ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵎⵙⵇⴰⴷ ⵏ ⵍⴱⵉⵔⵓ
ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 17 ⴱⵕⴰⵢⵕ 2020, ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙ ARTURO CHIPOCO CACEDA ⴰⵎⵙⵇⴰⴷ ⵜⵎⴰⵣⵉⵔⵜ ⵏ ⵍⴱⵉⵔⵓ ⵖ ⵕⵕⴱⴰⵟ ⵖ ⵓⵔⵣⴰⴼ ⵏ ⵓⵎⵢⴰⵙⵙⴰⵏ, ⵍⵍⵉⵖ ⵉⴳⴰ ⴰⵎⵙⵇⴰⴷ ⴰⵎⴰⵢⵏⵓ ⵏ ⵜⵎⴰⵣⵉⵔⵜ ⵏⵏⵙ ⵖ ⵜⴳⵍⴷⵉⵜ.
ⵙ ⵓⵣⵎⵣⵣⵓ, ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵣⴷⴰⵢⵉⵏ ⵏ ⵜⴷⴷⵓⴽⵍⴰ ⵉⵙⵎⵓⵏⵏ ⵊⴰⵔ ⵍⵎⵖⵔⵉⴱ ⴷ ⵍⴱⵉⵔⵓ, ⵖ ⵏⵉⵜ ⵉⵍⵍⴰ ⵓⵣⵎⵎⴻⵎⵏ ⴽⵉⴳⴰⵏ ⵏ ⵜⵎⵢⴰⵇⵇⴰⵏⵉⵏ ⵏ ⵓⵎⵢⴰⵡⴰⵙ ⵖ ⵉⵙⴳⴳⵯⴰⵙⵏ ⴳⴳⵓⵔⴰⵏⵉⵏ, ⵉⴱⴷⴷⴰ ⴼ ⵜⵍⵍⵓⴳⵏⴰ ⵏ ⵓⵎⵙⴰⵡⴰⵍ ⴰⵙⵔⵜⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴷ ⵜⵉⵔⴰⵜ ⵏⵏⵙⵏⵜ ⵉⵛⵛⴰⵔⵏ ⵉ ⵓⵙⵙⴷⵓⵙ ⵏ ⵉⵣⴷⴰⵢⵏ ⵏ ⵓⵎⵢⴰⵡⴰⵙ ⴷ ⵓⵙⵙⵎⵖⵔ ⵏⵏⵙⵏ ⵖ ⵉⴳⵔⴰⵏ ⴽⵓⵍⵍⵓⵜⵏ.
ⵉⵙⵙⵓⵜⴳ ⵎⴰⵙⵙ ⵍⵎⴰⵍⴽⵉ ⴰⴷⴷⴰⴷ ⵏ ⵜⵎⴰⵣⵉⵔⵜ ⵏ ⵍⴱⵉⵔⵓ ⴷⴰⵜ ⵏ ⵜⵎⵙⴰⵔⵜ ⵏ ⵜⴰⵢⴰⵏⴰⵜ ⵜⴰⴽⴰⵍⴰⵏⵜ ⵏ ⵜⴳⵍⴷⵉⵜ, ⵉⵎⵍⵉ ⴷ ⵎⴰⵙ ⵙⵏⴼⵍⵏⵜ ⴽⵉⴳⴰⵏ ⵏ ⵜⵎⵉⵣⴰⵔ ⴰⴷⴷⴰⴷⵏ ⵏⵏⵙⵏⵜ, ⵢⵉⵏⵉ:«ⴽⵓ ⵢⴰⵏ ⵉⵥⵕⴰⵏ ⵜⵉⴷⵜ ⵏ ⵓⵎⵏⵣⴰⵖ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵉⵥⵕ ⵜⵉⵖⴰⵡⵙⵉⵡⵉⵏ ⵖⵎⴽ ⵍⵍⵉ ⴳⴰⵏⵜ ⵖ ⵜⵉⵍⴰⵡⵜ ⵏ ⵜⵙⴳⴰ, ⵔⴰⴷ ⵢⵉⵍⵉ ⴷ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵉⴼⴽⴰ ⵍⵎⵖⵔⵉⴱ ⵉⴳ ⴰⴼⵙⵙⴰⵢ ⵓⵙⵎⵉⴷ ⵉ ⵓⵙⴷⴰⵡ ⴰⴷ».
ⵖ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵎⵍⴰ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵜⵉⵔⴰⵜ ⵉⴷⵓⵙⵏ ⵉ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ. ⵖ ⵓⵎⵏⴰⴹ ⴰⴷ, ⵉⵖⵔⴰ ⵉ ⵓⵏⵙⵙⵉⵅⴼ ⵏ ⵓⴽⵓⵏⴳⵕⵉⵚ ⵏ ⵍⴱⵉⵔⵓ ⵃⵎⴰ ⴰⴷ ⵉⵙⴽⵔ ⴰⵔⵣⴰⴼ ⵏ ⵜⵡⵓⵔⵉ ⵉ ⵜⴳⵍⴷⵉⵜ, ⵢⵉⵍⵉ ⵓⵍⴰ ⵓⵙⵉⴳⴳⵍ ⵏ ⵜⴱⵔⵉⴷⵉⵏ ⵏ ⵓⵙⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵖ ⵉⵍⵍⴰ ⵚⴰⵃⴰ ⵉ ⵙⵏⴰⵜ ⵜⵎⵉⵣⴰⵔ ⴰⴷ.
ⵖ ⵓⵎⵏⵉⴷ ⵏⵏⵙ, ⵉⵙⴰⵡⵍ ⵎⴰⵙⵙ ⴰⵎⵙⵇⴰⴷ ⴼ ⵓⴱⵓⵔⵣ ⵏⵏⵙ ⵍⵍⵉⵖ ⵉⴳⴰ ⴰⵎⵙⵇⴰⴷ ⵏ ⵜⵎⴰⵣⵉⵔⵜ ⵏⵏⵙ ⵖ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵉⵙⵙⵓⵜⴳ ⵓⵍⴰ ⵜⵉⵥⵉⴹⴰⵔ ⵏ ⵜⵎⴰⵣⵉⵔⵜ ⵏⵏⵖ ⵖ ⵉⴳⵔⴰⵏ ⵏ ⵜⵎⴰⵍⵍⴰⵢⵜ ⴷ ⵜⴷⵍⵙⴰ ⴷ ⵜⵖⵔⵎⴰ.
ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⵜⵍⵍⴰ ⵍⴱⵉⵔⵓ ⴷ ⵜⵓⵜⵔⴰ ⵏ ⵍⵎⵖⵔⵉⴱ ⵍⵍⵉⵖ ⵉⵔⴰ ⴰⴷ ⵉⴳ ⴰⴳⵎⴰⵎ ⵉⵎⵏⵥⵉ ⵖ “ⵜⵔⴰⴱⴱⵓⵜ ⵏ ⵉⵡⴰⵏⴽⵏ ⵏ ⵍⴰⵏⴷⵉⵥ”, ⵢⵉⵏⵉ ⵎⴰⵙ ⵉⵍⵍⴰ ⵓⵣⴷⴷⵓⵢ ⵉⵣⵣⵉⴳⵣⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵖ ⴽⵉⴳⴰⵏ ⵏ ⵜⵎⵙⴰⵔ ⵉⵛⵛⴰⵔⵏ.