ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⴷⴷⵉⴷ ⴼ ⵜⴷⵔⴰⵡⵜ ⵏ ⵡⴰⵎⵓⵏ ⵓⵖⵔⵉⵎ ⵖ ⵜⵓⵚⴽⴰ ⵏ ⵉⵎⴰⵍ ⵏ ⵍⵎⵖⵔⵉⴱ

ⵉⵙⴷⴷⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⵉⵎⵡⴰⵙ 13 ⵎⴰⵕⵚ 2020 ⵎⴰⵙ ⵉⴳⴰ ⵡⴰⵎⵓⵏ ⵓⵖⵔⵉⵎ ⴰⵎⴷⵔⴰⵡ ⵖ ⵜⵓⵚⴽⴰ ⵏ ⵉⵎⴰⵍ, ⵉⵎⵍⵉ ⴷ ⵎⴰⵙ ⵉⵎⵎⴰⵖ ⵓⵙⵇⵇⵉⵎ ⴼ ⵓⵏⵏⵓⵕⵥⵎ ⴼ ⵉⴼⵔⴷⴰⵙ ⵏ ⵡⴰⵎⵓⵏ ⵓⵖⵔⵉⵎ ⴽⵓⵍⵍⵓⵜⵏ, ⵎⴽ ⵍⵍⵉ  ⴷ ⵢⵓⵛⴽⴰⵏ ⵖ ⵜⴳⵓⵔⵉ ⵏⵏⵙ ⵖ ⵜⴼⵓⴳⵍⴰ ⵉⵥⵍⵉⵏ ⵙ ⵡⴰⵙⵙ ⴰⵏⴰⵎⵓⵔ ⵏ ⵡⴰⵎⵓⵏ ⵓⵖⵔⵉⵎ ⵍⵍⵉ ⵜⵙⵏⵎⴰⵍⴰ ⵜⵎⴰⵡⴰⵙⵜ ⵏ ⵓⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴰⴽⴷ ⵓⴱⵕⵍⴰⵎⴰⵏ, ⵉⵙⵙⴽⵜⵉ ⴷ ⴳⵉⵙ ⵓⵍⴰ ⴰⵙⵏⵎⴰⵍⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵓⵏⵎⵓⵇⵇⴰⵔ ⴰⵎⵣⵡⴰⵔⵓ ⴷ ⵡⴰⵎⵓⵏ ⵓⵖⵔⵉⵎ ⵖ ⵎⴰⵢⵢⵓ 2019, ⴷ ⵜⵉⵏⴰⵡⵜ ⵅⴼ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⴰⵙⵙ ⵏ 25 ⴱⵕⴰⵢⵕ 2020, ⵉⵙⴷⴷⵉⴷ ⵓⵍⴰ ⴼ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵓⵙⵀⵡⵏ ⵏ ⵜⴱⵔⵉⴷⵉⵏ ⵣⴷⵉⵏⵉⵏ ⴷ ⵜⴷⵉⵎⵓⵇⵔⴰⵟⵉⵜ ⵜⴰⵎⴷⵔⴰⵡⵜ ⵃⵎⴰ ⴰⴷ ⵜⵜⵓⵙⴽⵉⵔⵏⵜ ⵜⵣⵔⴰⵢⵉⵏ ⵥⵉⵍⵏⵉⵏ ⵏ ⵓⴷⵓⵙⵜⵓⵔ.

