ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵜⴰⵙⵎⵓⵏⵉ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵔⵜ ⵜⴰⵏⴰⵎⵓⵔⵜ ⵜⴰⵎⵣⵡⴰⵔⵓⵜ
ⵜⵙⵏⵎⴰⵍⴰ ⵜⵔⴰⴱⴱⵓⵜ ⵏ ⵜⵡⵓⵔⵉ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵔⵜ ⵜⴰⵏⴰⵎⵓⵔⵜ ⵜⴰⵙⵎⵓⵏⵉ ⵏⵏⵙ ⴰⵙⵙ ⵏ ⵓⴽⵡⴰⵙ 6 ⵛⵓⵜⴰⵏⴱⵉⵔ 2018 ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵉⵍⵉⵜ ⵏ ⴽⵓ ⵉⴳⵎⴰⵎⵏ ⵏⵏⵙ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ.
ⵜⴽⵛⵎ ⵜⵙⵎⵓⵏⵉ ⴰⴷ ⵖ ⵓⵙⵎⵀⵍ ⵏ ⵉⵎⴰⵙⵙⵏ ⵉⵎⴰⵢⵏⵓⵜⵏ ⵍⵍⴰⵏⵉⵏ ⵖ ⵓⵏⴳⵔⴰⵡ ⴰⴳⵯⵏⵙⴰⵏ ⴰⵎⴰⵢⵏⵓ ⵍⵍⵉ ⵉⵡⴰⵜⵜⵙⵏ ⴰⴷ ⵜⵉⵍⵉ ⴽⵉⴳⴰⵏ ⵏ ⵜⵉⵍⵉⵜ ⵜⴰⴱⵕⵍⴰⵎⴰⵏⵉⵜ ⵖ ⴽⵓ ⵉⵙⴰⵡⵓⵔⵏ ⵉⵏⴰⵎⵓⵔⵏ ⵙ ⵜⵖⴰⵔⴰⵙⵜ ⵉⴳⴰⵏ ⵜⴰⵎⵔⵙⵍⴰⵏⵜ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵣⵎⵎⵉⵎ ⵎⴰⵙⵙ ⴰⵏⵙⵙⵉⵅⴼ ⴷ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⴰⵜⵉⴳ ⴰⵅⴰⵜⴰⵔ ⵏ ⵜⵔⴰⴱⴱⵓⵜ ⴷ ⵉⵎⵏⵉⴷⵏ ⵏ ⵜⵡⵓⵔⵉ ⵏⵏⵙ, ⵙⵙⴽⵜⵉⵏ ⴷ ⵜⴰⵡⵓⵔⵉ ⵉⵥⵉⵍⵏ ⵉⵜⵜⵓⵙⴽⴰⵔⵏ ⵖ ⵓⵙⴷⴰⵡ ⵏ ⵜⵎⵙⴰⵔⵜ ⵜⴰⵏⴰⵎⵓⵔⵜ ⴷ ⵜⵡⵓⵔⵉⵡⵉⵏ ⵏ ⵓⵎⵓⵔⵙ ⵜⵜⵓⵙⴽⴰⵔⵏⵉⵏ ⵖ ⴽⵓ ⵉⵎⵓⵙⵙⵓⵜⵏ ⵉⴳⵔⴰⵖⵍⴰⵏⵏ, ⵙ ⵜⵣⵔⴼⵜ ⵉⵍⵍⴰⵏ ⴷⴰⵔ ⵜⵎⵙⴰⵔⵜ ⴰⴷ ⴷ ⵜⴱⵔⵉⴷⵜ ⵉⵕⵚⴰⵏ ⵍⵍⵉ ⵙ ⵜⵜⵓⵙⵙⴰⵏ ⵜⴷⵉⴱⵍⵓⵎⴰⵙⵉⵜ ⵜⴰⵎⵖⵔⵉⴱⵉⵜ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴷ ⵓⵎⴽⵕⴰⴹ ⴰⵏⴰⵎⵓⵔ ⴷ ⵓⵍⵜⴰⵖ ⴷ ⵓⵙⵎⵓⵙⵙⵓ ⵢⵓⵎⴰⵏ ⵏ ⴽⵓ ⵉⵏⴱⴷⴰⴷⵏ ⵓⴷⴷⵉⵔⵏ ⵖ ⵜⵎⴰⵣⵉⵔⵜ ⵏⵏⵖ.
