ⵜⴰⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵜⵣⵣⵔⵉ ⵜⴰⵙⵜⵔⴰⵜⵉⵊⵉⵜ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ ⵖ ⵓⵙⴱⴷⴷⵉ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ
ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⴽⵡⴰⵙ 28 ⵎⴰⵢⵢⵓ 2020 ⵜⴰⵙⵎⵓⵏⵉ ⵍⵍⵉ ⵜⵙⵙⵉⵅⴼ ⵎⴰⵙⵙⴰ ⵙⴰⵄⵉⴷⴰ ⴰⵢⵜ ⴱⵓⵄⴰⵍⵉ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⴰⵎⴰⵡⵙⴰⵙ ⵏ ⵜⴷⵓⵙⵉ, ⵜⵥⵍⵉ ⵉ ⵜⵖⵔⵉ ⵏ ⵜⵓⵜⵔⵉⵡⵉⵏ ⵏ ⵜⵔⵓⴱⴱⴰ ⵣⴷⵉⵏⵉⵏ ⴷ ⵜⵢⴰⴼⵓⵜ ⵏ ⵜⴼⵔⴽⴰ ⵜⴰⵎⵣⵡⴰⵔⵓⵜ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵓⵣⵣⵔⴰⵢ ⵏ ⵜⵙⵜⵔⴰⵜⵉⵊⵉⵜ ⵏ ⵜⵎⴰⵡⴰⵙⵜ ⵖ ⵓⵙⴱⴷⴷⵉ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ.
ⵉⴼⴽⴰ ⵎⴰⵙⵙ ⴰⵎⴰⵡⵙⴰⵙ ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ ⴰⴷ ⵢⴰⵏ ⵓⵙⵎⵏⵉⴷ ⴼ ⵡⴰⴷⴷⴰⴷ ⵏ ⵓⴱⴰⵢⵢⵓⵕ ⵖ ⵜⴳⵍⴷⵉⵜ, ⴷ ⵉⵙⵡⵓⴷⴷⵓⵜⵏ ⵉⵎⵣⵡⵓⵔⴰ ⵏ ⵡⴰⵔⴰⵢ , ⴷ ⵜⴼⵔⴽⴰ ⵏ ⵓⵙⴰⵍⵉ ⴰⵎⵜⴼⵓⵔⴰⵢ ⵖ ⵜⵍⵍⴰ ⵜⵏⴼⵔⵓⵜ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ.
ⵖ ⵜⵙⵎⵓⵏⵉ ⴰⴷ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ " ⴰⵎⵓⵏ ⴰⵎⴰⵙⵙⴰⵏ ⴰⵔ ⵓⴽⴰⵏ ⵙⵓⵍ ⵉⵙⵉⴳⴳⵉⵍ ⵙ ⵜⵎⵥⵍⴰⵢ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ", ⵖⵎⴽ ⵍⵍⵉ ⵉⵏⵏⴰ ⵎⴰⵙ ⴷ " ⴰⴼⵉⵔⵓⵙ ⴰⵔ ⵉⵜⵜⵎⴰⵜⵜⴰⵢ ⵖ ⵓⵎⴰⴹⴰⵍ ⵙⴳ ⴰⴷⵖⴰⵔ ⴰⵊⵓⵖⵔⴰⴼⵉ ⵙ ⵡⴰⵢⵢⴰⴹ, ⵉⵙⵙⵏⵜⵉ ⵖ ⵛⵛⵉⵏⵡⴰ ⴰⵢⵍⵍⵉⵖ ⵉⵍⴽⵎ ⵍⴱⵕⴰⵥⵉⵍ", ⵉⴱⴷⴷ ⵎⴰⵙⵙ ⴰⵎⴰⵡⵙⴰⵙ ⵓⵍⴰ ⴼ ⵡⴰⴷⴷⴰⴷ ⵏ ⵓⴱⴰⵢⵢⵓⵕ ⵖ ⵜⴳⵍⴷⵉⵜ, ⵢⵉⵏⵉ ⵎⴰⵙ ⵍⵍⴰⵏⵜ ⴽⵉⴳⴰⵏ ⵏ ⵜⵎⵉⵜⴰⵔ ⴼⵓⵍⴽⵉⵏⵉⵏ ⵣⵓⵏ ⴷ ⵍⵍⵉⵖ ⵢⵓⴽⵯⵉ ⵓⵟⵟⵓⵏ ⵏ ⵡⵉⴷ ⵓⵙⵉⵏⵉⵏ ⴰⴼⵉⵔⵓⵙ ⵙⴳ 15 % ⴰⵔ 4 %, ⵢⴰⴽⵯⵉ ⵓⵙⵖⵍ ⵏ ⵜⵎⵜⵜⴰⵏⵜ ⵙⴳ 7% ⴰⵔ 6;42%, ⵎⴰⵢⴰ ⴷ ⵉⴳⴰ ⵜⴰⵢⵢⴰⴼⵓⵜ ⵏ ⵜⵙⵔⵜⵉⵜ ⵜⴰⵎⵙⵉⵣⵡⴰⵔⵜ ⵏ ⵓⵙⵔⵓⵙ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵓⴱⵕⵓⵟⵓⴽⵓⵍ ⵏ ⵓⵙⵉⵊⵊⵉ ⴷ ⵓⵙⴰⵍⵉ ⵏ ⵓⵙⵖⵍ ⵏ ⵉⵔⵉⵎⵏ ⵓⵙⴼⵙⵉ ⵍⵍⵉ ⴽⵓⵍⵍⵓ ⵢⵉⵡⵙⵏ ⵖ ⵓⵙⴱⴷⴷⵉ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ.
