ⵜⴰⴳⵓⵔⵉ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵖ ⵓⵕⵥⵥⵓⵎ ⵏ ⵜⵙⵎⵓⵏⵉ ⵉⵛⵛⴰⵔⵏ ⵏ ⵙⵏⴰⵜ ⵜⵙⵇⵇⵉⵎⵉⵏ ⵏ ⵓⴱⵕⵍⴰⵎⴰⵏ ⴽⵓ-ⵉⴼⵔⵉⵇⵢⴰ

ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ,

ⵎⴰⵙⵙ ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⴰⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ,

ⵎⴰⵙⵙ ⴰⵎⴰⵡⵙⴰⵙ ⵉⵜⵜⵓⵙⵎⴰⴳⴰⵍⵏ ⵙ ⵓⵎⵢⴰⵡⴰⵙ ⴰⴼⵔⵉⵇⵉ,

ⵎⴰⵙⵙⴰ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ,

ⵎⴰⵙⵙ ⴰⵎⴰⵍⴰⵍ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵓⵙⵖⵏⵣⵉ ⴷ ⵜⵎⴳⵓⵔⵉ,

ⵎⴰⵙⵙ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵓⵙⵖⵏⵣⵉ ⴷ ⵜⴷⵉⵡⴰⵏⵜ ⴷ ⵜⵣⵡⴰⴳⵜ,

ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵎⵏⴰⴹⵉⵏ ⵏ ⵉⴼⴼⵓⵙ ⵏ ⵉⴼⵔⵉⵇⵢⴰ,

ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵙⵏⴰⵜ ⵜⵙⵇⵇⵉⵎⵉⵏ ⵉⴷⵔⵓⵏ ⵖ ⵜⵙⵎⵓⵏⵉ ⴰⴷ ⵉⵛⵛⴰⵔⵏ,

ⵉⵏⴱⴳⵉⵡ ⵏⵏⵖ, ⵉⵏⴱⴳⵉⵡⵏ ⵏ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ,

ⴰⴳⴷⵓⴷ ⵉⵍⴰⵏ ⴰⴷⴷⵓⵔ. 

ⵉⴼⴰⵡ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⴼⵔⵉⵇⵉ ⵖ ⵕⵕⴱⴰⵟ, ⴰⵏⵎⵓⵇⵇⴰⵔ ⵉⴳⴰⵏ ⴰⵎⴰⴷⴷⴰⵙ ⴷ ⴰⵜⵉⵇⵏⵉ ⴷ ⴰⵙⴳⵓⵎⴰⵏ, ⴰⵔ ⴷ ⵉⵍⴷⴷⵉ ⵉⵙⵡⵉⵏⴳⵉⵎⵏ ⴷⴰⵔ ⵓⴼⴳⴰⵏ ⵙ ⴽⵉⴳⴰⵏ ⵏ ⵓⵖⵣⴰⵏ ⴷ ⵓⵎⵔⵔⵡⴰⵢ, ⵙⵍⴰⵡⴰⵏ ⴰⴽⴽⵯ ⵉ ⵏⴽⴽⵏⵉⵏ ⵉⵍⵍⴰⵏ ⵖ ⵉⵥⵥⵍⵎⴹ  ⵏ ⵉⴼⵔⵉⵇⵢⴰ, ⵙ ⵜⵖⴰⵔⴰⵙⵜ ⵉⵥⵍⵉⵏ ⴷⴰⵔ ⵍⵎⵖⵔⵉⴱ ⵍⵍⵉ ⵉⵜⵜⵃⵉⵢⵢⴰⵍⵏ ⴰⴷ ⵜⴳ ⵜⵎⴰⵥⵓⵏⵜ ⵏⵏⵙ ⵖ ⵎⴰⵏⵏ ⵓⵔ ⵢⴰⴳⴳⵓⴳⵏ ⵜⴰⵎⴰⵥⵓⵏⵜ ⵏ ⵜⴷⵍⵙⴰ ⵜⴰⴼⵔⵉⵇⵉⵜ ⵉ ⵜⵉⵣⵉ ⵏ ⵓⵙⴳⴳⵯⴰⵙ, ⵍⵎⵖⵔⵉⴱ ⵍⵍⵉ ⵉⴳⴰⵏ ⵖ ⵜⵎⵉⵣⴰⵔ ⵜⵉⵎⵣⵡⵓⵔⴰ ⴷⵔⵓⵙⵏⵉⵏ ⵉⵙⴽⵔⵏ ⵜⴰⵎⴰⴷⴷⴰⵙⵜ ⵏ ⵜⴰⵢⴰⵏⵜ ⵜⴰⴼⵔⵉⵇⵉⵜ (ⴰⵙⵙ ⴰⴷ ⵜⵜⵓⵙⵎⵎⴰ ⵜⴰⵎⵓⵏⵜ ⵜⴰⴼⵔⵉⵇⵉⵜ), ⵍⵎⵖⵔⵉⴱ ⵍⵍⵉ ⴷⴰⵖ ⵉⴷⴷⵔⵏ ⵙ ⵡⴰⵏⵢⴰ ⵏ ⵉⴼⵔⵉⵇⵢⴰ - ⵎⵍⵍⵉⵖ ⵢⵓⵔⵔⵉ ⵙ ⵜⴰⴷⴷⴰⵔⵜ ⵏⵏⵙ ⵜⴰⴼⵔⵉⵇⵉⵜ- ⵖ ⵜⵖⵔⵎⴰ ⴷ ⵜⴷⵍⵙⴰ ⴷ ⵓⵙⵡⵉⵏⴳⵎ ⴷ ⵜⵙⵔⵜⵉⵜ ⴷ ⵜⴷⵉⴱⵍⵓⵎⴰⵙⵉⵜ ⴷ ⵜⴷⴰⵎⵙⴰ.

