ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵛⵛⵉⵍⵉ-ⵍⵎⵖⵔⵉⴱ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ ⴷⴼⴼⵉⵔ ⵏ ⵓⵔⵣⴰⴼ ⵏⵏⵙⵏ ⵉ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⴷ ⵉⵙⴷⴷⵉⴷ:«ⵓⵔ ⵜⵍⵍⵉ ⵜⴳⴷⵓⴷⴰⵏⵜ ⵏ ⵎⴰⵔⵓⵔ ⴳ ⵜⵉⵍⴰⵡⵜ»

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵕⴰⵙ 05 ⴱⵕⴰⵢⵕ 2020 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰⵙⵙ GONZALO FUENZALIDA ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵛⵛⵉⵍⵉ-ⵍⵎⵖⵔⵉⴱ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ, ⴷ ⵉⵍⵍⴰⵏ ⴳ ⵢⵉⵅⴼ ⵏ ⵓⴽⴰⴱⴰⵕ ⵏ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⴳ ⵓⵔⵣⴰⴼ ⵏ ⵜⵡⵓⵔⵉ ⴷ ⵜⴷⴷⵓⴽⵍⴰ ⵉ ⵜⵎⴰⵣⵉⵔⵜ ⵏⵏⵖ.

ⵙ ⵓⵣⵎⵣⵣⵓ ⴰⴷ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⴳⴰ ⵓⵔⵣⴰⴼ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵛⵉⵍⵉ ⵢⴰⵜ ⵜⴼⵔⴽⴰ ⵜⴰⵎⴰⵢⵏⵓⵜ ⵏ ⵓⵙⵙⴷⵓⵙ ⵏ ⵜⵣⴷⴰⵢⵉⵏ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵉⵙⵙⵓⵜⴳ ⵓⵍⴰ ⵙ ⵡⴰⴷⴰⵙ ⵉⵍⵍⴰⵏ ⵊⴰⵔ ⵍⵎⵖⵔⵉⴱ ⴷ ⵛⵛⵉⵍⵉ ⵖ ⴽⵉⴳⴰⵏ ⵏ ⵉⵙⵡⵉⵔⵏ. ⵉⵙⵙⵎⵖⵔ ⵖ ⵓⵎⵏⵉⴷ ⴰⴷ ⵏⵉⵜ «ⵜⴰⵙⵔⵜⵉⵜ ⵏ ⴱⵕⵕⴰ ⵏ ⵛⵛⵉⵍⵉ ⵉⴳⴰⵏ ⵜⵓⵏⵥⵉⵥⵜ ⴷ ⵜⵎⵢⴰⵙⴰⵏⵜ, ⵉⵣⴷⵉⵏ ⴷ ⵎⴰⴷ ⴷ ⵉⵡⵉⵏⵜ ⵜⵎⵜⵜⴰ ⵉⵎⵓⵏⵏ ⵖ ⵎⴰⴷ ⵉⵡⴰⵍⴰⵏ ⵜⴰⵎⵙⴰⵔⵜ ⵏ ⵜⴰⵢⴰⵏⵜ ⵏ ⵡⴰⴽⴰⵍ ⵏ ⵜⴳⵍⴷⵉⵜ».