ⵉⵍⴽⵎ ⵓⵏⵛⴽ ⵏ ⵡⵉⴷ ⵖ ⵉⵍⵍⴰ ⵓⴼⵉⵔⵓⵙ 7601, ⵎⵎⵜⵏ 202, ⵊⵊⵉⵏ 4978 ⵏ ⵓⴼⴳⴰⵏ, ⵉⵍⴽⵎ ⵓⵏⵛⴽ ⵏ ⵡⵉⵍⵍⵉ ⵍⵍⴰⵏⵉⵏ ⵖ ⵓⵙⵉⵊⵊⵉ2531 ⵏ ⵓⴼⴳⴰⵏ ⵢⵉⵍⵉ ⵓⵙⴰⵜⵜⵉ ⵏ 163000 ⵏ ⵓⴼⴳⴰⵏ, ⵓⵟⵟⵓⵏⵏ ⴰⴷ ⴰⵔ ⵎⵎⴰⵍⵏ ⵎⴰⵙ ⵉⵣⵔⵉ ⵍⵎⵖⵔⵉⴱ ⵜⴰⴼⵔⴽⴰ ⵏ ⵡⴰⴼⴰ, ⵖⵎⴽ ⵍⵍⵉ ⵉⵏⵏⴰ ⵓⵎⴰⵡⵙⴰⵙ.
ⵉⵎⵍⵉ ⴷ ⵎⴰⵙⵙ ⴰⵢⵜ ⵟⵟⴰⵍⴱ ⵎⴰⵙ ⴰⴽⴽⴰⵏⵜ ⵜⵎⵉⵜⴰⵔ ⴰⴷ ⵜⵓⵎⵏⵉⴳⵉⵏ ⵢⴰⵏ ⵓⵙⵓⵔⵙ ⵉⵜⵜⴰⵊⵊⴰⵏ ⴰⴷ ⵜⵉⵍⵉ ⵜⴼⴼⵔⴰⵡⵜ ⵡⴰⵅⵅⴰ ⵍⵍⴰⵏⵜ ⴽⵔⴰ ⵏ ⵜⵏⵥⴰⵕ, ⵢⵉⵏⵉ:"ⵓⵔ ⴼⵍⵍⴰⵖ ⵉⴽⴽⵉ ⵓⵙⵓⵔⵙ ⵏ ⵓⴱⴰⵢⵢⵓⵕ ⴰⵛⴽⵓ 85 % ⵏ ⵉⵎⵓⴹⴰⵏ ⵉⵎⴰⵢⵏⵓⵜⵏ ⴳⴰⵏ ⵖ ⵉⵏⴰⵎⴰⵍⵏ, ⵖⵎⴽ ⵍⵍⵉ ⵏⵣⵔⵉ 10 ⵉⴼⴹⵏ ⵏ ⵓⵙⴼⵙⵉ ⵏ ⵓⵙⴰⵔⵎ ⴽⵔⵢⴰⴳⴰⵜⵜ ⴰⵙⵙ".
