ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⵓⴱⴳ ⵜⴰⵎⵙⵇⴰⴷⵜ ⵏ ⴽⵓⵍⵓⵎⴱⵢⴰ ⴳ ⵕⵕⴱⴰⵟ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵏⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⵉⵏⴰⵙ 03 ⵎⴰⵕⵚ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙⴰ MARIA DEL PILAR GOMEZ  ⵜⴰⵎⵙⵇⴰⴷⵜ ⵏ ⴽⵓⵍⵓⵎⴱⵢⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵖ ⵓⵔⵣⴰⴼ ⵏ ⵓⵎⵢⴰⵙⵙⴰⵏ ⵍⵍⵉⵖ ⵜⴳⴰ ⵜⴰⵎⵙⵇⴰⴷⵜ ⵜⴰⵎⴰⵢⵏⵢⵜ ⵏ ⵜⵎⴰⵣⵉⵔⵜ ⵏⵏⵙ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⵙ ⵓⵣⵎⵣⵣⵓ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵍⵍⴰⵏⵜ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⴽⵓⵍⵓⵎⴱⵢⴰ ⵖ ⵢⴰⵜ ⵜⴷⵉⵏⴰⵎⵉⵜ ⵎⵇⵓⵔⵏ ⵖ ⵉⵙⴳⴳⵯⴰⵙⵏ ⴰⴷ ⴳⴳⵓⵔⴰⵏⵉⵏ, ⵉⵎⵍⵉ ⴷ ⵎⴰⵙ ⴷⵔⵓⵏⵜ ⵙⵏⴰⵜ ⵜⵎⵉⵣⴰⵔ ⴰⵜⵉⴳⵏ ⵣⴷⵉⵏⵉⵏ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⵏⴼⵔⵓⵜ ⴷ ⵓⵔⴳⴳⵉⴳ, ⵉⵙⵙⵓⵜⴳ ⵓⵍⴰ ⵜⵓⴳⵜ ⵏ ⵓⴷⵎⴰⵡⵏ ⵏ ⵓⵎⵢⴰⵡⴰⵙ ⵉⵍⵍⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵖⵎⴽ ⴰⵏⵏ ⵓⵍⴰ ⴷ ⵜⵉⵕⵡⵉ ⵏ ⵓⵣⴷⴷⵓⵢ ⵏⵏⵙⵏⵜ ⴳ ⵉⵙⵡⵉⵔⵏ ⴰⵏⵎⵏⴰⴹ ⴷ ⵓⴳⵔⴰⵖⵍⴰⵏ.

ⵉⵙⵙⵓⵜⴳ ⵎⴰⵙⵙ ⵍⵎⴰⵍⴽⵉ ⵙ ⵡⴰⴷⴷⴰⴷ ⵏ ⴽⵓⵍⵓⵎⴱⵢⴰ ⵖ ⵜⵎⵙⴰⵔⵜ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵢⵉⵏⵉ:”ⴰⴷⴷⴰⴷ ⵏ ⴽⵓⵍⵓⵎⴱⵢⴰ ⵖ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵉⴳⴰ ⴱⴰⵀⵔⴰ ⵓⵎⵏⵉⴳ ⵢⴰⵎⵥ ⴰⴱⵔⵉⴷ ⵏⵏⵙ ⵙ ⵉⵎⴰⵍ”. ⵉⵙⵙⴽⵯⵜⵉ ⴷ ⴰⵙⵖⵣⵏ ⵏ ⵓⴽⵓⵏⴳⵕⵉⵕ ⴰⴽⵓⵍⵓⵎⴱⵉ ⵖ 2018 ⵜⵓⵜⵜⵔⴰ ⵉⵍⵍⴰⵏ ⴷ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵉⴼⴽⴰ ⵍⵎⵖⵔⵉⴱ ⵉⴳ ⵢⴰⵏ ⵓⴼⵙⵙⴰⵢ ⵉⵙⵎⴷⵏ ⵉ ⵓⵎⵏⵣⴰⵖ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ.

ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵉⵔⵉⵜ ⵉⴷⵓⵙⵏ ⴰⴷ ⵣⵣⵉⴳⵣⵏⵜ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ ⵙ ⴽⵉⴳⴰⵏ ⵏ ⵓⵎⵢⴰⵡⴰⵙ ⴷ ⵜⵡⵉⵣⵉ, ⵉⵙⵙⵉⵙⴼⵉ ⵎⴰⵙ ⵔⴰⴷ ⵉⴳ ⵓⵔⵣⴰⴼ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⴽⵓⵍⵓⵎⴱⵢⴰ ⵖ ⵎⴰⴷ ⵢⵓⵛⴽⴰⵏ ⵢⴰⵏ ⵓⵣⵎⵣⵣⵓ ⵏ ⵓⵙⵙⴷⵓⵙ ⵏ ⵓⵎⵢⴰⴷⴰⵙ ⵊⴰⵔ ⵙⵉⵏ ⵉⵙⵇⵇⵉⵎⵏ.

ⵖ ⵜⵙⴳⴰ ⵏⵏⵙ, ⵜⵙⴷⴷⵉⴷ ⵎⴰⵙⵙⴰ ⵜⴰⵎⵙⵇⴰⴷⵜ ⵎⴰⵙ ⴰ ⵜⴰⴽⴽⴰ ⴽⵓⵍⵓⵎⴱⵢⴰ ⵢⴰⵏ ⵡⴰⵜⵉⴳ ⴰⵅⴰⵜⴰⵔ ⵉ ⵜⵣⴷⴰⵢⵉⵏ ⵏⵏⵙ ⴷ ⵜⴳⵍⴷⵉⵜ, ⵜⵍⵇⵎ:”ⴷⴰ ⵏⵙⵏⴼⴰⵍ ⴰⵡⵇⵇⵔ ⴷ ⵓⵎⵢⴰⵡⴰⵙ ⵉⵥⵉⵍⵏ ⵖ ⵜⵣⴷⴰⵢⵉⵏ ⵏⵏⵖ ⵉⵍⵍⴰⵏ ⵙⴳ ⵓⴳⴳⴰⵔ ⵏ 40 ⵏ ⵓⵙⴳⴳⵯⴰⵙ”. ⵜⵎⵍⵉ ⴷ ⵖ ⵓⵎⵏⴰⴹ ⴰⴷ ⵜⵉⵎⵢⴰⵇⵇⴰⵏⵉⵏ ⴳⴳⵓⵜⵏⵉⵏ ⵏ ⵓⵎⵢⴰⵡⴰⵙ ⵉⵍⵍⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⵍⵉⵏⵜ ⵖ ⵉⴳⵔⴰⵏ ⵏ ⵜⴷⵍⵙⴰ ⴷ ⵜⵎⴰⵍⵍⴰⵢⵜ ⴷ ⵓⵙⵍⵎⴷ ⴰⵎⵙⴷⴰⵡ ⴷ ⵡⵉⵢⵢⴰⴹ.

ⵜⵙⵙⵉⵙⴼⵉ ⴷ ⵎⴰⵙⵙⴰ MARIA DEL PILAR GOMEZ ⵎⴰⵙ ⵉⴳⴰ ⵡⴰⴷⴷⴰⴷ ⵏ ⴽⵓⵍⵓⵎⴱⵢⴰ ⵖ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵡⴰⴷ ⵉⴼⴰⵡⵏ ⵍⵍⵉⵖ ⵜⵍⵍⴰ ⴷ ⵓⵏⴱⴰⴹ ⴰⵏⵉⵎⴰⵏ ⵖ ⵓⵡⵇⵇⵔ ⵏ ⵓⴱⴰⴹ ⵏ ⵜⴳⵍⴷⵉⵜ, ⵉⴳ ⴰⴼⵙⵙⴰⵢ ⵉⵙⵎⴷⵏ ⵉ ⵓⵎⵏⵣⴰⵖ ⴰⴷ.