ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵎⵏⵉⴷ ⵜⴰⵙⵜⵔⴰⵜⵉⵊⵉⵜ ⵏ ⵜⴳⵍⴷⵉⵜ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵖ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵎⴰⵙ ⵜⴱⴷⴷ ⵜⵙⵜⵔⴰⵜⵉⵊⵉⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴼ ⵙⵉⵏ ⵉⵎⵏⴰⴷⵏ ⵉⴷⵙⵍⴰⵏⵏ, ⴰⵎⵣⵡⴰⵔⵓ ⵉⴳⴰ ⴰⵏⴰⵎⵓⵔ, ⵡⵉⵙ ⵙⵉⵏ ⵉⴳⴰ ⴰⴼⵔⵉⵇⵉ, ⵍⵍⵉⵖ ⵉⴷⵔⵓ ⵖ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ ⵉⵍⵍⴰⵏ ⴰⵙⵙ ⵏ ⵡⴰⵢⵏⴰⵙ 06 ⵢⵓⵍⵢⵓⵣ 2020 ⵙ ⵜⴻⵜⵉⵇⵏⵉⵜ ⵏ ⵓⴼⵉⵣⵢⵓⴽⵓⵏⴼⵉⵕⵓⵏⵚ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⵜⵜⵡⵉⵎⵉ ⴱⵏ ⵊⵍⵍⵓⵏ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ.
ⵉⵙⵙⵉⵙⴼⵉⵡ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵙⴽⵔ ⵍⵎⵖⵔⵉⴱ ⵜⵓⴳⵜ ⵏ ⵜⵎⵙⴽⴰⵔ ⵜⵉⵣⵔⴼⴰⵏⵉⵏ ⵙ ⵓⵡⵇⵇⵔ ⵉⵙⵎⴷⵏ ⵏ ⵉⴱⴹⵉⵢⵏ ⵏ ⵓⴷⵓⵙⵜⵓⵔ, ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ, ⴳⵉⵙⵏⵜ ⴰⵥⵍⴰⵢ ⴰⴷⵓⵙⴰⵏ ⴷ ⵓⵙⴽⵔ ⵏ ⵓⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⴷ ⵜⵓⴳⵜ ⵏ ⵜⵎⵙⴽⴰⵔ ⵏ ⵡⴰⵔⴰⵢ, ⴰⵢⵍⵍⵉ ⵢⵉⵡⵙⵏ ⵉ ⵜⴳⵍⴷⵉⵜ ⴰⴷ ⵜⵃⴽⵎ ⵖ ⵓⴱⴰⵢⵢⵓⵕ ⴰⴷ ⵜⵙⴱⴷⴷ ⴳⴰⵔ ⵉⴷⵔⵉⵣⵏ ⵏⵏⵙ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ.
ⵉⵎⵍⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⵎⵎⴰⵖ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵜⵏⴰⵔⴰ ⵏ ⵓⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴼ ⵓⵙⴷⵓⵙ ⵏ ⵡⴰⵜⵉⴳⵏ ⵏ ⵜⵡⵉⵣⵉ ⴷ ⵓⵎⵢⴰⵡⴰⵣ ⴷ ⵜⵎⵉⵣⴰⵔ ⵢⴰⴹⵏⵉⵏ ⵏ ⵓⵎⵏⵥⴰⵡ ⴰⴼⵔⵉⵇⵉ, ⵙ ⵜⵉⴽⴽⵉ ⵏ ⵜⵡⵉⵙⵉ ⴷ ⵉⵎⴰⵙⵙⵏ ⵏ ⵜⵙⵏⵉⵊⵊⵉⵜ ⵉ ⵎⴰ ⴷ ⵉⴳⴰⵏ 15 ⵏ ⵜⵎⴰⵣⵉⵔⵜ ⵖ ⴽⵓ ⵜⵙⴳⵉⵡⵉⵏ ⵏ ⵓⵎⵏⵥⴰⵡ.
ⵖ ⵓⵎⵏⴰⴹ ⴰⴷ ⵏⵉⵜ, ⵉⵣⵎⵎⵉⵎ ⵎⴰⵙ ⵉⴱⴱⵉ ⵓⴱⴰⵢⵢⵓⵕ ⴷ ⵜⴼⵔⴽⴰ ⵉⵣⵔⵉⵏ ⵍⵍⵉⵖ ⴷ ⵉⵎⵍⴰ ⵎⴰⵙ ⵜⴷⵔⵓⵙ ⵜⵡⵓⵔⵉ ⵏ ⵜⵙⵎⴰⴹⴰⵍⵜ ⵖ ⵓⵣⵎⵣ ⵖ ⵜ ⵉⵡⵉⵏ ⵉⵡⴰⵏⴽⵏ ⵖ ⵜⵎⵓⴽⵔⵉⵙⵉⵏ ⵏⵏⵙⵏ ⵜⵉⴳⵯⵏⵙⴰⵏⵉⵏ, ⴰⵢⵍⵍⵉ ⴷ ⵢⵉⵡⵉⵏ ⴰⴷ ⵉⵍⵉⵏⵜ ⴽⵉⴳⴰⵏ ⵏ ⵜⵓⵔⴷⴰⵡⵉⵏ ⴷ ⵉⵙⵇⵙⵉⵜⵏ ⴼ ⵜⵉⵕⵡⵉ ⵏ ⵡⴰⵏⴰⵡⵏ ⵉⵏⴳⵎⴰ ⵍⵍⴰⵏⵉⵏ ⴷⴼⴼⵉⵔ ⵏ ⵜⵎⴰⵖⵜ ⵜⴰⵎⴰⴹⵍⴰⵏⵜ ⵜⵉⵙ ⵏⵙⴰⵜ.
ⵉⴽⵛⵎ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵙ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ ⵖ 1979, ⵜⴳⴰ ⵜⵎⴰⴷⴷⴰⵙⵜ ⴰⴷ ⵢⴰⵏ ⵓⵏⵎⵓⵇⵇⴰⵔ ⵏ ⵓⵎⴹⴰⴽⴰⵕ ⴷ ⵜⵏⴽⴷⴰ ⵏ ⵜⵙⵓⵎⴰⵔ ⴷ ⵓⵙⵏⴼⵍ ⵏ ⵓⵎⵍⴰⵏ ⴷ ⵜⵉⵔⵎⵉⵜⵉⵏ, ⵉⵍⵉⵏⵜ ⴳⵉⵙ ⵎⴰ ⴷ ⵉⴳⴰⵏ 55 ⵏ ⵜⴰⵢⵢⴰⵡⵜ ⵜⴰⴱⵕⵍⴰⵎⴰⵏⵉⵜ ⵏ ⵉⵎⵏⵥⵡⴰⵏ ⴰⴽⴽⵯ.