ⵢⵉⵏⵉ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵕⵥⵎ ⵓⴷⵓⵙⵜⵓⵔ ⴷ ⵜⵣⵣⵔⴰⴼⵉⵏ ⵜⵉⵏⴰⵎⵓⵔⵉⵏ ⵜⵉⵥⵉⴹⴰⵕ ⴳⴳⵓⵜⵏⵉⵏ ⴷ ⵉⵎⵏⴰⴷⵏ ⵓⵙⵄⴰⵏⵉⵏ ⴷⴰⵜ ⵏ ⵡⴰⵎⵓⵏ ⵓⵖⵔⵉⵎ ⵃⵎⴰ ⴰⴷ ⵉⴷⵔⵓ ⵖ ⵜⵓⴷⵔⵜ ⵜⴰⵎⴰⵜⴰⵢⵜ, ⵉⴼⴽ ⴽⵉⴳⴰⵏ ⵏ ⵜⵏⵏⵓⴱⴹⴰ ⵉ ⵓⵙⵡⵓⴷⴷⵓ ⵏⵏⵙ, ⵃⵎⴰ ⴰⴷ ⴳⵉⵏⵜ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ ⴷ ⵉⵣⵣⵔⴰⴼⵏ ⵖ ⵚⴰⵃⴰ ⵏ ⵡⴰⵎⵓⵏ. ⵢⵉⵏⵉ:”ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵉⴳⴰ ⵡⴰⴷⴰⵙ ⵏ ⵜⵡⵓⵔⵉ ⵏ ⵜⵎⵙⵎⵓⵏⵉⵏ ⴷ ⵓⵖⵔⵔⴷ ⵏⵏⵙⵏⵜ ⴷ ⵓⵎⵢⴰⵏⴰⵡ ⵏ ⵉⴳⵔⴰⵏ ⵏ ⵓⵙⵡⵓⵔⵉ ⵏⵏⵙⵏⵜ, ⵉⴼⵔⴷⴰⵙ ⵍⵍⵉ ⵔⴰⴷ ⵢⴰⵡⵙ ⵖ ⵓⵙⵙⵓⵜⵉ ⵏ ⵜⵙⵏⵜⴰⵢⵉⵏ ⵏ ⵉⵏⵎⵓⵔⴰ ⵖ ⵉⴳⵔⴰⵏ ⵏ ⵜⵓⵍⴽⵉⵎⵏ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵉⴳⵎⴰⵎⵏ ⵉⵜⵜⵓⵙⵜⴰⵢⵏ ⵖ ⵉⵙⵡⵉⵔⵏ ⴰⴷⵖⴰⵔⴰⵏ ⴷ ⵓⵏⴰⵎⵓⵔ,  ⴷ ⵜⵓⵜⵔⵉⵡⵉⵏ ⵉ ⵓⵣⵣⵔⴰⴼ ⵉ ⵙⵉⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ.

ⵖ ⵓⵎⵏⵉⴷ ⴰⴷ, ⵉⵙⵙⵉⵙⴼⵉⵡ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵙⴽⵔ ⵓⵙⵇⵇⵉⵎ ⴰⴷ ⵢⴰⵜ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ, ⵍⵍⵉ ⵔⴰⴷ ⵉⵜⵜⴰⵎⵥ ⵜⵓⵍⴽⵉⵎⵉⵏ ⵏ ⵉⵏⵎⵓⵔⴰ ⵙ ⴰⵢⵍⵍⵉ ⴷ ⵢⵉⵡⵉ ⵓⴷⵓⵙⵜⵓⵔ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⴷ ⵓⵙⵍⴳⵏ ⴰⵎⴰⴷⴷⴰⵙ ⵉⵥⵍⵉⵏ ⵙ ⵎⴰ ⴰⴷ, ⵢⵉⵏⵉ ⵎⴰⵙ ⵔⴰⴷ ⵣⵣⵉⵢⴷⵏⵜ ⵜⵥⵍⴰⵢⵉⵏ ⵏⵏⵙ ⵃⵎⴰ ⴰⴷ ⵜⵣⵣⵔⴰⵢ ⵓⵍⴰ ⵜⵓⵜⵔⵉⵡⵉⵏ ⵉ ⵓⵣⵣⵔⴰⴼ, ⵖⵎⴽ ⵍⵍⵉ ⵍⵍⴰⵏⵜ ⵙⵏⴰⵜ ⵜⵏⵓⴼⴰ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⵉⵡⵉⵏ ⵉ ⵓⵣⵣⵔⴰⴼ ⵖ ⵓⵥⵟⵟⴰ ⴰⵎⵙⵙⵓⴳⵓⵔ ⴰⵎⴰⵢⵏⵓ ⵏ ⵓⵙⵇⵇⵉⵎ, ⵜⵜⵓⵙⴽⵉⵔ ⵓⵍⴰ ⵜⴷⴰⴱⵓⵜ ⵜⴰⵍⵉⴽⵟⵕⵓⵏⵉⵜ ⵏ ⵓⵙⵡⵓⴷⴷⵓ ⵏ ⵜⵓⵍⴽⵉⵎⵉⵏ ⵏ ⵉⵏⵎⵓⵔⴰ ⴷ ⵓⴹⴼⵓⵕ ⵏⵏⵙⵏⵜ ⴷ ⵓⵏⵢⴰⵍⴽⴰⵎ ⴷⵉⴷⵙⵏ.

ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⴳⴰ ⵡⴰⵎⵓⵏ ⵓⵖⵔⵉⵎ ⵢⴰⵏ ⵓⵎⴷⵔⴰⵡ ⴰⴷⵙⵍⴰⵏ ⵏ ⵓⵡⴰⵏⴽ ⴷ ⵜⵎⵔⵙⴰⵍ ⵉⵜⵜⵓⵙⵜⴰⵢⵏ ⵖ ⵜⵓⵚⴽⴰ ⵏ ⵜⵙⵜⵔⴰⵜⵉⵊⵉⵢⵏ ⵉⵥⴹⴰⵕⵏ ⴰⴷ ⵎⵎⴰⵖⵏⵜ ⴷ ⵜⵏⵥⴰⵕ ⵉⵍⵍⴰⵏ ⴷⴰⵜ ⵏ ⵡⴰⵎⵓⵏ ⴷ ⵓⵙⵉⵜⵜⵉ ⵏ ⵉⵎⵉⵣⵉⵢⵏ ⵏⵏⵙⵏⵜ, ⵉⵙⵙⵓⵜⴳ ⵜⴰⴷⵉⵏⴰⵎⵉⵜ ⵏ ⵜⵎⵙⵎⵓⵏⵉⵏ ⵖ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⵙⵡⵓⵔⵉ ⵏⵏⵙⵏⵜ ⵖ ⵉⴳⵔⴰⵏ ⵉⵎⵏⵏⴰⵡⵏ ⵖ ⵉⵍⵍⴰ ⵓⵙⴳⵎⵉ ⴷ ⵓⵙⵙⴰⵜⵉ ⴷ ⵓⵣⵓⵣⵣⵔ ⵏ ⵜⴷⵍⵙⴰ ⴷ ⵜⴳⵎⵉ ⵜⴰⴷⵖⵔⴰⵏⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏⵏⵙⵏ ⵙ ⵉⵎⵏⴰⴷⵏ ⵏⵏⵙⵏ ⵉⵎⵏⵏⴰⵡⵏ ⴷⴰⵔ ⵜⴰⵙⵓⵜⵉⵏ ⴰⴽⴽⵯ.

ⵢⵉⵏⵉ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⴳⴰ ⵡⴰⵎⵓⵏ ⵓⵖⵔⵉⵎ ⵖ ⵜⴳⵍⴷⵉⵜ ⵏ ⵍⵎⵖⵔⵉⴱ ⵢⴰⵏ ⵓⵎⴷⵔⴰⵡ ⵖ ⵜⴳⵎⵉ ⵙ ⵜⴷⵉⵏⴰⵎⵉⵜ ⵏⵏⵙ ⵖ ⵜⵍⵍⴰ ⵜⵢⴰⴼⵓⵜ ⵉⵍⴰⵏ ⴰⵜⵉⴳ ⵖ ⵜⵣⵣⵉⴳⵣⵜ ⵏ ⵜⴷⴰⵎⵙⴰ ⵜⴰⵏⴰⵎⵓⵏⵜ ⴷ ⵜⵉⵏ ⵓⵎⵢⴰⵡⴰⵙ ⴷ ⵜⵡⵉⵣⵉ ⵃⵎⴰ ⴰⴷ ⵍⴽⵎⵏⵜ ⵜⵏⵓⴼⴰ ⵜⵉⵏⴰⵎⵓⵏⵉⵏ ⴽⵉⴳⴰⵏ ⵏ ⵉⵡⴷⴰⵏ ⵖ ⵡⴰⵎⵓⵏ, ⵜⴳⴰ ⵜⴰⴷⵉⵏⴰⵎⵉⵜ ⵍⵍⵉ ⴳⵉⵙ ⵉⵙⴽⵔⵏ ⴰⵎⴷⵔⴰⵡ ⵏ ⵓⵡⴰⵏⴽ ⴷ ⵉⴳⵔ ⴰⵎⴰⵜⴰⵢ ⵖ ⵓⵙⴽⴰⵔ ⵏ ⵜⴳⵎⵉ ⴷ ⵓⵏⵄⴰⵕ ⵃⵎⴰ ⴰⴷ ⵜⵉⵍⵉ ⵖ ⵚⴰⵃⴰ ⵏ ⵎⴰ ⴰⴷ ⵉⵔⴰ ⵡⴰⵎⵓⵏ ⴰⴷⵖⵔⴰⵏ.

ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵉⵍⵉⵜ ⵉⴼⴰⵡⵏ ⵏ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ ⵉⵍⵍⴰⵏ ⵖ ⴱⵕⵕⴰ ⵏ ⵜⵎⴰⵣⵉⵔⵜ, ⴷ ⵜⵖⵍⴰⵖⴰⵍⵜ ⵜⵓⵎⵏⵉⴳⵜ ⵍⵍⵉ ⴷ ⴼⴼⴰⵍⵏⵜ ⵜⵡⵓⵔⵉⵉⵡⵏ ⵏⵏⵙ ⴷ ⵜⵙⵏⵜⴰⵢⵉⵏ ⵏⵏⵙ ⵖ ⴱⵕⵕⴰ  ⵏ ⵜⵎⴰⵣⵉⵔⵜ, ⴰⵢⵍⵍⵉ ⵉⵙⵙⴷⵓⵙⵏ ⵜⵉⵡⵉⵙⵉ ⵜⵓⵎⵏⵉⴳⵜ ⵉⵍⴰⵏ ⴰⵜⵉⴳ ⵏ ⵉⵎⵖⵔⵉⴱⵉⵢⵏ ⵏ ⴱⵕⵕⴰ ⵙ ⵜⵎⵙⵎⵓⵏⵉⵏ ⵏⵏⵙⵏ ⵜⵓⴷⴷⵉⵔⵉⵏ.

ⵉⵖⵔ ⵎⴰⵙⵙ ⵍⵎⴰⵍⴽⵉ ⵉ ⵜⵙⴰⵔⵡⴰ ⵏ ⵡⴰⵢⴷⴰ ⵏ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ ⵖ ⵜⵣⴷⴰⵢⵉⵏ ⵏⵏⵙ ⴷ ⵜⵎⵙⵎⵓⵏⵉⵏ ⵜⵉⵏⴳⴳⵯⴰ ⵏⵏⵙ ⵖ ⵜⵎⵉⵣⴰⵔ ⵏ ⵉⵥⵥⵍⵎⴹ ⵖⵎⴽ ⴰⵏⵏ ⵓⵍⴰ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ, ⵉⵎⵍⵉ ⴷ ⵎⴰⵙ ⵜⴱⴷⴷ ⵜⵙⵔⵜⵉⵜ ⵜⴰⴼⵔⵉⵇⵉⵜ ⵏ ⵜⴳⵍⴷⵉⵜ ⵍⵍⵉ ⴼ ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ, ⴼ ⵜⵎⴰⴷⵔⴰⵡⵜ ⵏ ⵓⵎⵢⴰⵙ ⴷ ⵚⴰⵃⴰ ⵉⵛⵛⴰⵔⵏ ⴷ ⵡⴰⵎⵎⴰⵥ ⵏ ⵉⴼⵔⵉⵇⵢⴰ ⵖ ⵜⵥⵉⴹⴰⵕ ⵏⵏⵙ ⴷ ⵜⵖⵜⴰⵙⵉⵏ ⵏⵏⵙ.