ⵏⴽⴽⵏⵉ ⵓⵔⴰ  ⵏⵥⵕⵕⴰ ⵉⴼⵔⵉⵇⵢⴰ ⵉⵙ ⵜⴳⴰ ⵢⴰⵏ ⵓⵥⴰⵥⵓ ⴰⵊⵓⵢⵓⵖⵔⴰⴼⵉ ⵉⵇⵇⵏ, ⴰⴷ ⵜⴳⴰ ⴷ ⵢⴰⵏ ⵓⵎⵏⵥⴰⵡ ⵉⴳⴰⵏ ⴱⴷⴷⴰ ⴰⵖⴱⴰⵍⵓ ⵉ ⵜⵖⵔⵎⴰ ⵜⴰⵎⵖⵔⵉⴱⵉⵜ, ⵖ ⵓⵎⵣⵔⵓⵢ ⴷ ⵜⵎⴽⵯⵜⵉⵜ ⵏ ⵉⵎⵖⵔⵉⴱⵉⵢⵏ ⵎⴰⵕⵕⴰ, ⵓⴼⵔⵉⴷⵏ ⵓⵍⴰ ⵜⵉⵔⵓⴱⴱⴰ, ⵖ ⵓⵥⵟⵟⴰ ⵏⵏⵖ ⴰⴷⵍⵙⴰⵏ ⴷ ⵓⵙⵏⵉⵍⵙ, ⵖ ⵜⵎⴰⴳⵉⵜ ⵏⵏⵖ ⴷ ⵜⴼⴳⵏⴰⵏⵉⵜ ⵏⵏⵖ, ⵖ ⵉⵖⴰⵡⴰⵙⵏ ⵏⵏⵖ ⵉⴱⵉⴷⴰⴳⵓⵊⵉⵢⵏ ⴷ ⵉⴷⵍⵉⵙⵏ ⵏⵏⵖ ⵉⵏⵎⵍⴰⵏⵏ, ⵖ ⵉⵡⵏⵏⴰⵏ ⵏⵏⵖ ⵏ ⵓⵥⴰⵡⴰⵏ ⴷ ⵜⴽⴰⵍⵉⴳⵕⴰⴼⵉⵜ ⴷ ⵜⵥⵓⵕⵉ ⴷ ⵙⵙⵉⵏⵉⵎⴰ ⴷ ⵡⵉⵢⵢⴰⴹ. ⵏⵥⴹⴰⵕ ⴰⴷ ⵏⵓⵔⵔⵉ ⵙ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵃⵎⴰ ⴰⴷ ⵏⵏ ⴳⵉⵙ ⵏⴰⴼⵉ ⴰⵎⵏⴰⴷ ⴰⴼⵔⵉⵇⵉ ⵉⴼⴰⵡⵏ ⵖ ⵜⵣⵡⴰⵔⵓⵜ  ⵏ ⵓⴹⵕⵉⵚ ⵏⵏⵙ ⴷ ⵓⴳⵯⵏⵙ ⵏⵏⵙ ⴷ ⵜⵣⴷⴰⵢⵜ ⵏⵏⵙ ⵜⴰⵙⵉⵍⴰⵏⵜ ⴷ ⵓⵎⵏⵥⴰⵡ. ⵙ ⵖⵉⴽ ⴰⵏⵏ, ⵜⴽⴽⴰ ⵜⵜⵉⵏⵏ ⵜⵣⴷⴰⵢⵜ ⵊⴰⵔ ⵍⵎⵖⵔⵉⴱ ⴷ ⵉⴼⵔⵉⵇⵢⴰ ⵜⴳⴰ ⵜⵉⵏ ⵉⵍⵉ, ⵖⵎⴽ ⴰⵏⵏ ⴰⴷ ⵏⵉⵜ ⵙⵓⵍ ⵜⴳⴰ, ⴷ ⵖⵎⴽ ⴰⵏⵏ ⴰⵔ ⴰⴷ ⴱⴷⴷⴰ ⵜⴳ. ⵡⴰⵅⵅⴰ ⵏⵏ ⵜⴰⴳⴳⵓⴳ ⵜⴳⵍⴷⵉⵜ ⵙ ⵉⵎⵉⴽⴽ ⵖ ⵜⴰⴷⴷⴰⵔⵜ ⵏⵏⵙ ⵜⴰⴼⵔⵉⵇⵉⵜ ⵜⵓⵏⵚⵉⴱⵜ, ⵀⴰ ⵏⵏ ⵓⵔ ⴰⴽⴽⵯ ⴱⴱⵉⵏⵜ ⵜⵣⴷⴰⵢⵉⵏ ⵏⵏⵙ ⴷ ⴽⵉⴳⴰⵏ ⴷ ⴰⵢⵜⵎⴰⵙ ⴷ ⵉⵎⴷⴷⵓⴽⴽⵯⴰⵍ ⵖ ⵓⵎⵏⵥⴰⵡ, ⵖⵎⴽ ⴰⵏⵏ ⴷ ⵜⵎⵙⴰⵔⵉⵏ ⵜⵉⵙⵉⵍⴰⵏⵉⵏ ⵖ ⵉⴼⵔⵉⵇⵢⴰ, ⵉⵙ ⴰⴽⴽⵯ ⵉⵣⵣⵉⴳⵣ ⵓⴷⵔⴰⵡ ⴰⵎⵖⵔⵉⴱⵉ ⵖ ⵓⵏⴳⵔⴰⵡ ⴰⴼⵔⵉⵇⵉ, ⵉⴳⴰ ⵓⵏⵚⵉⴱ ⵏⵖ ⴰⵎⴰⴷⴰⵏ, ⵣⵣⵉⴳⵣⵏ ⵓⵍⴰ ⵉⵔⵣⴰⴼⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ ⵉ ⵉⴼⵔⵉⵇⵢⴰ ⵙ ⵢⴰⵜ ⵜⵖⴰⵔⴰⵙⵜ ⵜⴰⵔⵎⵢⵓⵔⵜ, ⵎⴰ ⴰⵏⵏ ⴰⴷ ⵉⵙⵙⵔⵅⴰⵏ ⴰⴷ ⵢⵓⵔⵔⵉ ⵍⵎⵖⵔⵉⴱ ⵉ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵙ ⵜⵥⵢⵓⴹⵉ, ⵙ ⵜⵖⴰⵔⴰⵙⴰⵜ ⵍⵍⵉ ⴼ ⴽⵓⵍⵍⵓ ⵜⴽⵜⵉⵎ.

