ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵎⴰⴽⵕⴰⴹ ⵙⵉⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵓⵙⵏⴰⵍ ⴰⵏⴰⵎⵓⵏ ⵓⵙⵔⵉⴷ ⴷ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵏⴰⵍ ⴰⵏⴰⵎⵓⵏ

ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 27 ⵏⵓⵡⴰⵏⴱⵉⵔ 2023, ⵙ ⵓⵎⴰⴽⵕⴰⴹ ⵙⵉⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵓⵙⵏⴰⵍ ⴰⵏⴰⵎⵓⵏ ⵓⵙⵔⵉⴷ ⴷ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵏⴰⵍ ⴰⵏⴰⵎⵓⵏ ⴳ ⵜⵖⵉⵎⵉⵜ ⵜⴰⵣⵣⵔⴰⴼⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵚⵟⴰⴼⴰ ⴱⴰⵢⵜⴰⵙ ⴰⵎⴰⵡⵙⴰⵙ ⴰⵎⴰⵔⵉ ⵖⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵣⴷⴰⵢⵉⵏ ⴰⴽⴷ ⵓⴱⵕⵍⴰⵎⴰⵏ, ⴰⵎⵙⵙⵉⵡⵍ ⴰⵎⴰⴷⴷⵓⴷ ⵙ ⵢⵉⵙⵎ ⵏ ⵜⵏⴱⴰⴹⵜ.

ⵉⵍⵍⴰ ⵓⵙⵏⴼⴰⵔ ⵏ ⵓⵙⵍⴳⵏ 58.23 ⵉⵥⵍⵉⵏ ⵙ ⵓⵏⴳⵔⴰⵡ ⵏ ⵓⵙⵏⴰⵍ ⴰⵏⴰⵎⵓⵏ ⵓⵙⵔⵉⴷ ⴳ ⵓⵙⴰⵜⵉ ⵏ ⵜⵣⵣⵉⴳⵣⵜ ⵉⵙⵓⵍⵏ ⵏ ⵜⴳⵍⴷⵉⵜ ⵙ ⵉⵙⵏⴼⴰⵔⵏ ⴷ ⵉⵎⵓⴽⵏⵏ ⵉⵅⴰⵜⴰⵔⵏ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ. ⵉⴳ ⵓⴹⵕⵉⵚ ⴰⴷ ⵜⴰⵎⵍⴷⴰ ⵏ ⵓⵙⵎⴰⵢⵏⵓ ⵏ ⵜⵙⵔⵜⵉⵜ ⵏ ⵓⵡⴰⵏⴽ ⴳ ⵢⵉⴳⵔ ⴰⵏⴰⵎⵓⵏ ⴷ ⵓⵙⵏⵎⴰⵍⴰ ⵏ ⵜⵎⵣⵡⵓⵔⴰ ⵃⵎⴰ ⴰⴷ ⵉⵎⵎⴰⵜⵜⵉ ⵏ ⵓⵡⴰⵏⴽ ⵙⴳ ⵓⵙⵏⴰⵍ ⵏ ⵓⵙⵎⵏⵉⴷ ⴰⵔ ⴰⵙⵏⴰⵍ ⵏ ⵜⵓⵜⵔⴰ ⵙ ⵓⵙⵎⵏⵉⴷ ⵏ ⵓⵙⵏⴰⵍ ⴰⵥⵕⴼⴰⵏ ⵓⵙⵔⵉⴷ ⵉ ⵜⴰⵡⵊⵉⵡⵉⵏ.

ⵢⵉⵡⵉ ⴷ ⵓⵙⵏⴼⴰⵔ ⴰⴷ ⵙⵉⵏ ⵡⴰⵏⴰⵡⵏ ⵏ ⵜⵡⵉⵙⵉ, ⴰⵎⵣⵡⴰⵔⵓ ⵜⵉⵡⵉⵙⵉ ⵏ ⵓⴼⵔⴰⴳ ⵙⴳ ⵉⵎⵉⵣⵉⵜⵏ ⵣⴷⵉⵏⵉⵏ ⴷ ⵜⵎⵥⵉ, ⵉⵚⴰⵃⴰ ⵉ ⵜⴰⵡⵊⵉⵡⵉⵏ ⵟⵟⴰⴼⵏⵉⵏ ⵜⴰⵣⵣⴰⵏⵉⵏ ⵓⵔⵜⴰ ⵍⴽⵎⵏⵉⵏ ⴰⵡⵜⴰⵢ ⵡⵉⵙ ⴰⴳⵏⴰⵔ ⴷ ⵢⴰⵏ, ⴳⵉⵙ ⵢⴰⵜ ⵜⵉⴽⴽⵉ ⵜⴰⵢⵢⵓⵔⴰⵏⵜ ⴷ ⵓⵙⵏⴰⵍ ⵉⵙⵎⴷⵏ ⴷ ⵜⵉⴽⴽⵉ ⵏ ⵜⵍⴰⵍⵉⵜ, ⴷ ⵢⴰⵜ ⵜⵡⵉⵙⵉ ⵉ ⵚⴰⵃⴰ ⵏ ⵜⴰⵡⵊⵉⵡⵉⵏ ⵓⵔ ⵟⵟⴰⴼⵏⵉⵏ ⵜⴰⵣⵣⴰⵏⵉⵏ ⵏⵖ ⵜⴰⴷ ⵉⵟⵟⴰⴼⵏ ⵜⴰⵣⵣⴰⵏⵉⵏ ⵣⵔⵉⵏⵉⵏ 21 ⵏ ⵓⵙⴳⴳⵯⴰⵙ, ⵙⵍⴰⵡⴰⵏ ⴰⴽⴽⵯ ⵜⵉⴷⴰ ⵍⵍⴰⵏⵉⵏ ⴳ ⵓⵙⵓⵔⵙ ⵏ ⵓⵥⵍⴰⴹ ⵏⵖ ⵡⵉⵏ ⵜⵓⵙⵙⵔⴰ.

ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ 59.23 ⵉⵥⵍⵉⵏ ⵙ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵏⴰⵍ ⴰⵏⴰⵎⵓⵏ ⴰⵙⴽⵔ ⵏ ⵢⴰⵜ ⵜⵎⵔⵙⵍⵜ ⵜⴰⴳⵓⴷⴰⴷⵏⵜ ⵉⵟⵟⴰⴼⵏ ⴰⵡⵔⵉⴽ ⵏⵏⵙ ⴷ ⵜⵙⵉⵎⴰⵏⵜ ⵏⵏⵙ ⵜⴰⵥⵕⴼⴰⵏⵜ, ⵉⵙⵎ ⵏⵏⵙ: ⵜⴰⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵉ ⵓⵙⵏⴰⵍ ⴰⵏⴰⵎⵓⵏ, ⵔⴰⴷ ⵜⵙⵡⵓⴷⴷⵓ ⴰⵏⴳⵔⴰⵡ ⵏ ⵓⵙⵏⴰⵍ ⴰⵏⴰⵎⵓⵏ ⵓⵙⵔⵉⴷ ⴷ ⵓⴹⴼⵕ ⴷ ⵓⵣⵣⵔⴰⵢ  ⵏⵏⵙ ⵉ ⵓⵙⵎⵖⵔ ⵏ ⵜⵉⵕⵡⵉ ⵏⵏⵙ, ⵙ ⵓⵣⵣⴳⵉⵔ ⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⵉⵎⴰⵜⵜⵓⵢⵏ ⵍⵍⵉⵖ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵓⵛⵛⵉⵍ ⵏ ⵓⵙⵔⵓⵙ ⵏ ⵜⵏⵏⵓⴱⴹⴰ ⵉⵥⵉⵍⵏ ⵏ ⵓⵖⴰⵡⴰⵙ ⵏ ⵓⵙⵏⴰⵍ ⴰⵏⴰⵎⵓⵏ ⵓⵙⵔⵉⴷ ⴷ ⵓⵙⵔⵙ ⵏ ⵉⵎⵉⵙⵙ ⵉⵥⵍⵉⵏ ⵉ ⵓⴹⴼⵕ ⴷ ⵓⵙⵓⵜⵓⴳ ⵍⵍⵉ ⵔⴰⴷ ⵉⴹⵎⵏ ⵜⵉⵎⵏⵜⵍⵉⵏ ⵏ ⵏ ⵜⵣⵣⵉⴳⵣⵜ ⴷ ⵓⵙⵜⴰⵍ ⵉⵙⵓⵍⵏ.

ⵙ ⵓⵙⵏⴼⴰⵔ ⴰⴷ, ⵜⵜⵓⵙⵔⴰⵙⵏⵜ ⵜⵙⵎⵉⴳⴰⵍ ⴷ ⵜⵎⵥⵍⴰⵢ ⴷ ⵜⵎⴰⵎⴽⵉⵏ ⵏ ⵓⵙⵡⵓⴷⴷⵓ, ⴷ ⵓⵚⴽⵓⵏ ⵏ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⴷ ⵜⵎⵥⵍⴰⵢⵉⵏ ⵏ ⵓⵏⵎⵀⴰⵍ ⴰⵎⴰⵜⴰⵢ, ⵖⵎⴽ ⴰⵏⵏ ⴷ ⵓⵙⵏⴰⵎⴰⵍ ⴰⵎⵙⵙⵓⴳⵓⵔ ⴷ ⵓⵥⵕⴼⴰⵏ ⵏ ⵜⵙⵏⵓⵔⴰⵢⵜ ⵙ ⵉⵙⵓⴳⴰⵎ ⴷ ⵜⵎⴽⵕⴰⴷ ⵏⵏⵙ ⴷ ⵜⵎⴰⵎⴽⵜ ⵙ ⵔⴰⴷ ⵜⴻⵜⵜⵓⵙⴽⵉⵔ ⵜⵉⴹⴰⴼ ⵜⴰⵥⵕⴼⴰⵏⵜ ⵏ ⵓⵡⴰⵏⴽ ⴼⵍⵍⴰⵙ.