ⵉⵎⴹⴰⴽⴰⵕⵏ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵎⵏⴰⴹⵉⵏ (ⴰⵙⵇⵇⵉⵎ ⵏ ⵉⵎⵛⵛⵉⵡⴰⵕ) ⵏ ⵉⴼⴼⵓⵙ ⵏ ⵉⴼⵔⵉⵇⵢⴰ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 02 ⵎⴰⵕⵚ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ Nkosiyakhe Amos Masondo  ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵎⵏⴰⴹⵉⵏ (ⴰⵙⵇⵇⵉⵎ ⵏ ⵉⵎⵛⵛⵉⵡⴰⵕ) ⵏ ⵉⴼⴼⵓⵙ ⵏ ⵉⴼⵔⵉⵇⵢⴰ, ⵍⵍⵉ ⵉⴷⵔⵓⵏ ⵖ ⵜⵙⵎⵓⵏⵉ ⵉⵛⵛⴰⵔⵏ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵓⵙⵖⵏⵣⵉ ⴷ ⵜⴷⵉⵡⴰⵏⵜ ⴷ ⵜⵣⵡⴰⴳⵜ, ⴷ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵡⴰⵙⵙⴰⵢ ⴷ ⵜⵎⴳⵓⵔⵉ ⴷ ⵉⵏⵢⴰⵍⴽⴰⵎⵏ ⴷ ⵜⵥⴹⴰⵕⵉⵏ ⴷ ⵜⵎⴰⵙⵙⴰⵏⵉⵏ ⴷ ⵜⵉⴽⵏⵓⵍⵓⵊⵉⵜ ⵉⴹⴼⵕⵏ ⴰⴱⵕⵍⴰⵎⴰⵏ ⵏ ⴽⵓ-ⴰⴼⵔⵉⵇⵢⴰ ⵉⵜⵜⵓⵙⵏⵎⴰⵍⴰⵏ ⵖ ⵓⵙⵖⵉⵎ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵙⴳ 02 ⴰⵔ 06 ⵖ ⵡⴰⵢⵢⵓⵔ ⴰⴷ ⵏ ⵎⴰⵕⵚ.

ⵖ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⵍⵍⴰ ⴷⴰⵔ ⵍⵎⵖⵔⵉⴱ ⴷ ⵉⴼⴼⵓⵙ ⵏ ⵉⴼⵔⵉⵇⵢⴰ ⵢⴰⵜ ⵜⵎⴽⵯⵜⵉⵜ ⵉⵛⵛⴰⵔⵏ ⵉⵣⴷⵉⵏ ⴷ ⵜⵎⵖⵏⴰⵙⵜ ⵎⴳⴰⵍ ⵏ ⵓⵙⵏⵓⵃⵢⵓ (ⴰⴱⴰⵕⵟⴰⵢⴹ), ⵉⵎⵍⵉ ⴷ ⴰⵔⵣⴰⴼ ⴰⵎⵣⵔⴰⵢ ⵍⵍⵉ ⵉⵙⴽⵔ ⵓⵅⴰⵜⴰⵔ ⵏⵉⵍⵚⵓⵏ ⵎⴰⵏⴹⵉⵍⵍⴰ ⵉ ⵍⵎⵖⵔⵉⴱ ⵍⵍⵉⵖ ⵜ ⵉⵙⵏⵓⴱⴳ ⵉⴳⵍⵍⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⵍⵃⴰⵙⴰⵏ ⵡⵉⵙ ⵙⵉⵏ. 

