ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⵉⵡⵉⵏ ⴷ ⵜⵥⴹⴰⵕⵜ ⴷ ⵉⵣⵓⵖⴰⵣ ⴷ ⵡⴰⵡⵏⴰⴹ, ⴷ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⵎⴰⵖⴰⵔⵉⴱⵉⵜ ⴳ ⵓⴱⵕⵍⴰⵎⴰⵏ ⵏ ⴰⵍⵎⴰⵏⵢⴰ
ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⵥⴹⴰⵕⵜ ⴷ ⵉⵣⵓⵖⴰⵣ ⴷ ⵡⴰⵡⵏⴰⴹ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵎⵓⵃⴰⵎⵎⴰⴷ ⵎⴰⵍⴰⵍ, ⴰⵙⵉⵏⴰⵙ 21 ⵏⵓⵡⴰⵏⴱⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⵎⴰⵖⴰⵔⵉⴱⵉⵜ ⴳ ⵓⴱⵕⵍⴰⵎⴰⵏ ⵏ ⴰⵍⵎⴰⵏⵢⴰ ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ ⵙ ⵜⴰⵎⵓⵏⵜ ⴰⴽⴷ ⴽⵔⴰ ⵏ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ.
ⴳ ⵜⵣⵡⵉⵔⵉ, ⵉⵙⴰⵡⵍ ⵎⴰⵙⵙ ⵎⵓⵃⴰⵎⵎⴰⴷ ⵎⴰⵍⴰⵍ ⴼ ⵜⵣⵣⵉⴳⵣⵜ ⵏ ⵜⴳⵍⴷⵉⵜ ⴳ ⵢⵉⴳⵔ ⵏ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ, ⵉⵙⴷⴷⵉⴷ ⴼ ⵓⵙⵜⴰⵢ ⴰⵎⵖⵔⵉⴱⵉ ⵉ ⵓⵙⵎⵖⵔ ⵏ ⵓⵙⵙⴰⵔⵓ ⴳ ⵓⵎⵏⵉⴷ ⴰⴷ ⴷ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵜⵎⴷⵔⴰⵡⵜ ⴳ ⵓⵙⵡⵉⵔ ⵏ ⵓⵕⵓⴱⴱⴰ ⴷ ⵉⴼⵔⵉⵇⵢⴰ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.
ⵉⵙⵡⴰⵍ ⵎⴰⵙⵙ ⵎⵓⵃⴰⵎⵎⴰⴷ ⵎⴰⵍⴰ ⴼ ⵉⵙⵍⴳⵏⵏ ⵍⵍⵉ ⵜⵙⴽⵔ ⵜⴳⵍⴷⵉⵜ ⴳ ⵓⵎⵏⵉⴷ ⵏ ⵜⵥⴹⴰⵕⵜ ⵣⵓⵏ ⵜⴰⴳⵔⴰⵡⵜ ⵜⴰⵏⴰⵎⵓⵔⵜ ⵏ ⵓⵙⵏⴳⵉⴷⴷⵉ ⵏ ⵜⵉⴼⴰⵡⵜ, ⵢⵉⵏⵉ ⵎⴰⵙ ⵉⴳⴰ ⵓⵎⵇⵇⵏ ⵏ ⵓⵙⵙⴰⵔⵓ ⵜⴰⵙⵉⵍⴰ ⵉⵥⵉⵍⵏ ⵉ ⵓⵙⴽⵔ ⵏ ⵜⵎⴷⵔⴰⵡⵉⵏ ⴳ ⵢⵉⴳⵔ ⵏ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵀⵉⴹⵕⵓⵊⵉⵏ ⴰⵣⴳⵣⴰⵡ ⴷ ⵓⵙⵎⵖⵔ ⵏ ⵜⵎⴷⵔⴰⵡⵜ ⵊⴰⵔ ⵉⴳⵔ ⴰⵎⴰⵜⴰⵢ ⴷ ⵓⵙⵍⵉⴳ ⴰⵢⵍⵍⵉ ⵢⵉⵡⵙⵏ ⴼ ⵓⵙⵎⵖⵔ ⵏ ⵓⵣⴷⴰⵢ ⵏ ⵜⵉⴼⴰⵡⵜ ⵊⴰⵔ ⵉⴼⵔⵉⵇⵢⴰ ⴷ ⵓⵕⵓⴱⴱⴰ.
