ⴰⴼⵓⵕⵓⵎ ⵏ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵉⴱⵕⵍⴰⵎⴰⵏⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⵉⵙⵓⵜⴳ ⵉⵙⵡⵓⴷⴷⵓⵜⵏ ⵏ ⵓⴱⵓⵔⵣ ⵉⵙⵉⴽⵔⴰⵏⵏ ⴷ ⵓⵏⵊⵊⵉⵎⵏ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ

ⵉⵙⵓⵜⴳ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⴼⵓⵕⵓⵎ  ⵏ ⵉⵏⵙⵙⵉⵅⴼⵏ ⴷ  ⵜⵏⵙⵙⵉⵅⴼⵉⵏ  ⵏ ⵉⴱⵕⵍⴰⵎⴰⵏⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵍⴽⴰⵕⴰⵢⵉⴱ ( ⴼⵓⴱⵔⵉⵍ) " ⵉⵙⵡⵓⴷⴷⵓⵜⵏ ⵏ ⵓⴱⵓⵔⵣ ⵉⵙⵉⴽⵔⴰⵏⵏ ⴷ ⵓⵏⵊⵊⵉⵎⵏ ⵍⵍⵉ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ  ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴽⵓⴼⵉⴷ 19".

ⵉⵙⴷⴷⵉⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⴼⵓⵕⵓⵎ ⵏ « ⴼⵓⴱⵔⵉⵍ » ⵙ ⵉⵙⵎ ⵏⵏⵙ ⴷ ⵉⵙⵎ ⵏ ⵓⴼⵓⵕⵓⵎ ⵏ ⴼⵓⴱⵔⵉⵍ " ⵎⴰⵙ ⵜⴳⴰ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵏ ⵓⵙⴽⵔ ⵏ ⵓⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵢⴰⵜ ⵜⵉⵔⵎⵉⵜ ⵜⴰⵙⴰⵖⵓⵍⵜ ⵖ ⵓⵙⵡⵉⵔ ⴰⴳⵔⴰⵖⵍⴰⵏ, ⵔⴰⴷ ⵜⴰⵡⵙ ⵙ ⴽⵉⴳⴰⵏ ⵃⵎⴰ ⴰⴷ ⵉⵍⵉⵏ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⴷ ⵓⵙⴱⴷⴷⵉ ⵏ ⵓⴱⴰⵢⵢⵓⵕ, ⵖⵎⴽ ⴰⵏⵏ ⴰⵍⴰ ⴷ ⵉⴷⵔⵉⵣⵏ ⵏⵏⵙ ⵀⵔⵛⵏⵉⵏ ⵖ ⵉⵙⵡⵉⵔⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ".

ⵉⵙⵓⵜⴳ ⵎⴰⵙⵙ " Santiago U. Rivas Leclair" ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⴼⵓⵕⵓⵎ ⵏ "ⴼⵓⴱⵔⵉⵍ" ⴰⵜⵉⴳⵏ ⵏ ⵜⵡⵉⵣⵉ ⵍⵍⵉ ⴷ ⵜⵎⵍⴰ ⵜⴳⵍⴷⵉⵜ ⵏ ⵍⵎⴰⵖⵔⵉⴱ, ⵉⵙⵓⵜⴳ ⵓⵍⴰ ⵜⴰⵡⵓⵔⵉ ⵏ ⵓⴹⴼⵕ ⵍⵍⵉ ⵉⵙⴽⵔ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵉ ⵜⵓⴳⴳⴰⵙ ⵏ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴰⴷ.

ⵉⵜⵜⵓⵙⴽⴰⵔ ⵓⴼⵓⵕⵓⵎ ⵏ "ⴼⵓⴱⵔⵉⵍ" ⵖ ⵓⵙⴳⴳⵯⴰⵙ ⵏ 1994 ⵉ ⵓⵙⵏⴰⵍ ⵏ ⵉⵎⵉⴽⴰⵏⵉⵣⵎⵏ ⵏ ⵜⵙⵏⵙⵉ ⴷ ⵓⵣⴷⴷⵓⵢ ⵏ ⵉⵣⵣⵔⴰⴼⵏ ⵏⴳⵔ ⵉⵡⴰⵏⴽⵏ ⵍⵍⵉ ⴳⵉⵙ ⵉⵍⵍⴰⵏ, ⵖⵎⴽ ⴰⵏⵏ ⴷ ⵓⵙⴽⵔ ⵏ ⵉⵎⵉⴽⴰⵏⵉⵣⵎⵏ ⵏ ⵓⵎⵛⴰⵡⴰⵕ ⵏⴳⵔ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵉ ⵓⵙⵎⴽⵍ ⵏ ⴽⵓ ⵜⵉⵎⵓⴽⵔⵉⵙⵉⵏ ⵉⵜⵜⵉⵍⵉⵏ ⵖ ⵜⵙⴳⴰ, ⴷ ⵓⵙⵏⴰⵍ ⵏ ⵜⵖⵓⵔⵉⵡⵉⵏ ⵖ ⵓⵙⵡⵉⵔ ⴰⵏⵎⵏⴰⴹ.

ⵉⴽⵛⵎ ⵍⵎⴰⵖⵔⵉⴱ ⵙ ⵓⴼⵓⵕⵓⵎ ⴰⴷ ⵖ ⵓⵙⴳⴳⵯⴰⵙ ⵏ 2014 ⵉⴳ ⴳⵉⵙ ⴰⴳⵎⴰⵎ ⴰⵎⵥⵕⴰⵢ, ⵉⵍⵉⵏ ⴳⵉⵙ ⵉⵏⵙⵙⵉⵅⴼⵏ ⵏ ⵉⵙⵇⵇⵉⵎⵏ ⵉⵣⵣⵔⴰⴼⵏ ⵏ ⵎⵔⴰⵡ ⵉⵡⴰⵏⴽⵏ ⵍⵍⵉ ⴳⵉⵙ ⵉⴳⴰⵏ ⵉⴳⵎⴰⵎⵏ : ⴳⵡⴰⵟⵉⵎⴰⵍⴰ, ⴱⵉⵍⵉⵣ, ⵙⵙⴰⵍⴼⴰⴹⵓⵕ, ⵍⵀⵉⵏⴹⵓⵕⴰⵚ, ⵏⵉⴽⴰⵕⴰⴳⵡⴰ, ⴽⵓⵙⵜⴰⵔⵉⴽⴰ, ⴱⴰⵏⴰⵎⴰ, ⵜⴰⴳⴷⵓⴷⴰⵏⵜ ⵏ ⴷⴷⵓⵎⵉⵏⵉⴽⴰⵏ, ⵍⵎⵉⴽⵙⵉⴽ, ⴱⵓⵔⵜⵓⵔⵉⴽⵓ. ⵉⵍⵍⴰ ⵓⵙⵖⵉⵎ ⵏⵏⵙ ⵖ ⵎⴰⵏⴰⴳⵡⴰ ⵉⴳⴰⵏ ⵜⴰⴳⴷⵓⴷⴰⵏⵜ ⵏ ⵏⵉⴽⴰⵕⴰⴳⵡⴰ.