ⵜⴰⴳⵓⵔⵉ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⴼⵓⴳⵍⴰ ⵉⵥⵍⵉⵏ ⵙ ⵡⴰⵙⵙ ⴰⵏⴰⵎⵓⵔ ⵏ ⵡⴰⵎⵓⵏ ⵓⵖⵔⵉⵎ

ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ,

ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ,

ⵎⴰⵙⵙ ⴰⵎⴰⵡⵙⴰⵙ ⵏ ⵓⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴰⴽⴷ ⵓⴱⵕⵍⴰⵎⴰⵏ,

ⵎⴰⵙⵙ ⴰⵎⵣⴷⴰⵢ ⵏ ⵓⵏⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⵖ ⵍⵎⵖⵔⵉⴱ,

ⵉⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵙⵜⴳⴳⴰⵔⵏ ⵏ ⵉⵏⴳⵎⴰⵎⵏ ⵏ ⵡⴰⵎⵓⵏ ⵓⵖⵔⵉⵎ,

ⴰⴳⴷⵓⴷ ⵉⵍⴰⵏ ⴰⴷⴷⵓⵔ,

ⵉⴳⴰ ⵉⵢⵉ ⴰⴷⴷⵓⵔ ⴰⴷ ⴷⵔⵓⵖ ⵖ ⵓⵏⵎⵓⵇⵇⴰⵔ ⴰⴷ ⵉⵙⴼⵓⴳⵍⴰⵏ ⵙ ⵉⵏⴳⵎⴰⵎⵏ ⵏ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ, ⵍⵍⵉⵖ ⴰⴽⴽⵯ ⵉⵙⵙⵎⵖⵔ ⵙ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⵢⵓⵙⵉⵏ ⵜⴰⵎⴰⵙⴰⵢⵜ ⵏ ⵜⵡⵓⵔⵉ ⵜⴰⵎⵙⵎⵓⵏⴰⵏⵜ ⴷ ⵜⵖⵍⵉⴼⵜ ⵏ ⵓⵙⵙⵓⵜⵉ ⴰⵏⴰⵎⵓⵏ ⴷ ⵓⴷⵍⵙⴰⵏ, ⴷ ⵓⵥⴰⵥⵓ ⵏ ⵓⵙⴽⵔ ⵏ ⵉⵙⴼⵏⴰⵔⵏ ⵖ ⵎⵏⵏⴰⵡⵜ ⵜⵙⴳⴳⵉⵡⵉⵏ.

ⵔⵉⵖ ⵙ ⵓⵣⵎⵣⵣⵓ ⴰⴷ, ⴰⴷ ⵙⵙⵓⵜⴳⵖ ⵜⴰⴷⵉⵏⴰⵎⵉⵜ ⵏ ⵉⵏⴳⵎⴰⵎⵏ ⵓⵖⵔⵉⵎⵏ ⴷ ⵜⵎⵙⵎⵓⵏⵉⵏ ⴷ ⵓⵙⵡⵓⵔⵉ ⵏⵏⵙⵏ ⵖ ⵉⴳⵔⴰⵏ ⴳⴰⵏⵉⵏ ⵉⵎⵏⵏⴰⵡⵏ ⵖ ⵉⵍⵍⴰ ⵓⵙⴳⵎⵉ ⴷ ⵓⵙⵙⵓⵜⵉ ⴷ ⵓⵣⵓⵣⵣⵔ ⵏ ⵜⴷⵍⵙⴰ, ⴷ ⵜⴳⵎⵉ ⵜⴰⴷⵖⴰⵔⴰⵏⵜ, ⵖⵎⴽ ⴰⵏⵏ ⵓⵍⴰ, ⵙ ⵢⴰⵜ ⵜⵖⴰⵔⴰⵙⵜ ⵜⴰⴷⵙⵍⴰⵏⵜ, ⴰⵎⵣⴰⵖ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏⵏⵙⵏ ⵙ ⵉⵎⵏⴰⴷⵏ ⵏⵏⵙⵏ ⵥⵍⵉⵏⵉⵏ ⴷⴰⵔ ⵜⴰⵙⵓⵜⵉⵏ ⴰⴽⴽⵯ.

ⵙⵙⵓⵔⴼⴰⵜ ⵉⵢⵉ, ⵖ ⵓⵣⵎⵣⵣⵓ ⴰⴷ, ⴰⴷ ⴷⴰⵖ ⵙⵙⴽⵜⵉⵖ ⵜⵉⵍⴰⵍ ⵜⵉⵎⵖⵜⴰⵙⵉⵏ ⵍⵍⵉ ⵉⵙⴽⵔ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ ⵖ ⵓⵎⵣⵔⵓⵢ ⵏ ⵍⵎⵖⵔⵉⴱ ⴰⵜⵔⴰⵔ. ⵉⴽⴽⴰ ⵜⵜ ⵉⵏⵏ ⵉⴳⴰ ⵖ ⵜⴼⵔⴽⴰ ⵏ ⵓⵙⴷⵓⵔⵔⵉ ⵜⵉⵏⵎⵍ ⵏ ⵓⴼⵓⵖ ⴷ ⵓⵙⵎⵓⵜⵜⴳ ⵏ ⵉⵎⵖⵏⴰⵙⵏ ⵉⵏⴰⵎⵓⵔⵏ ⵏ ⵜⵎⴰⵣⵉⵔⵜ, ⵉⴳ ⴰⵙⵏⴰⵍ ⵉ ⵓⵎⵓⵙⵙⵓ ⴰⵏⴰⵎⵓⵔ ⴰⵎⵖⵔⵉⴱⵉ, ⵢⴰⵙⵉ ⴰⵙⵡⵉⵏⴳⵎ ⴰⵏⴰⵎⵓⵔ ⵏ ⵜⵍⴻⵍⵍⵉ ⵍⵍⵉⵖ ⵉⵍⵍⴰ ⵓⵎⵏⵖⵉ ⵉ ⵓⵙⴷⵔⴼⵉ ⴰⵏⴰⵎⵓⵔ.

