ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⵎⵏⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵙⵜⵔⴰⵜⵉⵊⵉⵜ ⵏ ⵓⵎⵢⴰⵡⴰⴹ ⵏ ⵓⵙⵇⵇⵉⵎ
ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⵉⵏⴰⵙ 07 ⵉⵏⵏⴰⵢⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⴰⵏⵎⵓⵇⵇⴰⵔ ⵉⵥⵍⵉⵏ ⵙ ⵜⵏⴽⴷⴰ ⵏ ⵓⵙⵉⵜ ⴰⵎⴰⵢⵏⵓ ⵏ ⵓⵙⵇⵇⵉⵎ, ⴷ ⵜⵎⵉⵜⴰⵔ ⵜⵉⴷⵙⵍⴰⵏⵉⵏ ⵏ ⵜⵙⵜⵔⴰⵜⵉⵊⵉⵜ ⵏ ⵓⵎⵢⴰⵡⴰⴹ ⵏ ⵓⵙⵇⵇⵉⵎ. ⴷⵔⵓⵏ ⵖ ⵓⵏⵎⵓⵇⵇⴰⵔ ⴰ ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⵏⵖⵎⴰⵙⵏ.
ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵓⵣⵎⵣⵣⵓ ⴰⴷ, ⵎⴰⵙ ⵉⴳⴰ ⵓⵙⵓⴼⵖ ⵏ ⵓⵙⵉⵜ ⴰⵍⵉⴽⵟⵕⵓⵏⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵢⴰⵏ ⵓⴷⵎ ⵖ ⵜⵙⵜⵔⴰⵜⵉⵊⵉⵜ ⵏⵏⵙ ⵏ ⵓⵎⵢⴰⵡⴰⴹ ⵉⴳⴰⵏ ⵢⴰⵏ ⵓⵛⴰⵎⵓⵛ ⵖ ⵓⵙⵖⵉⵡⵙ ⴰⵙⵜⵔⴰⵜⵉⵊⵉ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵜⵡⴰⵍⴰ ⴰ ⵜⴰⵣⵣⵔⴰⴼⵜ. ⵢⵉⵏⵉ ⵓⵍⴰ ⵎⴰⵙ ⵉⵎⵎⴰⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⴰⴽⴽⵯ ⵉⵙⴽⵔ ⵜⵉⵡⵓⵔⵉⵡⵉⵏ ⴷⴰ ⴰⵙ ⵜⴼⴽⴰ ⵜⵎⵏⴹⴰⵡⵜ ⴰⴼⴰⴷ ⴰⴷ ⵉⵙⵙⴷⵓⵙ ⵜⴰⴼⵍⴰⵙⵜ ⵖ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⵖⵎⴽ ⴰⵏⵏ ⴷ ⵉⵙⵙⴷⵓⵙ ⴰⴷⴰⵙ ⵙ ⵉⵏⵎⵓⵔⴰ.
ⵢⴰⵡⵉ ⴷ ⵎⴰⵙⵙ ⵍⵎⴰⵍⴽⵉ ⵎⴰⵙ ⴷⴷ ⵜⴰⵡⵓⵔⵉ ⵏ ⵓⵎⵢⴰⵡⴰⴹ ⵓⵔ ⵜⴳⴰ ⵜⴰⵡⵓⵔⵉ ⵜⴰⵜⵉⵇⵏⵉⵜ, ⴰⴷ ⵜⴳⴰ ⴷ ⵓⵎⵉⴽⴰⵏⵉⵣⵎ ⵏ ⵓⵙⵎⴰⵢⵏⵓ ⵏ ⵜⵓⵚⴽⵉⵡⵉⵏ ⵏ ⵓⵡⴰⵏⴽ ⴷ ⵡⴰⵎⵓⵏ, ⵖⵎⴽ ⴰⵏⵏ ⴰⴼ ⵉⴳⴰ ⵓⵎⵢⴰⵡⴰⴹ ⵜⴰⵖⴰⵡⵙⴰ ⵜⴰⵔⵙⵍⴰⵏⵜ ⵖ ⵜⵡⵓⵔⵉ ⵜⴰⵙⵔⵜⴰⵏⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ.
ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⵉⴳⴰ ⵓⵎⵢⴰⵡⴰⴹ ⵖ ⵓⴳⵏⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵎⴰⵜⴰⵔⵜ ⴼ ⵜⵉⵔⴰⵜ ⴰⴷ ⵜⵉⵍⵉ ⵜⴷⵔⴰⵡⵜ ⴷ ⵡⴰⵎⵓⵏ ⴰⵖⵔⵎⴰⵏ, ⴷ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⴰⵏⵖⵎⴰⵙ, ⴷ ⵉⵏⵎⵓⵔⴰ ⵖ ⵜⵡⵓⵔⵉ ⵜⴰⵏⴰⵎⵓⵔⵜ ⵏ ⵜⵉⴹⴰⴼ ⴷ ⵜⵣⵣⵔⴰⴼⵜ, ⴰⵛⴽⵓ ⵎⴰⵢⴰ ⵉⴳⴰ ⴰⵡⴷ ⵜⴰⵡⵓⵔⵉ ⵏ ⵉⵏⵎⵓⵔⴰ ⵓⵔ ⴷ ⵖⴰⵙ ⵜⵉⵏ ⵉⵎⵓⵔⴰ.
ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴼ ⵓⴷⵎⴰⵡⵏ ⵎⵇⵓⵔⵏⵉⵏ ⵏ ⵜⵙⵜⵔⴰⵜⵉⵊⵉⵜ ⵏ ⵓⵎⵢⴰⵡⴰⴹ ⵏ ⵓⵙⵇⵇⵉⵎ, ⵉⴳⴰⵏ ⵜⴰⵙⵜⵔⴰⵜⵉⵊⵉⵜ ⵜⴰⵖⵣⵓⵔⴰⵏⵜ ⵎⵓ ⴳⴳⵓⵜⵏ ⵓⴷⵎⴰⵡⵏ ⵏⵏⵙ, ⵢⵉⵍⵉ ⴷⵉⴳⵙ : ⴰⵙⴰⵔⵓ ⴰⴱⵕⵍⴰⵎⴰⵏⵉ, ⵜⵙⴷⵍⵉⵙⵜ ⵏ ⵓⵙⵇⵇⵉⵎ, ⴰⵃⵟⵟⵓ ⵏ ⵜⵎⴽⵜⵉⵜ ⵜⴰⴱⵕⵍⴰⵎⴰⵏⵉⵜ, ⴰⵙⵓⴼⵖ ⵏ ⵜⵙⵏⵏⵉⵖⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙⴷⵓⵙ ⵏ ⵜⵣⴷⴰⵢⵉⵏ ⴷ ⵉⵎⴰⵙⵙⵏ ⵏ ⵓⵙⵏⵖⵎⵙ, ⵓⵕⵥⵥⵓⵎ ⴼ ⵡⴰⵎⵓⵏ ⵙⵍⵉⵀⵡⴰⴷⴷ ⴰⴽⴽⵯ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ, ⴰⵙⵏⵎⴰⵍⴰ ⵏ « ⵜⴳⴳⵓⵔⴰ ⵉⵏⵏⵓⵕⵥⵎⵏ »…
ⴰⵔ ⵜⵎⵎⴰⵍ ⵜⵓⵏⵖⵉⵍⵜ ⵜⴰⵎⴰⵢⴰⵏⵓⵜ ⵏ ⵓⵙⵉⵜ ⴰⵍⵉⴽⵟⵕⵓⵏⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵔⴰ ⵓⵙⵇⵇⵉⵎ ⴰⴷ ⵉⵏⵏⵓⵕⵥⵎ ⴼ ⵡⴰⵎⵓⵏ, ⵉⵙⵙⴷⵓⵙ ⴰⵏⵢⴰⵍⴽⴰⵎ ⵏⴳⵔ ⵉⵏⵎⵓⵔⴰ ⴷ ⵉⵎⵓⵔⴰ, ⵉⴹⵎⵏ ⵓⵍⴰ ⴰⵣⵔⴼ ⵏ ⵓⴷⴰⴼ ⵙ ⵓⵎⵍⵉ ⵏ ⵓⴱⵕⵍⴰⵎⴰⵏ.