ⵉⵎⵍⵉ ⴷ ⵓⵎⴰⵡⵙⴰⵙ ⵎⴰⵙ ⴳⴰⵏ ⵡⵉⴷ ⵍⵍⴰⵏⵉⵏ ⵖ ⵓⴹⴼⵓⵕ ⴰⴷⵓⵙⴰⵏ 2531, ⴰⵢⵍⵍⵉ ⵉⴳⴰⴷⴷⴰⵏ ⴷ 8 ⵉ ⴽⵓ ⵜⵉⵎⵉⴹⵉ ⵏ ⵉⴼⴹ ⵏ ⵓⵎⵣⴷⴰⵖ, ⵉⴳⴰ ⵢⴰⵏ ⵓⵟⵟⵓⵏ ⵖ ⵜⵍⵍⴰ ⵜⴼⴼⵔⴰⵡⵜ ⵉⵖ ⵏⵥⵕⴰ ⴰⵏⵎⵎⴰⵍ ⴰⴳⵔⴰⵖⵍⴰⵏ ⵉⴱⴷⴷⵏ ⴼ 10 ⵉⴼⴳⴰⵏⵏ ⵉ ⵜⵎⵉⴹⵉ ⵏ ⵉⴼⴹ ⵏ ⵓⵎⵣⴷⴰⵖ, ⵖⵎⴽ ⵍⵍⵉ ⵉⵍⴽⵎ ⵓⵙⵖⵍ ⵏ ⵡⵉⵍⵍⵉ ⵊⵊⵉⵏⵉⵏ 64%. ⵢⵓⵔⵔⵉ ⵓⵍⴰ ⵓⵟⵟⵓⵏ ⵏ ⵡⵉⵍⵍⵉ ⵎⵎⵓⵜⵏⵉⵏ ⵉⵍⵍⴰⵏ ⵏⴳⵔ ⴰⵎⵢⴰ ⴷ ⵙⵉⵏ ⵖ ⵡⴰⵙⵙ, ⵎⴰⵢⴰ ⴷ ⵢⵉⵡⵉ ⵜⵉ ⴷ ⵓⵙⵎⵔⵙ ⵏ ⵜⵙⵙⵎⵉ ⵏ “ⵉⵏⴽⵙⴱⴰⵔⵉⵏ” ⵉⵖ ⴷ ⴱⵃⵃⵕⴰ ⵉⴽⵛⵉⵎ ⵓⵎⴰⴹⵓⵏ ⵙ ⵓⵙⴳⵏⴰⴼ. ⵖⵎⴽ ⵍⵍⵉ ⵢⵓⵔⵔⵉ ⵓⵙⵖⵍ ⵏ ⵜⵎⵜⵜⴰⵏⵜ, ⴷ ⵓⵙⵖⵍ ⵏ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ (R0) ⵍⵍⵉ ⵉⵍⴽⵎⵏ 0.76 ⵖ ⵓⵙⵡⵉⵔ ⴰⵏⴰⵎⵓⵔ.
ⵉⵏⵏⴰ ⵓⵎⴰⵡⵙⴰⵙ ⵏ ⵜⴷⵓⵙⵉ ⵎⴰⵙ "ⵕⵡⴰⵏ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵍⵍⵉ ⵉⵙⴽⵔ ⵍⵎⵖⵔⵉⴱ, ⵉⵎⵍⵉ ⴷ ⵎⴰⵙ ⴷ ⴰⴷⴷⴰⴷ ⵏ ⵓⵖⵔⵔⴷ ⵉⵡⵉⵏⵜ ⵜ ⴷ ⵜⵎⵓⴽⵔⵉⵙⵉⵏ ⵏ ⵓⵙⴰⵍⵉ ⴷ ⵓⵍⴳⴳⵓⴷ ⴷ ⵜⵢⴰⴼⵓⵜⵉⵏ ⵏⵏⵙ ⵀⵔⵛⵏⵉⵏ, ⵢⵉⵏⵉ ⵎⴰⵙ ⴳⴰⵏ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵡⵉⵏ ⵜⴰⵣⵓⵍⵜ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵉⴳ ⵓⵃⵟⵟⵓ ⵏ ⵓⵏⵎⴰⵔⵉ ⵜⴰⵏⵥⵕⵜ ⵙⴳ ⵓⵙⵏⵜⵉ ⵏ ⵓⴱⴰⵢⵢⵓⵕ".