ⵉⵙⵙⴼⵔⵓ ⵎⴰⵙⵙ ⵍⵎⴰⵍⴽⵉ ⵎⴰⵙ ⵜⴳⴰ ⵛⵛⵉⵍⵉ ⴰⵎ ⵜⵉⵎⵉⵣⴰⵔ ⴰⴽⴽⵯ ⵏ ⵓⵎⴰⴹⴰⵍ, ⵍⵍⵉⵖ ⵓⵔ ⵜⵙⵉⵙⵙⵏ ⵙ ⵜⴳⴷⵓⴷⴰⵏⵜ ⵏ ⵎⴰⵔⵓⵔ, ⵢⵉⵏⵉ:« ⴰⵙⴼⵙⵉ ⴰⵏⵉⵍⴰⵡ ⵏ ⵉⵙⵔⵓⵙⵏ ⵉⵍⵍⴰⵏ ⵖ ⵜⵙⴳⴰ, ⴷ ⵍⵍⵉⵖ ⵓⵔ ⵍⵍⵉⵏⵜ ⵜⵔⵙⴰⵍ ⵜⵉⵙⵓⵍⴰⵏⵉⵏ ⴼ ⵜⵜⵓⵚⴽⴰⵏ ⵉⵡⴰⵏⴽⵏ ⵖ ⵉⴳⴰ ⵡⴰⴽⴰⵍ ⴷ ⵉⵎⵣⴷⴰⵖⵏ ⴷ ⵡⴰⴱⴰⴹ, ⵜⴰⴳⴷⵓⴷⴰⵏⵜ ⵏ ⵎⴰⵔⵓⵔ ⵓⵔ ⵙⵔⵙ ⵙⵉⵙⵙⵏⵜ ⵜⵎⵜⵜⴰ ⵉⵎⵓⵏⵏ, ⵓⵔ ⴷⴰⵔⵙ ⴽⵔⴰ ⵏ ⵜⵍⴳⴰⵎⴰⵡⵉⵢⵜ, ⴷ ⵓⵔ ⵜⵍⵍⵉ ⴳ ⵜⵉⵍⴰⵡⵜ». ⵉⵎⵍⵉ ⴷ ⴰⵢⵍⵍⵉ ⵜⵜⵉⵏⵉⵏⵜ ⵜⵖⵜⴰⵙⵉⵏ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ ⵖ ⵉⵙⴳⴳⵯⴰⵙⵏ ⴳⴳⵓⵔⴰⵏⵉⵏ ⵍⵍⵉⵖ ⵉⴳⴰ ⵓⵏⴱⴰⴹ ⴰⵢⵉⵎⴰⵏ ⴰⴼⵙⵙⴰⵢ ⴷ ⵢⵓⵙⴰⵏ ⵉ ⵓⵎⵏⵣⴰⵖ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵉⵍⵇⵎ:«ⴰⵣⵔⴰⴽ ⵏ ⵜⴰⵢⴰⵏⵜ ⵏ ⵉⵎⴰⴷⴰⵏⵏ ⴷ ⵜⴰⵢⴰⵏⵜ ⵏ ⵉⵡⴰⵏⴽⵏ ⴳⴰⵏ ⵜⵉⵔⵙⴰⵍ ⵏ ⵓⵙⵙⵔⵚⵓ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⴳ ⵜⵙⴳⴳⵉⵡⵉⵏ ⴰⴷ».

ⵖⵎⴽ ⵍⵍⵉ ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵡⴰⴷⴷⴰⴷ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵛⵉⵍⵉ ⵉⵍⵍⴰⵏ ⴷ ⵜⵙⵏⵜⴰⵢⵜ ⵏ ⵓⵏⴱⴰⴹ ⴰⵢⵉⵎⴰⵏ  ⵖ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⵢⵉⵏⵉ ⵎⴰⵙ ⵉⵍⵍⴰ ⵓⴷⴳⵉ ⵙ ⵓⴷⵖⴰⵔ ⵉⵥⵉⵍⵏ ⵖ ⵍⵍⴰⵏⵜ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ. ⵉⵖⵔ ⵃⵎⴰ ⴰⴷ ⵢⵉⵍⵉ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ-ⴰⵛⵉⵍⵉ ⵖ ⴽⵔⴰⵢⴳⴰⵜⵜ ⵙⵉⵏ ⵉⵙⴳⴳⵯⴰⵙⵏ, ⵍⵍⵉ ⵔⴰⴷ ⵉⴳ ⴰⵙⴰⵢⵔⴰⵔ ⵏ ⵓⵙⵉⴳⴳⵍ ⵏ ⵜⴱⵔⵉⴷⵉⵏ ⵏ ⵓⵙⵙⵎⵖⵔ ⵙ ⵜⵣⴷⴰⵢⵉⵏ ⵜⵉⵙⵏⵉⵔⴰⵏⵉⵏ ⴷ ⴽⵉⴳⴰⵏ ⵏ ⵓⵎⵢⴰⵡⴰⵙ ⴷ ⵜⵡⵉⵣⵉ.   