ⵉⵏⴱⵉⴳⵡⵏ ⵏⵏⵖ ⵄⵣⵣⴰⵏⵉⵏ;

ⵉⵇⵇⴰⵏ ⴷ ⴰⴷ ⴽⵓⵍⵍⵓ ⵙⵔⵓⵏ ⵙⴱⵔⵔⴽⵖ ⵖ ⵜⵎⴰⵣⵉⵔⵜ ⵏⵏⵓⵏ ⵜⵉⵙ ⵙⵏⴰⵜ, ⵍⵎⵖⵔⵉⴱ. ⵉⵇⵇⴰⵏ ⴷ ⵓⵍⴰ ⴰⴷ ⵙⵙⵓⵜⴳⵖ ⵜⵉⵍⴰⵍⵜ ⵜⵓⴷⴷⵉⵔⵜ ⵉⴼⴰⵡⵏ ⴷⴰ ⵙⴽⴰⵔⵏ ⴰⵢⵜⵎⴰⵜⵏ ⴷ ⵉⵎⴷⴷⵓⴽⴽⵯⴰⵍ ⵖ ⵓⴱⵕⵍⴰⵎⴰⵏ ⵏ ⴽⵓ-ⵉⴼⵔⵉⵇⵢⴰ, ⵙ ⵜⵣⴷⴰⵢⵜ ⵉⴼⴰⵡⵏ ⴷ ⵉⵙⵡⴰⵍⴰⵜⵏ ⵉⵎⴰⵜⴰⵢⵏ ⵍⵍⵉ ⵜⵙⵔⵙⵔ ⵜⵎⴰⴷⴷⴰⵙⵜ ⵜⴰⵅⴰⵜⴰⵔⵜ ⵉ ⵢⵉⵅⴼ ⵏⵏⵙ ⴷ ⵉⴳⵎⴰⵎⵏ ⵏⵏⵙ, ⵖⵎⴽ ⴰⵏⵏ ⴷ ⵜⴼⵍⵙⴰⴼⵜ ⵏⵏⵙ ⵃⵎⴰ ⴰⴷ ⵉⴳ ⵢⴰⵏ ⵓⴳⵕⴹ ⵏ ⵉⵎⴰⴷⴰⵏⵏ ⵏ ⵉⴼⵔⵉⵇⵢⴰ ⴽⵓⵍⵍⵓ ⵜⵏ. ⴰⵏⵎⵓⵇⵇⴰⵔ ⴰⴷ ⴷ ⴰⵣⵎⵣⵣⵓ ⴰⴷ ⵙⵙⵓⵜⴳⵖ ⵓⵍⴰ ⵙ ⵜⵓⴳⴳⴰⵙ ⵏ ⵓⵏⵙⵙⵉⵅⴼ ⵏ ⵖⵉⵍⴰⴷ ⵎⴰⵙⵙ ⵕⵓⵊⵉ ⵏⴽⵓⴷⵓ Roger NKODO, ⵖⵎⴽ ⴰⵏⵏ ⴷ ⵜⵎⵉⵔⵉⵜ ⵜⴰⵎⴰⵜⴰⵢⵜ ⴷ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⴷ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵓⴳⵏⵙ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵍⵍⵉ ⵉⵙⴳⵓⴷⵉⵏ ⵜⴰⵡⵓⵔⵉ ⵉⵥⵉⵍⵏ ⴷ ⵜⵉⵍⵉⵜ ⵉⵕⵡⴰⵏ ⵖ ⵓⵙⴰⵢⵔⴰⵔ ⵏⵏⵖ ⴰⴱⵕⵍⴰⵎⴰⵏⵉ ⴰⴼⵔⵉⵇⵉ.

ⵉⵍⵍⴰ ⵡⴰⴷⴷⵓⵔ ⴷⴰⵔ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⴷ ⵉⵙⴱⴱⵔⴽ ⴰⵏⵎⵓⵇⵇⴰⵔ ⴰⴷ ⵅⴼ ⵜⵎⵙⴰⵔⵉⵏ ⵜⵉⵙⵉⵍⴰⵏⵉⵏ ⵉⵀⵎⵎⴰⵏ ⵉⴼⵔⵉⵇⵢⴰ ⴰⵙⵙ ⴰⴷ ⵓⵍⴰ ⵉⵎⴰⵍ. ⵉⴳⴰ ⵢⴰⵏ ⵓⵏⵎⵓⵇⵇⴰⵔ ⴷ ⵢⵓⵛⴽⴰⵏ ⵖ ⵢⴰⵜ ⵜⴼⵔⴽⴰ ⵖ ⵍⵍⴰⵏ ⵉⵙⵏⴼⵍⵏ ⵥⵍⵉⵏⵉⵏ ⵉⵔⴰⵏ ⴰⴷⴷ ⵜⴰⵡⵉ ⴽⵉⴳⴰⵏ ⵏ ⵓⵙⵙⴷⵓⵙ ⵏ ⵜⵎⵙⴽⴰⵔ ⵜⵉⴷⵉⵎⵓⵇⵔⴰⵟⵉⵢⵉⵏ ⴷ ⵓⵡⵇⵔⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵃⵟⵟⵓ ⵏ ⵜⵓⵚⴽⵉⵡⵉⵏ ⵏ ⵓⵡⴰⵏⴽ ⴰⵏⴰⵎⵓⵔ; ⴳⴰⵏⵜ ⵜⵉⵔⵙⴰⵍ ⵍⵍⵉ ⵔⴰⴷ ⵉⵙⵙⴷⵓⵎ ⴰⵔⴳⴳⵉⴳ ⴷ ⵜⵏⴼⵔⵓⵜ ⴷ ⵜⴳⵎⵉ ⵍⵍⵉ ⵔⴰⴷ ⵉⴳ ⵖ ⵚⴰⵃⴰ ⵏ ⵉⵎⴰⴷⴰⵏⵏ ⵏⵏⵖ ⵉⴼⵔⵉⵇⵉⵢⵏ. ⵖⵎⴽ ⵍⵍⵉ ⵔⴰⴷ ⴰⵡⵙⵏⵜ ⴼ ⵓⵃⵟⵟⵓ ⵏ ⵓⵎⵏⵥⴰⵡ ⵎⴳⴰⵍ ⵏ ⵜⴰⵙⵙⴰⵙⵉⵏ ⵏ ⵓⵎⵔⵡⵉ ⴷ ⵜⴽⵕⴹⵉ ⴷ ⵓⵔⴱⴰⴱ ⵡⴰⵔⵓⵍⴳⵉⵏ ⴷ ⵓⴱⴽⴽⵉⴹ ⵉⵜⵜⵓⵙⵏⵎⴰⵍⴰⵏ ⴷ ⵓⵙⵖⵍⵍⵓ ⵏ ⵉⴼⴳⴰⵏⵏ ⴷ ⵜⵣⵡⴰⴳⵜ ⵜⴰⵔⵓⵍⴳⵉⵏⵜ