ⵉⵙⵙⵉⵙⴼⵉⵡ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⴱⴷⴷ ⵍⵎⵖⵔⵉⴱ ⴷ ⵜⵎⴰⵖⵜ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵎⴳⴰⵍ ⵏ ⵓⵙⴷⵓⵔⵔⵉ, ⵉⴳ ⵖ ⵡⵉⵍⵍⵉ ⵙⴽⵔⵏⵉⵏ ⵜⴰⵎⴰⴷⴷⴰⵙⵜ ⵏ ⵜⴰⵢⴰⵏⵜ ⵜⴰⴼⵔⵉⵇⵉⵜ ⵍⵍⵉ ⵉⴳⴰⵏ ⵖⵉⵍⴰⴷ “ⵜⴰⵎⵓⵏⵜ ⵜⴰⴼⵔⵉⵇⵉⵜ”. ⵉⵙⵙⴽⵯⵜⵉ ⴷ ⵎⴰⵙ ⵉⵍⵍⴰ ⵓⵎⵏⴰⴷ ⴰⴼⵔⵉⵇⵉ ⵖ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⴷ ⵓⵎⵣⵔⵓⵢ ⵏⵏⵙ, ⴷ ⵡⴰⵢⴷⴰ ⵏⵏⵙ ⴰⵖⵔⵎⴰⵏ ⴷ ⵓⴷⵍⵙⴰⵏ, ⵢⵉⵏⵉ:”ⵏⴽⴽⵯⵏⵉ ⵉⵎⵖⵔⵉⴱⵢⵉⵏ ⵏⴳⴰ ⴱⴷⴷⴰ ⵉⴼⵔⵉⵇⵉⵢⵏ”.

ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵎⵎⴰⵖ ⵍⵎⵖⵔⵉⴱ ⴼ ⵜⴰⵢⴰⵏⵜ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ, ⵢⵉⵍⵉ ⵖⵓⵔⵙ ⵓⵏⵣⴳⵓⵎ ⴰⴷ ⵉⵣⵣⵉⴳⵣ ⵙ ⵜⵡⵓⵔⵉ ⵜⴰⴼⵔⵉⵇⵉⵜ ⵉⵛⵛⴰⵔⵏ, ⵉⵎⵍⵉ ⴷ ⵎⴰⵙ ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴷ ⵖ ⵜⵎⵣⵡⵓⵔⴰ ⵍⵍⵉ ⵉⵣⵎⵎⵉⵎⵏ ⵜⴰⵎⵢⴰⵇⵇⴰⵏⵜ ⵏ ⵓⵙⵏⴼⵍ ⵉⵍⴻⵍⵍⵉ (ZLECAF), ⵉⵎⵍⵇⵎ:” ⵜⵍⵍⴰ ⵜⵉⵍⴰⵍⵜ ⵉⵙⵜⴰⵡⵀⵎⵎⴰⵏ ⴷⴰⵔ ⵉⴱⵕⵍⴰⵎⴰⵏⵏ ⵃⵎⴰ ⴰⴷ ⵜⵉⵍⵉ ⵜⵎⵢⴰⵇⵇⴰⵏⵜ ⴰⴷ ⵖ ⵜⵉⵍⴰⵡⵜ”.

ⵉⵎⵍⵉ ⴷ ⵎⴰⵙⵙ ⵍⵎⵍⴰⴽⵉ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵣⵣⵉⴳⵣⵜ ⵙ ⵉⵎⴰⵍ, ⴷ ⵓⵙⵉⵜⵜⵉ ⵏ ⵜⵎⵓⴽⵔⵉⵙⵉⵏ ⵉⵜⵜⵓⵙⴽⴰⵔⵏ, ⵢⵉⵏⵉ:”ⵉⴼⵔⵉⵇⵢⴰ ⵜⵙⵖⴰⵡⵙⴰ ⵙ ⵉⵡⴰⵏⴽⵏ ⴷⵓⵙⵏⵉⵏ ⴷ ⵡⴰⵎⵓⵏ ⵓⵖⵔⵉⵎ ⵉⵙⵡⵓⵔⵉⵏ, ⴷ ⵓⵙⵏⴼⵍ ⴰⴷⵉⵎⵓⵇⵔⴰⵟⵉ ⵉⵎⵓⵏⵏ ⴷ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵎⵖⵔⵉⴱ ⵉⴽⵛⵉⵎ ⵖ ⵉⵎⵓⴽⵏⵏ ⴰⴷ, ⴷ ⵓⵔ ⴰⴷ ⵉⴽⵛⵛⵉⵎ ⵖ ⵜⵎⵓⴽⵔⵉⵙⵉⵏ ⵜⵉⴳⵯⵏⵙⴰⵏⵉⵏ ⵏ ⵉⵡⴰⵏⴽⵏ”.

ⵉⵖⵔⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵢⵉⵏⵉ:”ⵏⴻⵏⵏⵓⵔⵣ ⴰⴷ ⵉⵍⵉⵏⵜ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵥⵍⵉⵏⵉⵏ ⵊⴰⵔ ⵍⵎⵖⵔⵉⴱ ⴷ ⵉⴼⴼⵓⵙ ⵏ ⵉⴼⵔⵉⵇⵢⴰ, ⵏⴽⴽⵯⵏⵉ ⵏⵓⵊⴰⴷ ⴰⴷ  ⵉⵍⵉⵏⵜ  ⵜⵓⴳⴳⴰⵙ ⵍⵍⵉ ⵔⴰⴷ ⵢⴰⵡⵉ ⵙ ⵓⴱⵔⵉⴷ ⴰⴷ”.

ⵖ ⵜⵙⴳⴰ ⵏⵏⵙ, ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵎⵏⴰⴹⵉⵏ ⵏ ⵉⴼⴼⵓⵙ ⵏ ⵉⴼⵔⵉⵇⵢⴰ ⴼ ⵓⵙⵏⵉⵎⵎⵔ ⵏⵏⵙ ⵉ ⵓⵙⵏⴰⵍ ⵏ ⵍⵎⵖⵔⵉⴱ ⵉ ⵜⵎⴰⵖⵜ ⵏ ⵓⵎⴰⴷⴰⵏ ⵏ ⵉⴼⴼⵓⵙ ⵏ ⵉⴼⵔⵉⵇⵢⴰ ⵎⴳⴰⵍ ⵏ ⵓⵙⵏⵓⵃⵢⵓⴰ ⴰⵥⵓⵕⴰⵏ, ⵢⵉⵏⵉ ⵎⴰⵙ ⵉⵟⵟⴰⴼ ⵡⴰⵎⵓⵏ ⴰⴳⵔⴰⵖⵍⴰⵏ ⵜⵉⵍⴰⵍⵜ ⵏⵏⵙ ⵖ ⵓⴼⵏⴰ ⵏ ⵓⴱⴰⵕⵟⴰⵢⴹ.

ⵉⵎⵍⵉ ⴷ ⵎⴰⵙⵙ Nkosiyakhe Amos Masondo ⴰⵏⵣⴳⵓⵎ ⵏ ⵜⵎⴰⵣⵉⵔⵜ ⵏⵏⵙ ⵖ ⵓⵙⵙⴷⵓⵙ ⵏ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ, ⵉⵙⴷⴷⵉⴷ ⴼ ⵡⴰⵜⵉⴳ ⵏ ⵓⵙⵙⴷⵓⵙ ⵏ ⵓⵙⵏⴼⵍ ⵏ ⵓⵙⵖⵏⵣⵉ ⴷ ⵜⴷⴰⵎⵙⴰ ⵊⴰⵔ ⵜⵎⵉⵣⴰⵔ ⵏ ⵓⵎⵏⵥⴰⵡ ⴰⴼⵔⵉⵇⵉ ⴷ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵏⵏⵙⵏⵜ, ⵢⵉⵏⵉ:”ⵏⴷⵔⵓ ⴽⵉⴳⴰⵏ ⵏ ⵜⵖⴰⵡⵙⵉⵙⵏ, ⵖⵓⵔⵏⵖ ⴰⵏⴰⵔⵓⵣ ⴰⴷ ⴱⴷⴷⵏⵜ ⵜⵎⵓⴽⵔⵉⵙⵉⵏ  ⵉⴳⴰⵏ ⵜⴰⴱⴱⴰⵢⴹⴰⵕⵜ ⵏ ⵜⵣⵣⵉⴳⵣⵜ ⵏ ⵓⵎⵏⵥⴰⵡ”.