ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵖ ⵓⵙⵏⵓⴱⴳ ⵏⵏⵙ ⴷⴰⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ ⴷ ⵓⵎⴰⵡⵙⴰⵙ ⵏ ⴱⵕⵕⴰ ⵏ ⵜⵓⵔⴽⵎⴰⵏⵉⵙⵜⴰⵏ:«ⴰⴼⵙⵙⴰⵢ ⴰⵎⵢⵉⵡⵏ ⵏ ⵓⵎⵏⵣⴰⵖ ⴼ ⵚⵚⵃⵕⴰ ⵉⴳⴰ ⵜ ⵜⴰⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵉⴼⴽⴰ ⵍⵎⵖⵔⵉⴱ»
ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵡⴰⵙ 05 ⵎⴰⵕⵕ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ, ⵉⵎⴹⴰⴽⴰⵕⵏ ⴷ ⵎⴰⵙⵙ « ⵕⴰⵛⵉⴷ ⵎⵉⵔⵉⴷⵓⴼ » ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ ⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵚⵚⴰ ⵏ ⵜⵓⵔⴽⵎⴰⵏⵉⵙⵜⴰⵏ, ⵉⵍⵍⴰⵏ ⵖ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ.
ⵖ ⵓⵏⵎⵓⵇⵇⴰⵔ ⴰⴷ, ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷⴷⴰⴷ ⵓⵎⵏⵉⴳ ⵏ ⵜⵓⵔⴽⵎⴰⵏⵉⵙⵜⴰⵏ ⵖ ⵜⵎⵙⴰⵔⵜ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵢⵉⵏⵉ : « ⵜⴳⴰ ⵜⵏⴼⵔⵓⵜ ⴷ ⵓⵔⴳⴳⵉⴳ ⵖ ⵜⵖⴰⵡⵙⵉⵡⵉⵏ ⵜⵉⵎⵣⵡⵓⵔⴰ ⵏ ⵓⵎⴰⴹⴰⵍ ⵏ ⵡⴰⵙⵙ ⴰⴷ, ⵓⵔ ⵔⴰⴷ ⵜⵜⵓⵙⴽⵉⵔⵏ ⴰⴱⵍⴰ ⵙ ⵓⵡⵇⵇⵔ ⵏ ⵜⴰⵢⴰⵏⵜ ⵏ ⵉⵎⴰⴷⴰⵏⵏ ⴷ ⵜⴰⵢⴰⵏⵜ ⵏ ⵉⵡⴰⵏⴽⵏ ». ⵉⵣⵎⵎⵉⵎ ⴰⵎⵛⴰⵛⴽⴰ ⵏ ⵜⴰⵏⵏⴰⵢⵉⵏ ⵏ ⵙⵏⴰⵜ ⵜⵎⵉⵣⴰⵔ ⵖ ⴽⵓ ⵜⵉⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⵜⵉⵎⵉⵣⴰⵔ ⴰⴷ ⴷⵔⵓⵏⵜ ⵓⵍⴰ ⴰⵜⵉⴳⵏ ⵏ ⵓⵏⵏⵓⵕⵥⵎ ⴷ ⵜⴰⵔⴰⵡⵙⴰⵏⵜ ⵜⵓⵎⵏⵉⴳⵜ, ⵖⵎⴽ ⵍⵍⵉ ⵓⵔ ⴽⵛⵛⵎⵏⵜ ⵖ ⵜⵖⴰⵡⵙⵉⵡⵉⵏ ⵜⵉⴳⵯⵏⵙⴰⵏⵉⵏ ⵏ ⵉⵡⴰⵏⴽⵏ ⵢⴰⴹⵏⵉⵏ.
ⵉⵙⵙⵓⵜⴳ ⵎⴰⵙⵙ ⵍⵎⴰⵍⴽⵉ ⵙ ⵜⵙⵔⵜⵉⵜ ⵏ ⵜⵓⴹⵊⵓⵕⴰ ⵉⵥⵉⵍⵏ ⵍⵍⵉ ⵜⵛⵛⵓⴽⴽⴰ ⵜⵓⵔⴽⵎⴰⵏⵉⵙⵜⴰⵏ ⴷ ⵓⵏⵣⴳⵓⵎ ⵍⵍⵉ ⵜⵓⵙⵉ ⴼ ⵜⵉⵕⵡⵉ ⵏ ⵜⵣⴷⴰⵢⵉⵏ ⵏⵏⵙ ⴷ ⵜⵎⵉⵣⴰⵔ ⴳⴰⵏⵉⵏ ⵜⴰⴹⵊⴰⵕⵉⵏ ⵏⵏⵙ, ⴷ ⵓⴷⵔⴰⵡ ⵏⵏⵙ ⵓⵎⵏⵉⴳ ⵖ ⵓⵙⵎⴽⵍ ⵏ ⵜⵎⵙⴰⵔⵉⵏ ⵉⵍⵍⴰⵏ ⵖ ⵓⵙⵡⵉⵔ ⵏ ⵜⵎⵜⵜⴰ ⵉⵎⵓⵏⵏ, ⵜⵉⴷ ⵉⵣⴷⵉⵏ ⴷ ⵉⵎⴰⵍ ⵏ ⵜⵥⴹⴰⵕⵜ ⴷ ⵜⴳⵎⵉ ⵜⴰⵙⵓⵍⴰⵏⵜ ⴷ ⵜⵉⵢⵢⴰⴹ.