ⵙⴳ ⵜⵣⵡⵉⵔⵉ ⵏ ⵜⵙⵉⵎⴰⵏⵜ, ⵉⵙⴽⵔ ⵢⴰⵜ ⵜⵉⵍⴰⵍⵜ ⵜⴰⵅⴰⵜⴰⵔⵜ ⵖ ⵓⵙⴷⵓⵙ ⵏ ⵓⵙⵡⵉⵏⴳⵎ ⴰⵏⴰⵎⵓⵔ ⴷ ⵜⵓⵚⴽⴰ ⵏ ⵓⵡⵔⵉⴽ ⴰⵎⵖⵔⵉⴱⵉ, ⴷ ⵓⵙⴼⵙⵉ ⵏ ⵓⵣⴷⴰⵢ ⴷ ⵓⵙⵎⴰⴷ ⵏ ⵓⵎⵙⵙⴹⴼⵕ ⵉ ⵡⴰⴳⴳⴰⴹⵏ ⵏ ⵓⵙⴷⵓⵔⵔⵉ. ⵖⵎⴽ ⵍⵍⵉ ⵢⵉⵡⵙ ⵖ ⵓⵙⴷⵓⵙ ⵏ ⵜⵡⵉⵏⴳⵎⵜ ⵏ ⵜⵙⵉⵎⴰⵏⵜ ⵙ ⵉⵎⵏⴰⴷⵏ ⵏⵏⵙ ⵏ ⵜⴷⵍⵙⴰ ⴷ ⵜⴷⵎⵙⴰ ⴷ ⵡⴰⵜⵉⴳⵏ, ⴷ ⵜⵏⴽⴷⴰ ⵉ ⵓⵏⵏⵓⵕⵥⵎ ⴼ ⵢⵉⴷⵉⵔ ⵏ ⵜⴷⵍⵙⴰ ⴷ ⵡⴰⵜⵉⴳⵏ ⵉⵏⴼⴳⴰⵏⵏ ⴷ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴹⴰⵍⵜ, ⵉⵙⵙⴷⵓⵙ ⵙ ⵖⵎⴽ ⴰⵏⵏ ⵜⴰⵎⵙⴽⵔⵜ ⵏ ⵜⵎⵢⵓⵔⵉⵏ ⵏ ⵜⵍⴻⵍⵍⵉ ⵏ ⵉⵏⵎⵓⵇⵇⴰⵔⵏ, ⴷ ⵜⵎⵙⵎⵓⵏⵉⵏ, ⴷ ⵜⴷⵔⴼⵉⵏ  ⵜⵉⵎⴰⵜⴰⵢⵉⵏ ⵍⵍⵉ ⵉⵙⴳⴰⴷⴷⴰ ⵓⴹⴰⵀⵉⵕ ⵏ 1958 ⵍⵍⵉ ⵉⵣⵎⵎⴻⵎ ⴱⴰⴱ ⵏ ⵡⴰⴷⴷⵓⵔ ⵉⴳⵍⵍⵉⵏ ⵏ ⵎⵓⵃⴰⵎⵎⴰⴷ ⵡⵉⵙ ⵙⵎⵎⵓⵙ, ⵜⴰⵎⵍⵍⴰ ⵏ ⵕⴱⴱⵉ ⴼ ⵉⵎⴰⵏ ⵏⵏⵙ, ⵉⵙⴽⵔ ⵙⵔⵙ ⵢⴰⵏ ⵓⵙⴷⵓⵙ ⵓⵏⵚⵉⴱ ⵓⵙⵎⵉⴷ ⵏ ⵜⵎⵏⵏⴰⵡⵜ ⵙ ⴽⵓ ⵉⵎⵏⴰⴷⵏ ⵏⵏⵙ ⴷ ⵡⴰⵎⵎⴰⴽⵏ ⵏⵏⵙ ⵖ ⵎⴰ ⴰⴷ ⵉⵥⵍⵉⵏ ⵙ ⵓⵙⵡⵉⵏⴳⵎ ⴷ ⵜⵙⵔⵜⵉⵜ ⴷ ⵜⴷⵍⵙⴰ ⴷ ⵡⴰⵎⵓⵏ.

ⵖ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ, ⵢⵉⵡⵙ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ ⵖ ⵓⵙⵖⵏⵓ ⵏ ⵢⵉⴳⵔ ⴰⴷⵍⵙⴰⵏ, ⵉⵎⵎⴰⵖ ⴼ ⵜⵎⵏⵏⴰⵡⵜ ⴷ ⵓⵎⵢⴰⵏⴰⵡ, ⴷ ⵓⵙⵔⵓⵙ ⵏ ⵓⵙⴽⵔ ⴷ ⵓⴼⴰⵔⵙ ⴰⴷⵍⵙⴰⵏ ⴷ ⵓⵙⵙⵓⵜⵉ ⵏⵏⵙ ⴷ ⵓⵣⵓⵣⵣⵔ ⵏⵏⵙ, ⵖⵎⴽ ⴰⵏⵏ ⴷ ⵓⵙⵔⵓⵙ ⵏ ⵓⵙⴽⵔ ⵉⵎⵓⵏⵏ ⴷ ⵓⵎⵏⴰⴷ ⴰⵙⴳⴰⵡⴰⵏ, ⵎⴽ ⵏⵉⵜ ⵢⵉⵡⵙ ⵖ ⵓⵎⵣⴰⵖ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵢⵉⵏ, ⵙ ⵖⵉⴽ ⴰⵏⵏ ⴰⵙ ⵢⵉⵡⵙ ⵖ ⵓⴷⵖⴰⵔ ⵏⵏⵙ ⴷ ⴰⵢⵍⵍⵉ ⴰⵙ ⴼⴽⴰⵏⵜ ⵜⵎⵙⴽⴰⵔ ⵏⵏⵙ, ⵖ ⵓⵙⴷⵓⵙ ⵏ ⵜⵓⵚⴽⴰ ⵏ ⵜⴷⵉⵎⵓⵇⵔⴰⵟⵉⵜ ⴷ ⵜⵎⵔⵙⴰⵍ. 