ⵀⴰⴷ ⴰⵏⵎⵓⵇⵇⴰⵔ ⴰⴷ ⵏⵏⵖ ⵉⵜⵜⵓⵙⵏⵎⴰⵍⴰ ⵖ ⵢⴰⵏ ⵓⵣⵎⵣ ⵖ ⵉⵍⵍⴰ ⵓⵎⵍⵉⵡⵍ ⴷⴰⵔ ⴽⵉⴳⴰⵏ ⵏ ⵉⵡⴰⵏⴽⵏ ⵖⵎⴽ ⴰⵏⵏ ⴷ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵜⴷⵓⵙⵉ ⵅⴼ ⵎⴰⵎⵏⴽ ⵔⴰⴷ ⵢⵉⵍⵉ ⵓⴼⵏⴰ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⵉⴳⴰⵏ ⵓⵏⵥⵉⵢ, ⵍⵍⵉⵖ ⵍⵍⴰⵏⵜ ⵜⵓⴳⵜ ⵏ ⵉⵏⵎⵎⴰⵍⵏ ⵍⵍⵉ ⵎⵎⴰⵍⵏⵉⵏ ⵎⴰⵙ ⵜⵍⵍⴰ ⵢⴰⵜ ⵜⴰⵙⵙⴰⵙⵜ ⵏ ⵜⵉⴷⵜ, ⴷ ⵎⴰⵙ ⵜⵎⵎⴰⵜⵜⵉ ⵜⵎⴰⴹⵓⵏⵜ ⴰⴷ ⵙⴳ ⵓⵙⵡⵉⵔ ⵏ ⵜⴰⵙⵙⴰⵙⵜ ⵏ ⵜⴷⵓⵙⵉ ⵙ ⵜⴰⵙⵙⴰⵙⵜ ⵏ ⵜⴷⴰⵎⵙⴰ ⴷ ⵓⵙⵖⵏⵣⵉ ⴷ ⵓⵥⵕⴼ. ⵏⴽⵚⵓⴹ ⴰⴷ ⵜⴻⵟⵟⵉⴼ ⵜⴰⵙⵙⴰⵙⵜ ⴰⴷ ⵉⴷⵔⵉⵣⵏ  ⴼ ⵓⵎⵏⵥⴰⵡ ⵏⵏⵖ, ⵖ ⵓⵣⵎⵣ ⵍⵍⵉⵖ ⵜⵣⵣⵉⴳⵣ ⵉⴼⵔⵉⵇⵢⴰ ⵎⵣⵢⴰⵏ ⵖ ⵜⴷⵎⵙⴰⵡⵉⵏ ⵏⵏⵙ ⴷ ⵉⵙⵏⴼⵍⵏ ⵏⵏⵙ ⴰⴽⴷ ⵓⵎⴰⴹⴰⵍ ⵖ ⵉⵙⵡⵉⵔⵏ ⴰⴽⴽⵯ.

ⵜⵍⵍⴰ ⵉⴼⵔⵉⵇⵢⴰ ⵖⵉⵍⴰⴷ ⵖ ⵡⴰⵎⵎⴰⵙ ⵏ ⵉⵏⴰⵔⵓⵣⵏ ⵉⴳⵔⴰⵖⵍⴰⵏⵏ ⵏ ⵓⵣⵎⵣ ⵏⵏⵖ, ⵜⴳ ⵖ ⵓⴳⵏⵙ ⵏ ⵉⵙⵓⴼⵏ ⵏ ⵜⵎⵉⵣⴰⵔ ⵎⵇⵇⵓⵔⵏⵉⵏ ⴷ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⵏ ⵜⴷⴰⵎⵙⴰ ⴷ ⵓⵥⵕⴼ, ⵍⵍⵉⵖ ⴳⴳⵓⵜⵏ ⵉⵎⵣⴷⴰⵖⵏ ⵏⵏⵙ ⵍⴽⵎⵏⵉⵏ 1.3 ⵎⵍⵢⴰⵕ ⵏ ⵓⵎⵣⴷⴰⵖ, ⵢⵉⴳⵓⵜ ⵓⵍⴰ ⵓⴳⵓⴷⵎ ⵏⵏⵙ, ⵎⵢⴰⵏⴰⵡⵏⵜ ⵓⵍⴰ ⵜⵥⵉⴹⴰⵕ ⵏⵏⵙ ⵜⵉⴳⴰⵎⴰⵏⵉⵏ ⴷ ⵜⴳⴰⵡⵎⵍⴰⵏⵉⵏ ⴷ ⵜⴰⵔⴳⴰⵡⵎⵍⴰⵏⵉⵏ ⵍⵍⵉ ⴼ ⵓⵔⵜⴰ ⵉⵍⵍⵉ ⵓⵙⵙⴰⵔⵓ ⵙ ⵎⴰⴷ ⵉⴳⵓⵎⵏ ⴷ ⵎⴰⴷ ⵢⵓⵙⴰⵏ.

