ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵙⵇⴰⴷ ⵏ ⴽⵓⴱⴰ ⴳ ⵕⵕⴱⴰⵟ
ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⵉⵏⴰⵙ 18 ⴱⵕⴰⵢⵕ 2020 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ Javier Domokos Ruiz ⴰⵎⵙⵇⴰⴷ ⴰⵎⴰⵢⵏⵓ ⵏ ⴽⵓⴱⴰ ⴳ ⵕⵕⴱⴰⵟ, ⵖ ⵓⵔⵣⴰⴼ ⵏ ⵓⵎⵢⴰⵙⵙⴰⵏ ⵍⵍⵉⵖ ⵉⴳⴰ ⴰⵎⵙⵇⴰⴷ ⴰⵎⴰⵢⵓⵏⵓ ⵏ ⵜⵎⴰⵣⵉⵔⵜ ⵏⵏⵙ ⵖ ⵜⴳⵍⴷⵉⵜ ⵏ ⵍⵎⵖⵔⵉⴱ.
ⵙⴷⴷⵉⴷⵏ ⵙⵉⵏ ⵉⵎⵙⵜⴳⴳⴰⵔⵏ ⵖ ⵓⵏⵎⵓⵇⵇⴰⵔ ⴰⴷ ⴼ ⵓⵙⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵍⵎⵖⵔⵉⴱ ⴷ ⴽⵓⴱⴰ ⴷ ⵓⵚⴽⵓ ⵏ ⵜⴼⵔⴽⴰ ⵜⴰⵎⴰⵢⵏⵓⵜ ⵍⵍⵉⵖ ⴷ ⵓⵔⵔⵉⵏⵜ ⵜⵣⴷⴰⵢⵉⵏ ⵜⵉⴷⵓⴱⵍⵓⵎⴰⵙⵉⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵢⵉⵍⵉ ⵓⵙⵎⴰⵍ ⵏ ⵉⵎⵙⵇⴰⴷⵏ. ⵙ ⵓⵣⵎⵣⵣⵓ, ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⵡⴰⵍⴰ ⴰⵙⵜⵔⴰⵜⵉⵊⵉ ⵏ ⵜⴳⵍⴷⵉⵜ ⵖ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵉⴱⴷⵔ ⴽⵉⴳⴰⵏ ⵏ ⵉⵙⵏⴼⴰⵔⵏ ⵏ ⵓⵎⵢⴰⵡⴰⵙ ⵎⵓ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⵕⵥⵥⵓⵎ ⵖ ⵎⵏⵏⴰⵡⵜ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵖ ⵉⴳⵔⴰⵏ ⵓⴷⴷⵉⵔⵏ ⴰⵎ: ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ, ⵜⴰⴼⵍⵍⴰⵃⵜ, ⵜⴰⵎⴳⵓⵔⵉ ⴷ ⵡⵉⵢⵢⴰⴹ.
ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵖⵔⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵃⵎⴰ ⴰⴷ ⵢⵉⴳⵓⵜ ⴰⵙⵏⴼⵍ ⵏ ⵉⵔⵣⴰⴼⵏ ⵏ ⵉⴱⵕⵍⴰⵎⴰⵏⵉⵢⵏ ⵏ ⵙⵏⴰⵜ ⵜⵎⵉⵣⴰⵔ, ⵉⵖⵔ ⵓⵍⴰ ⵉ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⴽⵓⴱⴰ ⵉ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ ⴷ ⵓⵙⵉⴳⴳⵍ ⵏ ⵜⵎⴰⵎⴽⵉⵏ ⵏ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ.
ⵖ ⵓⵎⵏⵉⴷ ⵏⵏⵙ, ⵉⵏⵏⴰ ⵎⴰⵙⵙ ⴰⵎⵙⵇⴰⴷ ⵏ ⴽⵓⴱⴰ ⵎⴰⵙ ⵉⵍⵍⴰ ⵓⵏⵣⴳⵓⵎ ⴷⴰⵔ ⵜⵎⴰⵣⵉⵔⵜ ⵏⵏⵙ ⴰⴷ ⵜⵙⵙⴷⵓⵙ ⵜⵉⵣⴷⴰⵢⵉⵏ ⵏⵏⵙ ⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⵖ ⵉⴳⵔⴰⵏ ⴽⵓⵍⵍⵓⵜⵏ, ⵉⵙⵙⵓⵜⴳ ⵜⵉⵣⵡⵉⵔⵉ ⵏ ⵜⴳⵍⴷⵉⵜ ⵖ ⵓⴱⴰⵔⴰⵣ ⵏ ⵜⵥⴹⴰⵕⵜ ⵉⵜⵜⵓⵙⵎⴰⵢⵏⵓⵏ, ⵉⵎⵍⵉ ⴷ ⵎⴰⵙ ⵍⵍⴰⵏ ⴽⵉⴳⴰⵏ ⵏ ⵉⵣⵎⴰⵣ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ.
ⵖⵎⴽ ⵍⵍⵉ ⵉⴱⴷⵔ ⵎⴰⵙⵙ ⴰⵎⵙⵇⴰⴷ ⵉⵙⴽⵍⴽⵍⵏ ⵉⵅⴰⵜⴰⵔⵏ ⴷ ⵉⵙⵏⴼⵍⵏ ⵉⵍⵍⴰⵏ ⵖ ⴽⵓⴱⴰ ⵜⵉⴳⴰⵔⵉⵡⵉⵏ ⴰⴷ, ⵢⵉⵏⵉ ⵎⴰⵙ ⵢⵓⵙⵉ ⴰⵏⵣⴳⵓⵎ ⴰⴷ ⵢⵉⵍⵉ ⴽⵉⴳⴰⵏ ⵏ ⵡⴰⴷⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ ⴷ ⵙⵉⵏ ⵉⵎⴰⴷⴰⵏⵏ.