ⵉⵡⴰⵜⵜⵙ ⵓⵙⵏⴼⴰⵔ ⴰ ⴰⴷ ⵢⵉⵍⵉ ⵢⴰⵏ ⵓⵎⵙⴰⵙⴰ ⴷ ⵓⵙⵍⴳⵏ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵍⵍⵉ ⴷ ⵢⵉⵡⵉⵏ ⴼ ⵓⵣⵓⵣⵣⵔ ⵏ ⵜⵓⴽⵜ ⵏ ⵉⵏⵖⵎⵉⵙⵏ ⵖ ⵓⵙⵉⵜ ⴰⵍⵉⴽⵟⵕⵓⵏⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎ : ⵉⵙⵖⵡⴰⵏ ⵏ ⵜⵏⴱⴰⴹⵜ, ⵜⵉⵎⵔⴰⵔⵓⵜⵉⵏ ⴼ ⵉⵙⵇⵙⵉⵜⵏ, ⵉⵙⵇⵙⵉⵜⵏ ⵏ ⵉⵎⵓⵔⴰ, ⵜⵓⵜⵔⵉⵡⵉⵏ ⵏ ⵓⵣⵣⵔⴰⴼ, ⵉⵏⵇⵇⵉⵙⵏ ⴼ ⵜⵡⵓⵔⵉ ⵏ ⵜⵙⵇⵇⵉⵎⵉⵏ…
ⵖⵎⴽ ⵍⵍⵉ ⵜⵡⴰⵜⵜⵙ ⵜⵙⵏⵜⴰⵢⵜ ⴰ ⴰⴷ ⵜⵙⵙⵔⵅⵓ ⴰⵏⵢⴰⵍⴽⴰⵎ ⵏⴳⵔ ⴰⵙⵇⵇⵉⵎ ⴷ ⵉⵏⵎⵓⵔⴰ ⵖ ⵜⵎⵓⵔⵜ ⴰⴽⴽⵯ, ⵜⵔⴰ ⴰⴷ ⴰⵙ ⵜⴼⴽ ⵜⵓⴽⵜ ⵏ ⵜⵏⵓⴼⴰ ⵜⵉⵎⵔⴷⴰ ⴰⵎ : ⵉⵅⴼⴰⵡⴰⵍⵏ ⴼ ⵜⵙⵓⵎⴰⵔ ⴷ ⵉⵙⵏⴼⴰⵔⵏ ⵏ ⵉⵙⵍⴳⴰⵏⵏ, ⵜⵓⵜⵔⴰ ⵏ ⵓⵔⵣⴰⴼ ⵏ ⵓⵙⵇⵇⵉⵎ ⴷ ⵜⵙⴷⵍⵉⵙⵜ ⵏⵏⵙ, ⵜⵓⵜⵔⴰ ⵏ ⵜⵙⵖⵣⵏⵜ ⵏ ⵉⵏⵖⵎⴰⵙⵏ, ⵜⵓⵜⵔⴰ ⵏ ⵡⴰⵏⵏⴰⵏ…
ⵉⵣⵎⵔ ⵓⵏⵔⵣⴰⴼ ⵏ ⵓⵙⵉⵜ ⴰⵎⴰⵢⵏⵓ ⴰⴷ ⵉⵙⴽⵔ ⴰⵣⵔⴰⴼ ⴰⵎⵔⴷⵓ ⵉ ⵎⴰ ⴰⴷ ⵉⵍⵍⴰⵏ ⵖ ⵓⵙⵇⵇⵉⵎ, ⵉⵙⵙⵏ ⵉⵎⵙⵜⵉⵏⵏ ⵏⵏⵙ ⵉⵏⵢⴰⵍⴽⴰⵎ ⴷⵉⴷⵙⵏ, ⵉⴼⴽ ⵓⵍⴰ ⵜⵓⵜⵔⵉⵡⵉⵏ ⵏⵏⵙ ⵖ ⵢⵉⴳⵔ ⵏ ⵓⵣⵣⵔⴰⴼ ⴷ ⵜⵓⵍⴽⵉⵎⵉⵏ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵖ ⵜⵙⵉⵍⴰ ⵜⴰⵏⴰⵎⵓⵔⵜ ⵉⵥⵍⵉⵏ ⵉ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ.
ⵜⵍⵍⴰ ⵖ ⵓⵙⵉⵜ ⵜⵉⵖⵎⵔⵜ ⵉⵥⵍⵉⵏ ⵙ ⵉⵎⵥⵢⴰⵏⵏ, ⴷⵉⴳⵙ : ⵉⴼⵉⴷⵢⵓⵜⵏ, ⵓⵔⴰⵔⵏ ⴷ ⵡⴰⵔⵔⴰⵜⵏ ⵉⴱⵉⴷⴰⴳⵓⵊⵉⵢⵏ ⵉⵎⵎⴰⵍⵏ ⵜⵉⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⴱⵔⵉⴷⵉⵏ ⵙⴰ ⵉⵙⵡⵓⵔⵉ. ⵎⴽⵍⵍⵉ ⴷⵉⴳⵙ ⵜⵉⵖⵎⵔⵉⵏ ⵉⵥⵍⵉⵏ ⵙ ⵜⵎⵖⴰⵔⵜ ⴷ ⵉⵄⵔⵔⵉⵎⵏ, ⴷⵉⴳⵙⵏⵜ ⵉⴹⵕⵉⵚⵏ ⵉⵣⵣⵔⴰⴼⵏ ⴷ ⵉⵙⵇⵙⵉⵜⵏ ⵏ ⵉⵎⵓⵔⴰ ⵅⴼ ⵜⴰⵎⵟⵟⵓⴹⵜ ⴷ ⵉⵄⵔⵔⵉⵎⵏ ⴷ ⵉⵎⵥⵢⴰⵏⵏ.
