ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵎⴹⴰⴽⴰⵕ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵎⴰⵡⵙⴰⵙ ⵏ ⵍⵢⵓⵏⴰⵏ ⵉ ⵜⵖⴰⵡⵙⵉⵡⵉⵏ ⵏ ⴱⵕⵕⴰ
ⵉⵎⴹⴰⴽⴰⵕ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵕⴰⵙ 15 ⵉⵏⵏⴰⵢⵔ 2020 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴷ ⵎⴰⵙⵙ Nikolaos Dendias ⴰⵎⴰⵡⵙⴰⵙ ⵏ ⵍⵢⵓⵏⴰⵏ ⵉ ⵜⵖⴰⵡⵙⵉⵡⵉⵏ ⵏ ⴱⵕⵕⴰ, ⴷ ⵉⵍⵍⴰⵏ ⴳ ⵜⵎⴰⵣⵉⵔⵜ ⵏⵏⵖ ⴳ ⵓⵣⵔⴰⴼ ⵏ ⵜⵡⵓⵔⵉ.
ⵙ ⵓⵣⵎⵣⵣⵓ, ⵉⵙⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ « ⵜⵓⵇⵇⵏⵉⵏ ⵜⵓⵎⵏⵉⴳⵉⵏ ⴷ ⵜⵍⵓⴳⴰⵏⵉⵏ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵔ », ⵢⵉⵏⵉ ⵎⴰⵙ ⵉⴷⵔⵓ ⵍⵎⵖⵔⵉⴱ ⴷ ⵍⵢⵓⵏⴰⵏ ⴰⵜⵉⴳⵏ ⵣⴷⵉⵏⵉⵏ ⴷ ⵓⵎⵣⴰⵖ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵔⵙ ⵏ ⵓⵎⵏⴰⴷ ⴰⵏⴼⴳⴰⵏ ⴳ ⵓⵙⵎⴽⵍ ⵏ ⵜⵓⵎⴰⵏⵜ ⵏ ⵜⵣⵡⴰⴳⵜ. ⵉⵎⵍ ⵎⴰⵙ ⵢⵓⵎⵥ ⵍⵎⵖⵔⵉⴱ ⵜⴰⵙⵔⵜⵉⵜ ⵏ ⵜⵣⵡⴰⴳⵜ ⴳ ⵉⵍⵍⴰ ⵓⵃⵟⵟⵓ ⵏ ⵜⵉⵣⵉ ⵏ ⵉⵎⵣⵡⴰⴳⵏ ⴷ ⵓⵙⵉⴷⴼ ⵏⵏⵙⵏ ⵉⵣⵣⵉⴳⵣⵏ ⴳ ⵡⴰⵎⵓⵏ ⵏ ⵍⵎⵖⵔⵉⴱ.
ⴳ ⵎⴰⴷ ⵉⵥⵍⵉⵏ ⵙ ⵜⴰⵢⴰⵏⵜ ⵏ ⵡⴰⴽⴰⵍ ⵏ ⵜⴳⵍⴷⵉⵜ, ⵉⵙⴷⴷⵉⴷ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⴳⴰ ⵓⵎⵏⵣⴰⵖ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵡⵉⵏ ⵓⵣⵎⵣ ⵏ ⵓⵎⵏⵖⵉ ⴰⵚⵎⵎⴰⴹ, ⵉⴳ ⵜⴰⴱⴱⴰⵢⴹⴰⵕⵜ ⴷⴰⵜ ⵏ ⵜⴽⴰⵢⵍⴰⵍⵉⵏ ⵏ ⵉⵎⴰⴷⴰⵏⵏ ⵏ ⵜⵎⵏⴰⴹⵜ ⵉⵙⵉⴳⴳⵉⵍⵏ ⵜⴰⵎⵓⵏⵜ ⴷ ⵓⵙⵉⴷⴼ. ⵉⵙⵙⴽⵯⵜⵉ ⴷ ⵙ ⵜⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉⵔⴰⵏ ⴰⴷ ⵢⵉⵍⵉ ⵓⵎⵙⴰⵡⴰⵍ ⴷ ⵜⵎⴰⵣⵉⵔⵜ ⵏ ⴷⴷⵣⴰⵢⵔ ⴱⵍⴰ ⵛⵛⵕⵓⴹ ⵣⵡⴰⵔⵏⵉⵏ ⵃⵎⴰ ⴰⴷ ⵢⵉⵍⵉ ⵓⵙⵎⴽⵍ ⵏ ⵉⵙⴷⴰⵡⵏ ⵉⴱⵉⴷⴷⵏ ⴷⴰⵜ ⵏ ⵜⵣⵣⵉⴳⵣⵜ ⵏ ⵜⵓⵇⵇⵏⵉⵏ ⵜⵉⵙⵉⵏⵔⴰⵏⵉⵏ ⴷ ⵜⵓⵚⴽⴰ ⵏ ⵜⴰⵎⵓⵏⵜ ⵜⴰⵎⵖⴰⵔⵉⴱⵉⵜ.
ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵢⵉⵡⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵡⴰⵜⵉⴳ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⴷⵓⵙ ⵏ ⵜⵓⵇⵇⵏⵉⵏ ⵜⵉⵙⵉⵏⵔⴰⵏⵉⵏ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵎⵔⵙⵍ ⵏ ⵓⵎⵢⴰⵡⴰⵙ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ, ⵜⴻⵜⵜⵓⴼⴽⵉ ⵓⵍⴰ ⴽⵉⴳⴰⵏ ⵏ ⵜⴷⵉⵏⴰⵎⵉⵜ ⵉ ⵜⵡⵓⵔⵉ ⵏ ⵜⵔⵓⴱⴱⴰ ⵏ ⵜⵉⴷⴷⵓⴽⵍⴰ ⵜⴱⵕⵍⴰⵎⴰⵏⵉⵜ ⵊⴰⵔ ⵙⵏⴰⵜ ⵜⵎⵉⵣⴰⵔ.
ⴳ ⵓⵎⵏⵉⴷ ⵏⵏⵙ, ⵉⵙⵙⵓⵜⴳ ⵎⴰⵙⵙ ⴰⵎⴰⵡⵙⴰⵙ ⵏ ⵍⵢⵓⵏⴰⵏ ⵉ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵜⴰⵎⵢⴰⴷⴰⵙⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵙⵎⴽⵍ ⵏ ⵜⵓⵎⴰⵏⵜ ⵏ ⵜⵣⵡⴰⴳⵜ, ⵢⵉⵏⵉ : « ⵍⵎⵖⵔⵉⴱ ⴷⴰ ⵉⵜⵜⵡⴰⵇⵇⴰⵔ ⵜⵉⵣⵉ ⵏ ⵉⵎⵣⵡⴰⴳⵏ, ⵉⵙⵎⴽⵍ ⵓⵍⴰ ⵜⵓⵎⴰⵏⵜ ⴰⴷ ⵙ ⵜⵖⴰⵔⴰⵙⵜ ⵜⴰⵏⴼⴳⴰⵏⵜ ⴱⵍⴰ ⵉⵙⵉⴳⴳⵉⵍ ⵜⵓⴳⴷⵓⵜ ⵅⴼ ⵎⴰⴷ ⵉⵙⴽⴰⵔ ».
ⵉⵙⵙⵓⵜⴳ ⵎⴰⵙⵙ Nikolaos Dendias ⵜⵓⴳⴳⴰⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⴼⵙⴰⵢ ⵏ ⵜⵎⵓⴽⵔⵉⵙⵜ ⵜⴰⵍⵉⴱⵉⵜ ⴳ ⵉⵍⵍⴰ ⵓⵣⵎⵎⴻⵎ ⵏ ⵉⵎⵏⵜⴰⵢⵏ ⴼ ⵓⵎⵛⴰⵛⴽⴰ ⵏ ⵚⵚⵅⵉⵕⴰⵜ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⴰⴷ ⵉⴷⵔⵓ ⵍⵎⵖⵔⵉⴱ ⴳ ⵜⵙⵏⵜⴰⵢ ⵜⵉⵎⴰⴹⴰⵍⵉⵏ ⴷ ⵜⵉⵏ ⵜⵎⵜⵜⴰ ⵉⵎⵓⵏⵏ ⴳ ⵓⵙⵎⴽⵍ ⵏ ⵜⵎⵓⴽⵔⵉⵙⵜ ⴰ.
ⵢⴰⵡⵉ ⴷ ⵓⵎⴰⵡⵙⴰⵙ ⵏ ⵍⵢⵓⵏⴰⵏ ⵉ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵜⴰⵖⵓⵔⵉ ⵏ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵍⵢⵓⵏⴰⵏ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⵉⵙⴽⵔ ⴰⵔⵣⴰⴼ ⵏ ⵜⵡⵓⵔⵉ ⵉ ⵍⵢⵓⵏⴰⵏ, ⵔⴰⴷ ⵉⴳ ⴰⵣⵎⵣⵣⵓ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ.
ⵙⵏⴼⵍⵏ ⵉⵎⵙⵜⴳⴳⴰⵔⵏ ⴳ ⵓⵏⵎⵓⵇⵇⴰⵔ ⴰⴷ ⵜⴰⵏⵏⴰⵢⵉⵏ ⵅⴼ ⵉⵎⵔⵙⵉⵡⵏ ⵣⴷⵉⵏⵉⵏ ⴷ ⵜⵎⵏⴰⴹⵜ, ⵖⵎⴽ ⴰⵏⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵙⵎⵎⵣⴷⵉ ⵏ ⵡⴰⴷⴷⴰⴷⵏ ⴳ ⵜⵎⵙⴰⵔⵉⵏ ⵉⵛⵛⴰⵔⵏ.