ⵜⵉⵡⵉ ⴷ ⵜⵖⵏⵙⴰ ⵜⴰⵎⵣⵔⴰⵢⵜ ⴷ ⵜⵉⵏ ⵓⴱⴰⵔⴰⵣ ⵍⵍⵉ ⵉⵙⴽⵔ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ, ⴰⴷ ⴷⴰⵔⵙ ⵢⵉⵍⵉ ⵓⴷⵖⴰⵔ ⵍⵍⵉ ⵉⴼⴽⴰ ⵓⴷⵓⵙⵜⵓⵔ ⵏ 2011 ⵉ ⵉⵏⴳⵎⴰⵎⵏ ⵏ ⵡⴰⵎⵓⵏ ⵓⵖⵔⵉⵎ, ⵍⵍⵉⵖ ⴷ ⵢⵉⵡⵉ ⴼ ⵉⵣⵔⴼⴰⵏ ⵏⵏⵙ, ⵜⵓⵖⵓⵏⵉⵏ ⵏⵏⵙ, ⴷ ⵜⵉⵍⴰⵍ ⵏⵏⵙ, ⵉⵙⴽⵔ ⴳⵉⵙ ⵢⴰⵜ ⵜⵙⴳⴰ ⵉⵜⵜⴰⵡⵙⵏ ⵖ ⵜⵙⵉⵍⴰⵡⵜ ⵏ ⵜⵖⵜⴰⵙⵉⵏ ⴷ ⵉⵙⵏⴼⴰⵔⵏ ⴷⴰⵔ ⵜⵎⵔⵙⴰⵍ ⵉⵜⵜⵓⵙⵜⴰⵢⵏ ⴷ ⵜⵏⴱⴰⴹⵉⵏ, ⵖⵎⴽ ⴰⵏⵏ ⵓⵍⴰ ⴷ ⵓⵙⵎⵀⵍ ⵏⵏⵙⵏ ⴷ ⵓⵣⵣⵔⴰⵢ ⵏⵏⵙⵏ ⵖⵎⴽ ⵍⵍⵉ ⵉⵍⵍⴰⵏ ⵖ ⵓⵎⴰⴳⵔⴰⴷ 12 ⵏ ⵓⴷⵓⵙⵜⵓⵔ ⵍⵍⵉ ⴷ ⵢⵉⵡⵉⵏ ⴰⴷ ⵙⴽⵔⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵉ ⵉⵏⴳⵎⴰⵎⵏ ⵏ ⵓⵎⵛⴰⵡⴰⵕ ⵃⵎⴰ ⴰⴷ ⴷⵔⵓⵏ ⴽⵓ ⵉⵎⵙⴽⴰⵔⵏ ⵉⵏⴰⵎⵓⵏⵏ ⵖ ⵓⵙⵔⵓⵙ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵎⵀⵍ ⵏⵏⵙⵏⵜ ⴷ  ⵓⵣⵣⴳⵉⵔ ⵏⵏⵙⵏⵜ.

ⵏⵍⵍⴰ ⴷⴰⵜ ⵏ ⵜⵥⵉⴹⴰⵕ ⴳⴳⵓⵜⵏⵉⵏ ⴷ ⵉⵎⵏⴰⴷⵏ ⵓⵙⵄⴰⵏⵉⵏ ⵍⵍⵉ ⵉⵕⵥⵎ ⵓⴷⵓⵙⵜⵓⵔ ⴷ ⵉⵣⵣⵔⴰⴼⵏ ⵉⵏⴰⵎⵓⵔⵏ ⴷⴰⵜ ⵏ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ ⴰⴷ ⵢⴰⵡⵙ ⵖ ⵜⵓⴷⵔⵜ ⵜⴰⵎⴰⵜⴰⵢⵜ, ⵜⵉⵍⵉ ⵜⵓⴳⵜ ⵏ ⵜⵏⵏⵓⴱⴹⴰ ⵖ ⵓⵙⵡⵓⴷⴷⵓ ⵏⵏⵙ, ⴳⵉⵏⵜ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ ⵖ ⵚⴰⵃⴰ ⵏ ⵡⴰⵎⵓⵏ. ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵉⴳⴰ ⵡⴰⴷⴰⵙ ⵏ ⵜⵡⵓⵔⵉ ⵏ ⵉⵏⴳⵎⴰⵎⵏ ⵓⵖⵔⵉⵎⵏ ⴷ ⵓⵖⵔⵔⴷ ⵏⵏⵙⵏ ⴷ ⵓⵎⵢⴰⵏⴰⵡ ⵏ ⵉⴳⵔⴰⵏ ⵏ ⵓⵙⵡⵓⵔⵉ ⵏⵏⵙⵏ ⵉⴼⵔⴷⴰⵙ ⵍⵍⵉ ⵔⴰⴷ ⴰⵙⵏ ⵢⴰⵡⵙ ⴰⴷ ⵙⴳⴰⴷⴷⴰⵏ ⵜⵉⵙⵏⵜⴰⵢⵉⵏ ⵏ ⵉⵏⵎⵓⵔⴰ ⵖ ⵉⴳⵔⴰⵏ ⵏ ⵜⵓⵍⴽⵉⵎⵉⵏ ⵉⵜⵜⵓⴼⴽⴰⵏ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵉⵏⴳⵎⴰⵎⵏ ⵉⵜⵜⵓⵙⵜⴰⵢⵏ ⵖ ⵓⵙⵡⵉⵔ ⴰⴷⵖⴰⵔⴰⵏ ⴷ ⵓⵏⴰⵎⵓⵔ ⴷ ⵜⵓⵜⵔⴰⵡⵉⵏ ⵉ ⵓⵣⵣⵔⴰⵖ ⵖ ⵙⵉⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ.