ⵖⵎⴽ ⵍⵍⵉ ⴱⴷⴷⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⴼ ⵜⵡⵓⵔⵉ ⵍⵍⵉ ⴷ ⵉⵇⵇⴰⵏⵏ ⵃⵎⴰ ⴰⴷ ⵉⵣⵣⵉⴳⵣ ⵓⵙⴱⴷⴷⵉ ⵏ ⴽⵓ ⵉⵙⵎⵓⴷⴷⵓⵜⵏ ⵏ ⵡⴰⵄⴷⵉⵡⵏ ⵏ ⵜⵢⴰⵏⵜ ⵜⴰⵎⵓⵔⴰⵏⵜ ⴷ ⵓⵙⴼⵉⵙⵙ ⵏ ⵜⵙⵡⵉⵏⴳⵎⵜ ⵏ ⵓⵏⴳⵉⵔⵉ.
ⵍⵍⵉⵖ ⵉⵍⵍⴰ ⵓⵎⴹⴰⴽⴰⵕ ⴼ ⵜⵙⵎⵉⴳⵍⵜ ⵏ ⵜⵔⴰⴱⴱⵓⵜ ⴰⴷ, ⵙⴷⴷⵉⴷⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴼ ⵓⴷⵎ ⴰⵙⵜⵔⴰⵜⵉⵊⵉ ⵏ ⵜⵡⵓⵔⵉ ⵏⵏⵙ ⵍⵍⵉ ⵏⵏ ⵉⵜⵜⵉⵍⵉⵏ ⴷ ⵜⵣⵣⵉⴳⵣⵜ ⵏ ⵜⵎⵙⴰⵔⵜ ⵖ ⵓⵙⵡⵉⵔ ⵏ ⵜⵎⵜⵜⴰ ⵉⵎⵓⵏⵏ ⴷ ⵉⵣⵓⵛⵛⵏⵏ ⵀⵔⵛⵏⵉⵏ ⵏ ⵡⴰⵄⴷⵉⵡⵏ ⵏ ⵜⵢⴰⵏⵜ ⵜⴰⵎⵓⵔⴰⵏⵜ, ⵓⵍⴰ ⴷ ⵜⵎⴰⵎⴽⵉⵏ ⵏ ⵓⵏⵄⴰⵕ ⴷ ⵓⵖⴰⵡⴰⵙ ⵏ ⵓⵙⵏⵖⵎⵙ ⵉⴹⴼⵕⵏ, ⵖⵎⴽ ⴰⵏⵏ ⴷ ⵉⴱⵔⴷⴰⵏ ⵏ ⵓⵎⵣⵔⵓⵢ ⴷ ⵓⵣⵔⴼ ⴷ ⵉⵎⵏⴰⴷⵏ ⵏ ⵜⴳⵎⵉ ⵍⵍⴰⵏⵉⵏ ⵖ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ.
ⵙⴷⴷⵉⴷⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⵓⵍⴰ ⴼ ⵡⴰⵜⵉⴳ ⵏ ⵓⵎⵓⵢⴰⵡⴰⴹ ⵙ ⵢⴰⵏ ⵓⵖⴰⵡⴰⵙ ⴰⵅⴰⵜⴰⵔ ⵏ ⵓⵙⵏⵖⵎⵙ ⵉⵎⵎⴰⵍⴰⵏ ⵜⴰⵡⵓⵔⵉ ⵏ ⵜⵔⴰⴱⴱⵓⵜ ⵙ ⵓⵣⴷⴷⵓⵢ ⴷ ⵓⵎⵢⴰⵡⴰⵙ ⴷ ⵓⵎⵛⴰⵡⴰⵕ ⴷ ⴽⵓ ⵜⵉⵙⴳⴳⵉⵡⵉⵏ ⵙⵜⴰⵡⵀⵎⵎⴰⵏⵉⵏ.
ⵖ ⵜⴳⵉⵔⴰ ⵏ ⵜⵙⵎⵓⵏⵉ, ⵜⴼⴼⵖ ⵜⵔⴰⴱⴱⵓⵜ ⴰⴷ ⵜⵙⴽⵔ ⴰⵏⴳⵎⴰⵎ ⵍⵍⵉ ⵔⴰⴷ ⵉⵙⵡⵓⴷⴷⵓ ⵜⵉⵡⵓⵔⵉⵡⵉⵏ ⵏⵏⵙ.