ⵉⵙⴰⵡⵍ ⵎⴰⵙⵙ ⵎⵓⵃⴰⵎⵎⴰⴷ ⵎⴰⵍⴰⵍ ⵓⵍⴰ ⴼ ⵓⵙⵎⴽⵍ ⵏ ⵡⴰⵎⴰⵏ ⵍⵍⵉ ⵉⵡⴰⵜⵜⵙⵏ ⴰⴷ ⵉⵍⵉⵏ ⵡⴰⵎⴰⵏ ⵖⵓⵙⵏⵉⵏ ⵉ ⵜⵉⵙⵙⵉ ⴷ ⵜⴼⵍⵍⴰⵃⵜ ⴷ ⵜⵎⴳⵓⵔⵉ ⵙⵍⴰⵡⴰⵏ ⴰⴽⴽⵯ ⴳ ⵓⵙⴰⵜⵉ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵖⴰⵔⵜ ⴷ ⵜⵉⵔⵖⵉ, ⵢⵉⵏⵉ ⵎⴰⵙ ⵉⵙⴽⵔ ⵍⵎⵖⵔⵉⴱ ⵜⵉⵙⵔⵜⴰⵢ ⴳⴰⵏⵉⵏ ⵜⵉⵎⴷⴷⵓⴽⴽⵯⴰⵍ ⵏ ⵡⴰⵡⵏⴰⴹ ⴳ ⵢⵉⴳⵔ ⵏ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵙⵏⴰⵍ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵎⴰⵢⵏⵓ.
ⴳ ⵓⵎⵏⵉⴷ ⵏⵏⵙ, ⵉⵏⵏⴰ ⵎⴰⵙⵙ Carl Julius Cronenberg ⵎⴰⵙ ⴷ ⴰⵏⵎⵓⵇⵇⴰⵔ ⴰⴷ ⵔⴰⴷ ⵉⵙⵎⵖⵔ ⴰⵎⵢⴰⵡⴰⵙ ⴰⵙⵉⵏⵔⴰⵏ ⵊⴰⵔ ⴰⵍⵎⴰⵏⵢⴰ ⴷ ⵍⵎⵖⵔⵉⴱ, ⵙⵍⴰⵡⴰⵏ ⴰⴽⴽⵯ ⵎⴰⵙ ⵜⵔⴰ ⴰⵍⵎⴰⵏⵢⴰ ⴰⵙⵎⵖⵔ ⵏ ⵜⵎⴷⵔⴰⵡⵜ ⴳ ⵢⵉⴳⵔ ⵏ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵀⵉⴹⵕⵓⵊⵉⵏ ⴰⵣⴳⵣⴰⵡ, ⵉⵙⵎⴰⵢⵏⵓ ⴰⴱⴷⴷⴰⴷ ⵏ ⵜⵎⴰⵣⵉⵔⵜ ⵏⵏⵙ ⵉⴷⵓⵙⵏ ⴰⴽⴷ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⴷⴼⴼⵉⵔ ⵏ ⵓⵎⴷⵓⴷⵉ ⵏ 8 ⵛⵓⵜⵏⴱⵉⵔ.
ⵢⵓⵎⴰ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵏ ⴰⵍⵎⴰⵏⵢⴰ, ⵎⴰⵙⵙ ⴰⴳⵎⴰⵎ ⵏ ⵓⴽⴰⴱⴰⵕ ⴰⵍⵉⴱⵉⵕⴰⵍⵉ ⴰⴷⵉⵎⵓⵇⵔⴰⵟⵉ ⴷ ⵎⴰⵙⵙ ⴰⴳⵎⴰⵎ ⵏ ⵓⴽⴰⴱⴰⵕ ⵏ ⵓⵙⵏⴼⵍ ⵉ ⴰⵍⵎⴰⵏⵢⴰ ⴷ ⵎⴰⵙⵙⴰ ⵜⴰⴳⵎⴰⵎⵜ ⵏ ⵓⴽⴰⴱⴰⵕ ⵏ ⵜⴰⵎⵓⵏⵜ ⵜⴰⴷⵉⵎⵓⵇⵔⴰⵟⵉⵜ ⵜⴰⵎⴰⵙⵉⵃⵉⵜ / ⵜⴰⵎⵓⵏⵜ ⵜⴰⵏⴰⵎⵓⵏⵜ ⵜⴰⵎⴰⵙⵉⵃⵉⵜ.