ⵢⵉⵏⵉ ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ ⵎⴰⵙ "ⵓⵔ ⵜⵏⵏⵉ ⵜⵎⴰⴷⴷⴰⵙⵜ ⵜⴰⵎⴰⴹⵍⴰⵏⵜ ⵏ ⵜⴷⵓⵙⵉ ⴰⵣⵓⵛⵛⵍ ⵏ ⵓⵙⴱⴷⴷⵉ ⵏ ⵓⵙⵉⵊⵊⵉ ⵙ ⵍⴽⵍⵓⵕⵓⴽⵉⵏ, ⵎⴰⵛ ⴰⵙⴱⴷⴷⵉ ⵏ ⵓⵙⵎⵔⵙ ⵏⵏⵙ ⵏ ⵓⵙⵙⵓ, ⴰⵛⴽⵓ ⴰⵎⵏⵉⴷ ⴰⵎⴰⵙⵙⴰⵏ ⵉⴳⴰ ⵡⵉⵏ ⵓⴹⴱⵉⴱ ⵍⵍⵉ ⵉⵥⴹⴰⵕⵏ ⴰⴷ ⵉⵏⵏⴰ ⵜⴰⵖⵜⴰⵙⵜ ⵎⴰⵙ ⵉⵕⵡⴰ ⵍⴽⵍⵓⵕⵓⴽⵉⵏ ⵉ ⵓⵎⴰⴹⵓⵏ ⵏⵖ ⵓⵀⵓ", ⵉⵙⵉⵙⴼⵉⵡ ⵖ ⵓⴱⴰⵔⴰⵣ ⴰⴷ:”ⵜⵉⵕⵡⵉ ⵏ ⵍⴽⵍⵓⵕⵓⴽⵉⵏ ⴰⵔ ⵜⵜⵉⵍⵉ ⵖ ⵜⴼⵔⴽⴰ ⵜⴰⵎⵣⵡⴰⵔⵓⵜ ⵖ ⵉⴽⵛⵎ ⵓⴼⵉⵔⵓⵙ ⵙ ⵜⵖⵔⵜ". ⵢⵉⵏⵉ ⵎⴰⵙ "ⵜⴻⵟⵟⴰⴼ ⵜⵙⵇⵇⵉⵎⵜ ⵜⴰⵎⴰⵙⵙⴰⵏⵜ ⵜⴰⵏⴰⴹⵉⵏ ⴼ ⵜⵉⵕⵡⵉ ⵏ ⵓⵙⴰⴼⴰⵔ ⴰⴷ. ⵖⵎⴽ ⵍⵍⵉ ⵍⵍⴰⵏⵜ ⵜⵎⵙⴽⴰⵔ ⵏ ⵓⵙⴽⵛⵎ ⵏ ⵜⵎⵜⵜⴰ ⵜⴰⵎⵙⴰⵔⵉⵜ ⵏ ⵙⴰⵍⴼⴰⵜ ⵀⵉⴷⵔⵓⴽⵙⵉ ⴽⵍⵓⵕⵓⴽⵉⵏ ⴷ ⵀⵉⴷⵔⵓⴽⵙⵉ ⴽⵍⵓⵕⵓⴽⵉⵏ, ⵃⵎⴰ ⴰⴷ ⵓⵔ ⵉⵙⵎⴷ ⵓⴱⴰⵢⵏⵓ ⵏ ⵓⵙⴰⴼⴰⵔ, ⵢⵉⵍⵉ ⵓⵍⴰ ⵓⵙⵙⵍⵖⵜ ⴷ ⵓⵙⴼⵍⵙ ⵏ ⵜⵣⵣⵉⴳⵣⵜ ⵏ ⵓⵙⵉⵊⵊⵉ”.
ⵉⵙⴷⴷⵉⴷ ⵓⵎⴰⵡⵙⴰⵙ ⵎⴰⵙ ⵉⴳⴰ ⵓⵛⵛⵉⵍ ⴰⴷ ⵖⴰⵎⴰⵏⵜ ⵜⵎⵙⴽⴰⵔ ⵏ ⵡⴰⵔⴰⵢ, ⵢⵉⵏⵉ ⵎⴰⵙ ⵔⴰⴷ ⵢⵉⵍⵉ ⵓⴹⴼⵓⵕ ⵏ ⵡⴰⴷⴷⴰⴷ ⵏ ⵓⴱⴰⵢⵢⵓⵕ ⴰⵔ ⵜⵉⴳⵉⵔⴰ ⵏ ⵓⵙⴳⴳⵯⴰⵙ.
