ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵎⴹⴰⴽⴰⵕⵏ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵛⵛⵓⵕⴰ ⴰⵙⴰⵄⵓⴷⵉ
ⵉⵎⴰⴹⴰⴽⴰⵕ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 24 ⴱⵕⴰⵢⵕ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ, ⴷ ⵎⴰⵙⵙ ⵄⴰⴱⴷⵓⵍⵍⴰⵀ ⴱⵏ ⵎⵓⵃⴰⵎⵎⴰⴷ ⴱⵏ ⵉⴱⵕⴰⵀⵉⵎ ⴰⵍ ⵛⵛⵉⵅ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵛⵛⵓⵕⴰ ⴰⵙⴰⵄⵓⴷⵉ, ⵉⵍⵍⴰⵏ ⵖ ⵓⵔⵣⴰⴼ ⵏ ⵜⵡⵓⵔⵉ ⴷ ⵜⴳⵯⵎⴰⵜⵜ ⵉ ⵜⵎⴰⵣⵉⵔⵜ ⵏⵏⵖ ⵖ ⵢⵉⵅⴼ ⵏ ⵢⴰⵏ ⵓⴽⴰⴱⴰⵕ ⵉⵙⵜⴰⵡⵀⵎⵎⴰⵏ.
ⵖ ⵓⵏⵎⵓⵇⵇⴰⵔ ⴰⴷ ⵖ ⵉⵃⴰⴹⵕ ⵓⵎⵙⵇⴰⴷ ⵏ ⵙⵙⴰⵄⵓⴷⵉⵢⵢⴰ, ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵣⴷⴰⵢⵉⵏ ⵜⵉⵅⴰⵜⴰⵔⵉⵏ ⵉⵙⵎⵓⵏⵏ ⵏⴳⵔ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⵍⴷⵉⵜ ⵏ ⵙⵙⴰⵄⵓⴷⵉⵢⵢⴰ, ⵍⵍⵉ ⵉⴱⴷⴷⵏ ⴼ ⵍⵓⵇⵔ ⵏⴳⵔⴰⵜⵜⵙⵏⵜ ⴷ ⵜⴳⵯⵎⴰⵜⵜ ⵏ ⵜⵉⴷⵜ, ⴷ ⵜⴷⵓⵙⵉ ⵏ ⵉⵣⴷⴰⵢⵏ ⵉⵙⵎⵓⵏⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵓⵜⵔⴱⵉ ⵏ ⵍⵃⴰⵕⴰⵎⴰⵢⵏ ⵉⵜⵜⵓⵛⵕⵕⴰⴼⵏ ⴰⴳⵍⵍⵉⴷ ⵙⴰⵍⵎⴰⵏ ⴱⵏ ⵄⴰⴱⴷ ⵍⵄⴰⵣⵉⵣ ⴰⵍ ⵙⴰⵄⵓⴷ.
ⵉⵙⵙⵓⵜⴳ ⵎⴰⵙⵙ ⵍⵎⴰⵍⴽⵉ ⴰⴷⴷⴰⴷ ⵏ ⵜⴳⵍⴷⵉⵜ ⵏ ⵙⵙⴰⵄⵓⴷⵉⵢⵢⴰ ⵉⵍⵍⴰⵏ ⴷ ⵜⵢⴰⵏⵜ ⵜⴰⴽⴰⵍⴰⵏⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵡⵉⵣⵉ ⵏⵏⵙ ⵜⴰⵙⵓⵍⴰⵏⵜ ⴷⵉⴷⵙ, ⵢⵉⵏⵉ : « ⴰⵔ ⴽⵏ ⵏⵙⵏⵉⵎⵎⵉⵔ ⴼ ⵓⵙⵏⴰⵍ ⵉⴼⴰⵡⵏ ⴷ ⵉⵙⵓⵍⵏ ⵖ ⵓⵙⵡⵉⵔ ⴰⵏⵎⵏⴰⴹ ⴷ ⵓⴳⵔⴰⵖⵍⴰⵏ ⵉ ⵜⵢⴰⵏⵜ ⵜⴰⴽⴰⵍⴰⵏⵜ ⵏ ⵜⴳⵍⴷⵉⵜ, ⵖⵎⴽ ⴰⵏⵏ ⴷ ⵍⵍⵉⵖ ⵜⵍⵍⴰⵎ ⴷ ⵜⵙⵏⵜⴰⵢⵜ ⵏ ⵓⵏⴱⴰⴹ ⴰⵏⵉⵎⴰⵏ ⵉⴳⴰⵏ ⴰⴼⵙⵙⴰⵢ ⵉⵙⵎⴷⵏ ⵉ ⵓⵎⵏⵣⴰⵖ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ».
ⵉⵖⵔⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⵙⴷⵓⵙ ⵏ ⵓⵙⵏⴼⵍ ⵏ ⵜⴷⴰⵎⵙⴰ ⴷ ⵓⵙⵖⵏⵣⵉ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⵎⵍⵉ ⴷ ⵎⴰⵙ ⵍⵍⴰⵏⵜ ⴽⵉⴳⴰⵏ ⵏ ⵜⵥⵉⴹⴰⵕ ⵏ ⵓⵎⵢⴰⵡⴰⵙ, ⵉⴱⴷⵔ ⵓⵍⴰ ⴰⵜⵉⴳ ⵏ ⵓⵙⵙⴷⵓⵙ ⵏ ⵉⵣⴷⴰⵢⵏ ⴰⵢⵍⴰⵍⵏ ⴷ ⵡⵉⵏ ⵉⴳⵏⵏⴰ ⵊⴰⵔ ⵙⵏⴰⵜ ⵜⵎⵉⵣⴰⵔ.