ⵖ ⵓⵎⵏⵉⴷ ⵏⵏⵙ, ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵛⵛⵉⵍⵉ-ⵍⵎⵖⵔⵉⴱ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵛⵉⵍⵉ, ⵎⴰⵙ ⵉⵙⴽⵔ ⵓⴽⴰⴱⴰⵕ ⴼ ⵉⵍⵍⴰ ⵢⴰⵏ ⵓⵔⵣⴰⴼ ⵉ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⵉⵥⵕ ⵙ ⵜⵖⴰⵔⴰⵙⵜ ⵢⴰⵥⵏ ⵜⴰⵣⵣⵉⴳⵣⵜ ⵉⵍⵍⴰⵏ ⵖ ⵜⵙⴳⴰ ⴰ, ⵉⵙⴽⵔ ⵓⵍⴰ ⵉⵏⵎⵓⵇⵇⴰⵔⵏ ⴷ ⵉⵎⵙⵜⴳⴳⴰⵔⵏ ⴷ ⵉⵎⵙⵜⵉⵢⵏ ⴷ ⵉⵎⵖⴰⵔⵏ ⵏ ⵜⵇⴱⵉⵍⵉⵏ, ⴰⵢⵍⵍⵉ ⴰⵙⵏ ⵢⵉⵡⵉⵙⵏ ⴰⴷ ⵔⵎⵙⵏ ⵜⴰⵎⵙⴰⵔⵜ ⵏ ⵚⵚⵃⵚⴰ ⵙ ⵜⵖⴰⵔⴰⵙⵜ ⵉⴷⵔⴰⵏ.

 ⵉⵏⵉⵏ ⵉⴳⵎⴰⵎⵏ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵛⵉⵍⵉ, ⵉⵍⵍⴰⵏ ⵖ ⵉⵎⵣⴰⵣⵏ ⵉⵙⵔⵜⴰⵏⵏ ⵉⵎⵏⵏⴰⵡⵏ, ⵎⴰⵙ ⵜⵏ ⵜⵙⵙⵓⵙⵎ ⵜⵣⵣⵉⴳⵣⵜ ⵉⵍⵍⴰⵏ ⵖ ⵜⴳⵍⴷⵉⵜ ⵖ ⵉⵙⵡⵉⵔⵏ ⴰⴽⴽⵯ. ⵙⴷⴷⵉⴷⵏ ⴼ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵎⴰⴷ ⴰⴷⵎⵙⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵢⵉⵍⵉ ⵓⵙⵙⵎⵖⵔ ⵏ ⵓⵙⵏⴼⵍ ⵏ ⵜⴷⴰⵎⵙⴰ ⴷ ⵓⵙⵖⵏⵣⵉ ⵏⴳⵔ ⵙⵏⴰⵜ ⵜⵎⵉⵣⴰⵔ, ⵖⵎⴽ ⴰⵏⵏ ⴷ ⵜⵓⴳⴳⴰⵙ ⵉⵣⴷⵉⵏ ⴷ ⵜⵏⵥⴰⵕⵉⵏ ⵉⵛⵛⴰⵔⵏ: ⵜⴰⴳⵔⴰⵡⵍⴰ ⵜⴰⵎⵓⵟⵟⵓⵏⵜ, ⵜⴰⴷⵔⵓⵙⵜ ⵏ ⵡⴰⵎⴰⵏ, ⵜⵉⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ.

ⵉⵃⴰⴹⵕ ⵖ ⵓⵏⵎⵓⵇⵇⴰⵔ ⴰⴷ ⵎⴰⵙⵙ ⵛⵛⵕⵇⴰⵡⵉ ⵣⵏⴰⵢⴷⵉ, ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵛⵛⵉⵍⵉ ⵖ ⵓⵙⵇⵇⵉⵎ ⵏ ⵉⵎⵓⵔⴰ.