ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵜⴰⵙⵎⵓⵏⵉ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵖⴰⵡⵙⵉⵡⵉⵏ ⵏ ⵉⴼⵔⵉⵇⵢⴰ
ⵜⵙⵏⵎⴰⵍⴰ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵖⴰⵡⵙⵉⵡⵉⵏ ⵏ ⵉⴼⵔⵉⵇⵢⴰ ⵜⴰⵙⵎⵓⵏⵉ ⵏⵏⵙ ⴰⵙⵙ ⵏ ⵓⴽⵡⴰⵙ 6 ⵛⵓⵜⴰⵏⴱⵉⵔ 2018 ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ.
ⵜⴽⵛⵎ ⵜⵙⵎⵓⵏⵉ ⴰⴷ ⵖ ⵓⵙⵎⵀⵍ ⵏ ⵉⵎⴰⵙⵙⵏ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵍⵍⵉ ⴷ ⵢⵉⵡⵉⵏ ⵎⴰⵙ ⵉⴱⴷⴷ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵜⵡⵉⵣⵉ ⴷ ⵉⵎⴰⴷⴰⵏⵏ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ, ⴰⵢⵍⵍⵉ ⵉⴳⴰⵏ ⴰⵙⵜⴰⵢ ⴰⵙⵜⵔⴰⵜⵉⵊⵉ ⵏ ⵜⴳⵍⴷⵉⵜ.
ⵖ ⵜⵙⵎⵓⵏⵉ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⴼ ⵡⴰⵜⵉⴳ ⵉⵍⵍⴰⵏ ⴷⴰⵔ ⵜⵡⵉⵙⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵉⴱⵔⴷⴰⵏ ⴳⴳⵓⵜⵏⵉⵏ ⵍⵍⵉ ⵉⵙⵎⵓⵏⵏ ⵍⵎⵖⵔⵉⴱ ⴽⵓ ⵎⴰ ⴷ ⵉⵍⴰ ⵓⵎⵣⵔⵓⵢ ⵏⵏⵙ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ.
ⵖⵎⴽ ⵍⵍⵉ ⴷ ⵉⵙⵙⴽⵜⵉ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵙ ⴽⵉⴳⴰⵏ ⵏ ⵓⴱⵓⵔⵣ ⴰⵙⵡⵉⵔ ⵉⵥⵉⵍⵏ ⴷ ⵉⵣⵣⵉⴳⵣⵏ ⵏ ⵜⵣⴷⴰⵢⵉⵏ ⵏ ⵍⵎⵖⵔⵉⴱ ⴷ ⵉⴼⵔⵉⵇⵢⴰ, ⵙ ⴰⵢⵍⵍⵉ ⵏⵉⵜ ⵉⵍⵍⴰⵏ ⵖ ⵓⵙⵎⴰⵇⵇⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⴱⴷⴷⵏ ⴼ ⵓⵙⴷⵓⵙ ⴷ ⵓⵙⵎⵖⵔ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⴷ ⵜⵉⵔⴰⵜ ⵏ ⵍⵎⵖⵔⵉⴱ ⵃⵎⴰ ⴰⴷ ⵉⴳ ⵓⵎⵏⵥⴰⵡ ⵖ ⵉⵍⵍⴰ ⵖⵎⴽ ⴰⵏⵏ ⴷ ⵉⵙⵓⴳⴰⵎ ⵏⵏⵙ ⵉⵏⴼⴳⴰⵏⵏ ⵖ ⵓⴳⵯⵏⵙ ⵏ ⵉⵅⵎⵎⵉⵎⵏ ⵏⵏⵙ.
ⵙⵙⴽⵜⵉⵏ ⴷ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⴰⵙⵎⴰⵇⵇⵍ ⵉⴷⵔⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵖ ⵎⴰ ⴷ ⵉⵥⵍⵉⵏ ⵙ ⵉⴼⵔⵉⵇⵢⴰ, ⴰⵢⵍⵍⵉ ⵉⵙⴽⵔⵏ ⵢⴰⵜ ⵜⴰⴱⴱⴰⵢⵜ ⵜⴰⵎⵣⵔⴰⵢⵜ ⵉⵀⵢⵢⴰⵏ ⴷ ⵡⴰⵏⴰⵡⵏ ⵏ ⵓⵎⵢⴰⵡⴰⵙ ⴳⴰⵏⵉⵏ ⵉⵇⴱⵓⵔⵏ, ⵢⵉⵍⵉ ⵓⵚⴽⵓ ⵏ ⵜⵎⴷⵔⴰⵡⵜ ⵉⴱⴷⴷⵏ ⴼ ⵓⵎⵢⴰⵡⴰⵙ ⴷ ⵜⴳⵎⵉ ⵉⵛⵛⴰⵔⵏ ⵖ ⵉⵍⵍⴰ ⵓⵙⴽⵔ ⵏ ⵜⴱⵖⵓⵔⵉⵏ ⵉⴷⵔⵓ ⴽⵓ ⵢⴰⵏ.
ⵍⵍⵉⵖ ⵉⵍⵍⴰ ⵓⵙⵓⵊⴷ ⵏ ⵉⵖⴰⵡⴰⵙⵏ ⴷ ⵉⵎⵏⵉⴷⵏ ⵏ ⵜⵡⵓⵔⵉ ⵏ ⵜⵔⴰⴱⴱⵓⵜ ⴰⴷ, ⵙⴷⴷⵉⴷⵏ ⵉⴷ ⵎⴰⵙⵙ ⵉⴳⵎⴰⵎⵏ ⴼ ⵡⴰⵜⵉⴳ ⵏ ⵜⵔⴰⴱⴱⵓⵜ ⵖ ⵓⵙⵎⵖⵔ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⵙⴷⴷⵉⴷⵏ ⵓⵍⴰ ⴼ ⵓⵣⴷⴷⵓⵢ ⴷ ⴽⵓ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⵙ ⵓⵡⵇⵇⵔ ⵏ ⵜⵥⵍⴰⵢⵉⵏ ⵏ ⴽⵓ ⵢⴰⵏ, ⵖⵎⴽ ⵍⵍⵉ ⵙⴷⴷⵉⴷⵏ ⴼ ⵓⵏⵏⵓⵕⵥⵎ ⵏ ⵜⵔⴰⴱⴱⵓⵜ ⴷ ⵡⴰⵜⵉⴳ ⴷ ⵜⵓⴳⵜ ⵏ ⵉⵙⴷⴰⵡⵏ ⴷ ⵉⵙⴰⵡⵓⵔⵏ ⵍⵍⵉ ⴼ ⵔⴰⴷ ⵜⵉⵍⵉ ⵜⵡⵓⵔⵉ, ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵓⵙⴷⵓⵙ ⴷ ⵓⴼⵔⴰⴳ ⵏ ⵜⵣⴷⴰⵢⵉⵏ ⵏⴳⵔ ⵍⵎⵖⵔⵉⴱ ⴷ ⵉⴼⵔⵉⵇⵢⴰ ⵖ ⵉⵙⵡⵉⵔⵏ ⵉⵙⵔⵜⴰⵏⵏ ⴷ ⵉⵎⵔⵙⵍⴰⵏⵏ ⴷ ⵉⴱⵕⵍⴰⵎⴰⵏⵉⵢⵏ ⴷ ⵉⴷⵍⵙⴰⵏⵏ ⴷ ⵉⵏⴼⴳⴰⵏⵏ.