ⴰⵙⴱⵔⵔⴽ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵏ ⵜⵙⵎⵓⵏⵉ ⵉⵛⵛⴰⵔⵏ ⵏ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⵏ ⵓⵙⵖⵏⵣⵉ ⴷ ⵡⴰⵙⵙⴰⵢ ⵉⴹⴼⵕⵏ ⴰⴱⵕⵍⴰⵎⴰⵏ ⴰⴼⵔⵉⵇⵉ
ⵔⴰⴷ ⵉⵙⴱⵔⵔⴽ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵜⴰⵙⵎⵓⵏⵉ ⵉⵛⵛⴰⵔⵏ ⵏ ⵙⵏⴰⵜ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⵏ ⵓⵙⵖⵏⵣⵉ ⴷ ⵡⴰⵙⵙⴰⵢ ⵉⴹⴼⵕⵏ ⵉ ⵓⴱⵕⵍⴰⵎⴰⵏ ⴰⴼⵔⵉⵇⵉ, ⵖⵎⴽ ⴰⵏⵏ ⴷ ⵙⵏⴰⵜ ⵜⵉⵏⴰⵡⵉⵏ ⵅⴼ "ⴰⵙⵖⵏⵣⵉ ⵉⵏⵜⵔⴰ-ⴰⴼⵔⵉⵇⵉ ⵖ ⵜⵎⵢⴰⵇⵇⴰⵏⵜ ⵏ ⵜⵙⴳⴰ ⵜⴰⵎⵏⵥⴰⵡⵜ ⵜⴰⴼⵔⵉⵇⵉⵜ ⵏ ⵓⵙⵏⴼⵍ ⵉⵍⴻⵍⵍⵉ (ZLECAF) ", ⴷ " ⴰⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⴷ ⵜⴷⴰⵎⵙⴰ ⵜⴰⵎⵓⵟⵟⵓⵏⵜ ⵖ ⵉⴼⵔⵉⵇⵢⴰ" ⵉⵜⵜⵓⵙⵏⵎⴰⵍⴰⵏ ⵙ ⵓⵎⵢⴰⵡⴰⵙ ⴷ ⵜⴰⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵙⵙⵏⵜⴰⵢ ⵏ ⵍⵎⵖⵔⵉⴱ ⵙⴳ 02 ⴰⵔ 07 ⵎⴰⵕⵚ 2020.
ⵉⴳⴰ ⵓⵏⵎⵓⵇⵇⴰⵔ ⴰⴷ ⵖ ⵜⴷⵉⵏⴰⵎⵉⵜ ⵉⵥⵍⵉⵏ ⵉⵍⵍⴰⵏ ⵖ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵊⴰⵔ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵓⴱⵕⵍⴰⵎⴰⵏ ⴰⴼⵔⵉⵇⵉ, ⵎⵍⵍⵉⵖ ⵉⴽⵛⵉⵎ ⵙ ⵜⵎⴰⴷⴷⴰⵙ ⴰⴷ ⵜⴰⵎⵏⵥⴰⵡⵜ, ⵖⵎⴽ ⴰⵏⵏ ⵓⵍⴰ ⴷ ⵜⵓⴳⴳⴰⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉⵡⴰⵜⵜⵙⵏ ⴰⴷ ⵢⵉⵍⵉ ⵓⵙⵉⴷⴼ ⴰⴷⵎⵙⴰⵏ ⵖ ⵓⵎⵏⵥⴰⵡ ⴰⴼⵔⵉⵇⵉ ⵙ ⵓⵙⵔⵇⴱ ⵏ ⵉⵙⵙⴰⵔⵓⵜⵏ ⴷ ⵉⵙⵏⴼⵍⵏ ⵏ ⵓⵙⵖⵏⵣⵉ ⴷ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵡⴰⵣⵣⴰⵣ ⵏ ⵡⴰⵏⵢⴰ ⵏ ⵜⴳⵎⵉ.
ⵔⴰⴷ ⴷⵔⵓⵏ ⵖ ⵉⵏⵎⵓⵇⵇⴰⵔⵏ ⴰⴷ ⵉⵎⴰⵡⵙⴰⵙⵏ ⴷ ⵉⴱⵕⵍⴰⵎⴰⵏⵉⵢⵏ ⵙⴳ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⴷ ⵉⵏⵎⵏⴰⴹⵏ ⴷ ⵉⵎⵓⵥⴰⵢⵏ ⵖⵎⴽ ⴰⵏⵏ ⵓⵍ ⵉⵎⵓⵣⴰⵢⵏ, ⵔⴰⴷ ⴳⵉⵙⵏ ⵎⴷⴰⵡⴰⵍⵏ ⴼ ⵜⵙⴳⴳⵉⵡⵉⵏ ⵜⵉⵣⵣⵔⴰⴼⵉⵏ ⴷ ⵜⵎⵔⵙⴰⵍⵉⵏ ⴷ ⵍⵓⵊⵙⵜⵉⵢⵉⵏ ⴷ ⵜⴻⵜⵉⴽⵏⵓⵍⵓⵊⵉⵢⵉⵏ ⵉⵣⴷⵉⵏ ⴷ ⵢⵉⴳⵔ ⵏ ⵓⵙⵖⵏⵣⵉ ⴷ ⵡⴰⵙⵙⴰⵢ, ⴷ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵖ ⵓⵙⵔⵇⴱ ⴷ ⵓⵙⵏⴰⵍ ⵏ ⵉⵙⵏⴼⵍⵏ ⵏ ⵓⵙⵖⵏⵣⵉ ⵊⴰⵔ ⵉⵡⴰⵏⴽⵏ ⵉⴼⵔⵉⵇⵉⵢⵏ.
ⵉⵍⵍⴰ ⵖ ⵓⵖⴰⵡⴰⵙ ⵏ ⵓⵏⵎⵓⵇⵇⴰⵔ ⵢⴰⵏ ⵓⵔⵣⴰⴼ ⵍⵍⵉ ⵔⴰⴷ ⵙⴽⵔⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵉⵏ ⵉⵜⵜⵓⴱⴷⴰⵔⵏ ⵉ ⵓⴼⵜⴰⵙ ⴰⵏⴰⵎⵎⴰⵙ ⵏ ⵟⴰⵏⵊⴰ ⵃⵎⴰ ⴰⴷ ⵥⵕⵉⵏ ⵜⵉⵥⵉⴹⴰⵕ ⵉⵍⵍⴰⵏ ⵖ ⵓⴼⵜⴰⵙ ⴰⴷ ⵍⵍⵉⵖ ⵉⴳⴰ ⵜⵉⵍⴳⴳⵯⵉⵜ ⵉ ⵓⵙⵖⵏⵣⵉ ⴰⴳⵔⴰⵖⵍⴰⵏ ⵖ ⵜⵙⴳⴰ ⴰⴷ.