ⵖⵎⴽ ⵍⵍⵉ ⵔⴰⴷ ⵢⴰⵡⵙ ⵓⵙⵙⵓⵜⵉ ⴰⴷ ⵖ ⵜⵣⵣⵉⴳⵣⵜ ⵏ ⵜⵙⴼⵍⵙⵉⵢⵜ ⴷ ⵜⵎⴰⴷⴰⵏⵜ ⵏ ⵉⵏⴳⵎⴰⵎⵏ ⵓⵖⵔⵉⵎⵏ, ⵔⴰⴷ ⵉⴳ ⵢⴰⵏ ⵓⵎⴳⴳⵉ ⵏ ⵓⵙⵙⵎⵖⵔ ⵏ ⵜⵡⵉⵙⵉ ⵏ ⵉⵏⵎⵓⵔⴰ ⴷ ⵓⵙⴷⵓⵙ ⵏ ⵜⵎⵔⵙⴰⵍ ⴷ ⵓⵙⵕⵚⵓ ⵏ ⵜⵎⵢⵉⵎⴰⵏⵜ.

ⵖ ⵜⵙⴳⴰ ⵢⴰⴹⵏⵉⵏ, ⵉⵇⵇⴰⵏ ⴷ ⴰⴷ ⴱⴷⴷⴰ ⵢⵉⵍⵉ ⵖ ⵓⵙⵡⵉⵏⴳⵎ ⵏⵏⵖ ⴷ ⵜⵎⵙⴽⴰⵔ ⵏⵏⵖ, ⵎⴰⵙ ⵓⵔ ⵜⵍⵍⵉ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ, ⵉⴳⴰⵏ ⵖ ⵜⵓⵎⴰⵢⵜ ⵏ ⵓⴷⵓⵙⵜⵓⵔ, ⵖ ⵓⴷⵖⴰⵔ ⵏ ⵜⴷⵉⵎⵓⵇⵔⴰⵟⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵜⵎⵔⵙⴰⵍ ⵉⵜⵜⵓⵙⵜⴰⵢⵏ, ⵖⵎⴽ ⵍⵍⵉ ⴷ ⵉⵇⵇⴰⵏ ⴰⴷ ⵏⵓⵇⵇⵔ ⵉⵡⵜⵜⴰ ⵉⵍⵍⴰⵏ ⵏⴳⵔ ⴰⵢⵍⵍⵉ ⵉⴳⴰⵏ ⴰⵙⵔⵜⴰⵏ ⴷ ⴰⵢⵍⵍⵉ ⵉⴳⴰⵏ ⵓⵖⵔⵉⵎ, ⵓⵔ ⵓⴼⵉⵏⵜ ⵜⵎⵙⵎⵓⵏⵉⵏ, ⴷ ⵓⵔ ⴰⴽⴽⵯ ⵔⵉⵏⵜ ⵖⵉⴽ ⴰⵏⵏ, ⴰⴷ ⵉⵍⵉⵏⵜ ⵖ ⵓⴷⵖⴰⵔ ⵏ ⵉⴽⴰⴱⴰⵕⵏ ⵉⵙⵔⵜⴰⵏⵏ. ⴰⵔ ⵥⵕⵕⴰⵖ ⵎⴰⵙ ⵜⵍⵍⴰ ⵜⴷⵓⵙⵉ ⵏ ⵡⴰⵎⵓⵏ ⵓⵖⵔⵉⵎ ⵖ ⵜⵙⵉⵎⴰⵏⵜ ⵏⵏⵙ ⵜⴰⵏⵉⵎⴰⵏⵜ ⴼ ⵉⴳⵔⴰⵏ ⴷ ⵜⵎⴰⴷⴷⴰⵙⵉⵏ, ⴰⵢⵍⵍⵉ ⴳⵉⵙ ⵉⵙⴽⴰⵔⵏ ⵢⴰⵏ ⵓⵙⴰⵔⵓ ⵏ ⵜⴷⵉⵎⵓⵇⵔⴰⵟⵉⵜ ⴷ ⵢⴰⵏ ⵉⵎⵉⵙⵙ ⵏ ⵓⵙⵙⵎⵖⵔ ⵏ ⵜⵡⵓⵔⵉ ⵜⴰⴷⵉⵎⵓⵇⵔⴰⵟⵉⵜ.

 ⵉⵙⵜ  ⵎⴰⵙⵙⴰ, ⵉⴷ ⵎⴰⵙⵙ,

ⵃⵎⴰ ⴰⴷ ⵏⵍⴽⵎ ⴰⵡⵜⵜⴰⵙ ⴰⴷ, ⵏⵙⴽⵔ ⵜⴰⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ (ⵔⴰⴷ ⵏⵙⵙⵉⵎⵖⵓⵔ ⵜⵉⵥⵍⴰⵢⵉⵏ ⵏⵏⵙ ⴰⴷ ⴳⵉⵙⵏⵜ ⵉⵍⵉⵏⵜ ⵜⵓⵜⵔⵉⵡⵉⵏ ⵉ ⵓⵣⵣⵔⴰⴼ), ⵔⴰⴷ ⵜⵜⴰⵎⵥ ⵜⵓⵍⴽⵉⵎⵉⵏ ⵏ ⵉⵏⵎⵓⵔⴰ ⵎⴽ ⵉⵍⵍⴰⵏ ⵖ ⵓⴷⵓⵙⵜⵓⵔ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⴷ ⵓⵙⵍⴳⵏ ⴰⵎⴰⴷⴷⴰⵙ ⵍⵍⵉ ⴷⴰⵔ ⵜⴰⵣⴷⴰⵢⵜ, ⵏⴳ ⵖ ⵓⵥⵟⵟⴰ ⴰⵎⵙⵙⵓⴳⵓⵔ ⴰⵎⴰⵢⵏⵓ ⵏ ⵓⵙⵇⵇⵉⵎ ⵙⵏⴰⵜ ⵜⵏⵓⴼⴰ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⵉⵡⵉⵏ ⵉ ⵓⵣⵣⵔⴰⴼ.