ⵏⴽⴽⵏⵉ ⵏⴼⵔⴽ ⵙ ⵓⵙⵓⴼ ⴰⴷ ⵉⵍⵍⴰⵏ ⴷⴰⵔ ⴽⵓ ⵢⴰⵏ ⵙ ⵡⴰⵜⵉⴳ ⴰⴷ ⴰⵅⴰⵜⴰⵔ. ⵙⵍⴰⵡⴰⵏ ⴰⴽⴽⵯ ⵙ ⵉⴳⵔⴰⵡⵏ ⵉⵜⵜⵓⵙⵏⵎⴰⵍⴰⵏ ⵊⴰⵔ ⵎⴰⵔⵉⴽⴰⵏ ⴷ ⵉⴼⵔⵉⵇⵢⴰ, ⵊⴰⵔ ⵔⵓⵙⵉⵢⴰ ⴷ ⵉⴼⵔⵉⵇⵢⴰ, ⵊⴰⵔ ⵊⴰⴱⴱⵓⵏ ⴷ ⵉⴼⵔⵉⵇⵢⴰ, ⵊⴰⵔ ⵛⵛⵉⵏⵡⴰ ⴷ ⵉⴼⵔⵉⵇⵢⴰ. ⵎⴰ ⴰⴷ ⴰⵔ ⵏⵉⵜ ⵉⵎⵎⴰⵍ ⴰⵏⴰⵎⴽ ⵉⵖ ⵏⴻⵏⵏⴰ ⵎⴰⵙ ⵜⴳⴰ ⵉⴼⵔⵉⵇⵢⴰ ⴰⵎⵏⵥⴰⵡ ⵏ ⵉⵎⴰⵍ, ⵎⴰⵛⵛ ⵉⵇⵇⴰⵏ ⴷ ⴰⴷ ⵏⵙⵇⵙⴰ: ⵎⴰⵎⵏⴽ ⵙ ⵔⴰⴷ ⵏⵙⵢⴰⴼⴰ ⴰⵙⵓⴼ ⴰⴷ ⵃⵎⴰ ⴰⴷ ⵉⴳ ⵖ ⵚⴰⵃⴰ ⵏ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ?

ⴰⵔ ⵥⵕⵕⴰⵖ ⵎⴰⵙ ⵔⴰⴷ ⵓⵔ ⵉⵜⵜⵓⵙⴽⵉⵔ ⵓⵎⵏⵉⴷ ⴰⴷ  ⴰⴱⵍⴰ ⵖ ⵢⴰⵜ ⵜⵙⵜⵕⴰⵜⵉⵊⵉⵜ ⵏ ⵓⵎⵢⴰⵡⴰⵙ ⵉⴳⴰⵏ ⵜⵉⵏ ⵉⴼⴼⵓⵙ-ⵉⴼⴼⵓⵙ ⵍⵍⵉ ⵔⴰⴷ ⵉⵙⴳⵉⴷⴷⵉ ⵜⴰⵎⴰⵎⴽⵜ ⵏⵏⵖ ⵜⴰⴼⵔⵉⵇⵉⵜ ⵖ ⵜⴳⵎⵉ ⴷ ⵓⵙⵜⴰⵢ ⴷ ⵓⵙⵎⴰⵇⵇⵍ  ⴷ ⵜⵣⵡⵉⵔⵉ ⵏ ⵉⵖⴰⵡⴰⵙⵏ ⴷ ⵜⵙⵔⵜⴰⵢ. ⵖ ⵓⵙⴰⵜⵉ ⴰⴷ, ⵉⵕⵥⵎ ⵍⵎⵖⵔⵉⴱ ⴰⵙⴰⵡⵓⵔ ⴰⴷ ⵏ ⵉⴼⴼⵓⵙ-ⵉⴼⴼⵓⵙ ⵖ ⵢⴰⵏ ⵡⴰⵏⴰⵡ ⵍⵍⵉ ⵉⵙⵙⵕⵚⴰⵏ ⴰⵙⵙ ⴰⴷ ⵜⵉⵕⵡⵉ ⵏⵏⵙ ⴷ ⵡⴰⵜⵉⴳ ⵏⵏⵙ ⴰⵙⴰⵖⵓⵍ.

ⵍⵍⵉⵖ ⴰ ⵏⵜⵜⵎⴷⴰⵡⴰⵍ ⵅⴼ ⵢⴰⵏ ⵉⵎⵔⵙⵉ ⴰⵙⵜⵔⴰⵜⵉⵊⵉ ⵡⴰⴷ ⵏ ⵓⵙⵖⵏⵣⵉ ⵊⴰⵔ ⵜⵉⵎⵉⵣⴰⵔ ⵏ ⵉⴼⵔⵉⵇⵢⴰ ⵖ ⵓⵎⵏⴰⴹ ⵏ ⵜⵙⴳⴰ ⵜⵉⵍⴻⵍⵍⵉⵜ ⵏ ⵓⵙⵏⴼⵍ ⴰⵎⵏⵥⴰⵡ ⴰⴼⵔⵉⵇⵉ (ZLECAF), ⵉⵀⵎⵎⴰ ⵢⵢⵉ ⵖ ⵜⴳⵓⵔⵉ ⴰⴷ ⴰⴷ ⵙⴷⴷⵉⴷⵖ ⴼ ⵓⵛⵛⵉⵍ ⵏ ⵡⴰⵣⵣⴰⵣ ⵏ ⵡⴰⵏⵢⴰ ⵏ ⵓⵙⵉⴷⴼ ⴰⴷⵎⵙⴰⵏ ⴰⵏⵎⵏⴰⴹ ⵖ ⵜⴰⵎⵜ ⵜⵔⵓⴱⴱⴰ ⵉⵙⵎⵓⵏⵏ ⵜⵉⴳⵎⵉ ⵜⴰⵏⵎⵏⴰⴹⵜ ⵏ ⵓⵎⵏⵥⴰⵡ ⵏⵏⵖ. ⵎⴰⵢⴰⴷ ⴰⵔ ⴰⴷ ⵉⴳ ⴰⵙⴰⵜⵉ ⴰⴳⴰⵎⴰⵏ ⵍⵍⵉ ⵔⴰⴷ ⵉⵙⴽⵔ ⵖ ⵜⵙⴳⴰ ⵏ ⵓⵙⵏⴼⵍ ⴰⵍⴻⵍⵍⵉ ⴰⴼⵔⵉⵇⵉ, ⵉⵎⵉⴽⴽ ⵙ ⵉⵎⵉⴽⴽ, ⵢⴰⵜ ⵜⵉⵍⴰⵡⵜ ⵉⴷⴷⵔⵏ ⵉⴳⴰⵏ ⵚⴰⵃⴰ ⵏ ⵉⵎⴰⴷⴰⵏⵏ ⵏⵏⵖ.