ⵖ ⵎⴰ ⴷ ⵉⵥⵍⵉⵏ ⵙ ⵜⴼⴰⴷⵉⵡⵉⵏ ⵏ ⵓⵙⵉⴱⵙⵓⵙ ⵏⵖ ⴰⵙⴰⵍⵉ ⵏ ⵓⵥⵍⴰⵢ ⴰⴷⵓⵙⴰⵏ, ⵍⵍⴰⵏⵜ, ⵖⵎⴽ ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ, ⵉⵖ ⵢⵓⴽⵯⵉ ⵓⵏⵎⵎⴰⵍ ⵏ ⵓⵎⴰⵜⵜⵉ ⵏ ⵜⵎⴰⴹⵓⵏⵜ ⵙ ⴷⴷⵓ ⵏ 1 %, ⵢⴰⴽⵯⵉ ⵓⵟⵟⴰⵏ ⵏ ⵉⵎⵓⴹⴰⵏ ⵉⵎⴰⵢⵏⵓⵜⵏ, ⴷ ⵓⵙⵖⵍ ⵏ ⵜⵎⵜⵜⴰⵏⵜ ⴰⵔ 3 % ⵏⵖ ⴰⴽⴽⵯ ⵉⴷⵔⵓⵙ.
ⵢⵉⵏⵉ ⵎⴰⵙⵙ ⴰⵢⵜ ⵟⵟⴰⵍⴱ ⵎⴰⵙ ⵉⵣⴷⵉ ⵓⵎⵓⵔⵙ ⵏ ⵓⵙⴰⵍⵉ ⴰⵎⵜⴼⵓⵕⴰⵢ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵓⵖⵓⵍ ⵏ ⵜⵉⵍⴰⵍ ⴱⵍⴰ ⵜⵍⵍⴰ ⵜⴹⵓⵕⵉ ⵜⴰⵅⴰⵜⴰⵔⵜ, ⵙ ⵜⵡⵉⵣⵉ ⵏ ⴽⵓ ⵢⴰⵏ".
ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵜⵓⴳⴳⴰⵙ ⵏ ⵓⵡⴰⵏⴽ ⵉ ⵓⵙⴱⴷⴷⵉ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ, ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⵢⵍⵍⵉ ⵉⵙⴽⵔⵏ ⵖ ⵍⵎⵖⵔⵉⴱ ⵢⴰⵏ ⵡⴰⵏⴰⵡ ⵉⴼⵓⵍⴽⵉⵏ, ⵖⵎⴽ ⵍⵍⵉ ⵉⵜⵜⵓⴼⴽⴰ ⵡⴰⵣⵓⵍ ⵏ ⵓⵙⵉⵙⵙⵏ ⴷ ⵓⵙⵏⵉⵎⵎⵔ ⵉ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⴰⴷⵓⵙⴰⵏ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⵉⵙⴽⵔⵏ ⵜⵓⴳⴳⴰⵙ ⵎⵇⵇⵓⵔⵏⵉⵏ ⵖ ⵓⵙⵎⵀⵍ ⵏ ⵉⵙⵡⵓⴷⴷⵓⵜⵏ ⵉ ⵓⵃⵟⵟⴰ ⵏ ⵜⴷⵓⵙⵉ ⵏ ⵉⵏⵎⵓⵔⴰ, ⴳⴰⵏⵜ ⵜⵎⵉⵜⴰⵔ ⵏ ⵎⴰⵢⴰ ⴷ ⵍⵍⵉⵖ ⴳⴳⵓⵜⵏ ⵡⵉⵍⵍⵉ ⵊⵊⵉⵏⵉⵏ, ⵢⴰⴽⵯⵉ ⵓⵙⵖⵍ ⵏ ⵓⴱⴰⵢⵢⵓⵕ, ⵙⴷⴷⵉⴷⵏ ⵎⴰⵙ ⵉⵡⵙⵏⵜ ⵜⵎⵙⴽⴰⵔ ⵜⵉⵎⵙⵉⵣⵡⴰⵔ ⵉ ⵍⵎⵖⵔⵉⴱ ⴰⴷ ⵢⴰⵏⴼ ⵉ ⵡⴰⴽⴽⴰⵍⵏ ⴳⴳⵓⵜⵏⵉⵏ ⵖ ⵓⴼⴳⴰⵏ.