ⵖ ⵜⵙⴳⴰ ⵢⴰⴹⵏⵉⵏ, ⵏⵙⵔⵙ ⴷ ⵜⵏⴱⴰⴹⵜ, ⵢⴰⵏ ⵓⵏⴳⵔⴰⵡ ⴰⵏⵖⵎⵙⴰⵏ ⵏ ⵓⵙⵡⵓⴷⴷⵓ ⵏ ⵜⵓⵍⴽⵉⵎⵉⵏ ⵏ ⵉⵏⵎⵓⵔⴰ ⴷ ⵓⵏⵢⴰⵍⴽⴰⵎ ⴷⵉⴷⵙⵏⵜ ⴷ ⵖⵉⵍⵍⵉ ⵔⴰⴷ ⵡⴰⵍⴰⵏⵜ.

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵏⴻⵏⵏⵓⵔⵣ ⴰⴷ ⵉⵙⴽⵔ ⵡⴰⵎⵓⵏ ⵓⵖⵔⵉⵎ ⵜⵉⵍⴰⵍⵜ ⵏⵏⵙ ⵉⴳⴰⵏ ⵜⴰⵎⵢⵓⵔⵜ, ⵖ ⵓⵙⵙⵓⵜⵉ ⵏ ⵜⵙⵏⵜⴰⵢⵉⵏ ⵏ ⵉⵏⵎⵓⵔⴰ ⵖ ⵢⵉⴳⵔ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⵉⵡⵉⵏ,  ⴷⴰⵔⵉ ⵓⵍⴽⵉⵏ ⵎⴰⵙ ⵔⴰⴷ ⵣⴰⵢⴷⵏⵜ ⵜⴰⴷⵉⵏⴰⵎⵉⵜ ⵙⵖⵏⵓⵏⵜ ⵜⵉⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ ⵖ ⵜⵎⴰⵣⵉⵔⵜ ⵏⵏⵖ. ⵔⴰⴷ ⵏⵎⵎⴰⵖ ⴰⴷ ⵉⵣⵣⵉⴳⵣ ⵓⵎⵙⴰⵡⴰⵍ ⴷ ⵡⴰⵎⵓⵏ ⵓⵖⵔⵉⵎ ⵎⴽ ⵍⵍⵉ ⵜ ⵏⵙⵙⵏⵜⵉ ⵖ ⵓⵏⵎⵓⵇⵇⴰⵔ ⴰⵎⵣⵡⴰⵔⵓ ⵏⴳⵔ ⴰⵙⵇⵇⵉⵎ ⴷ ⵡⴰⵎⵓⵏ ⵓⵖⵔⵉⵎ ⵖ ⵎⴰⵢⵢⵓ 2019 ⵓⵍⴰ ⴼ ⵜⵢⴰⴼⵓⵜⵉⵏ ⵍⵍⵉ ⵙ ⵏⴼⴼⴰⵖ ⵖ ⵜⴳⵉⵔⴰ ⵏ ⵜⵉⵏⴰⵡⵜ ⵍⵍⵉ ⵏⵙⵎⴰⵍⴰ ⴰⵙⵙ ⵏ 25 ⴱⵕⴰⵢⵕ 2020 ⴼ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ. ⵏⴽⴽⵏⵉ ⵏⴼⵔⴽ ⵙ ⴰⵢⵍⵍⵉ ⵙ ⵉⵙⵖⴰⵡⵙⴰ ⵡⴰⵎⵓⵏ ⵓⵖⵔⵉⵎ ⴰⴼⴰⴷ ⴰⴷ ⵉⵙⴽⵔ ⵜⵉⵍⴰⵍ ⵏⵏⵙ ⵖ ⵓⵎⵏⵉⴷ ⴰⴷ, ⵔⴰⴷ ⵏⵎⵎⴰⵖ ⴰⴷ ⵏⵙⴱⴷⴷ ⵜⵉⴱⴱⴰⵢⴹⴰⵕⵉⵏ ⵍⵍⵉ ⵉⵍⵍⴰⵏ ⴷⴰⵜ ⵏⵏⵙ, ⵏⵙⴽⵔ ⵢⴰⵏ ⵓⵎⵏⴰⴷ ⴰⵎⴳⵔⵓ ⴰⴷ ⵢⵉⵍⵉ ⵓⵙⵀⵡⵏ ⵏ ⵜⴱⵔⵉⴷⵉⵏ ⵃⵎⴰ ⴰⴷ ⵜⵜⵓⵙⴽⵉⵔⵏⵜ ⵜⵣⵔⴰⵢⵉⵏ ⵥⵉⵍⵏⵉⵏ ⵏ ⵓⴷⵓⵙⵜⵓⵔ.