ⵉⵜⵜⵓⵚⴽⴰ ⵓⵙⵉⵜ ⴰⵎⴰⵢⵏⵓ ⵙ ⵜⴱⵔⵉⴷⵜ ⵉⵔⵅⴰⵏ ⵖ ⵉⵍⵍⴰ ⵡⴰⴷⴰⴼ ⵙ ⵓⵏⵖⵎⵉⵙ ⴷ ⵓⵍⴳⴳⵓⴷ, ⴰⵙⵓⵜⴳ ⵏ ⵜⵏⵓⴼⴰ ⴷ ⵢⴰⴽⴽⴰ ⵓⵙⵉⵜ ⴰⵎ ⴰⵣⵓⵣⵣⵔ ⵓⵙⵔⵉⴷ ⵏ ⵜⵖⵉⵎⴰ ⵜⵉⴳⴷⵓⴷⴰⵏⵉⵏ, ⵜⵉⵎⵃⴹⵉⵜ ⵜⴰⵙⵍⵉⵥⵉⵕⵜ ⵉⵎⵓⵏⵏ ⴷ ⵓⵏⵇⵇⵉⵙ ⵏ ⵜⵖⵉⵎⵉⵜ, ⵜⵉⵖⵔⵉ ⵏ ⵜⵥⵕⵉⴳⵉⵏ ⴷ ⵓⵙⵙⴼⵓⵖ ⵏⵏⵙⵏⵜ.
ⵍⵍⴰⵏⵜ ⵖ ⵓⵙⵉⵜ ⴰⴷ ⴰⵎⴰⵢⵏⵓ ⵜⵉⵖⵎⵔⵉⵏ ⵉⵥⵍⵉⵏ ⵙ ⴽⵓ ⴰⵎⴰⵔⵉ (ⵜⵉⵍⴰⵍ, ⵉⵙⵇⵙⵉⵜⵏ, ⵜⵉⵎⵔⴰⵔⵓⵜⵉⵏ ⵏ ⵜⵏⴱⴰⴹⵜ, ⵜⵉⴽⵛⵛⵓⵎⵉⵏ), ⴽⵓ ⵜⴰⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ (ⵉⵙⵇⵙⵉⵜⵏ, ⵜⵉⵙⵓⵎⴰⵔ ⵏ ⵓⵙⵍⴳⵏ, ⵜⵉⵍⴰⵍ, ⵉⵏⵖⵎⵉⵙⵏ), ⴽⵓ ⵜⴰⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ (ⵉⴳⵎⴰⵎⵏ, ⵉⴹⵕⵉⵚⵏ ⵏ ⵓⵙⵍⴳⵏ, ⵜⵉⵍⴰⵍ, ⵉⵏⵇⵇⵉⵙⵏ). ⵖⵎⴽ ⴰⵏⵏ ⴷ ⵜⵖⵎⵔⵉⵏ ⵉⵥⵍⵉⵏ ⵉ ⵜⵏⵙⵙⵉⵅⴼⵜ ⴷ ⵓⵙⵉⵔⴰ ⵏ ⵓⵙⵇⵇⵉⵎ, ⵜⵉⵙⵇⵇⵉⵎⵉⵏ ⵜⵉⵙⴳⵓⵎⴰⵏⵉⵏ, ⵜⴰⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ.
ⴰⴼⴰⴷ ⴰⴷ ⵢⵉⵍⵉ ⵓⴼⵏⴰ ⵏ ⵜⴽⵔⴽⴰⵙ ⵉⵜⵜⵉⵍⵉⵏ ⴼ ⵓⵙⵇⵇⵉⵎ, ⵜⴻⵜⵜⵓⵙⴽⴰⵔ ⵖ ⵓⵙⵉⵜ ⵜⵉⵖⵎⵔⵜ ⵉⵥⵍⵉⵏ ⵙ ⵓⵣⵓⵣⵣⵓⵔ ⵏ ⵉⵏⵖⵎⵉⵙⵏ ⴷⵓⵙⵏⵉⵏ ⵉⴳⴰⵏ ⵜⴰⵎⵔⴰⵔⵓⵜ ⴼ ⵜⴽⵔⴽⴰⵙ ⴰ ⵍⵍⵉ ⵉⵜⵜⵉⵍⵉⵏ ⵖ ⴽⵔⴰ ⵏ ⵉⵙⵉⵜⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ.
ⵉⵜⵜⵓⵚⴽⴰ ⵓⵙⵉⵜ ⴰⵎⴰⵢⵏⵓ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵙⵎⵎⵓⵙⵜ ⵜⵓⵜⵍⴰⵢⵉⵏ : ⵜⴰⵄⵕⴰⴱⵜ, ⵜⴰⵎⴰⵣⵉⵖⵜ, ⵜⴰⴼⵕⴰⵏⵚⵉⵚⵜ, ⵜⵉⵏⴳⵍⵉⵣⵜ, ⵜⴰⵙⴱⵍⵢⵓⵏⵜ.