ⴰⵎⵙⵇⴰⴷ ⵏ ⵜⴳⴷⵓⴷⴰⵏⵜ ⵏ ⵚⵚⵉⵏ ⵜⴰⵎⴷⵏⴰⵏⵜ ⵉⵙⵓⵜⴳ ⵜⴰⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵏⴰⵍ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵖ ⵓⵙⴱⴷⴷⵉ ⵏ ⴽⵓⵕⵓⵏⴰ

ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵙⵙ ⵏ ⵓⵙⵉⵎⵡⴰⵙ 03 ⵢⵓⵍⵢⵓⵣ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ Li Li ⴰⵎⵙⵇⴰⴷ ⵏ ⵜⴳⴷⵓⴷⴰⵏⵜ ⵏ ⵚⵚⵉⵏ ⵜⴰⵎⴷⵏⴰⵏⵜ ⵖ ⵍⵎⵖⵔⵉⴱ, ⵍⵍⵉ ⵔⴰⴷ ⵉⵎⵚⵉⴼⵉⴹ ⴷ ⵎⴰⵙⵙ ⴰⵏⵙⵙⵉⵅⴼ ⵖ ⵜⴳⵉⵔⴰ ⵏ ⵜⵙⵎⵉⴳⴰⵍ ⵏⵏⵙ ⵜⵉⴷⵉⴱⵍⵓⵎⴰⵙⵉⵢⵉⵏ ⵖ ⵜⴳⵍⴷⵉⵜ.

ⵙ ⵜⵎⵍⴷⴰ, ⵉⵙⴰⵡⵍ ⵎⴰⵙⵙ ⴰⵎⵙⵇⴰⴷ ⴼ ⵓⵙⵓⵜⴳ ⵏ ⵜⵎⴰⵣⵉⵔⵜ ⵏⵏⵙ ⵉ ⵜⵓⴳⴳⴰⵙ ⵏ ⵓⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵖ ⵓⵙⵏⴰⵍ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵢⵉⵏⵉ : "ⵉⴳⴰ ⵍⵎⵖⵔⵉⴱ ⵢⴰⵏ ⵡⴰⵏⴰⵡ ⵉ ⵉⵡⴰⵏⴽⵏ ⵢⴰⴹⵏⵉⵏ ⵖ ⵓⵙⵎⴽⵍ ⵏ ⵓⴱⴰⵢⵢⵓⵕ ⴰⴷ". ⵖⵎⴽ ⵍⵍⵉ ⵉⵙⵓⵜⴳ ⵖ ⵓⵎⵏⴰⴹ ⴰⴷ "ⴰⵙⵏⴰⵍ ⵉⵙⵜⴰⵡⵀⵎⵎⴰⵏ ⵍⵍⵉ ⵜⴼⴽⴰ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵉ ⵜⴳⴷⵓⴷⴰⵏⵜ ⵏ ⵚⵚⵉⵏ ⵜⴰⵎⴷⵏⴰⵏⵜ ⵖ ⵜⵣⵡⵉⵔⵉ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ".