ⵉⵖ ⵣⵣⵉⴳⵣⵏⵜ ⴽⵉⴳⴰⵏ ⵏ ⵜⵏⵥⴰⵕ ⵉⵍⵍⴰⵏ ⴷⴰⵜ ⵏ ⵡⴰⵎⵓⵏⵏ ⴰⵜⵔⴰⵔⵏ, ⵜⵉⵍⵉ ⵜⵎⵔⴰⵔⵓⵜ ⵏⵏⵙⵏⵜ ⴼ ⵉⵡⴰⵏⴽⵏ ⴷ ⵜⵎⵔⵙⴰⵍ ⵏ ⵓⵣⵣⴳⵉⵔ ⴷ ⵜⵉⴷ ⵉⵜⵜⵓⵙⵜⴰⵢⵏ, ⵀⴰⵜⵉ ⴳⴰⵏⵜ ⵉ ⵡⴰⵎⵓⵏ ⵓⵖⵔⵉⵎ ⵢⴰⵏ ⵓⵣⵎⵣⵣⵓ ⵏ ⵓⵏⵄⴰⵕ ⵓⵖⵔⵉⵎ, ⵍⵓⵃⵏⵜ ⴼⵍⵍⴰⵙ ⵜⵉⵎⴰⵙⴰⵢⵉⵏ ⵎⵇⵓⵔⵏⵉⵏ, ⵖ ⵢⵉⴳⵔ ⵏ ⵓⵙⵙⵓⵜⵉ ⴷ ⵓⵙⴼⵔⴽ ⴷ ⵓⵣⵣⵔⴰⵢ ⵏ ⵉⵣⵏⴽⴷⵏ ⵓⵔ ⵉⴷⵓⵙⵏ, ⴷ ⵜⵖⵓⵔⵉ ⵉ ⵜⵖⵜⴰⵡⵜ ⴷ ⵓⵎⵙⵓⵔⵓⴼ. ⵀⴰⵏⵏ ⵜⵉⵎⵓⴽⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⵎⴰⵢⵏⵓⵜⵉⵏ ⵣⵓⵏ ⴷ ⵉⵙⵏⴼⵍⵏ ⵏ ⵓⵏⵣⵡⵉ, ⴷ ⵜⵣⵡⴰⴳⵉⵏ ⵙ ⵓⴱⵣⵣⴻⵣ, ⴷ ⵜⵓⵎⴰⵏⵉⵏ ⵜⵉⴱⵢⵓⵍⵓⵊⵉⵢⵉⵏ ⴷ ⵜⵎⵓⴹⴰⵏ ⵉⵣⵣⴳⵔⵏ ⵉⵡⵜⵜⴰ, ⵣⵓⵏ ⴷ ⵏⵉⵜ ⴰⵢⵍⵍⵉ ⵉⵍⵍⴰⵏ ⵖ ⵓⵎⴰⴹⴰⵍ ⵖⵉⵍⴰⴷ ⵙ ⵓⵖⵉⵍⵓⴼ, ⴰⵔ ⵙⴽⴰⵔⵏⵜ ⵖ ⵡⴰⵎⵓⵏ ⵓⵖⵔⵉⵎ ⵢⴰⵏ ⵓⵎⴷⵔⴰⵡ ⴰⴷⵙⵍⴰⵏ ⵏ ⵓⵡⴰⵏⴽ ⴷ ⵜⵎⵔⵙⴰⵍ ⵜⵓⵏⵚⵉⴱⵉⵏ ⵖ ⵜⵓⵚⴽⴰ ⵏ ⵜⵙⵜⵔⴰⵜⵉⵊⵉⵢⵉⵏ ⵉⵥⴹⴰⵕⵏ ⴰⴷ ⵙⵎⴰⵜⵜⵉⵏⵜ ⵜⵉⵏⵥⴰⵕ ⴰⴷ ⴷ ⵓⵙⴰⵜⵜⵉ ⵏ ⵉⵎⵉⵣⵉⵢⵏ ⵏⵏⵙⵏⵜ.

ⵖ ⵍⵎⵖⵔⵉⴱ, ⵉⵇⵇⴰⵏ ⴷ ⴰⴷ ⵏⵙⵙⵎⵖⵔ ⵜⴰⵔⴰⵔⵉⵢⵜ ⵏ ⵡⴰⵎⵓⵏ ⵓⵖⵔⵉⵎ, ⵓⵔ ⴷ ⵖⴰⵙ ⵖ ⵉⴳⵔⴰⵏ ⴰⴷ, ⵎⴰⵛ ⵓⵍⴰ ⵖ ⵜⴳⵎⵉ ⵙ ⵜⴷⵉⵏⴰⵎⵉⵜ ⵏⵏⵙ ⵉⴼⴽⴰⵏ ⵜⴰⵢⴰⴼⵓⵜ ⵉⵍⴰⵏ ⴰⵜⵉⴳ ⵏⵏⵙ ⵖ ⵜⵣⵣⵉⴳⵣⵜ ⵏ ⵜⴷⴰⵎⵙⴰ ⵜⴰⵏⴰⵎⵓⵏⵜ ⴷ ⵜⵉⵏ ⵓⵎⵢⴰⵡⴰⵙ ⴷ ⵜⵡⵉⵙⵉ ⵃⵎⴰ ⴰⴷ ⵍⴽⵎⵏⵜ ⴽⵉⴳⴰⵏ ⵏ ⵉⵡⴷⴰⵏ ⵏ ⵡⴰⵎⵓⵏ ⴽⵉⴳⴰⵏ ⵏ ⵜⵏⵓⴼⴰ ⵜⵉⵏⴰⵎⵓⵏⵉⵏ, ⵜⴳⴰ ⵢⴰⵜ ⵜⴷⵉⵏⴰⵎⵉⵜ ⵍⵍⵉ ⴳⵉⵙ ⵉⵙⴽⵔⵏ ⵢⴰⵏ ⵓⵎⴷⵔⴰⵡ ⵏ ⵓⵡⴰⵏⴽ ⴷ ⵉⴳⵔ ⴰⵎⴰⵜⴰⵢ ⵖ ⵓⵙⴽⵔ ⵏ ⵜⴳⵎⵉ ⴷ ⵓⵏⵄⴰⵕ ⵃⵎⴰ ⴰⴷ ⵜⵜⵓⵙⴽⵉⵔ, ⵜⵉⵍⵉ ⴷ ⴰⵢⵍⵍⵉ ⴽⵓⵍⵍⵓ ⵉⵙⵉⴳⴳⵉⵍ ⵡⴰⵎⵓⵏ ⴰⴷⵖⴰⵔⴰⵏ.