ⵎⴰⵢⴰⴷ ⴰⵔ ⵢⵢⵉ ⵉⵜⵜⴰⵡⵉ ⴰⴷ ⵉⵏⵉⵖ ⵢⴰⵏ ⵓⵎⵙⵉⴳⵉⵔ ⵉⴳⴰⵏ ⴰⵔⵙⵍⴰⵏ  ⵖ ⵓⵎⵏⴰⴹ ⴰⴷ ⵏⵏⵖ, ⵖ ⵜⵉⴼⴰⵡⵜ ⵏ ⵜⴰⵙⵙⴰⵙⵜ ⵏ ⵜⴷⵓⵙⵉ ⴷ ⵉⴷⵔⵉⵣⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵖ ⵜⵓⴳⵜ ⵏ ⵜⵎⵉⵣⴰⵔ, ⴷ ⵓⵎⵍⵉⵡⵍ ⵍⵍⵉ ⴷⵉⵙⵙ ⵉⵎⵓⵏⵏ , ⵉⵇⵇⴰⵏ ⴷ ⵓⵣⵣⵔⴰⵢ ⵉ ⵉⵍⵓⴳⵏⵏ ⵏ ⵜⵙⵎⴰⴹⴰⵍⵜ, ⵢⴰⵏ ⵓⵣⵣⵔⴰⵢ ⵉⵜⵜⴰⵡⵉⵏ ⵙ ⵓⵙⵙⵍⴳⵏ ⵏ ⵓⵙⵏⴼⵍ ⵉⵍⴻⵍⵍⵉ ⵉⵥⵥⵍⵎⴹ-ⵉⴼⴼⵓⵙ ⵍⵍⵉⵖ ⴳⵉⵙ ⵙⵙⵓⵜⵍⵏⵜ ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ ⴷ ⵜⴱⴱⴰⵢⴹⴰⵕⵉⵏ ⵉ ⵓⴱⴰⴹ ⵏ ⴽⵉⴳⴰⵏ ⵏ ⵜⵎⵉⵣⴰⵔ.

ⵉⴳⴰ ⵖ ⵓⵏⵉⵔⵢ ⵎⴰⵙ ⴰ ⵉⵎⵎⴰⵍ ⵓⵎⵔⴰⵙ ⵏ ⵖⵉⵍⴰⴷ ⵜⵉⴷⴰⵜ ⴰⴷ ⵓⵔ ⵢⴰⵙⵜⵡⴰⵏ, ⵍⵍⵉⵖ ⵉⵟⵟⴰⴼ ⵓⵎⵏⵥⴰⵡ ⴰⴼⵔⵉⵇⵉ ⵉⵙⵓⴳⵓⵎ ⴷ ⵉⵢⴰⴼⵓⵜⵏ ⵙⵜⴰⵡⵀⵎⵎⴰⵏⵉⵏ ⴳⴰⵏⵉⵏ ⵉⵎⵏⵏⴰⵡⵏ, ⵎⴰⵛⵛ ⴰⴷⵖⴰⵔ ⴷ ⵜⵔⴰⵔⵉⵢⵜ ⵏⵏⵙ ⵎⵥⵥⵉⵏ ⵓⴽⴰⵏ ⵙⵓⵍ ⵉⵖ ⵏⵥⵕⴰ ⵜⴰⵔⴰⵔⵉⵢⵜ ⵏ ⵜⵙⴳⴳⵉⵡⵉⵏ ⵏ ⵓⵙⵏⴼⵍ ⵏ ⵓⵙⵖⵏⵣⵉ ⴷ ⵜⴷⵎⵙⴰⵡⵉⵏ ⵢⴰⴹⵏⵉⵏ. ⵓⵔ ⵊⵊⵓ ⵏⵏ ⵉⵣⵔⵉ ⵓⵎⵏⵥⴰⵡ ⵏⵏⵖ ⵜⴰⵙⴽⴼⵍⵜ ⵏ 2 % ⵖ ⵓⵙⵖⵏⵣⵉ ⴰⴳⵔⴰⵖⵍⴰⵏ ⴽⵓⵍⵍⵓ ⵜ.

ⵏⴳⵔ 2015 ⴷ 2017, ⵓⵔ ⴷ ⴼⵍⵏ ⵉⵙⵏⴼⵍⵏ ⵉⴼⵔⵉⵇⵉⵢⵏ ⴰⴱⵍⴰ 760 ⵎⵍⵢⴰⵕ ⴷⵓⵍⴰⵕ ⵖ ⵓⵣⵎⵣ ⵍⵍⵉⵖ ⵍⴽⵎⵏ ⵉⴼⵔⴰⵢⵏ ⵏ ⵓⵕⵓⴱⴱⴰ 4110 ⵎⵍⵢⴰⵕ ⴷⵓⵍⴰⵕ, ⴷ 5140 ⵎⵍⵢⴰⵕ ⴷⵓⵍⴰⵕ ⵖ ⵎⴰⵔⵉⴽⴰⵏ, ⴷ 6800 ⵎⵍⵢⴰⵕ ⴷⵓⵍⴰⵕ ⵖ ⴰⵙⵢⴰ. ⵓⵔ ⴰⴽⴽⵯ ⵙⵓⵍ ⵙⵖⴰⵡⵙⴰⵖ ⴰⴷ ⴼⴽⵖ ⴽⵉⴳⴰⵏ ⵏ ⵉⵎⴷⵢⴰⵜⵏ ⵉⴼⴰⵡⵏ ⵏ ⵓⵎⵉⴹⵕ ⵖ ⵓⴽⵛⵉⵎⵏ ⴷ ⵉⵙⵉⴼⴰⴹ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵉⵢⴰⴼⵓⵜⵏ ⵏ ⵜⵉⵔⵎⵜ ⴷ ⵉⵎⴰⵙⵙⵏ ⴷ ⵉⵎⵍⴰⴹ ⵉⵜⵜⵓⵙⴽⴰⵔⵏ, ⵜⵍⵇⵎⵜ ⴰⵙ ⴰⵢⵍⵍⵉ ⵙ ⵉⵙⵖⴰⵡⵙⴰ ⵓⵎⵏⵥⴰⵡ ⵖ ⵉⵎⵍⴰⴹ ⵉⵎⵙⴰⵔⵉⵜⵏ ⵢⴰⴹⵏⵉⵏ ⴷ  ⵉⵣⵓⵖⴰⵣ ⴷ ⵡⵉⵢⵢⴰⴹ…