ⵙⴰⵡⵍⵏ ⵉⴷ ⵎⴰⵙⵙ ⵉⴳⵎⴰⵎⵏ ⴼ ⵜⵎⵏⵜⴰⵍ ⵏ ⵜⵡⵓⵔⵉⵡⵉⵏ ⵏ ⵓⴹⴼⵓⵕ ⵏ ⵉⵏⴰⵎⴰⵍⵏ , ⵖⵔⵉⵏ ⵉ ⵓⵙⵉⴷⵔⵓⵙ ⵏ ⵜⵉⵣⵉ ⵏ ⵓⵙⵓⴼⵖ ⵏ ⵜⵢⴰⴼⵓⵜⵉⵏ ⵏ ⵉⵙⴼⵙⵉⵜⵏ ⵏ ⵓⵙⴰⵔⵎ, ⵖⵎⴽ ⵍⵍⵉ ⵖⵔⴰⵏ ⵉ ⵓⵙⵖⵔⵜ ⵏ ⵓⵏⴳⵔⴰⵡ ⴰⴷⵓⵙⴰⵏ ⴰⴷ ⵉⴹⴼⵕ ⵉⵙⵖⴰⵡⵙⴰⵜⵏ ⴷ ⵓⵅⵎⵎⴻⵎ ⵖ ⵉⴹⴱⵉⴱⵏ ⴷ ⵉⴼⵔⵎⵍⵉⵢⵏ ⴷ ⵓⵙⵖⵓⴷⵓ ⵏ ⵜⵎⵙⵓⵜⵍⵉⵏ ⵏⵜⵡⵓⵔⵉ ⴷ ⵓⵙⵎⵓⵜⵜⴳ, ⵖⵎⴽ ⵍⵍⵉ ⴼⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⴷ ⵉⵎⵓⵔⴰ ⵉⵙⵇⵙⵉⵜⵏ ⴼ ⵓⵙⵎⵓⵙⵙⵓ ⵏ ⵢⵉⴳⵔ ⴰⴷⵓⵙⴰⵏ ⵓⵙⵍⵉⴳ ⵖ ⵓⵙⴰⵜⵉ ⵏ ⵜⵎⵢⴰⴷⴰⵙⵜ ⵏ ⵓⵎⵢⴰⵡⴰⵣ ⵉ ⵓⵙⴱⴷⴷⵉ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⴱⴷⵔⵏ ⵉⴷ ⵎⴰⵙⵙ ⵉⴳⵎⴰⵎⵏ ⴰⵣⴷⴷⵓⵢ ⵏⴳⵔ ⴽⵓ ⵉⴳⵔⴰⵏ ⵓⵏⴱⵉⴹⵏ ⵉ ⵓⵙⵡⵓⴷⴷⵓ ⵉⵛⵏⴰⵏ ⵏ ⵜⴼⵔⴽⴰ ⴷ ⵢⵓⵛⴽⴰⵏ.
ⵖⵎⴽ ⵍⵍⵉ ⴼⴽⴰⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉⵙⵇⵙⵉⵜⵏ ⴼ ⵉⵎⵖⵔⴰⴱⵉⵢⵏ ⵍⵍⵉ ⵏⵏ ⵖⴰⵎⴰⵏⵉⵏ ⵖ ⵜⵎⵉⵣⴰⵔ ⵏ ⴱⵕⵕⴰ, ⵢⵉⵏⵉ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵉⵣⴷⵉ ⵓⵖⵓⵍ ⵏⵏⵙⵏ ⴷ ⵓⵙⵓⵔⵙ ⵏ ⵓⴱⴰⵢⵢⵓⵕ ⵖ ⵜⴳⵍⴷⵉⵜ, ⵜⵉⵣⵉ ⵏⵏⴰ ⵉⵔⴳⴳⵉⴳ ⵓⵙⵓⵔⵙ ⴰⴷ, ⵔⴰⴷ ⴷ ⵓⵔⵔⵉⵏ ⵙ ⵜⵎⵓⵔⵜ, ⵖⵎⴽ ⵍⵍⵉ ⵜⵙⵖⴰⵡⵙⴰ ⵜⵎⴰⵡⴰⵙⵜ ⴰⴷ ⵉⵍⵉⵏⵜ ⵜⴼⴰⴷⵉⵡⵉⵏ ⵏ ⵜⴷⵓⵙⵉ ⴷ ⵜⴼⴰⵜⵉⵜ ⵍⵍⵉ ⵔⴰⴷ ⵉⵙⵙⵣⵔⴱ ⵉⵙⵡⵓⴷⵓⵜⵏ ⵏ ⵓⵖⵓⵍ ⵏ ⵉⵏⵎⵓⵔⴰ ⵍⵍⵉ ⵏⵏ ⵖⴰⵎⴰⵏⵉⵏ ⵖ ⴱⵕⵕⴰ.