ⵖ ⵜⵙⴳⴰ ⵢⴰⴹⵏ, ⵉⵇⵇⴰⵏ ⴷ ⴰⴷ ⵏⵙⵙⵎⵖⵔ ⵙ ⵜⵉⵍⵉⵜ ⵉⴼⴰⵡⵏ ⵏ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ ⵖ ⴱⵕⵕⴰ ⵏ ⵜⵎⴰⵣⵉⵔⵜ, ⴷ ⵜⵖⵍⴰⵖⴰⵍⵜ ⵜⵓⵎⵏⵉⴳⵜ ⵉⵍⵍⴰⵏ ⴷⴰⵔ ⵜⵉⵍⴰⵍ ⵏⵏⵙ ⴷ ⵜⵙⵏⵜⴰⵢⵉⵏ ⵏⵏⵙ ⵖ ⴱⵕⵕⴰ, ⴰⵢⵍⵍⵉ ⵜⵙⵙⴷⵓⵙ ⵜⵡⵉⵙⵉ ⵜⵓⵎⵏⵉⴳⵜ ⵉⵍⴰⵏ ⴰⵜⵉⴳ ⵏ ⵉⵎⵖⵔⵉⴱⵉⵢⵏ ⵏ ⵓⵎⴰⴹⴰⵍ ⵙ ⵜⵎⴰⴷⴷⴰⵙⵉⵏ ⵏⵏⵙⵏ ⵜⵓⵖⵔⵉⵎⵉⵏ ⵜⵓⴷⴷⵉⵔⵉⵏ.

ⵖ ⵓⵎⵏⵉⴷ ⴰⴷ, ⴰⵔ ⵥⵕⵕⴰⵖ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵙⴰⵔⵡⴰ ⵏ ⵡⴰⵢⴷⴰ ⵏ ⵡⴰⵎⵓⵏ ⵓⵖⵔⵉⵎ ⴰⵎⵖⵔⵉⴱⵉ ⵖ ⵜⵣⴷⴰⵢⵉⵏ ⵏⵏⵙ ⴰⴽⴷ ⵜⵉⵎⴰⴷⴷⴰⵙⵉⵏ ⵜⵉⵏⴳⴳⵯⴰ ⵖ ⵜⵎⵉⵣⴰⵔ ⵏ ⵉⵥⵥⵍⵎⴹ, ⵙ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏⵏⵙ ⴰⴽⴷ ⵉⵏⴳⵎⴰⵎⵏ ⵉⵏⴳⴳⵯⴰ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ, ⵍⵍⵉⵖ ⴳⴳⵓⵜⵏ ⵉⵣⵎⵣⵣⴰ ⵏ ⵓⵎⵢⴰⵡⴰⵙ ⵢⵉⵍⵉ ⴳⵉⵙⵏ ⵉⵎⴰⵍ, ⵉⴳⵓⵜⵏⵜ ⵓⵍⴰ ⵜⵥⵉⴹⴰⵕ ⵜⵉⵏⴼⴳⴰⵏⵉⵏ, ⵉⵇⵇⴰⵏ ⴷ ⴰⴷ ⵏⴰⵡⵙ ⵖ ⵎⴰⴷ ⵉⵅⴰⵚⵚⴰⵏ ⵙ ⵓⵎⵢⴰⵡⴰⵙ, ⵏⴰⵡⵙ ⵙ ⵜⵎⵓⵣⴰⵢⵉⵏ ⴷ ⵜⵎⵙⴽⵉⵔⵉⵏ ⵏⵏⵖ. ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵉⴳⴰ ⵎⴰ ⴰⵏⵏ ⴰⵙⵙⴰⵔⵓ ⵉ ⵉⵎⴰⵍ, ⵖ ⵢⴰⵏ ⵉⴳⵔ ⵊⵢⵓ-ⴰⵙⵔⵜⴰⵏ ⴼ ⵍⵍⴰⵏ ⴽⵉⴳⴰⵏ ⵏ ⵉⵎⵏⵉⴷⵏ. ⵖⵎⴽ ⵍⵍⵉ ⵜⵙⵙⵏⵎ, ⵜⵔⴰ ⵜⵎⴰⵣⵉⵔⵜ ⵏⵏⵖ, ⵙ ⵜⵙⵔⵜⵉⵜ ⵜⴰⴼⵔⵉⵇⵉⵜ ⴼ ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ, ⵉⴱⴷⴷⵏ ⴼ ⵜⵎⴷⵔⴰⵡⵜ ⵏ ⵓⵎⵢⴰⵙ ⴷ ⵚⴰⵃⴰ ⵉⵛⵛⴰⵔⵏ, ⴷ ⴰⴷ ⵜⴰⵎⵥ ⵉⴼⵔⵉⵇⵢⴰ ⵜⵉⵥⵉⴹⴰⵕ ⵏⵏⵙ ⴷ ⵜⵖⵜⴰⵙⵉⵏ ⵏⵏⵙ, ⵜⵔⴰ ⴰⴷ ⵜⴰⵡⵙ ⵙ ⵜⵖⴰⵔⴰⵙⵜ ⵜⴰⵎⵢⵉⵎⴰⵏⵜ ⴰⴷ ⵉⴳ ⵉⴳⵔ ⵏ ⵉⵎⴰⵍ ⴷ ⵓⵎⵏⵥⴰⵡ ⵏ ⵓⴼⵓⵖ. ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵔⴰⴷ ⵉⴳ ⵓⵎⵣⵔⵓⵢ ⴷ ⵜⴷⵍⵙⴰ ⵉⵛⵛⴰⵔⵏ ⴷ ⵜⴰⵢⴰⵏⵜ ⵏ ⵜⵓⴳⴰⵔⵜ ⴷ ⵜⵏⵥⴰⵕ ⵉⴼⵔⴷⴰⵙ ⵍⵍⵉ ⵔⴰⴷ ⵉⵙⵀⵡⵏ ⴰⵙⵡⴰⵍⴰ ⴰⴷ. 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵙⵜⴳⴳⴰⵔⵏ ⵏ ⵡⴰⵎⵓⵏ ⵓⵖⵔⵉⵎ,