ⵡⴰⵅⵅⴰ ⵖⵉⴽⴰ ⴰⵏⵏ, ⵜⵍⵍⴰ ⵜⵉⴼⴰⵡⵜ ⵍⵍⵉⵖ ⵉⵙⴽⵔ ⵓⵙⵏⴼⵍ ⵏ ⵓⵙⵖⵏⵣⵉ ⵏⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵙⴳ ⵜⵉⵣⵡⵉⵔⵉ ⵏ ⵓⴼⴹⴳⴳⵯⴰⵙ ⴰⴷ ⵢⴰⵏ ⵡⴰⵏⵢⴰ ⵉⵙⵜⴰⵡⵀⵎⵎⴰⵏ ⵉⵍⴽⵎ 12.5%. ⵎⵍⴰ ⵜⵜⵓⵙⴽⴰⵔ ⵜⵙⵜⵔⴰⵜⵉⵊⵉⵜ ⵏ ⵜⵙⴳⴰ ⵜⴰⴼⵔⵉⵇⵉⵜ  ⵏ ⵓⵙⵏⴼⵍ ⵉⵍⴻⵍⵍⵉ ⵙ ⵜⵖⴰⵔⴰⵙⵜ ⵍⵍⵉ ⵙ ⴰⵙ ⵏⵙⵡⵉⵏⴳⵎ ⴷ ⵏⵙⵔⵙ ⵜⵜ, ⵖⵎⴽ ⵍⵍⵉ ⴷ ⵢⵓⵛⴽⴰⵏ ⵖ ⵢⴰⵜ ⵜⵖⵓⵔⵉ ⵜⵓⵏⵚⵉⴱⵜ ⵏ ⵓⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⵏ ⵓⵙⵖⵏⵣⵉ ⴷ ⵜⴳⵎⵉ, ⵔⴰⴷ ⵉⵍⴽⵎ ⵓⵎⵏⵥⴰⵡ ⵏⵏⵖ 33% ⵖ ⵢⵉⴳⵔ ⵏ ⵓⵙⵏⴼⵍ ⵏ ⵓⵙⵖⵏⵣⵉ ⵏⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ. ⵜⴳ ⵢⴰⵜ ⵜⴳⵎⴹⵉ ⵏ ⵜⵉⵍⴰⵡⵜ, ⵉⵇⵇⴰⵏ ⴷ ⴰⴷ ⵏⵎⵎⴰⵖ ⴰⴷ ⵜⵜⵓⵍⴽⵉⵎ ⵙ ⵓⵚⴽⵓ ⵏ ⵜⵙⴳⴰ ⴰⴷ ⵙ ⵜⴼⴰⴷⵉⵡⵉⵏ ⴷ ⵜⵎⵢⴰⴷⴰⵙⵜ ⵉⵍⵍⴰⵏ ⵖ ⵚⴰⵃⴰ ⵏ ⵓⵎⵏⵥⴰⵡ ⴷ ⵉⵎⴰⴷⴰⵏⵏ ⵏⵏⵙ. ⵉⵥⴹⴰⵕ ⵓⵎⵏⵉⴷ ⴰⴷ ⴰⴷ ⵉⵜⵜⵓⵙⴽⵉⵔ ⵉⵖ ⵜⵍⵍⴰ ⵜⵉⵔⴰⵜ ⵜⴰⵙⵔⵜⴰⵏⵜ ⵉⵎⵓⵏⵏ ⴷ ⵓⵙⵎⴰⵇⵇⵍ ⵉⴷⵔⴰⵏ ⴷ ⵉⵎⴰⵏ ⴰⵏⴰⵎⵓⵔ ⵉⵜⵜⵎⵏⴰⴷⵏ ⵉⵎⴰⵍ ⵢⵓⵎⵏⵏ ⵙ ⵓⵎⵣⵔⵓⵢ ⴷ ⵜⵥⵉⴹⴰⵕ ⵏ ⵉⵎⴰⴷⴰⵏⵏ ⵏ ⵉⴼⵔⵉⵇⵢⴰ ⴷ ⵓⴼⵓⵍⵍⵙ ⵏⵏⵙⵏ.

