⴰⵙⵜ ⵏ ⵜⵏⴼⵔⵓⵜ ⵙ ⵜⵎⵙⵙⵓⵔⵜ ⵏ ⵜⵡⵉⵙⵉ, ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵓⵙⵙⵥⵕⴼ ⵏ ⵜⴷⵎⵙⴰ ⵜⴰⵏⴰⵎⵓⵔⵜ ⵙⵍⴰⵡⴰⵏ ⴰⴽⴽⵯ ⵜⵉⵎⵙⵙⵏⵜⴰⵢ ⵎⵥⵥⵉⵏⵉⵏ ⴷ ⵜⵎⵊⵀⴷⴰⵢ, ⵉⵏⵉⵏ ⵎⴰⵙ ⵍⵍⴰⵏ ⵉⵎⴰⵙⵙⵏ ⴳⴳⵓⵜⵏⵉⵏ ⵉ ⵓⵙⵙⵥⵕⴼ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⵎⴰⵛⵛ ⵉⵇⵇⴰⵏ ⴷ ⴰⴷ ⵢⵉⵍⵉ ⵖⴰⵙ ⵢⴰⵏ ⵓⵙⴽⵙⵍ ⵏ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵍⵍⵉ ⵔⴰⴷ ⵢⴰⵡⵙ ⴰⴷ ⴰⵎⵥⵏⵜ ⴰⵙⵙⵥⵕⴼ ⴷ ⵓⴹⴼⵕ ⵉⵣⵣⵉⴳⵣⵏ.

ⵖⵔⵉⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⴰ ⵉⵎⵓⵔⴰ ⵉ ⵍⴰⴱⵏⴰⴽ ⵃⵎⴰ ⴰⵏⵏ ⴳⵉⵏ ⴽⵉⴳⴰⵏ ⵏ ⵜⵓⴳⴳⴰⵙ ⵉ ⵓⵙⵙⵥⵕⴼ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⴷ ⵓⴷⵔⴰⵡ ⵏ ⵉⵎⵉⵣⵉⵢⵏ ⵣⴷⵉⵏⵉⵏ ⴷ ⵓⵙⵙⴰⵔⵓ, ⴷ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵎⵥⵥⵉⵏⵉⵏ ⴷ ⴽⵓ ⵉⵎⵙⴽⴰⵔⵏ ⵉⴷⵎⵙⴰⵏⵏ ⵙⵍⴰⵡⴰⵏ ⴰⴽⴽⵯ ⵖ ⵉⴳⵔⴰⵏ ⵍⵍⵉ ⵜⵜⵓⴹⵕⵕⴰⵏⵉⵏ ⵖ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ.

ⵙ ⵓⵣⵎⵣⵣⵓ ⵏ ⵓⵙⵎⵏⵉⴷ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵣⴷⵉⵏⵉⵏ ⴷ ⵓⵎⵣⴰⵖ ⴰⵏⴰⵎⵓⵔ, ⵉⵙⵓⵜⴳ ⵎⴰⵙⵙ ⵄⴰⴱⴷⵍⵍⴰⵟⵉⴼ ⵍⵓⴷⵉⵢⵢⵉ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵥⵍⵉⵏ ⵙ ⵜⵎⵙⵙⵓⴳⵓⵔⵜ ⵏ ⵓⵎⵣⴰⵖ ⴰⵏⴰⵎⵓⵔ, ⴰⵅⵎⵎⴻⵎ ⵏ ⵉⴳⵏⵙⴰⵙⵏ ⵏ ⵜⵎⵜⵜⵉ ⵖ ⵉⴼⵔⴷⴰⵙ ⵏ ⵢⵉⴳⵔ ⵏ ⵓⵎⵣⴰⵖ ⴰⵏⴰⵎⵓⵔ ⵍⵍⵉ ⵏⵏ ⵉⵡⴰⵍⴰⵏ ⵜⴰⵙⵎⵉⴳⵍⵜ ⵜⴰⵎⵙⴼⵓⵥⵥⵕⵜ ⵏ ⵓⵃⵟⵟⵓ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴰⵏⵙⵙⵉⵅⴼ ⵢⴰⵜⵜⵓⵢⵏ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ.

ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 05.20 ⵉⵥⵍⵉⵏ ⵙ ⵜⵏⴼⵔⵓⵜ ⵜⴰⵍⵉⴽⵟⵓⵕⵓⵏⵉⵜ ⴰⵙⴷⵓⵙ ⵏ ⵜⵥⵉⴹⴰⵕ ⵜⵉⵏⴰⵎⵓⵔⵉⵏ ⵖ ⵢⵉⴳⵔ ⵏ ⵜⵏⴼⵔⵓⵜ ⵜⴰⵍⵉⴽⵟⵓⵕⵓⵏⵉⵜ, ⴷ ⵓⵙⵎⵖⵔ ⵏ ⵢⵉⴳⵔ ⵏ ⵜⵏⴼⵔⵓⵜ ⵏ ⵉⵏⴳⵔⴰⵡⵏ ⵏ ⵓⵎⵍⴰⵏ ⵙ ⵓⵙⵉⴷⴼ ⵏ ⵉⵎⵙⴽⴰⵔⵏ ⵢⴰⴹⵏⵉⵏ ⴰⵎ ⵉⴷ ⴱⴰⴱ ⵏ ⵉⵥⵟⵡⴰⵏ ⵉⵎⴰⵜⴰⵢⵏ ⵏ ⵉⵏⵢⴰⵍⴽⴰⵎⵏ ⴷ ⵉⴷ ⴱⴰⴱ ⵏ ⵜⵏⵓⴼⴰ ⵏ ⵜⵏⴼⵔⵓⵜ ⵜⴰⵍⵉⴽⵟⵕⵓⵏⵉⵜ ⴷ ⵉⴷ ⴱⴰⴱ ⵏ ⵜⵏⵓⴼⴰ ⵜⵉⵎⵓⵟⵟⵓⵏⵉⵏ, ⴷ ⵓⵙⴼⵍⵙ ⵏ ⵜⵡⵓⵔⵉ ⵏ ⵓⵎⵎⴰⵜⵜⵉ ⴰⵎⵓⵟⵟⵓⵏ ⵖ ⵜⵎⴰⵣⵉⵔⵜ ⵏⵏⵖ ⴷ ⵓⵙⵔⵓⵙ ⵏ ⵓⵙⴰⵜⵉ ⵏ ⵓⵎⵢⴰⵡⴰⵙ ⴷ ⵓⵙⵏⴼⵍ ⵏ ⵓⵎⵍⴰⵏ ⵏⴳⵔ ⵜⴰⵏⴱⴰⴹⵜ ⵜⴰⵏⴰⵎⵓⵔⵜ ⵉ ⵜⵏⴼⵔⵓⵜ ⵜⴰⵍⵉⴽⵟⵕⵓⵏⵉⵜ ⴷ ⵜⵏⵓⴼⴰ ⵜⵉⵎⵥⵍⴰⵢ ⵉ ⵓⵙⴱⴷⴷⵉ ⵏ ⵉⴱⴽⴰⴹⵏ ⵉⵍⵉⴽⵟⵕⵓⵏⵉⵢⵏ ⴷ ⴳⴰⵔ ⴰⵙⵎⵔⵙ ⵏ ⵜⵎⵓⵛⴰ ⵥⵍⵉⵏⵉⵏ ⴷ ⵜⵉⵏⵉⵎⴰⵏⵉⵏ, ⴷ ⵓⵙⴷⵓⵙ ⵏ ⵓⵏⴱⴰⴹ ⵏ ⵜⵏⴼⵔⵓⵜ ⵜⴰⵍⵉⴽⵟⵕⵓⵏⵉⵜ, ⴷ ⵡⴰⵔⴰⵢ ⴷ ⵓⵙⴼⵔⴽ ⵙ ⵜⵏⴰⵥⴰⵕⵉⵏ ⵣⴷⵉⵏⵉⵏ ⴷ ⵜⵏⴼⵔⵓⵜ ⵜⴰⵍⵉⴽⵟⵕⵓⵏⵉⵜ, ⴷ ⵓⵏⵏⵓⵕⵥⵎ ⴼ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵖ ⵢⵉⴳⵔ ⴰⴷ, ⴷ ⵓⵙⴽⵔ ⵏ ⵜⵎⵙⵓⵜⵍⵉⵏ ⴷ ⵓⵙⴰⵏⵉⵏ ⵉ ⵜⵉⵍⵉⵜ ⵏ ⵜⵉⵍⴰⵍ ⵜⵉⵏⴰⵎⵓⵔⵉⵏ ⵖ ⵢⵉⴳⵔ ⵏ ⵓⵙⴼⵍⵙ ⵏ ⵉⵥⵟⵡⴰⵏ ⴷ ⵉⵏⴳⵔⴰⵡⵏ ⵏ ⵓⵎⵍⴰⵏ.

ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 10.20 ⵉⵣⴷⵉⵏ ⴷ ⵉⵎⴰⵙⵙⵏ ⴷ ⵓⵎⴰⵡⴰ ⵏ ⵓⵎⵣⴰⵖ ⴷ ⵜⵏⴼⵔⵓⵜ ⴷ ⵉⵔⴱⴰⴱⵏ ⴷ ⵜⵉⵏⴼⴰⵔ ⴰⵙⵎⵓⵏ ⴷ ⵓⵙⵎⴰⵢⵏⵓ ⵏ ⵉⵣⵣⵔⴰⴼⵏ ⵣⴷⵉⵏⵉⵏ ⴷ ⵜⵡⵓⵔⵉ ⵏ ⵓⵙⴽⵛⵎ ⴷ ⵓⵙⵉⴼⴹ ⴷ ⵡⴰⵙⵙⴰⵢ ⵏ ⵉⵎⴰⵙⵙⵏ ⵉⵄⵚⴽⵕⵉⵢⵏ ⴷ ⵡⵉⵏ ⵜⵏⴼⵔⵓⵜ, ⴷ ⵓⵙⵉⴷⴼ ⵏ ⵜⵓⵎⴰⵢⵉⵏ ⵜⵉⵎⴰⵢⵏⵓⵜⵉⵏ ⵥⵍⵉⵏⵉⵏ ⴷ ⵜⵎⴳⵓⵔⵉ ⵏ ⵓⵎⵣⴰⵖ ⵖ ⵓⴳⵯⵏⵙ ⵏ ⵡⴰⴽⴰⵍ ⴰⵏⴰⵎⵓⵔ.

ⵢⵉⵡⵉ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 29.20 ⵉⵙⵎⴷⵏ ⴰⵙⵍⴳⵏ ⵓⵟⵟⵓⵏ 5.99 ⵉⵥⵍⵉⵏ ⵙ ⵜⵙⵔⴷⴰⵙⵜ ⵏ ⵓⵖⴹⴰⴼ ⵖ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴰⴷ ⴳⵉⵏ ⴽⵓ ⵉⵎⵙⵡⵓⵔⵉⵢⵏ ⵏ ⵜⵎⵔⵙⴰⵍ ⴷ ⵜⵎⵎⵙⵏⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵉⵡⴷⴰⵏ ⴹⴼⵕⵏⵉⵏ ⴰⵙⵍⴳⵏ ⴰⵎⴰⵜⴰⵢ ⵏⵖ ⵓⵙⵍⵉⴳ ⵍⵍⵉ ⵎⵓ ⵉⵚⴰⵃⴰ ⵓⵙⵎⵓⵜⵜⴳ ⴰⵄⵚⴽⵕⵉ ⵖ ⴽⵔⴰ ⵏ ⵜⵎⵔⵙⵍⵜ ⵉⴹⴼⵕⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴰⵎ ⵢⴰⵏ ⵖ ⵉⴼⵔⴷⴰⵙ  ⵏ ⵓⴳⵔⴰⵡ ⵏ ⵉⴼⵙⴰⵢⵏⵏ ⵏ ⵜⵙⵔⴷⴰⵙⵜ ⵏ ⵓⵖⴹⴰⴼ.

ⵖⵎⴽ ⵍⵍⵉ ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 42.18  ⵉⵥⵍⵉⵏ ⵙ ⵜⵉⴹⴰⴼ ⵏ ⵓⵙⵉⴼⴹ ⴷ ⵓⵙⴽⵛⵎ ⵏ ⵜⴳⵓⵔⴰ ⵏ ⵓⵙⵎⵔⵙ ⵓⵖⵔⵉⵎ ⴷ ⵓⵄⵚⴽⵕⵉ ⴷ ⵜⵏⵓⴼⴰ ⵙⵔⵙⵏⵜ ⵉⵣⴷⵉⵏ, ⵍⵍⵉ ⵉⴽⵛⵎⵏ ⵖ ⵓⵣⵣⴳⵉⵔ ⵏ ⵉⵙⵖⵡⴰⵏ ⵉⴳⵔⴰⵖⵍⴰⵏⵏ ⵏ ⵍⵎⵖⵔⵉⴱ ⵖ ⵓⵎⵏⵉⴷ ⵏ ⵜⵉⴹⴰⴼ ⵏ ⵓⵙⵉⴼⴹ ⴷ ⵓⵙⴽⵛⵎ ⴷ ⵓⵎⴰⵜⵜⵉ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ ⵍⵍⵉ ⵍⵍⴰⵏⵉⵏ ⵖ ⵡⴰⵔⵔⴰⵜⵏ ⵉⴳⵔⴰⵖⵍⴰⵏⵏ ⴷⵉⵙⵙⵏ ⵣⴷⵉⵏⵉⵏ.