ⵖ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵎⵍⴰ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵙⴽⵔ ⵓⵙⵇⵇⵉⵎ ⵜⴰⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵜⵓⵔⴽⵎⴰⵏⵉⵙⵜⴰⵏ, ⵉⵙⴷⴷⵉⴷ ⴼ ⵡⴰⵜⵉⴳ ⵏ ⵓⵔⵣⴰⴼ ⴰⴷ ⵏ ⵎⴰⵙⵙ ⴰⵎⴰⵔⵉ ⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ ⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵏ ⵜⵓⵔⴽⵎⴰⵏⵉⵙⵜⴰⵏ ⵍⵍⵉⵖ ⵔⴰⴷ ⵉⵜⵜⵓⴼⴽⵉ ⵢⴰⵏ ⵓⵏⴼⵓⵙ ⴰⵎⴰⵢⵏⵓ ⵉ ⵜⵣⴷⴰⵢⵉⵏ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ.
ⵖ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ “ⵕⴰⵛⵉⴷ ⵎⵉⵔⵉⴷⵓⴼ” ⵎⴰⵙ ⵜⵍⵍⴰ ⵜⵓⵔⴽⵎⴰⵏⵉⵙⵜⴰⵏ ⴷ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵢⵉⵏⵉ:«ⵏⵙⵙⵏ ⵎⴰⵙ ⴷⴷ ⴰⴼⵙⵙⴰⵢ ⴰⵎⵢⵉⵡⵏ ⵏ ⵓⵎⵏⵣⴰⵖ ⵅⴼ ⵚⵚⵃⵕⴰ ⵉⴳⴰ ⵜ ⵜⴰⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵉⴼⴽⴰ ⵍⵎⵖⵔⵉⴱ, ⴰⴷⴷⴰⴷ ⵏⵏⵖ ⵉⵜⵜⵓⵚⴽⴰ ⴼ ⵜⵏⵜⵜⴰⵎⵜ ⵏ ⵜⵎⵜⵜⴰ ⵉⵎⵓⵏⵏ ⵖ ⵉⵍⵍⴰ ⵓⵡⵇⵇⵔ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵉⵡⴰⵏⴽⵏ».
ⵉⵙⵙⵉⵙⴼⵉⵡ ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ ⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵏ ⵜⵓⵔⴽⵎⴰⵏⵉⵙⵜⴰⵏ ⵎⴰⵙ ⴳⴰⵏⵜ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵜⵓⵔⴽⵎⴰⵏⵉⵙⵜⴰⵏ ⵜⵉⵏ ⵜⴰⴳⵯⵎⴰⵜ, ⵉⵎⵍⵉ ⴷ ⵎⴰⵙ ⵉⴳⴰ ⵍⵎⵖⵔⵉⴱ ⵖ ⵜⵎⵉⵣⴰⵔ ⵜⵉⵎⵣⵡⵓⵔⴰ ⵉⵙⵙⵏ ⵙ ⵜⵙⵉⵎⴰⵏⵜ ⵏ ⵜⵓⵔⴽⵎⴰⵏⵉⵙⵜⴰⵏ, ⵉⴱⴷⴷ ⴷⵉⴷⵙ ⵓⵍⴰ ⵖ ⵓⵙⵡⵉⵔ ⴰⴳⵔⴰⵖⵍⴰⵏ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⵣⵎⵣⵣⵓ ⵖ ⵙⴰⵡⵍⵏⵜ ⵙⵏⴰⵜ ⵜⵙⴳⴳⵉⵡⵉⵏ ⴼ ⴽⵉⴳⴰⵏ ⵏ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵖ ⵉⵍⵍⴰ ⵓⵅⵎⵎⴻⵎ ⵉⵛⵛⴰⵔⵏ, ⵎⴽ ⵍⵍⵉ ⵙⴰⵡⵍⵏ ⴼ ⵜⵉⵔⴰⵜ ⵏⵏⵙⵏ ⵉⵛⵛⴰⵔⵏ ⴰⴷ ⵢⵉⵍⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵖ ⵙⵏⴰⵜ ⵜⵎⵉⵣⴰⵔ.