ⵎⴰⵢⴰⴷ ⴰⵔ ⵉⵎⵎⴰⵍ ⵓⵍⴰ ⵎⴰⵙ ⵜⵙⵖⴰⵡⵙⴰ ⵉⴼⵔⵉⵇⵢⴰ ⵙ ⵜⵓⴼⵔⵉⵏⵜ ⵜⴰⵙⵔⵜⴰⵏⵜ ⴷ ⵜⴷⵎⵙⴰⵏⵜ ⵜⴰⵎⴰⵢⵏⵓⵜ ⵉⴷⴷⵔⵏ ⵜⵉⵣⵉ ⵏⵏⵙ, ⵉⵙⵙⵉⵣⵡⵔⵏ ⴰⵣⵎⵣ, ⵉⵣⵡⵓⵔⵏ ⵜⵉⵙⵔⴰⴳⵉⵏ ⵜⵉⴱⵢⵓⵍⵓⵊⵉⵜⵉⵏ, ⵉⵙⵏⴼⵍⵏ ⵜⵉⵡⵏⴳⵉⵎⵉⵏ ⵉⵍⵍⴰⵏ, ⵉⵙⵙⵎⵖⵔⵏ ⵉⴳⵔⴰⵏ ⵏ ⵓⵙⴳⵎⵉ ⴷ ⵓⵙⵍⵎⴷ ⴷ ⵓⵙⵉⵍⵖ ⴷ ⵜⵙⴷⴰⵡⵉⵜ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵜⵙⵡⵓⵔⵉ ⴰⴷ ⵉⵎⵎⴰⵜⵜⵉ ⵓⵎⵉⴹⵕ ⵏ ⵓⵎⵏⵥⴰⵡ ⵏⵏⵖ ⵖ ⵉⴳⵔⴰⵏ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵖ ⵍⵍⴰⵏ ⵉⴼⵜⴰⵙⵏ ⴷ ⵉⵣⴰⴳⵯⵣⵏ ⴷ ⵉⴱⵔⴷⴰⵏ ⴳⴰⴷⴷⴰⵏⵉⵏ ⴷ ⵉⴱⵔⴱⵔⵉⴷⵏ ⴷ ⵉⴱⵔⴷⴰⵏ ⵏ ⵓⵣⵣⴰⵍ ⴷ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ ⴷ ⵜⵉⴽⵏⵓⵍⵓⵊⵉⵏⵜ ⵜⴰⵎⴰⵢⵏⵓⵜ ⵏ ⵓⵎⵢⴰⵡⴰⴹ, ⴷ ⵓⵣⵣⵔⴰⵢ ⵏ ⵜⵎⵙⴽⴰⵔ ⴷ ⵉⵣⵣⵔⴰⴼⵏ ⵏ ⵜⴷⵉⵡⴰⵏⵜ ⴷ ⵜⵎⵙⵙⵓⴳⵓⵔⵜ ⵍⵍⵉ ⵓⴽⴰⵏ ⵙⵓⵍ ⵉⴳⴳⵓⵜⵏ ⵉⵖ ⵏⵥⵕⴰ ⵜⵉⵏⴳⴳⵯⴰ ⵏⵏⵙⵏⵜ ⵖ ⵜⵙⴳⴳⵉⵡⵉⵏ ⵢⴰⴹⵏⵉⵏ ⵏ ⵓⵙⵖⵏⵣⵉ.

ⵖ ⵜⴳⵉⵔⴰ, ⵖⵓⵔⵉ ⵜⴰⵎⵢⵉⵎⴰⵏⵜ ⵉⵖⵥⴰⵏⵏ ⵎⴰⵙ ⵏⵙⵙⵏⵜⵉ ⴰⵔ ⵏⵜⴻⵟⵟⵉⴼ ⴰⵙⵎⴰⵇⵇⵍ ⵉⵛⵛⴰⵔⵏ ⵉⴼⴰⵡⵏ ⴼ ⴰⵢⵍⵍⵉ ⵙ ⵉⵙⵖⴰⵡⵙⴰ ⵡⴰⵣⵣⴰⵣ ⵏ ⵜⴷⴰⵎⵙⴰ ⴷ ⵓⵙⵖⵏⵣⵉ ⴷ ⵓⵚⴽⵓ ⴰⵏⴳⵎⵓ ⴰⴼⵔⵉⵇⵉ, ⵖⵎⴽ ⴰⵏⵏ ⴷ ⵜⵎⵣⵡⴰⵔⵉⵏ ⵏ ⵓⵎⵢⴰⵡⴰⵙ ⴷ ⵜⵡⵉⵣⵉ ⵉⴼⴼⵓⵙ-ⵉⴼⴼⵓⵙ, ⵖⵎⴽ ⴰⵏⵏ ⵓⵍⴰ ⴼ ⵓⵛⵛⵉⵍ ⴰⴷ ⵜⵉⵍⵉ (ⵉⴼⵔⵉⵇⵢⴰ ⵜⴰⵎⴰⵢⵏⵓⵜ), ⵎⴽ ⵍⵍⵉ ⴰⵙ ⵉⵙⵎⵎⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⴳⵍⵍⵉⴷ ⵏ ⵍⵎⵖⵔⵉⴱ, ⵖ ⵜⴱⵔⴰⵜ ⵏⵏⵙ ⵜⴰⴳⵍⴷⴰⵏⵜ ⵉ ⵓⵏⵎⵓⵇⵇⴰⵔ ⵡⵉⵙ ⵜⵥⴰ ⵏ ⵓⴼⵓⵕⵓⵎ ⵏ ⵜⴳⵎⵉ ⵉ ⵉⴼⵔⵉⵇⵢⴰ ⵖ ⵎⵕⵕⴰⴽⵛ ⵖ ⴽⵟⵓⴱⵕ 2014: “ ⵉⴼⵔⵉⵇⵢⴰ ⵜⴰⵎⴰⵢⵏⵓⵜ, ⵉⴼⵔⵉⵇⵢⴰ ⵉⵍⴰⵏ ⴰⴷⴷⵓⵔ ⵙ ⵜⵎⴰⴳⵉⵜ ⵏⵏⵙ, ⵉⵛⵛⵓⴽⴽⴰⵏ ⴰⵣⵎⵣ ⵏⵏⵙ, ⵉⴼⵔⵉⵇⵢⴰ ⵉⴳⴰⵏ ⵜⵉⵍⴻⵍⵍⵉⵜ ⵙⴳ ⵉⵙⴽⵔⴰⴼ ⵏ ⵜⴷⵢⵓⵍⵓⵊⵉⵜ ⴷ ⵜⵎⵓⴽⵔⵉⵙⵉⵏ ⵣⵔⵉⵏⵉⵏ, ⵉⴼⵔⵉⵇⵢⴰ ⵉⵣⵄⵎⵏ ⵉⵣⵡⵓⵔⵏ ⵙ ⵜⵙⵏⵜⴰⵢⵜ”. ⵎⴰⵢⴰⴷ ⵓⵔ ⴰⴽⴽⵯ ⵉⵛⵇⵇⵉ ⴼ ⵉⴼⵔⵉⵇⵢⴰ ⴷ ⵉⴼⵔⵉⵇⵉⵢⵏ ⵖ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⴷ ⵉⵄⵔⵔⵉⵎⵏ.

ⵜⴰⵏⵎⵎⵉⵔⵜ.