ⵉⴱⴷⴷ ⵎⴰⵙⵙ Li Li ⴼ ⵜⴷⵓⵙⵉ ⵏ ⵜⵣⴷⴰⵢⵉⵏ ⵏ ⵜⵉⴷⴷⵓⴽⵍⴰ ⵍⵍⴰⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⴷ ⵓⵙⵏⴼⵍ ⵉⵙⵓⵍⵏ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⵊⴰⵔ ⵏⵏⵙⵏ ⵖ ⵓⵣⵎⵣ ⴰⴷ, ⵉⵙⵓⵜⴳ ⵜⴰⵣⵣⵉⴳⵣⵜ ⵉⴼⴰⵡⵏ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵓⵎⵛⴰⵡⴰⵕ ⵊⴰⵔ ⵏⵏⵙⵏ ⵖ ⵉⵙⴳⴳⵯⴰⵙⵏ ⴰⴷ ⴳⴳⵓⵔⴰⵏⵉⵏ, ⵢⵉⵏⵉ:"ⴰⵔ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵍⴰⵍⵜ ⵎⵇⵇⵓⵔⵏ ⵖ ⵓⵏⵜⴰⵎ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ". ⵉⵎⵍⵉ ⴷ ⵎⴰⵙ ⵍⵍⴰⵏ ⴽⵉⴳⴰⵏ ⵏ ⵉⵣⵎⴰⵣ ⴷ ⵜⵥⵉⴹⴰⵕ ⴳⴳⵓⵜⵏⵉⵏ ⵏ ⵓⵎⵢⴰⵡⴰⵙ ⵊⴰⵔ ⵍⵎⵖⵔⵉⴱ ⴷ ⵚⵚⵉⵏ ⵍⵍⵉ ⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵙⴰⵔⵡⴰ ⵏⵏⵙⵏ, ⵉⵙⵓⵜⴳ ⵜⵓⴳⴳⴰⵙ ⵏ ⵜⴳⵍⴷⵉⵜ ⵖ ⵓⵎⵏⵉⴷ ⵏ ⵓⵙⴽⵔ ⵏ ⵡⴰⵏⴰⵡ ⴰⵏⴳⵎⵓ ⵉⴳⴰⵏ ⴰⵎⴰⵢⵏⵓ ⵖ ⵍⵍⴰⵏ ⵉⴼⵙⵙⴰⵢⵏ ⵏ ⵜⵏⴰⵥⴰⵕⵉⵏ ⵏ ⵖⵉⵍⴰⴷ ⴷ ⵜⵉⵏ ⵉⵎⴰⵍ.

ⵖ ⵜⵙⴳⴰ ⵏⵏⵙ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵙⵎⵓⵏⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⴷ ⵜⵣⵣⵉⴳⵣⵜ ⵏⵏⵙⵏⵜ ⵉⴼⵓⵍⴽⵉⵏ ⵖ ⵉⵙⴳⴳⵯⴰⵙⵏ ⴰⴷ ⴳⴳⵓⵔⴰⵏⵉⵏ, ⵖ ⵏⵉⵜ ⵍⵍⴰⵏⵜ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵖ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⵓⵜⴳ ⵓⵍⴰ ⵜⴰⵡⵓⵔⵉ ⵏ ⵓⵎⵛⴰⵡⴰⵕ ⴷ ⵓⵣⴷⴷⵓⵢ ⵉⵍⵍⴰⵏ ⵊⴰⵔ ⵏⵏⵙⵏⵜ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ, ⵢⵉⵏⵉ ⵎⴰⵙ ⵜⴳⴰ ⵜⴳⴷⵓⴷⴰⵏⵜ ⵏ ⵚⵚⵉⵏ ⵜⴰⵎⴷⵏⴰⵏⵜ ⵜⴰⵎⵣⵡⴰⵔⵓⵜ ⵖ ⵓⴱⴰⵔⴰⵣ ⴰⴷ.

ⵙ ⵜⵎⵍⴷⴰ ⴰⴷ, ⵉⵙⴰⵡⵍ ⵎⴰⵙⵙ ⵍⵎⴰⵍⴽⵉ ⴼ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵉⵥⵉⵍⵏ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴷ ⵉⴷⵔⵉⵣⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⵢⵉⵏⵉ ⵎⴰⵙ ⵢⵉⵡⵙ ⵓⵙⵎⴰⵇⵇⵍ ⵉⴷⵔⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵏⵊⵎ ⵍⵎⵖⵔⵉⴱ ⵉ ⵉⵎⵉⵣⵉⵢⵏ ⵏ ⵓⴱⴰⵢⵢⵓⵕ, ⵢⵉⵏⵉ "ⵉⵣⵣⵡⴰⵔ ⴷ ⵓⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵜⵓⴷⵔⵜ ⵏ ⵓⵏⵎⵓⵔⵉ ⴰⵎⵖⵔⵉⴱⵉ ⴼ ⴽⵔⴰⵢⴳⴰⵜⵜ ⵜⴰⵖⴰⵡⵙⴰ ⵢⴰⴹⵏ".