ⵉⵖ ⵉⵟⵟⴰⴼ ⵍⵎⵖⵔⵉⴱ ⴽⵉⴳⴰⵏ ⵏ ⵡⴰⵢⴷⴰ ⴰⵎⵣⵔⴰⵢ ⴷ ⵓⵡⴰⵔⴰⵎⵍⵓⴹⴰⵏ ⴰⵢⵍⵍⵉ ⴷⴰⵔⵙ ⵉⴳⴰⵏ ⴰⴷⴷⵓⵔ, ⵀⴰⵏⵏ ⴰⵎⵓⵏ ⵓⵖⵔⵉⵎ, ⵙ ⵓⵎⵢⴰⵏⴰⵡ ⵏⵏⵙ ⴷ ⵜⵎⴼⴽⵉⵜ ⵏⵏⵙ ⴷ ⵜⴷⵉⵏⴰⵎⵉⵜ ⵏⵏⵙ ⴷ ⵜⵉⵍⵉⵜ ⵏⵏⵙ ⵜⴰⵙⴳⴰⵡⴰⵏⵜ ⴷ ⵜⵏⴰⵎⵓⵔⵜ, ⵉⴳⴰ ⵢⴰⵏ ⵖ ⵡⴰⵢⴷⴰ ⴰⵏⵏ, ⵉⴳⴰ ⵖ ⵜⵎⵥⵍⴰⵢⵉⵏ ⵉⴼⵔⵙⵏ ⴰⵎⵣⵔⵓⵢ ⵏ ⵜⵎⵜⵜⵉ ⴰⴷ, ⵙ ⵓⵎⵢⴰⵏⴰⵡ ⵏ ⵉⴳⵔⴰⵏ ⵏ ⵓⵙⵡⵓⵔⵉ ⵏⵏⵙ ⴷ ⵜⵉⴹⴰⴼ ⵏⵏⵙ ⴷ ⵓⵙⵡⵓⵔⵉ ⵏⵏⵙ ⵙ ⵡⴰⴷⴰⵙ ⵖ ⵢⵓⵎⵥ. ⵖⵉⴽ ⴰⵏⵏ ⴰⴼ ⵉⵙⵜⴰⵀⵍⵍⴰ ⴰⵙⵏⴰⵍ, ⵙⵜⴰⵀⵍⵍⴰⵏⵜ ⵜⵙⵏⵜⴰⵢⵉⵏ ⵏⵏⵙ ⴰⵙⵙⵓⵜⴳ, ⵎⴰ ⴰⴷ ⴰⴷ ⵉⴳⴰⵏ ⵖ ⵜⵎⴰⵙⴰⵢⵉⵏ ⵏⵏⵖ ⵖ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴷ ⵜⵎⵔⵙⴰⵍ ⵜⵉⵎⵣⵣⴳⴰⵔⵉⵏ ⴷ ⵜⵉⴷ ⵜⵜⵓⵙⵜⴰⵢⵏⵉⵏ, ⵖ ⵉⵙⵡⵉⵔⵏ ⴰⴷⵖⴰⵔⴰⵏ ⴷ ⵓⵙⴳⴰⵡⴰⵏ ⴷ ⵓⵏⵎⵏⴰⴹ, ⵃⵎⴰ ⴰⴷ ⵏⵃⵟⵟⵓ ⴼ ⵓⴱⵓⵖⵍⵓ ⵏ ⵡⴰⵎⵓⵏ ⵏⵏⵖ ⵓⵖⵔⵉⵎ, ⵉⴳⴰⵏ ⴰⵎⵙⵏⴰⵍ ⵏ ⵓⵎⵢⴰⵡⴰⵙ ⵉ ⵜⴳⵎⵉ ⴷ ⵜⴷⵔⴰⵡⵜ ⴷ ⵓⵙⴷⵓⵙ ⵏ ⵜⵎⵢⵉⵎⴰⵏⵜ.

ⵖ ⵜⴳⵉⵔⴰ, ⴰⵔ ⴰⵡⵏ ⵜⵜⵉⵏⵉⵖ ⴰⵢⵢⵓⵣ ⴼ ⵜⵉⵍⵉⵜ ⵏⵏⵓⵏ, ⴷ ⴰⵔ ⵙⵏⵏⵉⵎⵎⵉⵔⵖ ⵜⵉⴽⴽⵍⵉⵜ ⵢⴰⴹⵏⵉⵏ ⵎⴰⵙⵙ ⴰⵎⴰⵡⵙⴰⵙ ⵏ ⵓⵡⴰⵏⴽ ⴼ ⵜⵖⵓⵔⵉ ⵏⵏⵙ ⵉⵍⴰⵏ ⴰⴷⴷⵓⵔ.

ⵜⴰⵏⵎⵎⵉⵔⵜ ⴼ ⵓⴷⵡⴰⵍ ⵏⵏⵓⵏ