ⵖ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⴱⴷⴷ ⵎⴰⵙⵙ ⵍⵎⴰⵍⴽⵉ ⴼ ⵜⵉⵕⵡⵉ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵜⵍⵍⵓⴳⵏⴰ ⵏ ⵉⵔⵣⴰⴼⵏ ⵏ ⵉⴱⵕⵍⴰⵎⴰⵏⵉⵢⵏ ⵏ ⵙⵏⴰⵜ ⵜⵎⵉⵣⴰⵔ, ⵉⵍⵇⵎ: «ⵜⵥⴹⴰⵕ ⵜⴷⵉⴱⵍⴰⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴰⴷ ⵜⵙⴽⵔ ⵜⵉⵍⴰⵍ ⵎⵇⵓⵔⵏⵉⵏ ⵉ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵜⴼⴽ ⵓⵍⴰ ⵓⵏⴼⵓⵙ ⴰⵎⴰⵢⵏⵓ ⵉ ⵜⵣⴷⴰⵢⵉⵏ ⵊⴰⵔ ⵜⵎⵉⵣⴰⵔ ⵏ ⵡⴰⵄⵕⴰⴱⵏ ⴰⴽⴽⵯ ⵃⵎⴰ ⴰⴷ ⵜⵓⵔⵔⵉ ⵜⵎⵢⵉⵎⴰⵏⵜ ⵏⴳⵔⴰⵜⵜⵙⵏⵜ ⴰⴷ ⵎⵎⴰⵖⵎⵏⵜ ⴷ ⵜⵏⵥⴰⵕ ⵏ ⵜⴰⵙⵓⵜ ⵜⵉⵙ ⵙⵉⵏ ⵉⴷ ⵎⵔⴰⵡⵜ ⴷ ⵢⴰⵜ».
ⵖ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵛⵛⵓⵕⴰ ⴰⵙⴰⵄⵓⴷⵉ ⴼ ⵡⴰⵜⵉⴳ ⵏ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ, ⴰⵢⵍⵍⵉ ⵉⵎⵎⴰⵍⴰⵏ ⵜⴰⴷⵓⵙⵉ ⵉⵙⵎⵓⵏⵏ ⵉⵏⵎⵖⵓⵔⵏ ⵏ ⵙⵏⴰⵜ ⵜⵎⵉⵣⴰⵔ ⴷ ⵉⵎⴰⴷⴰⵏⵏ ⵏⵏⵙⵏⵜ, ⵢⵉⵏⵉ:«ⴳⴰⵏⵜ ⵜⵣⴷⴰⵢⵉⵏ ⵊⴰⵔ ⵜⴳⵍⴷⵉⵜⵉⵏ ⵜⵉⴷ ⴷⵔⴰⵏⵉⵏ ⵖ ⵉⵙⵡⵉⵔⵏ ⴰⴽⴽⵯ, ⵏⴱⴷⴷ ⴰⴷ ⵣⵣⵉⴳⵣⵏⵜ ⵙ ⵓⴳⴳⴰⵔ».
ⵉⵎⵍⵉ ⴷ ⵎⴰⵙⵙ ⵄⴰⴱⴷⵓⵍⵍⴰⵀ ⴱⵏ ⵎⵓⵃⴰⵎⵎⴰⴷ ⴱⵏ ⵉⴱⵕⴰⵀⵉⵎ ⴰⵍ ⵛⵛⵉⵅ, ⵎⴰⵙ ⵍⵍⴰⵏ ⵉⵣⵎⴰⵣ ⵎⵇⵓⵔⵏⵉⵏ ⵏ ⵓⵙⵙⴷⵓⵙ ⵏ ⵓⵙⵏⴼⵍ ⵉⵥⵍⵉⵏ ⵙ ⵜⵎⴰⵍⵍⴰⵢⵜ, ⵢⴰⵡⵉ ⴷ ⵎⴰⵙ ⵜⴻⵟⵟⴰⴼ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⵉⵥⵉⴹⴰⵕ ⵎⵇⵓⵔⵏⵉⵏ ⵏ ⵜⵎⴰⵍⵍⴰⵢⵜ, ⵜⵉⵥⴹⵉⵕ ⵙ ⵖⵎⴽ ⴰⵏⵏ ⴰⴷⴷ ⵜⴰⵡⵉ ⴽⵉⴳⴰⵏ ⵏ ⵉⵎⵍⵓⵍⵍⵓⵢⵏ ⵉⵙⴰⵄⵓⴷⵉⵢⵏ ⵙ “ⵜⵎⴰⵍⵍⴰⵢⵜ ⵏ ⵜⵡⴰⵛⵓⵏⵜ”.
ⵉⴼⴽⴰ ⵎⴰⵙⵙ ⵄⴰⴱⴷⵓⵍⵍⴰⵀ ⴱⵏ ⵎⵓⵃⴰⵎⵎⴰⴷ ⴱⵏ ⵉⴱⵕⴰⵀⵉⵎ ⴰⵍ ⵛⵛⵉⵅ ⵜⴰⵖⵓⵔⵉ ⵉ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⴳⵍⴷⵉⵜ ⵏ ⵙⵙⴰⵄⵓⴷⵉⵢⵢⴰ, ⵔⴰⴷ ⵜⴳ ⴰⵣⵎⵣⵣⵓ ⵏ ⵓⵙⵎⵔⵙⵍ ⵏ ⵜⵣⴷⴰⵢⵉⵏ ⵊⴰⵔ ⵙⵉⵏ ⵉⵙⵇⵇⵉⵎⵉⵏ ⵙ ⵓⵣⵎⵎⴻⵎ ⵏ ⵜⵓⵙⵎⵉⵔⵜ ⵏ ⵓⵎⵢⴰⵡⴰⵙ ⵊⴰⵔ ⵏⵏⵙⵏ.